KAPITULU 22
“Eska ísï úkuarhiaka eska Tata Diosï Jeoba na uéjka”
Jimboka Pablu eratsetini jarhasïnga úni ambe enga Tata Diosï uéjka, nirasïndi Jerusaléni
Pʼitakata jarhasti Úkuecha 21:1-17
1-4. ¿Andisï Pablu Jerusaléni nirani japi ka ambe úkuarhinchapirini jima?
PABLU ka Lukasï, úkua jukanchasïndiksï Miletu uéakuntani. ¡Kánikuaksï no sési pʼikuarherasïndi Éfesu anapu orhejtsïkutiichani jurajkuani engaksï xáni xénchaajka! Tátsekua, íksï tsimani aianhpiriicha jatasïndi barkuni, páxatiksï ambe engaksï xáni uétarhinchaaka ka ístu imani sentabuni engaksï tánaka paraksï jarhuataani Judea anapu kristianuechani engaksï uétarhinchani jaka. Kánikuaksï uékaxatiia niárani Jerusaléni ka íntskuantani sentabu erachiicha ka pirenchiichani.
2 Barkurhu, beleechaksï pirakurhisïndi tarhiata jimbo ka enga barku sánhani arhijka iauani nirani, sánhani arhisïndi pínandintani. Pablu, Lukasï ka siete kristianuecha engaksï imeecha jingoni nirani jaka, iauani jatinksï exexati na engaksï kómu pʼikuarherani jaka imeecha engaksï eranguantani jaka (Úku. 20:4, 14, 15). Pablu ka ochu erachiichaksï níjkurhaparini uandanuantaxati astakaksï nóteru exeajkia.
3 Tanimu uéxurhini, Pablu kánikua ánchikuarhisti Éfesu anapu orhejtsïkutiichani jingoni, joperu iásï úxati ambe enga espiritu santu arhika ka niraxati Jerusaléni. Pablu sánisï mítesti ambe enga úkuarhinchaaka Jerusaléni, jimboka sánititu antesi arhiaspka ini mismu orhejtsïkutiichani: “Jerusaléni niuaka jimbokarini espiritu santu ísï arhiska, nájkirukani no míteka ambe úkuarhinchaa jini, joperu ante de ireta ma jimbo niárani, espiritu santurini méntku aianguni jarhasïndi eskani ónhanhaaka ka no sési nitamakuarhini” (Úku. 20:22, 23). Nájkiruka peligru jaka, exesïndi eska jatsiska para nirani jimboka espiritu santu arhixaka eska niuaka Jerusaléni ka ima jimbosï uékajti ísï úni. Ima no uékasïndi eska no sési kánhaaka, joperu para ima sánderu jukaparhakuesti úni ambe enga Tata Diosï uéjka.
4 ¿A no eskachi májkueni pʼikuarherasïnga eska Pablu? Engachi aiakukuarhejka Tata Diosï Jeobani, aiakusïngachi eskachi uaaka ambe enga ima uéjka ka eska inde ambe sánderu jukaparhakueuaka para jucha. Ísï jimbo, kánikua jukaparhakuesti eskachi exeaka na enga Pablu méntkisï kurhajchapka Tata Diosïni ka ju je exeni nénachi uaa májkueni úni eska ima.
“Iauani jatini eraakuarhispti isla enga Chipre arhinhajka” (Úkuecha 21:1-3)
5. ¿Náki xanharu jimboksï niraspi Pablu ka imeeri kompanieruecha paraksï Tiru niárani?
5 Pablu ka imeeri kompanieruechaksï barkuni ma jataspti ka jurhimbitkuksï niraspti. Ka jimboka sési tarhiaxapka, barku úspti sési niárani Kosi, nani engaksï pakarapka ima chúrikua (Úku. 21:1). Tátsekuaksï Rodasisï nitamaspti ka Pátaraksï niáraspti, ireta ma enga suri de Asia Menor japka. Jimaksï barkuni ma jataspti enga Tiru jamberi paapka, enga Fenisia jaka. Lukasïjtsïni aiangusïndi ambe enga úkuarhipka engaksï nirani japkia: “Ka uikixkandani jimbo, iauani jatini eraakuarhispti isla enga Chipre arhinhajka” (Úku. 21:3). ¿Andisï Lukasï indeni ambe uandapi?
6. a) Enga Pablu ménderu exepka Chipreni, ¿andisï sési pʼikuarherantapi? b) Engachi eratsentajka ka na engajtsïni újchakurajka ka jarhuatani Tata Diosï Jeoba, ¿ambechi niárasïni kurhanguni?
6 Jamberi Pablu imeeri jájki jingoni tʼantsirapti nani enga japka Chipre ka aianguapti ambe enga xáni nitamakuarhipka jima. Ma nuebe uéxurhinisï antesi, jiáni enga Pablu primeru xanhari nípka iauanisï aianhpini, indeni ireta jimbo jámaspti Bernabé ka Juanu Markusï jingoni, ka jimasï arhirperapti Elimasi jingoni enga sïkuamiipka (Úku. 13:4-12). Enga ménderu exepka islani ka miántani ambe enga xáni nitamakuarhipka jima, jamberi apostoli Pablu uinhapikuarhintapti para úni orhepani uérani imani ambe jingoni enga Jerusaléni nitamakuarhipiringa. Ístu iásï, kánikuajtsïni jarhuatasïndi engachi miántajka ka eratsentani néna engajtsïni újchakuraka ka jarhuatani Tata Diosï. I ambejtsïni uaati jarhuatani parachi májkueni pʼikuarherani eska Dabidi enga karapka: “Uánikua ambe jimbo no sési nitamakuarhisïndi ima enga jurhimbitku jámajka, peru Tata Diosï Jeoba iámindu ambe jimbo jarhuatasïndi” (Sal. 34:19).
“Jámaspkachi jirinhaantani chúxapatiichani ka exeantaspkachi” (Úkuecha 21:4-9)
7. ¿Ambe úspi Pablu ka imeeri kompanieruecha engaksï niárapka Tiru?
7 Pablu mítespti eska kánikua jukaparhakueska erachiicha ka pirenchiichani jingoni jarhani ka kánikua uékaxaptia exeani. Ka Lukasï uandantasïndi ambe engaksï úpka engaksï na niárapkia Tiru: “Jámaspkachi jirinhaantani chúxapatiichani ka exeantaspkachi” (Úku. 21:4). Jimbokaksï mítespka eskaksï Tiru jarhaspka kristianuecha, jánguarhintasptiksï jirinhaantani ka jamberiksï imeechani jingoni pakarapti. Ini jurhiatikuecha jimbojtu kʼéri kóntperata máesti jurhimbikuarhu jarhani, jimboka nani uéjkisï engachi niuaka exeantasïngachi erachiichani engajtsïni sési erokajka imeo. Ísï jimbo, imeecha engaksï xénchajka Tata Diosïni ka únksï ambe engaksï jorhenguarhijka, jatsiastiksï amiguechani iápuru parhakpinirhu.
8. ¿Ambe arhikuekasïni Úkuecha 21:4?
8 Erachiichaksï siete jurhiatikua páxaptia Tiru, joperu jima anapu kristianuechaksï ma repentku ueenaspti arhini Pabluni ambe enga Lukasï uandantajka: “Espiritu santuni jimbo, imeechaksï méntku arhixapti Pabluni eska no jámapiringa Jerusaléni nirani” (Úku. 21:4). ¿Arhikuekasïni eska Tata Diosï Jeoba nóteru uékasïreengia eska Pablu Jerusaléni nipiringa? Nómbe, no indeni ambesï arhikuekani japti. Ambe enga espiritu santu arhini japka Pabluni, jindeespti eska kánikua no sési kánhapiringa jima ka no eska no nipiringa. Jimajkani, ¿ambe arhikuekasïni i bersikulu? Eskaksï Tiru anapu kristianuecha espiritu santu jimbo kurhanguspka eska Pablu kánikua no sési kánhapiringa, ka jimbokaksï uandanhiaspka kurhakusptiksï Pabluni eska no nipiringa. Úsïngachi kurhanguni eskaksï no uékasïreenga eska no sési ambe úkuarhinchapiringa, joperu Pablu eratsetixaptia úni ambe enga Tata Diosï uéjka jimbosï nípti Jerusaléni (Úku. 21:12).
9, 10. a) Enga pablu exeapka Tiru anapu erachiichani eskaksï uandanhiaxapka, ¿ambe miántapi? b) ¿Ambeksï úsïni iásï uánikua kʼuiripuecha joperu ambe uandaspi Jesúsi?
9 Enga Pablu exeapka erachiichani eskaksï kánikua uandanhiaxapka, jamberi miántapti eska Jesúsijtu májkueni jásï ambe nitamakuarhispka enga arhiapka imeeri chúxapatiichani eska Jerusaléni nipiringa ka eskaksï kánikua no sési kámapiringa ka eskaksï uándikupiringa. Ka jimboka Pedru xáni xénchasïreenga Jesúsini, arhispti: “¡Tata, pʼamojkukuarhi sáni! Tʼuri no méni ísï nitamakuarhiaka”. Joperu Jesúsi arhispti: “¡Kéndikucherini Satanási! Jimbokarini ójkutaxaka parani úni ambe engani jatsika para úni. Jimbokari no ísï eratsesïnga eska Tata Diosï sino ísï eskaksï kʼuiripuecha” (Mat. 16:21-23). Jesúsi eratsetixaptia úni ambe enga Tata Diosï Jeoba uékeenga ka íntspini imeeri tsípikuani ka Pablujtu májkueni eratsetixapti úni. Ísï eska Pedru, Tiru anapuechajtuksï xénchperakua jimbosï ísï arhini japti Pabluni jimbokaksï no sési kurhanguxapka eska Tata Diosï uékasïreenga eska Pablu nipiringa Jerusaléni.
Para Jesúsini chúxapani, uétarhisïndi eska ma no imeeri ambejku pendienti pákuarhiaka.
10 Iásï, uánikua kʼuiripuechaksï imani relijionini jirinhantasïndi enga no xáni ambe kurhajkuarhijka paraksï úni agustu jámani. Joperu Jesúsi arini ambe arhiaspti imeeri chúxapatiichani: “Engareni nema uéjka chúxapuni, eska ísku exekuarhiaka, eska tarhatakuarhiaka imeeri chkarini enga jindeeka para no sési nitamakuarhini ka eskarini méntkisï chúxapaaka” (Mat. 16:24). Sánderu sésiisti májkueni úni eska Jesúsi nájkiruka no sánderu fásiliika ísï úni.
11. ¿Nénaksï xarhataspi Tiru anapuecha eskaksï xénchasïreenga Pabluni ka eskaksï apoiarisïreenga?
11 Sóntku niárasptia jurhiatikua enga Pablu ka imeeri kompanieru jémbeechaksï ménderu jatsipka para xanharu jupikani. Na enga uéakuntapka Pablu iretarhu, xarhatasïndi eskaksï Tiru anapuecha kánikua xénchasïreenga ka eskaksï uékasïreenga eska seguiriipiringa aianhpini. Ima achamasïicha, uarhiitiicha ka sapiicha engaksï pámbetapka Pabluni marirhu uanamukuteni jamberi, tinguixurhisptiksï ka májku kʼériksï kómarhispti Tata Diosïni ka uandanukuarhintasptiksï. Ísï tátsekua, Pablu, Lukasï ka máteru erachiicha, barkunksï ma jataspti enga Tolemaida paapka ka jimaksï pakaraspti chúskutani erachiichani jingoni (Úku. 21:5-7).
12, 13. a) ¿Néna mítekateespi Felipe? b) ¿Andisï Felipe ambakiti ejemplu máe para taatiicha engaksï uájpeechani kaajka?
12 Lukasï uandantasïndi eska tátsekua, Pablu ka imeeri kompanieru jémbeechaksï niraspka Sesarea. a Ka jimaksï Felipeo pakaraspti, achamasï ma enga aianhpiriipka (Úku. 21:8). Felipe uánikua uéxurhini sési marhuakusptia Tata Diosï Jeobani. Ma 20 uéxurhini antesi, apostoliichaksï imani íntskuspti ánchikuarhitani para tʼirekua etsakuntani Jerusaléni anapu kúnguarhikuarhu enga apenasi uaxastanhapka. Ístu, Felipe mítekateespti eska kánikua tsípikua jingoni aianhpisïreenga. Jiáni engaksï ueenapka kánikua no sési kánhani, Jesúsiiri chúxapatiichaksï etsakuarhispti, ka ima Samaria niraspti ka jima ueenaspti aianhpini ambakiti aianhperakuani. Ka ísï tátsekua Etiopía anapu eunukuni jorhendaspti jurhimbikueri ambe ka itsï ataspti (Úku. 6:2-6; 8:4-13, 26-38). ¡Kánikuaksï sési pʼikuarherapti engaksï exepka ini erachini enga xáni sési marhuani japka!
13 Felipe seguiriixapti tsípikua jingoni aianhpini Tata Diosïiri ambe. Imani jurhiatikuechani jimbo, Felipe Sesarea irekaxaptia ka seguiriixapti tsípikua jingoni aianhpini jimbosï Lukasï uandajti eska ambakiti aianhperakuani jámasïreenga uandantani. Ístu Biblia uandasïndi eska tʼámu uátsïichani kaasïreenga engaksï Tata Diosïiri uandakua páriipka. I ambe xarhatasïndi eskaksï imeechajtu ísï úxapka eska taati jémba (Úku. 21:9). b Eskachi na exekia, Felipe kánikua jánguarhintasïreendi paraka imeeri familia xénchapiringa ka marhuakupiringa Tata Diosï Jeobani. Iásïjtu, taatiichaksï sési úsïndi engaksï májkueni újka, jimbokaksï imeecha ueenasïnga kánikua tsitini aianhpini ka marhuakuni Tata Diosïni ka ísïksï jorhendaasïndi uájpeechani májkueni úni.
14. ¿Néna jarhuataaspi Pablu erachiichani enga nireenga pʼorhembiani ka nénachi uaa májkueni úni eska ima erachiicha?
14 Nani uéjkisï enga nireenga Pablu, jirinhaantasïreendi erachiichani ka imeecha jingoni pakarasïreendi. Ima erachiichaksï kánikua tsitisïreendi imeecho pakataani Pabluni ka kompanieru jémbeechani, ka ísïksï úsïreendi uinhaperperantani iáminduecha (Rom. 1:11, 12). Iáminduechachi uaaka xárhati kóntperateechani jatsiani engachi pʼímarhiaka sirkuitueri orhejtsïkutini ka témbani nájkirukachi arisku jándu irekaaka (Rom. 12:13).
“Listu jarhaska parani [...] uarhini” (Úkuecha 21:10-14)
15, 16. ¿Ambe uandaspi Ágabu eska úkuarhipiringa ka néna pʼikuastaaspi inde ambe imeechani engaksï jima japka?
15 Enga útasï Pablu Felipeo japka, achamasï ma niáraspti enga kánikua janhanharhinheenga: Ágabu. Imeecha engaksï jima japka mítesptiksï eska Ágabu profeteespka ka ístu eska uandaspka eska kʼéri ma kʼarhingua japiringa jiáni enga Klaudiu juramuni japka, Roma anapu emperadori (Úku. 11:27, 28). Ísï jimbo, jamberiksï kurhamarhikuarhiendi: “¿Andisï juki Ágabu? ¿Ambejtsïni aiangua?”. Iáminduechaksï ísku pakaraspti exeni, ka ima ma repentku pʼíkuspti Pabluni imeeri jónguarhikuani, i takusï iósti máespti engaksï kʼuiripuecha jónguarhienga ka marhuasïreendi para sentabu patsani ka máteru ambe. Ini jónguarhikua jingoni, Ágabu jóndurhaspti ka jójkurhaspti ka ambe enga uandapka ísku pakataaspti iáminduechani, uandaspti: “Ísï uandasïndi espiritu santu: ‘Judiuechaksï ísï kámaati Jerusaléni indeni achamasïni enga ini jónguarhikuani kámajka ka no judiuecheeri jájki jimboksï jurajkuati’” (Úku. 21:11).
16 Ambe enga Ágabu uandapka, xarhataxapti eska Pablu nipiringa Jerusaléni. Ístu xarhataspti eska judiuecheeri kulpa jimbo, no judiuecheeri jájki jimbo jurajkunhapiringa. Imeecha engaksï kurhaapka ini profesiani, kánikuaksï no sési pʼikuarheraspti. Lukasï uandantasïndi: “Enga ima ísï uandapka, iámindu jucha engachi jima japka, méntkuchi úndaspka arhini Pabluni eska no jámapiringa Jerusaléni nirani. Jimajkani Pablu arhiaspti: ‘¿Andijtsïsï uerani jaki ka andijtsïnisï uéjki chérani? Sési mítetini ja je eskani ji listu jarhaska parani ónhanhani ka ístuni listu jarhaska parani Jerusaléni uarhini Jesúsiiri nombri jimbo’” (Úku. 21:12, 13).
17, 18. ¿Néna xarhataspi Pablu eska meru uékasïreenga úni ambe enga Tata Diosï Jeoba uéjka ka ambeksï úspi erachiicha?
17 Eranhaska je ambe enga úkuarhini japka. Iámindu erachiicha, asta Lukasï jamberi, arhixaptiksï Pabluni eska no nipiringa Jerusaléni ka máruksï asta uerani jarhasïndi. Pablu pʼamojkuasïndi enga exeajka na engaksï xáni uandanhiajka imani jimbo, ka jimbosï uékperakua jingoni arhiajti: “¿Andijtsïsï uerani jaki ka andijtsïnisï uéjki chérani?”. Pablu eratsetixatia nirani Jerusaléni, ísï eska na arhiapkia Tiru anapu erachiichani. Nóksï úpirindi pʼínguni nájkirukaksï arhipiringa eska no nipiringa ka nijtu engaksï uerapiringa. Pablu aianguasïndi andisï jatsi para nirani. ¡Na enga xáni no chépka ka balori xarhatani Pablu! Ísï eska Jesúsi, balori jingoni niraspti Jerusaléni (Ebr. 12:2). Pablu no uékasïndi uarhini, joperu enga niárapiringa ísï úkuarhinchani, para ima kóntperata máepirindi jimboka ísï uarhipiringa komueska Kristueri chúxapati ma.
18 ¿Ambeksï úspi erachiicha? Biblia arhisïndi: “Jimbokachi no úspka pʼínguni, nóteruchi ambe ma arhispkia ka uandaspkachi: ‘Eska ísï úkuarhiaka eska Tata Diosï Jeoba na uéjka’” (Úku. 21:14). Ísï jimbo, respetariisptiksï Pabluni ka nóteruksï ambe ma arhisptia. Nájkirukaksï úkua jukanchapka, kurhangusptiksï eska jatsispka para ísï úkuarhini ambe enga Tata Diosï Jeoba uékeenga. Pablu imani ambe erakusptia úni enga jimbo úpiringa uándikunhani, jimbosï sánderu sésiipti eskaksï ima erachiicha engaksï kánikua xéncheenga nóteru pʼíngupiringia.
19. ¿Ambechi jorhenguarhisïni ambe enga nitamakuarhipka Pablu?
19 Ambakiti ambechi jorhenguarhisïnga ambe enga nitamakuarhipka Pablu: nóchi méni jatsiska para pʼínguni nemani enga uéjka sánderu ambe úni para marhuakuni Tata Diosïni. Ka nóchi indeni ambesï arhikuekani jaka eska jatsiaka para no sési nitamakuarhini o niárani uarhini. Pori ejemplu, nájkirukaksï uánikua taatiicha no sési pʼikuarherajka engaksï uájpeecha máteru naniisï nirajka marhuakuni Tata Diosï Jeobani, apoiariuasïndiksï. Ju je eratsentani pirenchini ma enga Phyllis arhinhajka ka enga Inglaterra anapueka. Enga imeeri máechakua uájpa nanaka África nípka marhuani komueska misionera, pirenchi kánikua no sési pʼikuarheraspti. Pirenchi uandasïndi: “Nájkirukani sési pʼikuarherapka imani jimbo, ístuni kómu pʼikuarheraspka jimboka ima iásï iauani japiringia. Someni kómarhispka Tata Diosïni, joperu imasï erakupti nirani iauanisï ka no méni jámaspka pʼínguni o arhini eska junguapiringia. Jísïni jorhendapka eska méntkisï jatsispka para orheta peerani Reinueri ambe. Ka iásï 30 uéxurhini páxatiia marhuakuni máteru paisi jimbo ka pauani pauani diosmaiamukua íntskuntasïnga Tata Diosï Jeobani jimboka útasï sési marhuakuxaka”. ¡Xáni enga sésiika apoiariuani erachiichani ka pirenchiichani paraksï seguiriini marhuakuni Tata Diosï Jeobani!
Ju je uinhaperaantani imeechani engaksï jánguarhintani jaka marhuakuni Tata Diosï Jeobani.
“Erachiichajtsïni kánikua tsípikua jingoni erokaspti” (Úkuecha 21:15-17)
20, 21. ¿Nénachi míteski eska Pablu tsitisïreenga erachiicha jingoni jarhani ka andisï ísï ueeni?
20 Enga Pablu ka imeeri kompanieruechaksï na listu japkia, ménderuksï xanharu jupikaspti. Imani tiempuni engaksï Jerusaléni nirani japka, méntkisïksï jirinhaantasïreendi erachiichani paraksï imeecha jingoni jarhani. Engaksï Tiru niárapka, exeantasptiksï erachiichani ka ma semanaksï pakaraspti imeecha jingoni. Ka Tolemaidajtuksï exeantaspti erachiichani ka chúskutasptiksï imeecha jingoni jarhani. Ka Sesarea, jimaksï uánikua jurhiatikua pakaraspti Felipeo. Tátsekua, Sesarea anapu kristianuechaksï niraspti pámbetaani Jerusaléni jamberi. Engaksï na niárapkia, Nasóniiri kʼumanchikuarhuksï niáraspti enga jindeepka orheta Jesúsiiri chúxapati ma. Ka eska Lukasï na uandantajka, erachiichaksï kánikua tsípikua jingoni eroaspti (Úku. 21:17).
21 Pablu kánikua tsitisïreendi máteru kristianuechani jingoni jarhani. Ísï eskajtsïni máteruecha na sési pʼikuastantajka juchantsïni, erachiicha ka pirenchiichaksï kánikua uinhaperantasïreendi Pabluni ka inde ambe jarhuataspti para orhepani uérani engaksï kʼuiripuecha no sési kámapiringa ka asta uékanksï uándikuni.
a Exe je rekuadruni “ Sesarea kapitaliispti Judeaeri”.
b Exe je rekuadruni “ ¿Úsïreenksï nanakeecha jorhentpini kúnguarhikuarhu?”.