KAPITULU 25
“¡Ji uékasïnga eskarini Roma anapu juramuti jusgariuaka!”
Pablu kánikua sési kuájpisïndi ambakiti aianhperakuani
Pʼitakata jarhasti Úkuecha 25:1–26:32
1, 2. a) ¿Ambe nitamakuarhixapi Pablu? b) ¿Ambechi úpirini kurhamarhikuarhini enga apostoli Pablu ísï uandapka eska Roma anapu juramuti jusgaripiringa?
PABLU, Sesarea jarhasti jupikakata ka sondaduechaksï kuidarixati. Tsimani uéxurhiniistia enga kʼuanhatsentapka Judea ka judiuechaksï tanimu xanhari jánguarhintasptia paraksï uándikuni (Úku. 21:27-36; 23:10, 12-15, 27). Ka nájkirukaksï no úpka uándikuni jiáni, útasïksï jánguarhintaxati ísï úni. Ísï jimbo, enga Pablu mítepka eska juramuti Festu uékasïnga axani judiuechani jingoni, arhispti Festuni: “¡Ji uékasïnga eskarini Roma anapu juramuti jusgariuaka!” (Úku. 25:11).
2 ¿Sési exespi Tata Diosï Jeoba ambe enga Pablu uandapka? ¿Sési jarhaspi eska Roma anapu juramuti jingoni nipiringa? Kánikua jukaparhakuesti míteni ini ambe jimbokachi aianhpisïnga Tata Diosïiri Reinueri ambe ini jurhiatikuechani jimbo. Jatsiskachi para míteni sinchi uaa májkueni úni eska Pablu para ʻjuramutiichani japarini kuájpini ambakiti aianhperakuaniʼ (Filip. 1:7).
“Ji imani kʼuiripuni japarini jarhaskia enga Roma anapu juramuti axaka” (Úkuecha 25:1-12)
3, 4. a) ¿Andiksïsï uékeeni judiuecha Jerusaléni móskuni Pabluni ka néna no niáraspi ísï úkuarhini? b) ¿Nénajtsïni jarhuatasïni iásï Tata Diosï ísï eska na úpka apostoli Pablu jingoni?
3 Enga Festu na tanimu jurhiatikua páni japkia komueska Judea anapu juramuti, Jerusaléni niraspti a ka jima kurhaaspti na engaksï kʼérati saserdotiicha ka judiuecheeri orhejtsïkutiicha xáni no sési ambe uandani japka apostoli Pablueri ambe. Iichaksï mítespti eska Festu no jatsispka para arhirperani jarhani iichani jingoni ka nijtu iámindu judiuecha jingoni, jimboksïsï tekaapti arhini eska Sesarea uératini móskupiringa Pabluni Jerusaléni paraksï jima jusgariini, jimbokaksï uékasïreenga xanharu jimbo uándikuni. Joperu juramuti no uékaspti ka arhiaspti: “Imeecha engaksï juramukua jatsika ixú, juueksï jíndeni jingoni [Sesarea] kétsemani ka enga inde achamasï meru no sési ambe úka, uaakajtsï uandani ambe no sési úski” (Úku. 25:5). Ka ménderuksï no úsïndia uándikuni Pabluni.
4 Pablu úspti tekaantani jimboka Tata Diosï Jeoba úraspka tata Jesukristuni para uinhaperantani jiáni enga no sési nitamakuarhini japka. Pori ejemplu, Jesúsi arhispti Pabluni jánhaskua ma jimbo: “¡Asï ché!” (Úku. 23:11). Iásï, ístuchi Tata Diosïiri marhuariicha mámaru ambe no sési nitamakuarhisïnga ka ístujtsïni kʼuiripuecha niárasïndi no sési kámani. Ka nájkirukajtsïni Tata Diosï Jeoba no pʼímutantaaka iámindu indeni ambe jimbo, íntskusïndijtsïni jánhaskakua ka uinhapikua parachi úni tekaantani. Uaakachi seguru jarhani eskajtsïni juchaari Taati íntskuaka “indeni uinhapikua enga no ma kʼuiripu újka jatsini” (2 Kor. 4:7).
5. ¿Ambe úspi Festu jiáni enga jusgariini japka Pabluni?
5 Ísï tátsekua Festu “jusgadurhu uaxakaspti” jima enga Sesarea japka. b Jima jarhasptia apostoli Pablu ka judiuecha engaksï kʼamanharhitantani japka. Indeni chkuanderakua jimbo engaksï máteruecha kʼamanharhitantani japka, Pablu uandaspti: “Ji méntkuni no ma ambe no sési úska, ji janhanharhisïnga judiuecheeri Leini, templuni ka ístu Roma anapu juramutini”. Jo, apostoli Pablu no ma ambe no sési úspti ka jatsispti para jurajkunhani, ¿joperu ambe uandaspi juramuti? Jimboka uékasïreenga sési pakarani judiuechani jingoni, kurhamarhispti Pabluni: “¿Uékasïndi Jerusaléni karhamani parakeni ji jini jusgarini ini ambe jimbo?” (Úku. 25:6-9). Ísku ambe masï uandani japtia juramuti, enga kʼuanhaskuntapiringa Pabluni Jerusaléni, judiuecha engaksï kʼamanharhitantani japka niárapirindiksï jusgariini ka uándikuni. Ambe enga úni japka Festu, jindeespti kʼuiripuechani jingoni sési pakarani komu juramuti ka eska sési ambe úni. Sáno májkueni úkuarhispti jiáni enga Ponsiu Pilatu jusgaripka Jesúsini (Juanu 19:12-16). Ka ini jurhiatikuechani jimbo májkueni úkuarhisïndi, jarhastiksï juramutiicha engaksï újka ambe engaksï kʼuiripuecha arhiajka. Ísï jimbo, nóchi jatsiska para ísku pakarani enga juesi ma no kuájpiaka Tata Diosïiri iretani asipueriksï jarhani pruebeecha eskachi no ma ambe no sési úska.
6, 7. ¿Andisï Pablu uandapi eska Roma anapu juramuti jusgaripiringa ka nénachi uaa májkueni úni Jeobaeri testiguecha?
6 Pablu exespti eska no sési ambe úkuarhinchapiringa jimboka Festu uékasïreenga sési pakarani judiuecha jingoni, jimbosï Pablu uékapti kuájpikuarhini jimboka Roma anapuespka ka arhispti Festuni: “Ji imani kʼuiripuni japarini jarhaskia enga Roma anapu juramuti axaka ka ixúsïni jusgarinhaaka. Ka tʼuri exexakaia eskani no ma ambe no sési úkuaska judiuechani. [...] ¡Ji uékasïnga eskarini Roma anapu juramuti jusgariuaka!”. Sáno méntkisï, enga nema ísï uandeenga nóteru ambe ma úsïreendi únia jimbosï Festu uandapti: “Engari uéjka eskakeni Roma anapu juramuti jusgariuaka, jiájkani Roma anapu juramutikeni jusgariuati” (Úku. 25:10-12). Enga apostoli Pablu ísï uandapka eska uékasïreenga sánderu kʼéri juramuti ma jingoni nirani, xarhatachesïndijtsïni eskachi juchajtu uaaka májkueni úni engachi ísï nitamakuarhini jauaka. Engajtsïni juramuti ma nóteru jurajkuni jarhajkia parachi úni juchaari ánchikuarhitani solu jimboka juramukua jatsiska, Jeobaeri testiguechachi jánguarhintasïnga na engachi xáni uaaka parachi úraani leichani engajtsïni kuájpijka ka ísïchi seguiriini jarhani aianhpini ambakiti aianhperakuani (Sal. 94:20). c
7 Tsimani uéxurhiniisptia enga Pablu ísku jatini ónhakata japka, joperu sésikua intsïnhasptia para Roma anapu juramuti jingoni nirani. Joperu ante deksï jini páni, máteru juramuti uékasïndi exeni.
Kristianuechachi jánguarhintasïnga kuájpikuarhini jiáni engajtsïni juesiicha no sési jusgarijka.
“Ji ísï úxaka eskajtsïni na exeraka” (Úkuecha 25:13–26:23)
8, 9. ¿Andisï rei Agripa nípi Sesarea?
8 Ísï máru jurhiatikua tátsekua enga apostoli Pablu na uandapkia eska uékasïreenga eska Roma anapu juramuti jusgaripiringa, juramuti Agripa ka imeeri piremba Berenise nirasptiksï sáni pʼorhembini juramuti Festuni. d Ióntki, Roma anapu juramutiichaksï pʼindespti nirani pʼorhembiani imeechani engaksï apenasi juramuti únheenga. Enga Agripa ísï sési ambe arhipka Festuni, uékasïreendi sési pájperani imani jingoni jimboka inde ambe marhuakupiringa sánderu orhepani (Úku. 25:13).
9 Enga Festu aiangupka Agripani Pablueri ambe, i uékasïreendia sánderu sési míteni. Ísï pauandikua, inde tsimani juramutiichaksï niraspti jusgadurhu ka méntkuksï xáni sési jásï niáraspti ka kʼéramakuarhiparini paraksï míteni ambesï úkuarhini japi Pablu jingoni. Joperu ambe enga sánderu ísku pakataapka kʼuiripuechani, no jindeespti na engaksï indeecha niárapka, sino ambe enga Pablu uandapka (Úku. 25:22-27).
10, 11. ¿Néna xarhataspi Pablu eska janhanharhisïreenga Agripani, ka ambe aianguspi imeeri ambe?
10 Apostoli Pablu janhanharhikua jingoni agradeserikuspti rei Agripani jimboka íntskuspka sésikua para ima jusgariini ka ístu jimboka rei Agripa sési mítespka ambe engaksï pʼindepka úni judiuecha ka ístu jimboka jarhuataasïreenga judiuecheeri problemeechani jingoni. Tátsekua, Pablu ueenasïndi aianguni na enga irekapka antesi: “Ji fariseuespka, ka fariseuechaksï sánderumindu ísï úsïndi eska Lei na uandajka ka eska máteru judiuecha” (Úku. 26:5). Jimboka antesi Pablu fariseuespka, erokuarhixapti eska Mesíasi jupiringa. Ka iásï enga kristianuepkia, méntku no sáni chésïreendi uandani eska tata Jesukristu jindeespka Mesíasi enga Tata Diosï aiakuapka Pablueri ióntki anapu parientiichani. Pablu uandaspti eskaksï jusgariixapka jimboka uandantasïreenga eska úkuarhispkia ambe enga Tata Diosï aiatspipka, ísï eskaksï na jakajkuenga imeecha engaksï kʼamanharhitantani japka. Ambe enga uandapka Pablu, úspti eska Agripa sánderu ambe uékapiringa míteni. e
11 Pablu miántaxapti na enga xáni no sési kaapka kristianuechani jimbosï uandapti: “Jíjtuni eratsesïreenga eskani jatsispka para mámaru ambe úni ka uarhipeni Jesúsi jingoni enga Nasareti anapueka. [...] Ka iauanisï jamberi niraska jirinhaantani parani no sési kaani [imeeri chúxapatiichani] jimbokani kánikua ikiakuasïreenga” (Úku. 26:9-11). Ka uánikua kʼuiripuechaksï jarhaspti engaksï mítepka eska apostoli Pablu no chkuanderaxapka (Gal. 1:13, 23). Jamberi juramuti Agripa kurhamarhikuarhipti: “¿Andisï iásï xáni mójtakurhia?”.
12, 13. a) ¿Néna niáraspi Pablu mójtakurhini? b) ¿Néna jimbo Pablu tʼauarhexapi chʼurhuretarakuani?
12 Pablu mismu aianguspti andisï xáni mójtakurhipi jimboka uandantaspka: “Ísï jimbosïni nirani japka Damasku, jimbokajtsïni kʼérati saserdotiicha sésikua íntskuspka ka imajtsïni axaspti, ka teruxutinisï, engachi xanharu jimbo nirani japkia, oh juramuti, tʼíntskuajtsïni ma tsónhastaspti jíndeni ka ístu imeechani engaksï jíndeni jingoni nirani japka. Inde tʼíntskua sánderu tʼíntskasïreendi eska jurhiata. Engachi iáminduecha kuarhatsepka, kurhaaspka eskarini nema arhixapka ebreu jimbo: ‘Saulu, Saulu, ¿andirenisï xáni no sési kámani jaki? Jandiajkuri atakuarhixaka engari ísï tʼauarheni jaka chʼurhuretarakuani’. Joperu ji arhispka: ‘Tata, ¿neeskiri?’. Ka Tatarini arhispti: ‘Jesúsiiska, ima engari tʼu xáni no sési kámani jaka’” (Úku. 26:12-15). f
13 Ante de Pablu ini ambe nitamakuarhini, ima ísï jámasïreendi eska animali ma enga tʼauarhejka chʼurhuretarakuani. ¿Andi? Jimbokaksï máru animaliicha no jurajkusïndi eskaksï arhijchukunhaaka imani pirimu o chkari jingoni enga tsurhutsurhumujka ka jámasïndiksï tʼauarheni chʼurhuretarakuani ka jandiajkuksï atakuarhisïndi. Pablu májkueni úxapti jimboka no jurajkuxapka eska Tata Diosï arhipiringa ambe úni ka inde ambe no jarhuatasïreendi para ima sési pájperani Tata Diosï jingoni. Joperu jiáni enga Damasku nirani japka Jesúsi xarhakuspti ka jarhuataspti mójtakuni na enga eratseenga antesi (Juanu 16:1, 2).
14, 15. ¿Ambe uandaspi Pablu na enga niárapka mójtakurhini?
14 Pablu niáraspti kánikua mójtakurhini, jimboka arhispka Agripani: “Ji ísï úxaka eskajtsïni na exeraka auandarhu uératini, jimbokani orheta niraska aianguani Damasku anapuechani, tátsekua Jerusaléni anapuechani ka ístu iámu Judeaisï jámaska ka jimeesïsï engaksï no judiuecha irekaka, ka aianguaska eskaksï jatsiska para móantani ka andarhientani Tata Diosïni xarhataparini eskaksï móantaskia imani ambe jimbo engaksï újka” (Úku. 26:19, 20). Ka iásï apostoli Pablu ióni páxaptia úni imani ánchikuarhitani enga tata Jesukristu arhipka eska úpiringa jiáni enga xarhakupka teruxutinisï. ¿Ambe xáni niáraspi úkuarhini enga Pablu ísï jámapka aianhpini? Imeecha engaksï niárapka míteni jurhimbikuani, móantasptiksï ka nóteruksï no sési ambe niátasïreendia ka ístuksï ueenaspti úni ambe enga Tata Diosï uéjka, ka ini ambe úparini, niárasptiksï ambakiti kʼuiripueni ka imeecheeri ambakiti úkuechani jimbo jarhuataasïreendiksï máteruechani májkueni úni ka janhanharhiani leiichani.
15 Joperu ima kʼuiripuecha engaksï ikiakuenga Pabluni nóksï sáni jukaparharasïreendi indeni ambe, jimbosï Pablu uandapti: “Jimbojtsïnisï judiuecha jupikapti templurhu ka uándikuxamendijtsïnia. Joperu Tata Diosïiri jarhuajperata jimbo, iásï jamberini aianguaxaka kʼératiichani ka ístu sapirhatiichani” (Úku. 26:21, 22).
16. ¿Nénachi uaa májkueni úni eska apostoli Pablu jiáni engachi jatsiaka para juesiichani ka politikuechani aianguani ambe engachi jakajkujka?
16 Jucha kristianuecha, jatsiskachi para méntkisï jingontku jarhani parachi úni mókukuantani imeechani engajtsïni kurhamarhiaka indeeri ambe engachi mintsikajka (1 Ped. 3:15). Jiáni engachi jatsiaka para aianguani juesiichani o politikuechani ambe engachi jakajkujka, jatsiskachi para ísï arhiani eska apostoli Pablu na arhipka Agripani ka Festuni. Jamberichi mintsitarhu niárakuauaka engachi aianguaska na engajtsïni Biblieri karakata enga jurhimbikua ambeeka, jarhuatajka sánderu sési irekani juchantsïni ka ístu imeechani engachi jucha aianguajka.
“Tʼureni sóntku jakajkutarapiringa parani jíjtuni kristianu úkuarhini” (Úkuecha 26:24-32)
17. Enga Pablu na kuájpikuarhipkia, ¿ambe arhispi Festu, ka ístuksï ambe eratsesïni iásï uánikua kʼuiripuecha?
17 Engaksï Festu ka Agripa kurhaapka ambe enga Pablu aianguapka, nóksï úspti ísku kurhajchani. Ju je exeni ambe enga úkuarhipka: “Enga Pablu ini ambe uandani japka para kuájpikuarhini, Festu uinhachakuspti: ‘¡Pablu, tʼuri loku jarhaskia! ¡Iámuri xerejtsïskia xáni uánikua ambe jorhenguarhini!’” (Úku. 26:24). Iásïjtuksï uánikua kʼuiripuecha májkueni eratsesïndi eska Festu. Uandasïndiksï eskachi jucha puru Biblieri ambejkusï uéjka uandani. Ka imeecha engaksï uánikua ambe jorhenaka méntkuksï no úsïndi jakajkuni tsíntskueri ambe.
18. ¿Ambe arhispi Pablu Festuni ka ambe arhispi tátsekua Agripa?
18 ¿Ambe mókukuspi Pablu juramutini? Arhispti: “Ji no loku jarhaska tata Festu. Jurhimbikua ambe uandaxaka ka míteska ambe engani uandani jaka. Ji mítetixaka eska juramuti iámu ambe sési míteska, jimbosïni no sáni chéparini uandani jaka. Ka juramuti sési mítesti iámindu ambe, jimboka i ambe no sïpatikuarku úkuarhiska. [...] ¿Tʼuri jakajkusïni ambe engaksï Tata Diosïiri Uandakua Páriicha uandajka? Ji míteska eskari tʼu jakajkusïnga indeni ambe”. Ka juramuti arhispti: “Tʼureni sóntku jakajkutarapiringa parani jíjtuni kristianu úkuarhini” (Úku. 26:25-28). Nóchi míteska sini juramuti Agripa sési jimbo ísï úpirini eska na uandapka, joperu ambe enga Pablu aiangupka mintsitarhu niárakuspti.
19. ¿Ambeksï uandaspi últimu Festu ka Agripa Pablueri ambe?
19 Tátsekua, íksï tsimani juramutiicha jauaraspti ka uandasptiksï eska kʼamakurhispkia tánguarhikua. “Engaksï uéntani japkia, ísïksï arhijperapaxapti: ‘I achamasï no ma ambe no sési ústi paraksï uándikuni o paraksï ónhani’. Ka Agripa arhispti Festuni: ‘I achamasï úpirindi jurajkunhani enga no kurhajkuarhipiringa eska Roma anapu juramuti jusgaripiringa’” (Úku. 26:31, 32). Tsimarhanksï sési mítetixapti eska Pablu no ma ambe no sési úspka. Ísï jimbo, jamberiksï tátsekua sánderu sáni sési kaapirindia kristianuechani.
20. ¿Andisï sési japi enga Pablu ísï kuájpikuarhipka juramutiichani japarini?
20 Peekaksï i tsimani juramutiicha no jiókuarhipka ambakiti aianhperakuani Tata Diosïiri Reinueri ambe, ¿jimajkani sési jarhaspi enga apostoli Pablu ísï kuájpikuarhipka indeechani japarini? Enga i kristianu ísï pánhapka Judea anapu reiicha ka juramutiichani jingoni, úspti eska ambakiti aianhperakua asta Roma anapu juramutiichani jamberi niárakuapiringa (Luk. 21:12, 13). Ístu, ambe enga nitamakuarhipka Pablu ka enga no jurajkupka Tata Diosïni nájkiruka tsʼéjkukuechani jatsiapka, inde ambe kánikua uinhaperaantaspti imeeri erachiichani (Filip. 1:12-14).
21. ¿Ambe uaa úkuarhini engachi seguiriiska aianhpini nájkirukachi no sési kánhaaka?
21 Iásïjtu májkueni úkuarhisïndi. Engachi seguiriiska úni juchaari ánchikuarhitani nájkirukachi tsʼéjkukuechani jatsiauaka ochi no sési kánhani, niáraakachi jatsiani uánikua kóntperateechani, jamberichi asta niáraaka aianguani Tata Diosïiri ambe imani juramutiichani enga sáni úkua jukajka exeantani kʼumanchikuecharhu. Ka engachi no méni jurajkuska Tata Diosïni ka tekaantanchi, uaakachi jarhuataani uánikua erachiichani paraksï májkueni no chéni ka seguiriini jarhani kánikua jánguarhintani úni ini ánchikuarhitani, jo, seguiriini jarhani sési aianhpini Tata Diosïiri Reinueri ambe.
a Exe je rekuadruni “ Porsiu Festu, Judea anapu juramuti”.
b Uandakua enga tradusirikuarhijka “jusgadu” imani siiani arhikuekasïndi nani enga uaxakeenga juesi ma. Ka sáni iótakuarhu jarhasïreendi paraka kʼuiripu exepiringa o kurhaani eska ambe enga juesi juramupiringa, jatsipiringa para ísï úkuarhini ka no mójtakurhini. Pilatu indeeni jásï jusgadu ma jimbo jusgariispti Jesúsini.
c Exe je rekuadruni “ Néna engachi kuájpijka iásï jurhimbiti kómarhikuani”.
d Exe je rekuadruni “ Rei Erodesi Agripa II”.
e Ísï eskaksï iámindu kristianuecha, apostoli Pablu jakajkusïreendi eska Jesúsi jindeespka Mesíasi, joperuksï judiuecha no jakajkusïreendi Jesúsini jimboksïsï uandeendi eska Pablu apostata máeska (Úku. 21:21, 27, 28).
f Kʼuiripu ma enga sési mítekuka Biblieri ambe, uandasïndi eska sáno méntkisï kʼuiripu ma mintsikuarhisïreenga teruxutinisï enga nirani jarheenga nani jimboka kánikua aparhikuarhisïreenga, joperu no ísï úsïreendi enga kókuani uékani jarheenga niárani. I ambejtsïni jarhuatasïndi exeni eska Pablu sóntku uékaxapkia niárani para úni ambe engaksï kʼérati saserdotiicha arhipka.
