KAPITULU 21
“Ji no kulpa jatsiska enga nema niáraska uarhini”
Pablu enga mintsita jingoni jámeenga aianhpini, arhijtsïkuasïndi orhejtsïkutiichani
Pʼitakata jarhasti Úkuecha 20:1-38
1-3. a) ¿Néna uarhisïni Eutiku? b) ¿Ambe úsïni Pablu ka ambejtsïni jorhendasïni imeeri ambe?
PABLU ireta Troasi jarhasti, kuarturhu ma enga terseru pisurhu jaka ka jima uánikua kʼuiripu jarhasti. Terujkani chúriisti ka útasï jima jarhasti arhijtsïkpini. Ióni jamberi uandontskuarhekuasïndi erachiichani jimboka jamberi nóteru méni exeauakia. Indeni kuartu jimbo uánikua lámpareechaksï jarhasti, jimbosï sïraata uinintajti ka sánderu jorhepikuarhisïndi. Ka jima jarhasti tumbi ma enga Eutiku arhinhajka, bentanarhu uaxarhukusti, ka enga Pablu arhijtsïkpini jarhajka, i tumbi ueenasïndi kʼuínchani ka tátsekua kʼuíerasïndi ka uekorhesïndi asta xanharu andatseerani.
2 Ka jimboka Lukasï doktoriiska, uiriisïndi kétsentani para exeni Eutikuni. Ka engaksï jauatajka, exesïndiksï eska uarhiskia (Úku. 20:9). Joperu milagru ma úkuarhipirindi, apostoli Pablu kapchakusïndi tumbini ka arhiasïndi iáminduechani: “Asï uandanhia je. Tsípiti jarhasti”. ¡Pablu tsítantaspti Eutikuni! (Úku. 20:10).
3 I ambe xarhatasïndi ambe enga xáni újka Tata Diosï Jeoba imeeri espiritu santu jingoni. Nájkiruka Pablu no kulpa jatsipka ambe enga úkuarhipka Eutiku jingoni, no uékaspti eska erachiicha indeni ambe miáni pakarapiringa ka nijtu eskaksï niárapiringa chkéni. Enga ísï tsítantapka imani tumbini, sési pʼikuastaantaspti erachiichani ka uinhaperaantaspti paraksï seguiriini tsípikua jingoni aianhpini. Pablu exesïreendi eska tsípikua kánikua jukaparhakueska, jimbosï tátsekua uandapti: “Ji no kulpa jatsiska enga nema niáraska uarhini” (Úku. 20:26). Juchajtuchi jatsiska para ísï exeni tsípikuani. Ísï jimbo, ju je exeni ambejtsïni jorhendasïni Pablu.
“Masedonia niraspti” (Úkuecha 20:1, 2)
4. ¿Néna nitamakuarhisïni Pablu Éfesu?
4 Eskachi na exeka máteru kapitulurhu, apostoli Pablu kánikua no sési nitamakuarhispti Éfesu. Enga ima aianhpini jámani japka, kánikua no sési jánhaskuarhispti iretarhu jimbokaksï kánikua ikiaxapka imeecha engaksï plata jingoni uaauenga diosï úkateechani paraksï diosa Ártemisi kómarhini. Úkuecha 20:1 uandasïndi: “Enga na pínandipkia, Pablu pʼitajkuarhiaspti chúxapatiichani ka enga na uinhaperaantapkia ka uandanuantani, Masedonia niraspti”.
5, 6. a) ¿Na xáni ióni pakaraspi Pablu Masedonia ka néna jarhuataaspi jima anapu erachiichani? b) ¿Ambe eratsesïreeni Pablu imeeri erachiicheeri ambe?
5 Enga na Masedonia nirani japkia, Troasi anhaxurhispti ka jima pakaraspti namuni jurhiatikuechani jimbo. Jimaksï exejperantapirindi Titu jingoni enga Korintu nípka (2 Kor. 2:12, 13). Joperu Titu útasï nótki niárasïreendi, jimbosï Pablu Masedoniaisï nípti ka jima pakaraspti ma uéxurhinisï para uinhaperaantani iámindu erachiichani (Úku. 20:2). a Tátsekuaksï Masedonia exejperanataspti Pabluni jingoni ka aianguspti eskaksï Korintu anapu erachiicha kánikua tsitispka primeru karakatani enga Pablu axakuapka (2 Kor. 7:5-7). Ísï jimbosï apostoli Pablu axakuapti máteru karakatani enga iásï ísï mítekateekia komueska Segundu karakata para Korintu anapuecha.
6 Lukasï uandantasïndi eska jiáni enga Pablu Éfesu ka Masedonia nípka, uinhaperaantaspka erachiichani. I ambe xarhatasïndi na enga pʼikuarhereenga Pablu erachiichani jimbo. Ima no ísïispti eskaksï fariseuecha engaksï kʼéramakuarhienga ka no sésiksï kámpini. Pablu xénchaasïreendi kúnguarhikuarhu anapu erachiichani ka májku kʼéri ánchikuarhisïreendi imeecha jingoni (Juanu 7:47-49; 1 Kor. 3:9). Ka méntkisï ísï eratsesïreendi asta jiáni jamberi enga jatsienga para konseju íntskuani (2 Kor. 2:4).
7. ¿Orhejtsïkutiichaksï néna májkueni úsïni eska Pablu?
7 Kúnguarhikuarhu anapu orhejtsïkutiicha ka sirkuitueri orhejtsïkutiicha, májkuenksï úsïndi eska Pablu, asta jiáni jamberi engaksï jatsijka para arhini nemani eska no sési ambe úxaka, jánguarhintasïndiksï uinhaperantani, jánguarhintasïndiksï kurhangukuani máteruechani ka sési pʼikuastaantani enbesi de kastigariuani. Sirkuitueri orhejtsïkuti ma enga uánikua uéxurhini pʼorhembiakia kúnguarhikuechani, uandasïndi: “Sáno iámindu erachiichaksï uékasïndi sési ambe úni, joperuksï ménisï sánisï ikiasïndi, chésïndiksï oksï ísï pʼikuarherani enajkiksï no uaa sánderu sési úni ambe ma”. Jiánisï sánderu uétarhijti eskaksï orhejtsïkutiicha uinhaperantauaka (Ebr. 12:12, 13).
Judiuechaksï jirinhakuntaxapti néna uándikuni (Úkuecha 20:3, 4)
8, 9. a) ¿Andisï Pablu nóteru jatapia barkuni para Siria nirani? b) ¿Andiksïsï judiuecha kurhunhieni Pabluni?
8 Masedonia uératini, Pablu Korintu niraspti, b jima pakaraspti tanimu kutsï. Tátsekua Senkreasi niraspti, barkuni ma jataspti para Siria nirani ka jima uératini Jerusaléni nipirindi para íntskuantani sentabu ka máteru ambe iámindu imani erachiichani engaksï uétarhinchani japka (Úku. 24:17; Rom. 15:25, 26). c Joperu ma repentku úkuarhispti ambe ma ka nóteru úpirindia ísï úni. ¿Ambe úkuarhispi? Judiuechaksï ‘jirinhakuntaxapti néna uándikuni’ (Úku. 20:3).
9 Judiuechaksï kánikua ikiakusïreendi Pabluni jimbokaksï ísï exesïreenga komueska apostata ma. Ka ístu jimboka jiáni enga Pablu Korintu jámani japka aianhpini, Krispu kristianu úkuarhispti, achamasï ma enga orhejtsïkutiipka jima engaksï judiuecha tánguarhienga para Tata Diosïni kómarhini (Úku. 18:7, 8; 1 Kor. 1:14). Ka tátsekua, Pablunksï Galióni jingoni páspti enga Akaia anapu juramutiipka. Joperu Galióni uandaspti eska Pablu no no sési ambe niátaspka, jimboksïsï judiuecha kánikua ikiapti (Úku. 18:12-17). Ísï jimbo, engaksï mítepka eska Pablu barkuni ma jatapiringa Senkreasi, ueenasptiksï jirinhakuntani néna uándikuni. Joperu ju je exeni ambe enga úpka Pablu.
10. ¿Andichisï no úpirini uandani eska Pablu chéspka Senkreasi nirani?
10 Jimboka no uékasïreenga no sési ambe úkuarhinchani ka ístu jimboka sentabu páxapka, apostoli Pablu no kétsemaspti Senkreasi, sino xanharu jupikaspti para ménderu Masedonia kʼuanhatsentani. Joperu indeni xanharu jimbojtu úpirindi no sési ambe úkuarhinchani jimbokaksï kuarhukpitiicha jámasïreenga, ka ístuksï no seguruespi ima kʼumanchikuecha engaksï jindeepka para mintsikuarhini sáni. Joperu Pablu sánderu sési exespti ini xanharu jimbo nirani enbesi de no sési ambe úkuarhinchani Senkreasi. Ka xáni sési enga no jandiajku jámani japka, imani jingonksï niraxapti Aristarku, Gaiu, Segundu, Sópateri, Timoteu, Tíkiku ka Trófimu (Úku. 20:3, 4).
11. ¿Ambe úsïni parachi xéparintku jámani ka náki ejemplujtsïni íntskuski Kristu?
11 Ístu, juchajtuchi jatsiska para jingontku jámani engachi aianhpini jámani jauaka. Ísï jimbo, máru lugaricharhu méntkisïchi grupu jimbo jámasïnga o tsimandani. Ka ístu, jatsiskachi para jingontku jámani jiáni engachi no sési kánhani jauaka. Nóchi ambe ma uaaka úni indeni ambe jimbo, joperuchi no jatsiska para ísku jatini nirani jimeesïsï enga no sési jánhaskuarhini jauaka (Juanu 15:20; 2 Tim. 3:12). Májkuenchi úsïnga eska Jesúsi. ¿Ambe úspi Jerusaléni enga exepka eska imeecha engaksï ikiakuenga tsakapuechani kʼarhaantaxapka paraksï kʼuanirani? “Ima jirikuarhespti ka uéntaspti templurhu” (Juanu 8:59). ¿Ka ambe úspi tátsekua enga mítepka eskaksï judiuecha uékasïreenga uándikuni? ‘Nóteru jámasïreendia judiuechani japarini ka desierturhu no iauanisï niraspti’ (Juanu 11:54). Ísï eskachi na exekia, Jesúsi xéparini jámasïreendi para no no sési ambe úkuarhinchani ka inde ambe jarhuataspti paraka ima seguiriipiringa úni ambe enga Tata Diosï uékeenga. Ístuchi iásï anapu kristianuecha májkueni úsïnga (Mat. 10:16).
“Kánikua tsípinhaxapti” (Úkuecha 20:5-12)
12, 13. a) ¿Náksï pʼikuarheraspi erachiicha enga Eutiku tsítantapka? b) ¿Andiksïsï uaa tsípini iámindu imeecha engaksï uarhiranchaka nemani?
12 Pablu ka imeeri kompanieruechaksï márku niraspti Masedoniaisï. Joperu peekaksï nani jurajperapka ka tátsekuaksï ménderu exejperantania, jimboka Lukasï uandantasïnga: “Sinko jurhiatikisï tátsekua, d Troasichi exejperantaspka imeechani jingoni” (Úku. 20:6). e Indeni iretani jimbosï Pablu tsítantapti Eutikuni, ísï eskachi na uandani japka primeru párrafuecharhu. ¡Nájtuksï xáni sési pʼikuarherantapi erachiicha engaksï exepka eska ménderu tsípiti jarhaspkia! Biblia uandasïndi: “Kánikua tsípinhaxapti” (Úku. 20:12).
13 Ini jurhiatikuechani jimbo, nóteruksï úkuarhisïndia inde járhati milagruecha, joperu imeecha engaksï uarhiranchaka nemani kánikuaksï tsípisïndi engaksï jorhenguarhijka eska Biblia uandasïnga eskaksï uarhiriicha tsíntaaka (Juanu 5:28, 29). Ju je miántani eska Eutiku ménderu uarhispka jimboka no perfektuespka (Rom. 6:23). Joperu ima kʼuiripuecha engaksï tsíntaaka jimbanhi parhakpinirhu, imaksï kʼóru sésikua jatsiati paraksï irekani para méntkisï. Ka imeecha engaksï tsíntaaka para Jesúsi jingoni juramuni auandarhu nóteruksï méni uarhiatia (1 Kor. 15:51-53). Jimajkani, iáminduechaksï jatsisti para kánikua tsipini, erakukateecha ka ístu máteru karichiicha (Juanu 10:16).
“Kʼuiripuechani japarini ka kʼumanchikuecharhu” (Úkuecha 20:13-24)
14. ¿Ambe arhiaspi Pablu Éfesu anapu orhejtsïkutiichani jiáni engaksï tánguarhintapka Miletu?
14 Pablu ka imeeri kompanieruechaksï Jasóni niraspti Troasi uératini ka tátsekua Mitilene, Kíosi, Samosi ka Miletu. Ka jimboka sóntku uékaxapka niárani Jerusaléni para Pentekostesiiri Kʼuínchikua, barkuni ma jataspti enga no anhaxurhienga Éfesu, joperu uékasïreendi uandontskuarheni Éfesu anapu orhejtsïkutiicha jingoni jimbosï uandakua axakuapti paraksï Miletu exejperantani (Úku. 20:13-17). Engaksï jima japkia, ísï arhiaspti: “Chájtsï sési mítetixaka na engani jámaka chánksïni japarini desde engani ueenaka Asiaisï jámani. Kaxumbikua jingoni marhuakuska Tatani ísï eska jántspiri ma, ueraska ka kánikua no sési nitamakuarhiska engajtsïni judiuecha méntku úndaka xáni no sési kámani. Ka nájkirukani ísï nitamakuarhika, jíksïni méntkisï aianguska ambe engaksïni jarhuatapiringa ka ístuksïni méntkisï jorhendaska kʼuiripuechani japarini ka kʼumanchikuecharhu. Ji sési aianguaska iámindu ambe judiuechani ka ístu grieguechani eskaksï jatsiska para móantani ka andarhientani Tata Diosïni ka ístu eskaksï jatsiska para mintsikani Jesúsini, juchaari Tatani” (Úku. 20:18-21).
15. ¿Andisï xáni marhuajki kʼumanchikuecharhu aianhpini?
15 Ini jurhiatikuechani jimbo, mámaruchi aianhpisïnga ambakiti aianhperakuani. Ísï eska apostoli Pablu, jirinhaantasïngachi kʼuiripuechani nani uéjkiksï jarhani, jimeesïsï engakï karruecha anhaxurhijka, xanharuecha jimbo enga uánikua kʼuiripu jámajka ka plasecharhisï. Joperuchi Jeobaeri testiguecha kʼumanchikuecharhusï sánderu aianhpijka. ¿Andi? Parakaksï iáminduecha jatsiaka sésikua paraksï someni kurhaani Reinueri ambe, ka i ambe xarhatasïndi eska Tata Diosï Jeoba iáminduechani májkueni kaasïnga. Ístu, jimbokachi exeantasïnga imani kʼuiripuechani engaksï ambakiti mintsita ma jataka ka jarhuataasïngachi ísï eskaksï na uétarhinchaaka mándani arhini. Ka jarhuatasïndijtsïni juchantsïni parachi sánderu mintsikani Tata Diosïni ka parachi seguiriini jarhani tekaantani. Jiájkani, ambakiti kristianuechachi sánderu indeni ambe jimbosï mítekateeka, jimbokachi mintsita jingoni aianhpisïnga “kʼuiripuechani japarini ka kʼumanchikuecharhu”.
16, 17. ¿Néna xarhataspi Pablu eska no chésïreenga ka nénachi uaa májkueni úni?
16 Tátsekua, Pablu arhiaspti Éfesu anapu orhejtsïkutiichani eska ambe uéjki úkuarhinchani Jerusaléni, eska ima listu jarhaspka para nirani, uandaspti: “Joperu no arhiati ambe uéjkini úkuarhinchani jini engani kʼamaraaka indeni ambe engani jatsika para úni, ka kʼamarani indeni ánchikuarhitani engareni Jesúsi arhika, inde ánchikuarhita jindeesti sési aianhpini ambakiti aianhperakuani eska Tata Diosï kánikua kóntpintasïnga” (Úku. 20:24). Ísï eskachi na exekia, méntku no ma ambe úpirindi ójkutani Pablu para imeeri ánchikuarhitani úni. No jurajkuspti eska pʼamenchakua ambe nijtu máteru ambe ójkutapiringa.
17 Ini jurhiatikuechani jimbo, kristianuechajtuksï mámaru ambe tekaantasïndi. Máruksï jatsisti para tekaantani engaksï juramutiicha no sési kaajka, o engaksï nóteru jurajkuajkia paraksï imeecheeri ánchikuarhini úni. Máteruechaksï uinhamu pʼamenchaxati, oksï no sési pʼikuarherani jarhani imeecheeri mintsitarhu. Ka tumbiichaksï jatsisti para tekaantani engaksï eskuelarhu kompanieru jémbeecha méntku arhiani jarhajka paraksï no sési ambe úni. Joperu ambe uéjkichi nitamakuarhinchani jarhani jucha, ju je májkueni úni eska Pablu ka ísï eska ima, ju je seguiriini sési aianhpini ambakiti aianhperakuani.
“Chá kuidarikuarhi je ka chá sáni exeani ja je karichiichani” (Úkuecha 20:25-38)
18. ¿Andisï Pablu no kulpa jatsipirini enga nema niárapiringa uarhini ka nénaksï úpirini májkueni úni Éfesu anapu orhejtsïkutiicha?
18 Últimu, apostoli Pablu konseju íntskuaspti imani orhejtsïkutiichani aianguaparini ambe enga ima úpka, ka enga na arhiapkia eska nóteru exeapiringia ménderu, arhiaspti: “Ji no kulpa jatsiska enga nema niáraska uarhini, jimbokaksïni méntku iámu ambe aianguska ambe enga Tata Diosï uéjka”. Tátsekua arhiaspti nénaksï úpirini májkueni úni ka nóksï kulpa jatsini enga nema no niárapiringa pʼímutanhantani, arhiaspti: “Chá kuidarikuarhi je ka chá sáni exeani ja je karichiichani, jimbokaksïni espiritu santu erakuska parajtsï orhejtsïkutiini ka parajtsï exeani jarhani imeechani engaksï Tata Diosïiri kúnguarhikuarhu jaka, imeechani enga Tata Diosï imeeri Uájpeeri iurhirini jimbo piaaka” (Úku. 20:26-28). Ka ístu arhiaspti eskaksï japiringa kúnguarhikuarhu máru “jiuatsïicha engaksï no sési jámajka” ka eskaksï chkuanderakua ambe jorhentpipiringa “paraksï támisï jánhastaani chúxapatiichani ka paraksï imeechani jingoni paani”. ¿Ka nénaksï úpirini orhepani uérani ini ambe jingoni? Pablu ísï arhiaspti: “Jingontku ja je ka miá je eskaksïni tanimu uéxurhini, chúrikua ka jurhiakua, juchaksïni méntku úndaska ueparini arhistachini iámindu chánksïni” (Úku. 20:29-31).
19. ¿Ambe úkuarhispi primeru siglurhu kʼamarhuerani jámani ka indeni ambe jingoni ambe úkuarhispi máru uéxurhini tátsekua?
19 Primeru siglurhu kʼamarhuerani ueenasptiksï jarhani “jiuatsïicha engaksï no sési jámajka”. Uéxurhini 98 jimbo, apostoli Juanu karaspti: “Uánikuechaksï jarhastia engaksï ikiakujka Kristuni [...]. Imeechaksï ixú uérasti ka juchantsïni jingonksï jarhaspti, joperuksï no juchantsïni jingoniispti, jimboka engaksï juchantsïni jingoniipiringa, juchantsïni jingonksï pakarapirindi” (1 Juanu 2:18, 19). Dosientosi uéxurhinisï tátsekua enga tata Jesukristu na uarhipkia, iámindu kʼuiripuecha engaksï responsabilidadiichani jatsiapka kúnguarhikuarhu, ueenasptiksï kʼéri ambe exekuarhini. Ka ma 300 uéxurhinisï tátsekua enga tata Jesukristu na uarhipkia, juramuti Konstantinu jurajkuspti eskaksï inde kꞌuiripuecha o grupu, relijioni ma úkuarhipiringa joperu enga no jurhimbitiipka. Ka ísïksï ueenaspti jarhani apostateecha engaksï chkuanderakua ambe jorhentpienga paraksï támisï jánhastpini. Ueenasptiksï diosï úkateechani kómarhiani ka pʼindekua ambe inchaatani ka uandanksï eska Bibliarhusï ísï uandeenga. Ka iásï jamberi, iámindu imeecha engaksï kristianu arhikuarhijka seguiriixatiksï ini ambe jakajkuni ka úni.
20, 21. ¿Néna xarhatasïreeni Pablu eska kánikua jarhuajpesïreenga ka nénaksï májkueni úsïni iásï orhejtsïkutiicha?
20 Pablu méntku ménderueniispti eskaksï inde orhejtsïkutiicha engaksï ísï tátsekua fásili exeapka kúnguarhikuarhu anapuechani paraksï indeecha sési uéranchani. Pablu ánchikuarhisïreendi para kéndakuarhini ka no kúnguarhikuarhu anapuechani kurhakuani jarhani. Ima jánguarhintasïreendi jarhuataani erachiichani, joperu no para ima sési uéranchani ka arhiaspti Éfesu anapu orhejtsïkutiichani eskaksï jánguarhintapiringa májkueni úni, eskaksï jatsispka para jarhuataani imeechani engaksï chkerini japka ka ístu arhiaspti eskaksï no mirikurhipiringa ambe enga Jesúsi uandapka: “Ma sánderu sési pʼikuarherasïndi intsïmpini ka eska intsïmbinhani” (Úku. 20:35).
21 Iásïjtu, orhejtsïkutiichaksï kánikua jánguarhintasïndi jarhuajpeni, nóksï ísïisti eskaksï relijioniiri orhejtsïkutiicha engaksï euakuarhiajka kʼuiripuechani sentabu paraksï imeecha riku úkuarhini. Kurhangusïndiksï eska Tata Diosï imeechani erakuaska paraksï exeani jarhani imeechani engaksï Tata Diosïiri kúnguarhikuarhu jaka. Ka no interesi jimboksïsï ísï újti, kúnguarhikuarhu no nema jatsisti para jarhani enga kʼéramakuarhijka ka enga tsitijka sánderu ambe jatsini, jimboka ima enga jirinhani jarhajka kʼéri ambe exenhani, kánikua no sési kʼamarhukusïndi. Jo, ima enga kʼéramakuarhijka tátsekua niárasïndi kánikua kʼuratsekua jingoni pakarani (Prov. 11:2; 25:27).
“Iáminduechaksï pʼiáraspti uerani” (Úkuecha 20:37).
22. ¿Andiksïsï xáni xéncheeni Pabluni Éfesu anapu orhejtsïkutiicha?
22 Apostoli Pablu kánikua xénchaasïreendi erachiichani, jimboksïsï erachiichajtu kánikua xéncheendi. Ísï jimbo, enga uandanukuarhintani japka, “iáminduechaksï pʼiáraspti uerani ka kamajchakusptiksï Pabluni ka uékperakua jingonksï putinharhikuspti” (Úku. 20:37, 38). Jucha engaksï kristianueka, májkuenchi jukaparharaasïnga ka xénchaani imeechani engaksï ísïika eska Pablu ka támuksï peerani imeecheeri ambe paraksï exeani jarhani Tata Diosïiri karichiichani. I ambe engachi exeka, xarhatasïndi eska Pablu no kʼéramakuarhixapka ka nijtu jukari ambe uandani japi enga uandapka: “Ji no kulpa jatsiska enga nema niáraska uarhini” (Úku. 20:26).
a Exe je rekuadruni “ Karakateecha enga Pablu Masedonia karaapka”.
b Jamberi jiáni karapti karakatani para Roma anapuecha.
c Exe je rekuadruni “ Pablu íntspintasïndi sentabu”.
d Antesi, tsimani jurhiatikua jimbojkuksïsï niárapti Troasi Filipusï uératini, joperu iásïksï sinko jurhiatikua jimbo niárasptia, jamberi jimboka kánikua tarhiaxapka (Úku. 16:11).
e Úkuecha 20:5, 6 jimbo, Lukasï ménderu kuenta úkuarhisïndi enga uandantani jarhajka ambe enga úkurhipka. I ambe xarhatasïndi eskaksï Pablu jingoni Filipisï exejperantaspka nani enga antesi jurajkupka Pablu (Úku. 16:10-17, 40).
