1, 2. ¿Ambe ka ambe úkuarhispi engaksï Pablu ka Bernabé Listra japka?

 ¿AMBE xáni úkuarhixaki Listra? Pablu ka Bernabé ambakerantastiksï kʼuiripuni ma enga no ueenga xanharani jimboka ísï andajpenuspka, ísï jimbo tsanguaraxati xáni tsípini. Kʼuiripuechaksï xáni tsípixati engaksï uandajka eskaksï diosïiska, asta Seusiiri saserdoti jamberi nirasti koroneechani jingoni ka preparariuasti toruechani para kéjtsïtakuani. Kurhaakuarhixati na engaksï no sési mintsirani jaka toruecha ka kʼuiripujtu mámaru ambe uinhachaxati, jimboksïsï Pablu ka Bernabé uinhachaparini arhiajti eskaksï no uaaka indeni ambe. Karukusïndiksï imeecheeri xukuparhakuani ka nirasïndiksï nani engaksï kʼuiripuecha jaka ka méntkuksï úndasïndi arhiani eskaksï no kʼéri ambe arhiauaka.

² Tátsekua, máru judiuecha engaksï uékeenga pʼínguni ambakiti aianhperakuani, Ikoniu ka Antiokía de Pisidia uératinksï jurhasïndi ka chkuanderakua ambeksï uandasïndi Pablu ka Bernabéeri ambe. Listra anapuechaksï jakajkukuasïndi ka uékasïndiksï uándikuani. Iásï ima kʼuiripuecha engaksï kʼéri ambe arhini japka Pabluni uékasïndiksïa tsakapkuerani. Ísï jimbo, uirhipandasïndiksï ka ueenasïndiksï tsakapu kʼuanirani astaka jamberi miákua tsïtajka. Engaksï na ísï úpkia, antsikupasptiksï petantani iretarhu, jimbokaksï eratsesïreenga eska uarhispkia.

3. ¿Náki kurhamarhikuechanchi exeani jaua ini kapitulu jimbo?

³ ¿Andisï niárapi i ambe úkuarhini? ¿Ambechi jorhenguarhisïni ambe engaksï xáni nitamakuarhipka Pablu ka Bernabé? Ka ¿na engaksï Listra anapuecha sóntku mójtakurhipka? ¿Nénaksï uaa kúnguarhikuarhu anapu orhejtsïkutiicha májkueni tekaantskua xarhatani  eskaksï i tsimani Tata Diosïiri marhuariicha engaksï “no sáni chéparini uandontskuarheen[ga] kʼuiripuechani jingoni, jimboka Tata Diosï Jeoba juramukua íntsaaspka”? (Úku. 14:3). Ju je exeni.

4, 5. ¿Andiksïsï Pablu ka Bernabé nípi Ikoniu, ka ambe úkuarhispi jima?

⁴ Ís eskachi na exekia, imani judiuecha jimbo engaksï uékeenga pʼínguni ambakiti aianhperakuani, Pablu ka Bernabé petanhantasïndiksï Antiokía de Pisidia uératini. Joperuksï no desanimarikuarhispti, sánderu sési, uaranduntasptiksï tʼupurini, ísïksï xarhataxapti eska imeecheeri jimboepiringia, jimbokaksï no uékasïreenga míteni jurhimbikua ambe (Úku. 13:50-52; Mat. 10:14). Tátsekuaksï niraspti jima uératini ka jurajkuasptiksï paraksï ima kuenta íntskuntani Tata Diosïni (Úku. 18:5, 6; 20:26). Ka tsípikua jingoni xanharasptiksï ma 150 kilometrisï (100 miia) suresterhisï asta imani lugari jimbo engaksï ambakiti echeriicha jaka enga juáta del Tauro ka Sultániiri terujkaniikuarhisï jaka.

⁵ Pablu ka Bernabé, orhetaksï Ikoniu niáraspti, kʼéri ireta ma enga Galasia japka engaksï útasï ísï irekapka eska grieguecha. a Ini ireta jimbo, uánikua judiuechaksï irekaspti ka ístu uánikua imeecha engaksï niárapka judiu úkuarhini. Ísï eskaksï na pʼindepkia, Pablu ka Bernabé nirasptiksï aianhpini jima nani engaksï judiuecha tánguarhienga (Úku. 13:5, 14). “Ka xánksï sési uandaspti engaksï jamberi uánikua judiuecha ka grieguecha ueenapka jakajkuni” (Úku. 14:1).

6. ¿Andiksïsï xáni sési jorhentpeeni Pablu ka Bernabé, ka nénachi uaa májkueni úni eska imeecha?

⁶ ¿Andiksïsï xáni sési jorhentpeeni Pablu ka Bernabé? Pablu kánikua ambe mítespti Biblieri ambe, úsïreendi kurhangutarpini eska Jesúsi jindeespka Mesíasi enga jupiringa úrapariani ióntki anapu relatuechani, leiiri karakateechani ka profesiechani (Úku. 13:15-31; 26:22, 23). Joperu Bernabé ísï mítekateespti eska uandanhiasïreenga máteruechani jimbo (Úku. 4:36, 37; 9:27; 11:23, 24). Tsimarhanksï ísï jorhentpisïreendi eska Tata Diosï Jeoba na juramukua íntsaapka enbesi deksï ísï jorhentpini eskaksï imeecha na kurhanguenga ambe ma. ¿Nénajtsï uaa májkueni aianhpini eska imeecha? Arini ambe úparini: sési jorhenguarhi je Tata Diosïiri karakatani, sési erakua je Biblieri anapu karakateechani, jánguarhinta je exeni néna sési pʼikuastaantani imeechani engaksïni uékaaka kurhajchani ka méntkisï úra je Bibliani ka no chaari eratsekuechani.

7. a) Ambakiti aianhperakuani jimbo, ¿ambe niárasïni úkuarhini? b) Enga chaari parienti ma no uéjka eskajtsï chá kurhajchaaka Tata Diosï Jeobani, ¿ambejtsï no jatsiski para mirikurhini?

⁷ Lukasï uandantasïndi eskaksï no iámindu Ikoniu anapuecha jakajkuspka  ambakiti aianhperakuani: “Judiuecha engaksï no jakajkupka, mámaru ambeksï arhiaspti imeechani engaksï no judiuepka parakaksï no jakajkukuapiringa erachiichani”. Joperu Pablu ka Bernabé sésiksï exespti jima pakarani. “Imeechaksï ióni sáni pakaraspti jima ka nóksï sáni chéparini uandontskuarhesïreendi kʼuiripuechani jingoni”, jiájkani, ísï jimbo, “máru iretarhu anapuechaksï, judiuechani jingoni úkuarhispti ka máteruechaksï apostoliichani jingoni” (Úku. 14:2-4). Ístu, iásï májkueni ambe úkuarhisïndi ambakiti aianhperakuani jimbo, máru kʼuiripuechani márku uaantasïndi ka máteruechani arhukuasïndi (Mat. 10:34-36). ¿Jarhaskiksï máru parientiicha engaksï no uéjka eskajtsï chá kurhajchaaka Tata Diosï Jeobani? Jiájkani, asï mirikurhi je eskaksï ménisï ísï úsïnga jimbokaksï mámaru ambe kurhaasïnga juchaari ambe ka ístu chkuanderakua ambe. Joperu chaari ambakiti jángua jimbo, uaatiksï exeni eska no ísïiska eska na uandanhajka ka niáranksïa sési eratseni juchaari ambe (1 Ped. 2:12; 3:1, 2).   

8. ¿Andiksïsï Pablu ka Bernabé no pakarapi Ikoniu, ka ambejtsïni jorhendasïni ambe engaksï úpka?

⁸ Ísï tátsekua, Ikoniu anapuecha engaksï ikiakuenga Pablu ka Bernabéni, uékasïreendiksï tsakapu jimbo ataani, joperu engaksï Pablu ka Bernabé mítepka ini ambe, máteru naniisïksï niraspti aianhpini (Úku. 14:5-7). Juchajtuchi májkueni úsïnga. Engajtsïni no sési arhijka, juchachi no sáni chéparini kurhakuarhisïnga (Filip. 1:7; 1 Ped. 3:13-15). Joperu engachi exejka eska no sési ambe úkuarhiaka, kéndikukuarhisïngachi parachi no no sési ambe úkuarhinchani jucha o juchaari erachiicha (Prov. 22:3).

9, 10. ¿Nani jarhaspi ireta Listra, ka ambechi míteski jima anapu kʼuiripuecheeri?

⁹ Máteru ireta engaksï niárapka, jindeespti Listra, i ireta 30 kilometru (20 miia) iauani jarhaspti Ikoniu uératini suroesterhisï. I ireta kánikua sési pájperasïreendi Antiokía de Pisidia jingoni. Joperuksï no uánikua judiuecha irekaspti jima. Ini ireta jimbo, grieguksï uandasïreendi nájkiruka imeecheri idioma jindeepka likaoniu. Pablu ka Bernabé, ueenasptiksï xanharu jimbo aianhpini, jamberi jimboka no japka lugari ma nani engaksï judiuecha tánguarhienga para Tata Diosïni kómarhini. Ka Pablu imani milagruni úspti enga Pedru úpka Jerusaléni, ambakerantani kʼuiripuni ma enga no ueenga xanharani desde enga andajpenupka (Úku. 14:8-10). Enga Pedru úpka indeni milagruni, uánikua kʼuiripuechaksï niáraspti jakajkuni, joperu enga Pablu úpka, no májkueni úkuarhispti (Úku. 3:1-10).

¹⁰ Listra anapuecha máteru diosïichanksï kómarhiasïreendi. Ísï jimbo, engaksï exepka eska ima kʼuiripu enga no ueenga xanharani jirejiresï ueenaspka xanharani, niárasptiksï eratseni eska Pablu ka Bernabé diosïispkaksï. Uandasïreendiksï eska Bernabé Seusiispka, grieguecheeri sánderu kʼéri diosï, ka eska Pablu jindeespka Ermesi, Seusiiri uájpa enga diosïcheeri uandakua páriipka (exe je rekuadruni enga ini pájinarhu jaka “ Listra ka na engaksï kómarhienga Seusini ka Ermesini”). Joperu Bernabé ka Pablu uékasïreendiksï xarhatakuani eskaksï imeecha no diosïispka, sánderu sési, eska májku Tata Diosïjkusï jaka enga jurhimbitiika enga Jeoba arhinhajka ka  eska imasï juramukua íntsaapka paraksï uandani ka eska imeeri uinhapikua jimboksïsï úpka indeni milagruni (Úku. 14:11-14).

11-13. a) ¿Ambeksï arhiaspi Pablu ka Bernabé Listra anapu kʼuiripuechani? b) ¿Ambechi uaa jorhenguarhini ima ambeeri engaksï Pablu ka Bernabé uandapka?

¹¹ Nájkiruka i ambe úkuarhipka iretarhu, Pablu ka Bernabé, jánguarhintasptiksï mintsitarhu niárakuani. Arhiasptiksï: “Achamasïicha, ¿andijtsïsï ísï jámani jaki? Juchajtuchi kʼuiripueska ka májkuenchi kómu nitamakuarhisïnga eska chá. Juchaksïni jurhaska aianguni ambakiti aianhperakuani parakajtsï jurajkuaka ini ambe enga no marhuajka ka parajtsï Tata Diosïni andarhientani imani enga tsípiti jaka, enga auandani úka, echerini, marini ka ístu ambe enga xáni jaka auandarhu, echerirhu ka marirhu. Ióntki, ima jurajkuspti eska mándani ireta úpiringa ambe enga uékapiringa úni, ka paraksïni mítetarani neespi ima, méntkisï ambakiti ambe ústi. Úspti eska janipiringa, eskajtsï kánikua pʼikuntapiringa ka ístuksïni kánikua tʼirekua íntskusti ka kánikuaksïni sési pʼikuastasti mintsitarhu” (Úku. 14:15-17). Ini karakatani Lukasï karasti ka uánikua ambejtsïni jorhendasïndi na engachi jatsika para uandontskuarhekuani imeechani engaksï no kristianueka.

¹² ¿Ambechi jorhenguarhisïni iiri ambe enga úkuarhipka? Orheta, eska Pablu ka Bernabé nóksï sánderu kʼéri pʼikuarherasïreenga eska ima kʼuiripuecha. Enbesi deksï kʼéramakuarhini, Pablu ka Bernabé kaxumbikua jingonksï uandaspti eskaksï imajtu májkueniispka eska ima kʼuiripuecha. Ísïisti, imeechaksï nóteru jakajkusïreendia chkuanderakua ambe, intsïnhasptiksï espiritu santu ka erokuarhixaptiksï Kristu jingoni juramuni auandarhu. Joperuksï ístu mítetixapti eskaksï Listra anapu kʼuiripuechajtu májkueni kóndenhantapiringa engaksï kurhajchapiringa Kristuni.

¹³ ¿Ka jucha na exeasïni imani kʼuiripuechani engachi aianguajka ambakiti aianhperakueri ambe? ¿Eskaksï májkueniiska eska jucha? Ka engachi jorhentpini jarhajka Tata Diosïiri Uandakueri ambe ka kʼuiripuechajtsïni úndani kʼéri ambe arhini, ¿arhiasïnchi eskaksï no ísï uaaka, ísï eskaksï na úpka Pablu ka Bernabé? Ambakiti ejemplu máesti ambe enga uandapka Charles Russell, jorhentpiri ma enga orherukuni japka ánchikuarhita aianhpikueri siglu 19 kʼamarhukunisï ka siglu 20 inchamanisï. Nájkiruka ima kánikua sési jorhentpienga, ma uelta karaspti: “Nóchi uékasïnga kʼéri ambe exenhani nijtu eska kʼéri ambe exenhaaka ambe engachi jucha karajka. Ístu, nóchi uékasïnga eskajtsïni ísï arhiaka reberendo o rabí”. Imajtu kánikua kaxumbitiispti, ísï eska Pablu ka Bernabé. Nóchi jimbosï aianhpijka parachi kʼéri ambe arhinhani, sino parachi jarhuataani kʼuiripuechani paraksï “Tata Diosïni andarhientani imani enga tsípiti jaka”.

14-16. ¿Ambe máteru tsimani ambechi uaa jorhenguarhini ambe engaksï Pablu ka Bernabé uandapka jini Listra?

¹⁴ Ju je exeni ambe máteru ambejtsïni jorhendasïni i karakata. Pablu ka  Bernabé adaptarikuarhisïreendiksï. Judiuecha ka imeecha engaksï judiu úkuarhipka Ikoniu anapuecha, mítesptiksï Tata Diosïiri Karakateeri ambe ka na enga sési pájpereenga Tata Diosï Israeli anapuechani jingoni. Joperu Listra anapuechaksï kasi no ma ambe mítespti, ambe engaksï kʼóru sési mítepka jindeespti tarhekueri ambe, jimboka imani iretarhu ambakiti klima jarhaspka ka ístu ambakiti echeriicha engaksï ueenga mámaru ambe jukani, nóksï úkua jukanchapirindi kurhanguani Tata Diosïiri kualidadiichani, na enga Tata Diosï kóntpintajka enga íntspijka mámaru ambe estasioniicha jimbo. Ísï mítetini, Pablu ka Bernabé iiri ambeksï uandontskuarhekuaspti para aianguani ambakiti aianhperakuani (Rom. 1:19, 20).

¹⁵ ¿Nénachi uaa juchajtu májkueni adaptarikuarhini eska imeecha? Nájkiruka tarheri májku jásï semiia úrajka para mámaru jásï echerirhu ikarani, mámaru ambe úrasïndi para preparariini echerini. Jarhastiksï máru echeriicha engaksï lista jakaia para jatsikuni ambe ma, joperu máteruechaksï nótki ambe. Májkueniisti aianhpikuarhu. Májku semiiesti enga jindeeka ambakiti aianhperakua Reinueri ambe enga Tata Diosïiri Uandakuarhu jaka. Ísï jimbo, ísï eska Pablu ka Bernabé, exesïngachi ambe engaksï kʼuiripuecha nitamakuarhijka ka jakajkuni parachi úni indeeri ambe ueenani uandontskuarhekuani (Luk. 8:11, 15).

¹⁶ Ka últimu engachi jorhenguarhijka, jindeesti eskachi no jatsiska para kuatantani enga kʼuiripu no niáraaka jakajkuni jurhimbikua ambe. ¿Andi? Jimboka nájkirukachi kánikua jánguarhintaaka, ménichani inde semiia engachi jatsikujka uaati tsakapurhisï andatseerani o nema murutani (Mat. 13:18-21). Ísï tátsekua, Pablu miátantaaspti Roma anapu kristianuechani eskachi ‘mándani arhini jatsiaka para aianguni Tata Diosïni ambe engachi xáni úka’, asta imeecha jamberi engachi uandontskuarhekuajka Biblieri ambe (Rom. 14:12).

17. ¿Naniksï niraspi Pablu ka Bernabé engaksï Derbe uéntapka, ka andi?

¹⁷ Eskachi na exepkia antesi, Listra anapuechaksï tsakapu jimbo ataspti Pabluni ka antsikupasptiksï petantani iretarhu jimbokaksï eratsesïreenga eska uarhispkia. ¿Ambe úkuarhispi tátsekua? Jesúsiiri chúxapatiichaksï andarhieraspti, ima jauaraspti ka ménderu inchaakuntaspti iretarhu para jima pakarani ima chúri. Pauandikua, Pablu ka Bernabé nirasptiksï Derbe, xanharasptiksï 100 kilometru (60 miia). Jamberi kánikua pʼamerhikuarhini japti, joperu niraspti iatsitapani, astakaksï niárapka Derbe. Jimaksï jarhuataaspti “uánikua kʼuiripuechani paraksï Jesúsiiri chúxapatiini”. Tátsekua, enbesi deksï imani xanharu jimbo nirani enga sánderu no iauaniipka paraksï kʼuanhatsentani Antiokía de Siria, ménderuksï Listra, Ikoniu  ka Antiokía de Pisidia kʼuanhatsentaspti. ¿Andiksïsï kʼuanhatsentapi ini ireteecharhu? Paraksï uinhaperaantani “Jesúsiiri chúxapatiichani paraksï seguiriini mintsikani Tatani” (Úku. 14:20-22). ¡Ambakiti ejempluestiksï! Sánderuksï pendienti jarhaspti kúnguarhikuechani jimbo ka nóksï imeechajku pendienti pákuarhispti. Ini jurhiatikuecha jimbo, uánikua misioneruecha ka sirkuitueri orhejtsïkutiicha májkuenksï úxati.

18. ¿Nénaksï erakuasïni orhejtsïkutiichani?

¹⁸ Aparte deksï uinhaperaantani Jesúsiiri chúxapatiichani imeecheeri uandakuecha ka ejemplu jingoni, Pablu ka Bernabé “mándani kúnguarhikuarhu erakuasptiksï máru erachiichani paraksï orhejtsïkutiini”. Nájkiruka espiritu santu axaapka, imeechaksï kómarhispti ka kʼarhindaksï jarhaspti engaksï Tata Diosï Jeobani jurajkukuapka jimbanhi orhejtsïkutiichani “para ima exeani jarhani” (Úku. 13:1-4; 14:23). Ini jurhiatikuecha jimbo májkuenksï úsïndi, engaksï kúnguarhikuarhu anapu orhejtsïkutiicha uéjka erakuni erachini ma, orhetaksï kómarhikua jimbo exesïndi sini ísï úxaki eskaksï Biblieri juramukuecha na uandajka (1 Tim. 3:1-10, 12, 13; Titu 1:5-9; Sant. 3:17, 18; 1 Ped. 5:2, 3). Na enga xáni ióni páni jakaia jurhimbikuarhu, no indesï sánderu jukaparhakua ambeeti, ambe engaksï jatsika para exeni jindeesti na enga uandajka ka na enga jámajka ka ístu na enga mítekateeka, para míteni sini jurajkutakuarhexaki para espiritu santu jarhuatani imeeri irekuarhu. Erachi solu jiáni uaati orhejtsïkuni kúnguarhikuarhu enga ísï úni jauaka eska Biblia na juramujka (Gal. 5:22, 23). Sirkuitueri orhejtsïkutisï jatsiti para uandani néksïsï uaa orhejtsïkutiini (terukutanta je 1 Timoteu 5:22 jingoni).

19. ¿Ambeksï mítetixaki orhejtsïkutiicha, ka nénaksï májkueni úsïni eska Pablu ka Bernabé?

¹⁹ Imeecha engaksï erakunhajka paraksï orhejtsïkutiini, mítestiksï eskaksï jatsiska para kuenta íntskuntani Tata Diosïni na engaksï káuaka kúnguarhikuarhu anapuechani (Ebr. 13:17). Májkueni eska Pablu ka Bernabé, orhejtsïkutiichajtuksï jatsisti para aianhpini, uinhaperaantani erachiichani imeecheri uandakuecha jingoni ka orheta peerani kúnguarhikuani para méntkisï sési jarhani (Filip. 2:3, 4).

20. ¿Ambechi uékasïni úni míteparini ambe engaksï xáni nitamakuarhipka Pablu ka Bernabé?

²⁰ Enga Pablu ka Bernabé kʼuanhatsentapkaksïa jima engaksï uérapka Antiokía de Siria, “aianguasptiksï ambe enga xáni úpka Tata Diosï imeechani úrapariani. Ístuksï aianguaspti eska Tata Diosï mítakuaspkia puertani parakaksï no judiuechajtu úpiringa jakajkuni” (Úku 14:27). Engachi exejka indeni ambakiti ánchikuarhitani engaksï i erachiicha úka ka kóntperateechani enga Tata Diosï Jeoba íntsaapka, ¿a no eskachi sánderu tsípikua jingoni uékasïnga “no sáni chéparini aianhpini” jimbokajtsïni Tata Diosï Jeoba juramukua íntskuxaka?