CAPÍTULU 3
“Espiritu santu iáminduechani andarhieraaspti”
Ambe engaksï úpka enga espiritu santu iáminduechani andarhieraapka Pentekostesi jimbo
Pʼitakata jarhasti Úkuecha 2:1-47
1. Uandanta je ambe enga úkuarhienga Pentekostesiiri Kʼuínchikua jimbo.
JERUSALÉNI uánikua ambe úkuarhixati. a Templurhu jima enga altari jaka, sïraaxati ka lebiteechaksï pirekuechani pireaxati engaksï ísï mítekateeka komueska Aieli (Salmos 113 a 118). Jamberiksï máru, ma partini pirejti ka máteruecha máteru partini paraksï mókukuantani. Uánikua kʼuiripu jámaxati engaksï iauanisï anapueka komu Elami, Mesopotamia, Kapadosia, Pontu, Ejiptu ka Roma. b ¿Náki kʼuínchikua úkuarhixaki? Pentekostesiisti, o “jurhiatikua engaksï primeru frutuecha pʼikunhantajka” (Núm. 28:26). Kʼuínchikua máespti enga mándani uéxurhini úkuarhijka ka kánikua tsípinhani janhasïndi, jimboka kʼamakurhisïngia sebadeeri pʼikuntskua ka ueenakuarhisïndia trigueri pʼikuntskua.
2. ¿Ambe ambakiti ambe úkuarhispi Pentekostesi uéxurhini 33 jimbo?
2 Ini jurhiatikua uéxurhini 33 jimbo enga primabereeka, nuebisï tsípa anapu, úkuarhisïndi ambe ma enga ióni jamberi miánhantaaka. “Ma repentku kurhaakuarhispti auandarhu uératini enajki ambe uinhamu tarhiapi” (Úku. 2:2). Imani kʼumanchikuarhu engaksï ma 120 Jesúsiiri chúxapatiicha jaka, uinhamu kurhakuarhisïndi. Imeechaksï ísku pakarasïndi jimboka chpiriini jásï ambeksï exesïnga engaksï katambeeni járhaka ka engaksï mándani imeechani andajtsïkueraajka. c Tátsekua, iámindu i chúxapatiichaksï niárasïndi jatsini espiritu santu ka ueenasïndiksï mámaru jásï idioma uandani. Engaksï Jesúsiiri chúxapatiicha uérapka kʼumanchikuarhu, imeecha engaksï máteru ireta jimbo anapuepka, nóksï jánhaskasïreendi ambe úkuarhixapi, jimbokaksï kurhachakuaxapka “engaksï [Jesúsiiri chúxapatiicha] imeecheeri idioma jimbo uandani japka” (Úku. 2:1-6).
3. a) ¿Andisï xáni jukaparhakue ambe enga úkuarhipka Pentekostesirhu uéxurhini 33? b) Pentekostesirhu, ¿néna úraspi Pedru primeru iabeni imani tanimu iabeecheeri “auandarhu anapu Reinueri”?
3 Íksï karakateecha ambakiti ambe xarhatasïndi na engachi jatsika para kómarhini Tata Diosïni: xarhatasïndi na enga ueenakuarhika Tata Diosïiri Israeli, enga jindeeka kristianu erakukateecheeri kúnguarhikua (Gal. 6:16). Joperu no inde ambejkusï úkuarhipti. Imani mismu jurhiatikua jimbo, sánderu sáni tátsekua, Pedru arhijtsïkuaspti kʼuiripuechani. Ka ísï úraspti primeru iabeni imani tanimu iabeecheeri “auandarhu anapu Reinueri”, parakaksï mámaru jásï kʼuiripuecha úpiringa ambakiti ánchikuarhiteechani jatsiani (Mat. 16:18, 19). Primeru iabe jingoni, úspti eskaksï judiuecha ka imeecha engaksï judiu úkuarhipka jiókuarhipiringa ambakiti aianhperakuani ka eskaksï espiritu santu jingoni erakunhapiringa. d Engaksï no méni jurajkupiringa Tata Diosï Jeobani, niárapirindiksï Tata Diosïiri Israeli jingoni kuenta úkuarhini ka niáranksï juramutiini ka saserdotiini Mesíasiiri Reinurhu (Apok. 5:9, 10). Ístuksï niárapirindi ini ambe jatsini Samaria anapuecha ka últimu imeecha engaksï no judiuepka. Iásï anapu kristianuecha, ¿ambechi jorhenguarhisïni imeeri ambe enga Pentekostesi jimbo úkuarhipka?
“Iáminduechaksï májku kʼéri tánguarhintatixapti” (Úkuecha 2:1-4)
4. ¿Andichisï újki uandani eska iásï anapu kúnguarhikua jima uératini jurhaska enga uéxurhini 33 jimbo uaxastanhaka?
4 Eskachi na exekia, kristianuecheeri kúnguarhikua jiáni ueenakuarhisti engaksï 120 Jesúsiiri chúxapatiicha espiritu santu intsïnhapka, jiáni ‘engaksï májku kʼéri tánguarhintatini japka’ kuartu ma jimbo enga kʼumanchikuarhu karhakua japka (Úku. 2:1). Joperu enga na inchatiruepkia, uánikua kʼuiripuechaksï itsï atakuarhisptia. Ka i ambe apenasi ueenakuarhixapti, jimboka asta iásï jamberi seguirixaka sánderu uániinhani. Ini jurhiatikuechani jimbo, kúnguarhikuarhuksï jarhasti mámaru jásï kʼuiripuecha engaksï xénchajka Tata Diosïni. Iichaksïsï aianhpini jati “ambakiti aianhperakua Tata Diosïiri Reinueri, [...] paraksï iámindu ireteecha mítetini jarhani” ante de parhakpini kʼamajkunhani (Mat. 24:14).
5. ¿Náki kóntperatechanksï jatsiapirini imeecha engaksï kúnguarhikuarhu japiringa primeru siglurhu ka ístu iásï?
5 Kristianuecheeri kúnguarhikua ístu marhuapirindi para jarhuataani ka uinhaperaantani erakukateechani ka ísï tátsekua “máteru karichiichani” (Juanu 10:16). Pablu kánikua jukaparharasïreendi na engaksï jarhuajpereenga iámindu erachiicha. Jimbosï Roma anapu kristianuechani karakuapti: “Jíksïni uékaxakaia exeni paraksïni íntskuni Tata Diosïiri kóntperata ma ka ísïksïni úni uinhaperantani, o sánderu sési, parachi uinhaperperantani indeni ambe jimbo engajtsï chá mintsikajka ka ístu ambe engani ji mintsikajka ” (Rom. 1:11, 12).
6, 7. ¿Néna aianhpixaki kúnguarhikua iámu parhakpinirhu?
6 Iásï anapu kúnguarhikua ístu jánguarhintaxati májkueni úni eska primeru siglurhu anapu. Para ueenani, jatsistiksï para ini ánchikuarhitani úni enga sáni úkua jukaka joperu enga ambakiti ambeeka, ka enga Jesúsi kurhakuaka imeeri chúxapatiichani: “Jorhendaa je iámindu ireteecharhu anapu kʼuiripuechani paraksï juchiiti chúxapatiini. Itsï ataa je Taatiiri, Uájpeeri ka espiritu santueri nombri jimbo. Jorhendaa je paraksï úni iámindu ambe engaksïni ji juramuchika” (Mat. 28:19, 20).
7 Tata Diosï Jeoba úraxati iásï kristianuecheeri kúnguarhikuani engaksï jindeeka Jeobaeri testiguecha paraksï úni ini ánchikuarhitani. Joperu nájkiruka sáni úkua jukaka xáni uánikua idiomeecha jimbo aianhpini, úxatiksï orhepani uérani: Testiguechaksï petaaxati Biblieri publikasionichani jukari 1,000 idiomecha jimbo. ¿Niraxakijtsï chá tánguarhikuecharhu, aianhpini ka Jesúsiiri chúxapati uaani? Enga ísïika, uaakajtsï kánikua sési pʼikuarherani jimbokajtsï namunitkueska Echerirhu engajtsï jatsika indeni kóntperatani para sési aianhpini Tata Diosï Jeobaeri nombriiri ambe.
8. ¿Náki kóntperatechantsï intsïnhaasïni kúnguarhikuarhu?
8 Ístu, Tata Diosï Jeobaeri intsïmperakua máesti jatsiani interu parhakpini anapu erachiichani paraksïni jarhuatani tsípikua jingoni jámani ka parajtsï no kuatantani ini jurhiatikuecha jimbo enga xáni no sési jánhaskuarhini jaka. Exe je ambe enga Pablu karakuapka kristianuechani engaksï ebreu uandeenga: “Ju je pendienti jarhani máteruechani jimbo parachi jarhuajperani xénchpeni ka ambakiti ambe úni ka ju je méntkisï nirani tánguarhini ka no ísï eskaksï máru na pʼindeka no nirani. Sánderu sési, ju je uinhaperperantani ka sánderia iásï engachi exeni jaka eska ima jurhiatikua axuterku jarhaskia” (Ebr. 10:24, 25). Ísïisti, kúnguarhikua Tata Diosï Jeobaeri kóntperata máesti nani engachi újka uinhaperperantani. Ísï jimbo, ju je májku kʼéri jarhani erachiicha jingoni ka no kueratani tánguarhikuecharhu.
Kurhachakuaxaptiksï “Jesúsiiri chúxapatiichani engaksï imeecheeri idioma jimbo uandani japka” (Úkuecha 2:5-13)
“Iáminduechachi kurhajchaaska na engajtsïni juchaari uandakua jimbo aianguka indeni xáni ambakiti ambe enga Tata Diosï úka” (Úkuecha 2:11).
9, 10. ¿Ambe ka ambeksï úsïni máru paraksï úni aianhpini máteru idioma jimbo?
9 ¡Eranhaska je na engaksï xáni tsípini japka ima jurhiatikua judiuecha ka imeecha engaksï judiu úkuarhipka! Jamberiksï sáno iáminduecha májku idioma úreendi paraksï uandontskuarheni, jamberi griegu o ebreu. Peru iásïksï kurhachakuaxapti “Jesúsiiri chúxapatiichani engaksï imeecheeri idioma jimbo uandani japka” (Úku. 2:6). Seguru eska mintsitarhu niárakuapka engaksï kurhaapka ambakiti aianhperakuani imeecheeri idioma jimbo. Eskachi iásï na mítekia, kristianuechachi nóteru úsïngia milagru ma jimbo mámaru jásï idioma uandani. Joperu uánikua erachiichaksï aianhpixati Reinueri ambe iápurisï. ¿Nénaksï ísï úxaki? Máruksï jorhenguarhisïndi máteru idioma paraksï imani kúnguarhikuecha jimbo marhuani enga máteru idioma uandanhajka o jamberi paraksï máteru paisi jimbo nirani marhuani. Ka mémindu, ima kʼuiripuecha engaksï kurhajchaajka ini erachiichani, ískuksï pakarasïndi engaksï exejka na engaksï xáni jánguarhintajka.
10 Inde ambesï nitamakuarhipti Christine enga máteru siete Testiguecha jingoni jorhenguarhipka gujaratí uandani. Enga exentapka ánchikuarhitarhu anapu kompanierani ma enga indeeni idioma uandeenga, imeeri idioma jimbo saludarispti. Ima uátsï ísku pakaraspti ka kurhamarhispti andisï gujaratí jorhenguarhini japi. Christine úspti Biblieri ambe aianguni ka uátsï arhisti: “Peeka no jaka máteru relijioni enga arhiajka máteruechani eskaksï jorhenguarhiaka ini idiomani enga xáni difisiliika. Ambe engajtsï chá uandantajka, kánikua jukaparhakueti”.
11. ¿Nénachi uaa prepararikuarhini parachi aianguani kʼuiripuechani máteru idioma jimbo?
11 Ísïisti, nóchi iáminduecha úsïnga jorhenguarhini máteru idioma. Peruchi iáminduecha uaaka prepararikuarhini parachi aianguani Reinueri ambe kʼuiripuechani engaksï máteru idioma uandajka. ¿Néna? Pori ejemplu, uaakachi úrani aplikasioni JW Language®. Ini aplikasioni jingoni uaakajtsï jorhenguarhini néna saludarpini imani idioma jimbo enga jimeesïsï uandanhajka enga chá irekaka. Ístujtsï uaaka jorhenguarhiani máru uandakuechani parajtsï ueenani uandontskuarheni kʼuiripu jingoni. Uaakajtsï arhini eska inchaaka pájina jw.org jimbo o chá mismu exeraani bideuechani ka publikasionichani engaksï imeeri idioma jimbo jaka. Ju je sési úrani ini ambe. Juchajtuchi kánikua sési pʼikuarheraaka ísï eskaksï primeru kristianuecha, jimbokachi exeaka na engaksï kʼuiripuecha tsitiaka kurhaani ambakiti aianhperakuani imeecheri idioma jimbo.
“Pedru jauaraspti” (Úkuecha 2:14-37)
12. a) ¿Ambe uandaspi profeta Joeli imani milagrueri ambe enga Pentekostesi jimbo úkuarhipka? b) ¿Andisï Joeliiri profesia jatsipi para primeru siglurhu kumplirikuarhini?
12 Karakateechaksï seguirisïndi arhini eska Pedru jauaraspka para kʼuiripuechani uandontskuarhekuani engaksï uápuru uératini jupka (Úku. 2:14). Aianguaspti eskaksï Jesúsiiri chúxapatiicha mámaru jásï idioma jimbo uandaxapka, jimboka Tata Diosï úxapka eska kumplirikuarhipiringa ambe enga uandarini japkia profeta Joelini jimbo: “Íntskuaka juchiiti espiritu iámindu jásï kʼuiripuni” (Joel 2:28). Ka i ambe primeru siglurhu úkuarhispti, jimboka ante de Jesúsi karhanchentani auandarhu, aiakuaspti imeeri chúxapatiichani: “Ji kómarhiaka Taatini ka imaksïni íntskuati máteru ambe engaksïni jarhuataaka”, enga jindeeka “espiritu santu” (Juanu 14:16, 17).
13, 14. ¿Ambe úspi Pedru para mintsitarhu niárakuani kʼuiripuechani ka nénachi uaa májkueni úni?
13 Pedru no sáni chéparini kʼamaraspti arhijtsïkperatani: “Eskajtsï iámindu israeli anapuecha sési mítetini jauaka eska Tata Diosï úska Tata ka ístu Kristu imani achamasïni enga Jesúsi arhinhajka, imani engajtsï chá chkarirhu ma cháparhataka” (Úku. 2:36). Ísïisti, uánikua imeecha engaksï kurhaani japka nóksï jima jarhaspti enga Jesúsi chkarirhu cháparhatanhapka. Joperu jimbokaksï Israeli anapuespka, imeechajtuksï kulpa jatsispti. Joperu, ju je exeni eska apostoli Pedru janhanharhikua jingoni uandontskuarhekuasïnga judiuechani para úni mintsitarhu niárakuani. No uékasïreendi no sési arhiani, sino eskaksï móantapiringa. Ka imeechaksï no ikiaspti. Sánderu sési, “kánikuaksï no sési pʼikuarheraspti” mintsitarhu, jimboksïsï kurhamarhipti: “¿Jiájkani ambechi uaa?”. Na enga uandontskuarhekuapka Pedru mintsitarhu niárakuaspti ka úspti eskaksï móantapiringa (Úku. 2:37).
14 Juchajtuchi uaaka májkueni úni eska Pedru, parachi úni kʼuiripuechani mintsitarhu niárakuani. Engachi aianhpini jarhajka, nóchi arhiasïnga kʼuiripuechani eska chkuanderakua ambeeska ambe engaksï imeecha jakajkujka. Sánderu sési, imeeri ambechi uandontskuarhesïnga engachi tsimarhani jakajkujka ka tátsekuachi jarhuataasïnga Biblia jingoni sési kurhanguni ambe ma. Engachi janhanharhikua jingoni aianhpiska Biblieri ambe ísï eska Pedru, sánderu segurueuati eskaksï ambakiti kʼuiripuecha uékaaka kurhaani.
“Itsï atakuarhi je iáminduecha” (Úkuecha 2:38-47)
15. a) ¿Ambe arhiaspi Pedru imeechani engaksï judiu úkuarhipka ka ístu judiuechani, ka ambeksï úspi imeecha? b) ¿Nénachi míteski eska ima xáni uánikua kʼuiripuecha engaksï itsï atakuarhipka listuksï jarhaspkia paraksï ísï úni?
15 Imani xáni kʼéri jurhiatikua jimbo, Pedru arhiaspti imeechani engaksï judiu úkuarhipka ka ístu judiuechani engaksï kurhaapka ambakiti aianhperakuani: “Móanta je ka itsï atakuarhi je iáminduecha” (Úku. 2:38). Ísï jimbo, ima jurhiatikua jimboksï ma 3,000 kʼuiripuecha itsï atakuarhispti, jamberi imani pileecharhu engaksï Jerusaléni japka o jima no iauanisï. e ¿Jukariksï sóntku itsï atakuarhispi? ¿Xarhatasïni i ambe eska imeecha engaksï Biblieri ambe jorhenguarhini jaka ka Testigu uájpeecha sóntku itsï atakuarhiaka nájkirukaksï nótki preparadu jauaka? Nómbe. Ju je miáni eska imeecha engaksï judiu úkuarhipka ka ístu judiuecha engaksï Pentekostesi jimbo itsï atakuarhipka, kánikuaksï jorhenasptia Biblieri ambe ka imani iretarhu anapuesptiksï enga Tata Diosï Jeobani marhuakuenga. Ka ístuksï xarhatasïreendi eskaksï xénchasïreenga Tata Diosï Jeobani, jimbokaksï iauanisï uératini jurhasïreenga kʼuínchikuarhu. Soluksï uétarhinchasïreendi kurhanguni Jesúsiiri ánchikuarhitani paraka úkuarhiaka ambe enga Tata Diosï uéjka. Ka engaksï na itsï atakuarhipkia, iásïksï listu jarhasptia komu Kristueri chúxapatiicha paraksï seguiriini marhuakuni Tata Diosïni.
16. ¿Nénaksï xarhataspi primeru siglurhu anapu kristianuecha eskaksï intsïmpitiispka?
16 Xarharasïndi eska Tata Diosï Jeoba újchakuraxapka imani grupuni, jimbokaksï karakateecha seguirisïnga uandani: “Iámindu imeecha engaksï jakajkuenga, májku kʼériksï jarhasïreendi ka intsïmperasïreendiksï ambe engaksï xáni jatsikuarhienga ka íntspikuarhiasïreendiksï echeriichani ka ambe engaksï xáni jatsikuarhienga ka ísïksï arhukutsperasïreendi sentabuni ísï eska na uétarhinchani japiringa mándani kʼuiripu” (Úku. 2:44, 45). f Seguru eskachi iásï anapu kristianuechajtu uékasïnga májkueni xénchpeni ka intsïmpitiini.
17. ¿Ambe jatsiski para úni ima enga uéjka itsï atakuarhini?
17 Iásï, ima enga uéjka aiakukuarheni ka itsï atakuarhini, jatsisti para ísï úni eska Biblia na uandajka. Orheta, jatsisti para jorhenguarhini ambe enga Biblia arhijka (Juanu 17:3). Tátsekua, xarhatani eska mintsikasïnga ka eska nóteru uaakia no sési jásï ambe enga ióntki úpka, eska móantaskia, ka xarhatani eska mintsita jingoni ísï úxaka (Úku. 3:19). Ístu, jatsisti para mójtakurhini, nóteru ísï jámania eska antesi ka ueenani imani ambe úni enga Tata Diosï Jeoba jaiapanhintajka (Rom. 12:2; Éfes. 4:23, 24). Ka últimu, jatsisti para kómarhini Tata Diosïni para aiakuni imeeri tsípikuani, ka tátsekua itsï atakuarhini (Mat. 16:24, 1 Ped. 3: 21).
18. ¿Náki kʼéri kóntperata jatsisïni kristianu ma enga itsï atakuarhikia?
18 ¿Ka chá aiakukuarheskia Tata Diosï Jeobani ka itsï atakuarhini komu Kristueri chúxapati ma?. Enga ísïika, Tata Diosï Jeobajtuksïni íntskuati chánksïni imeeri espiritu santu parajtsï úni sési aianhpini jurhimbikueri ambe ka úntsï ambe enga ima uéjka, ísï eska na úpka primeru siglurhu anapu kristianuecha jingoni. Kʼéri kóntperata máesti engachi jatsika, ¿a no?
a Exe je rekuadruni “J erusaléni, ireta engaksï judiuecha Tata Diosïni kómarhienga”.
b Exe je rekuadruni “ Roma, nani enga japka juramukua”, “ Judiuechaksï niáraspti irekani Mesopotamia ka Ejiptu” ka “ Pontu, nani engaksï irekapka máru kristianuecha”.
c Biblia arhisïndi eskaksï ‘chpiriini jásï ambe exespka engaksï katambeeni járhapka’. I ambe arhikuekasïndi eska ima espiritu santu engaksï Jesúsiiri chúxapatiicha pʼipka, ísï xarharasïreenga eska chpiri, nájkiruka no meru jindeepka chpiri.
d Exe je rekuadruni “ ¿Neespiksï ima engaksï judiu úkuarhipka?”.
e Joperu no jiántkusï xáni uánikua itsï atakuarhinhapti. Siete de agostu de 1993 jimbo, Jeobaeri testiguecheeri kʼéri tánguarhikua internasionali ma jimbo enga Kiev (Ucrania) úkuarhipka, seisi alberkechaksï úrakuarhespti paraksï 7,402 kʼuiripuecha itsï atakuarhini ka tsimani ora ka kinse minutu durariispti.
f I arreglu úkuarhispti para jarhuataani imeechani engaksï Jerusaléni pakarapka paraksï sánderu jorhenguarhini Biblieri ambe ka engaksï uétarhinchani japiringa ambe ma. I ambe engaksï intsïmpienga jindeespti paraksï jarhuajperani ka no politikeeri ambeespti (Úku. 5:1-4).
