KAPITULU 14
“Iáminduechachi sési exeska”
Primeru siglurhu anapu kuerpu gobernanti úsïndi ambe ma enga újka eska kúnguarhikuecha sánderu májku kʼéri jauaka
Pʼitakata jarhasti Úkuecha 15:13-35
1, 2. a) ¿Náki kurhamarhikuechanksï jatsiaspi para mókuantani kuerpu gobernanti primeru siglurhu anapu? b) ¿Náki jarhuajperataksï jatsispi paraksï ambakiti ambe erakuni úni?
APOSTOLIICHA ka orhejtsïkutiichaksï tánguarhintatixati kʼumanchikua ma jimbo Jerusaléni, iáminduechaksï jingontku jarhasti ambe engaksï erakuaka úni. Jandoreestia parakaksï uandaaka ambeksïsï uaa ka kánikua jukaparhakuesti. Apenasiksï kʼamakusti exeni sirkunsisioniiri ambe ka kurhamarhikuarhinksï: ¿Kristianuechaksï jatsiski para seguiriini kurhajchani Moisésiiri Leini? ¿Jatsiskiksï para ménderueni kánhani kristianu judiuechani ka imeechani engaksï no judiueka?
2 Íksï erachiicha engaksï orhejtsïkujka uánikua ambeksï exestia, komu profesiechani engaksï Bibliarhu jaka ka ístuksï kurhauastia máru erachiichani engaksï uandantaka eska Tata Diosï Jeoba jiókuarhiaxakaia imeechani engaksï no judiueka. Exestiksïa iámindu ambe. Uánikua pruebeechanksï jatsiastia, ka Tata Diosï Jeobaeri espiritu exeraaxati ambeksïsï jatsi para úni. Joperu ¿ísïksï uaa?
3. ¿Nénajtsïni uaa marhuacheni engachi jorhenguarhiska Úkuecha kapitulu 15?
3 Apostoliicha ka orhejtsïkutiichaksï jatsisti para kánikua balori jukani ka mintsikani paraksï ísï úni eska espiritu santu na arhiani jaka. ¿Andi? Jimbokaksï relijioniiri orhejtsïkutiicha uaaka no sési kaani. Ka ístuksï kúnguarhikuarhu jarhasti máru erachiicha engaksï afuersa uéjka eskaksï máteruecha uaaka ambe enga Moisésiiri Lei uandajka. ¿Jiájkani ambe uaa kuerpu gobernanti? Exeakachi ambe engaksï úpka ka ístuchi jorhenguarhiaka na enga iásï májkueni újka Grupu enga Orhejtsïkuajka iámindu kúnguarhikuechani. I ambejtsï ístu jarhuataati iámindu kristianuechani parachi ambakiti ambe erakuni úni ka orhepani uérani engachi uandanhiata ambe jatsiaka.
“Inde ambe terukuntasïndi imani ambe jingoni engaksï profeteecha uandapka” (Úkuecha 15:13-21, nota)
4, 5. ¿Náki profesia uandaspi Santiagu para jarhuataani erachiichani paraksï sési peentani uandanhiatani?
4 Jiájkani ueenaspti uandani Santiagu enga jindeepka Jesúsiiri mediu ermanu. a Ambe enga uandapka, xarhatasïreendi ambe enga kuerpu gobernanti pakatperapkia. Ísï ueenasïndi uandani: “Erachiicha, kurhaa je ambe engaksïni arhiaka. Simeóntsïni iámindu ambe aiangustia na enga Tata Diosï ueenapka jaiapanheantani no judiuechani para iretani ma erakuni enga imeeri nombrini paaka. Ka inde ambe terukuntasïndi imani ambe jingoni engaksï profeteecha uandapka” (Úku. 15:14, 15, nota).
5 Ambe enga Pedru, Bernabé ka Pablu uandapka, úpti eska Santiagu miántaapiringa máru tekstuechani enga jarhuataapka erachiichani paraksï kurhanguni ambesï uékeeni Tata Diosï Jeoba eskaksï úpiringa (Juanu 14:26). Santiagu uandaspti eska ambe engaksï imeecha uandapka terukuntasïreenga “imani ambe jingoni engaksï profeteecha uandapka”, ka tátsekua uandaspti ambe enga Amos 9:11, 12 arhijka. I libru jimini jarhasti Karakateecharhu engaksï Ebreu jimbo Karanhaka ka kuenta úkuarhisïndi imani partirhu enga ísï mítekateeka komu “Profeteecha” (Mat. 22:40; Úku. 15:16-18). Enga Santiagu úrapka Amos 9:11, 12, sánisï ménderueni arhisïndi indeni Bibliarhu engachi jucha úrajka, jamberi jimboeti jimboka ima Septuagintani úraspka, Karakata Ebreu enga griegu jimbo tradusirinhantaka.
6. ¿Néna jarhuataaspi Tata Diosïiri Karakata paraksï úni sánderu sési kurhanguni sirkunsisioniiri ambe?
6 Profeta Amósini úraparini, Tata Diosï Jeoba uandaspti eska ménderu jauatantapiringa Dabidiiri kʼumanchikuani jimboka indeni familia jimbosï jupiringa Mesíasi enga juramupiringa Reinurhu (Ezeq. 21:26, 27). ¿Inde ambe arhikuekaxapi eska Tata Diosï Jeoba ménderu sési pájperantapiringa ireta Israeli jingoni? Nómbe. Jimboka profesia uandasïreenga eska grupu ma japiringa “iámindu imani kʼuiripuechani jingoni engaksï no judiueka” ka i grupu Tata Diosïiri nombrini pápirindi. Ístu Pedru apenasi kʼamakusti uandani: “Ima [Tata Diosï Jeoba] májkueni kaasti imeechani [kristianuechani engaksï no judiueka] ísï eskajtsïni juchantsïni [kristianuechani engachi judiueka] na kámaka ka pímbinhajkuantasti imeecheeri mintsiteechani jimbokaksï mintsikaska” (Úku. 15:9). I ambe arhikuekasïndi eska Tata Diosï Jeoba uékasïnga eskaksï judiuecha ka ístu no judiuecha juramuaka Reinurhu (Rom. 8:17; Efes. 2:17-19). Íksï profesiecha no uandasïndi eska paraka kʼuiripu ma úpiringa inchani Tata Diosïiri Reinurhu jatsispka para sirkunsidarikuarhini o judiu úkuarhini.
7, 8. a) ¿Ambe uandaspi últimu Santiagu? b) ¿Andichisï míte eska ima no uékasïreenga eska ísï úkuarhipiringa ambe ma eska ima na uékeenga?
7 Engaksï na exepkia ambe enga uandajka Tata Diosïiri Karakata ka ambe engaksï uandantapka máru erachiicha, Santiagu ini ambe uandaspti: “Ísï jimbo, ji exesïnga eskachi no jatsiska para pʼínguani jarhani imeechani engaksï no judiueka ka engaksï andarhientani jakaia Tata Diosïni. Sánderu sési, ju je karakuani eskaksï no jámaaka jiókuarhini ima ambe engaksï diosï úkateechani kéjtsïtakuajka, eskaksï no jámaaka ísku jándikua ambe niátani, eskaksï no auantauaka imani animaliichani engaksï pirajchakukateuaka ka ístu eskaksï no jámaaka jiókuarhini iurhiri. Ka iónisïistia engaksï mándani ireta jimbo jaka kʼuiripuecha engaksï uandantajka ambe enga Moisési karaka, jimboka jima engaksï judiuecha tánguarhijka para Tata Diosïni kómarhini, mándani sábadu arhikuarhintasïnga ambe enga Moisési karaka” (Úku. 15:19-21).
8 Enga Santiagu uandapka “ji exesïnga”, ¿arhikuekaxapi eska ima jatsispka juramukua o eska úkuarhipiringa ambe enga ima uandapiringa nomasi jimboka ima orhejtsïkuxapka tánguarhikuani? Nómbe. Santiagu solu uékasïreendi eskaksï erachiicha imani ambe úpiringa ambe engaksï uandeenga Karakateecha ka ístu ambe engaksï xarhatani japka erachiicheeri eksperiensiecha.
9. ¿Andisï sési japi ambe enga Santiagu uandapka?
9 ¿Sési jarhaspi ambe enga uandapka Santiagu? Jo. Jimbokaksï apostoliicha ka orhejtsïkutiicha sési exespka. ¿Néna marhuakuapirini? Orheta jimboka jarhuatapiringa imani kristianuechani engaksï no judiuepka paraksï no afuersa úni ambe enga Moisésiiri Lei uandeenga (Úku. 15:19). Segundu, jimboka respetarisïreenga kristianu judiuecheeri konsiensiani, Jimbokaksï imeecha iónisï kurhaaspkia ambe enga Moisési karapka, ‘jimboka jima engaksï judiuecha tánguarhienga para Tata Diosïni kómarhini, mándani sábadu arhikuarhintasïreenga ambe enga Moisési karapka’ (Úku. 15:21). b Terseru, jarhuataapirindi parakaksï kristianu judiuecha ka ístu kristianu no judiuecha sési pájperapiringa. Ka ístu kánikua sési jarhaspti jimboka Tata Diosï Jeoba jaiapanhentaxapka indeni ambe ka xarhataxapti eska ima ambe úkuarhixapka ambe enga ima uékeenga. Xáni ambakiti ambe engaksï úpka paraksï sési peentani uandanhiatani enga úpiringa arhukuni Tata Diosïiri iretani. Ambakiti ejemplu máesti para iásï anapu kúnguarhikua.
Erachi Albert Schroeder kʼéri tánguarhikua internasionalirhu ma 1998 jimbo.
10. ¿Néna májkueni úxaki iásï Grupu enga Orhejtsïkuajka iámindu kúnguarhikuechani ísï eskaksï na uaxastaka apostoliicha ka orhejtsïkutiicha primeru siglurhu anapuecha?
10 Máteru kapitulu jimbo, exeskachi eska májkueni eskaksï apostoliicha ka orhejtsïkutiicha na ueenga primeru siglurhu, Grupu enga Orhejtsïkuajka iámindu kúnguarhikuechani Jeobaeri testiguecheeri, méntkisïksï Tata Diosï Jeobaeri jarhuajperata jirinhantasïndi ka tata Jesukristueri enga orhejtsïkujka kúnguarhikuani (1 Kor. 11:3). c ¿Néna úsïni? Erachi Albert Schroeder uandaspti: “Grupu enga Orhejtsïkuajka iámindu kúnguarhikuechani mándani mierkulisï tánguarhintasïndi. Ueenakuarhisïndi kómarhikua ma jingoni ka kurhakusïndi Tata Diosï Jeobani eska íntsauaka imeeri espiritu santu paraksï exeni ambeksïsï uaa. Jánguarhintasïndiksï eska ima ambe enga jima uandanhajka ka erakunhani terukuntaaka Tata Diosïiri Karakata jingoni, Biblia”. I erachi desde 1974 asta enga na kʼamarapka imeeri tsípikua ixú Echerirhu marsu de 2006 jimbo kuenta úkuarhispti Grupurhu enga Orhejtsïkuajka iámindu kúnguarhikuechani. Ka ístu sáno májkueni uandaspti Milton Henschel enga ístu uánikua uéxurhini japka Grupurhu enga Orhejtsïkuajka iámindu kúnguarhikuechani asta marsu de 2003 jimbo enga na kʼamarapka imeeri tsípikua ixú Echerirhu. Ima ambakiti kurhamarhikua ma úkuaspti imeechani engaksï klase 101 jimbo nípka Galaadirhu. Kurhamarhiaspti: “¿Jaki kúnguarhikua ma ixú echerirhu enga méntkisï úrajka Tata Diosïiri Karakatani, Bibliani, ante de erakuni úni ambe ma?”. Nómbe.
“Erakuasptiksï máru achamasïichani paraksï [...] axaani” (Úkuecha 15:22-29)
11. ¿Nénaksï aianguaspi iámindu kúnguarhikuechani ambe engaksï erakupka úni?
11 Iámindu apostoliicha ka Jerusaléni anapu orhejtsïkutiichaksï erakuspti ambe úni sirkunsisioni jingoni. Joperu parakaksï iápurisï anapu erachiicha májkueni ambe úpiringa, jatsisptiksï para nirani ka iatsitakuarhu aianguani ka ístu uékperakua jingoni. ¿Nénaksï ísï úpirini? Biblia arhisïndi: “apostoliicha ka orhejtsïkutiicha ka ístu iámu kúnguarhikuarhu anapuecha, erakuasptiksï máru achamasïichani paraksï Antiokía axaani Pablu ka Bernabé jingoni. Ka Judasïnksï axaspti, engaksï ístu arhienga Barsabási, ka ístu Silasini, íksï achamasïicha kʼéri ánchikuarhita ma jatsispti kúnguarhikuarhu”. Ístu, karasptiksï karta ma parakaksï imeecha arhintapiringa Antiokía, Siria ka Silisia anapu kúnguarhikuecharhu (Úku. 15:22-26).
12, 13. a) ¿Andisï sési japi engaksï Judasï ka Silasini axapka kúnguarhikuecharhu? b) ¿Néna jarhuajpespi karta engaksï apostoliicha ka orhejtsïkutiicha axapka?
12 Judasï ka Silasi, jindeesptiksï achamasïicha engaksï kʼéri ánchikuarhita ma jatsipka kúnguarhikuarhu, jimboksïsï indeecha erakunhapti paraksï aianhpini ambe enga kuerpu gobernanti erakupkia úni. Engaksï tʼámu achamasïicha nípka indeni ambe aianhpini kúnguarhikuecharhu, sési jimbo xarhataxapti eska juramukua máespka kuerpu gobernantiiri ambe ka ambe engaksï jatsipka para úni ka no solu sirkunsisioniiri ambejkuni. Engaksï Judasï ka Silasini nípka, jarhuajpepirindiksï paraksï Jerusaléni anapu kristianuecha sánderu sési pájperani imani kristianuecha jingoni engaksï no judiuepka. Xáni engaksï jánhaskakua ka uékperakua jingoni úpka ambe ma, jimboka jarhuataspka Tata Diosïiri iretani pínandikua jatsini ka eskaksï iáminduecha májku kʼéri japiringa.
13 Karta sési uandasïreendi ambe engaksï jatsipka para úni kristianuecha engaksï no judiuepka. No solu uandasïreendi sirkunsisioniiri ambe, sino ístu ambe engaksï jatsipiringa para úni paraksï sési pájperani Tata Diosï Jeoba jingoni ka para ima újchakuraani. Karta arhisïreendi: “Espiritu santu ka juchajtuni sési exeska nóteruksïni xáni úkua ambe jatsikuchenia, i ambejku engajtsï kʼóru jatsika para úni: eskajtsï no jámaaka jiókuarhini ima ambe engaksï diosï úkateechani kéjtsïtakuajka, nijtu iurhiri, eskajtsï no auantauaka imani animaliichani engaksï pirajchakukateuaka ka eskajtsï no jámaaka ísku jándikua ambe niátani. Ka engajtsï chá méntku no jiókuarhiaka ini ambe, kánikuaksïni sési nicheati. ¡Eskajtsï sési jámani jauaka!” (Úku. 15:28, 29).
14. ¿Nénachi úsïni xáni sési pájperani nájkiruka ini parhakpinirhu mámaru ambe úkuarhini jaka ka kʼuiripuechaksï mámaru ambe eratseni?
14 Ini jurhiatikuecha jimbo, jukari 8,000,000 Jeobaeri testiguecha engaksï marhuani jaka jukari 100,000 kúnguarhikuecharhu iámu parhakpinirhu, májkuenksï ambe jorhenguarhisïndi ka májku kʼériksï úkuarhintatixati. ¿Nénachi úsïni xáni sési pájperani nájkiruka ini parhakpinirhu mámaru ambe úkuarhini jaka ka kʼuiripuechaksï mámaru ambe eratseni? Jimboka tata Jesukristu orhejtsïkuxaka ini kúnguarhikuani ka imajtsïni jarhuatasïndi. Ka i ambe xarhatasïndi eska ima úraxaka jántspirini “enga mintsinharhikueka ka jánhaskatiini”, enga jindeeka Grupu enga Orhejtsïkuajka iámindu kúnguarhikuechani, parajtsïni arhistachini ambe engachi jatsika para úni (Mat. 24:45-47). Ka juchachi tsípikua jingoni úsïnga ambe engajtsïni ima arhistachijka.
“Kánikuaksï tsípispti engaksï xáni sési arhinhapka” (Úkuecha 15:30-35)
15, 16. ¿Nénaksï exespi kúnguarhikuecha ambe enga uandapka kuerpu gobernanti eskaksï úpiringa, ka andi?
15 Libru Úkuecha uandasïndi eska engaksï na niárapkia Antiokía Jerusaléni uératini, “jimaksï tánguarhintaspti iámindu chúxapatiichani jingoni ka íntsaantasptiksï imani karakatani”. ¿Náksï pʼikuarheraspi kúnguarhikuarhu anapuecha? “Engaksï na arhintapkia, kánikuaksï tsípispti engaksï xáni sési arhinhapka” (Úku. 15:30, 31). Ístu, Judasï ka Silasi “kánikuaksï sési pʼikuastaantaspti erachiichani jimbokaksï someni arhijtsïkuaspka ka ístuksï uinhaperaantaspti”. Jimbokaksï i tsimani erachiicha sési aianhpispka Tata Diosïiri ambe, Biblia uandasïndi eskaksï jindeespka “profeteecha”, májkueni eska Bernabé, Pablu ka máteru Tata Diosïiri marhuariicha (Úku. 13:1, nota; 15:32; Éx. 7:1, 2).
16 Ísïisti, Tata Diosï Jeoba újchakuraspti ambe enga kuerpu gobernanti erakupka úni ka kúnguarhikuechaksï kánikua uinhaperanhantaspti. ¿Andisï sési nikuapi? Jindeespti jimboka kuerpu gobernanti meru arhispka ambe engaksï jatsipka para úni ka meru jiáni enga uétarhini japka ka Tata Diosïiri Karakatarhuksï pʼitaspti ka ístu jimboka espiritu santu jarhuataaspka. Ka jimboka kuerpu gobernanti axaaspka máru erachiichani parakaksï uékperakua ka pʼamojperakua jingoni arhiapiringa kúnguarhikuechani ambe engaksï jatsipka para úni.
17. ¿Néna sáno májkueniiski ánchikuarhita engaksï sirkuitueri orhejtsïkutiicha újka ísï eska Pablu, Bernabé, Judasï ka Silasi na úpka?
17 Ístu ini jurhiatikuechani jimbo, Grupu enga Orhejtsïkuajka iámindu kúnguarhikuechani Jeobaeri testiguecheeri jarhuataaxati iápuru anapu erachiichani. Engaksï erakujka ambe ma úni, sésiksï aianguasïndi kúnguarhikuechani ambe engaksï jatsika para úni. Ménisï sirkuitueri orhejtsïkutiichani úraasïndi. Íksï erachiicha nirasïndi mándani kúnguarhikuarhu paraksï arhistakuani ka uinhaperantaani kúnguarhikuarhu anapuechani. Íksï erachiicha májkueni úsïndi eskaksï Pablu ka Bernabé engaksï kánikua tiempu úreenga paraksï uánikua erachiichani jingoni jámani “jorhentpini ka uandantani ambakiti aianhperakuani Tata Diosï Jeobaeri uandakueri ambe” (Úku. 15:35). Ístu, májkuenksï úsïndi eska Judasï ka Silasi engaksï ‘kánikua sési pʼikuastaantapka erachiichani jimbokaksï someni arhijtsïkuaspka ka ístuksï uinhaperaantani’.
18. ¿Ambe jatsiski para úni Tata Diosïiri ireta paraka ima seguiriini jauaka újchakurani?
18 ¿Ambe úkuarhixaki kúnguarhikuecharhu iámu parhakpinirhu? ¿Andiksïsï újki pínandikua jatsini ka sésiksï pájperani nájkirukaksï parhakpinirhu anapuecha no újka ísï úni? Ju je miáni ambe enga karapka Santiagu: “Ima kʼuiripu enga Tata Diosïiri jánhaskakua jatsika, pímbinhasï irekua ma jatsisti ka ístu jánguarhintasïndi iáminduecha jingoni sési pájperani, kurhangutspisïndi, kurhandirasïndi [...]. Ístu, imeecha engaksï jánguarhintajka máteruecha jingoni sési pájperani, jarhuajpesïndiksï para pínandikua jarhani ka sésiksï jámasïndi engaksï ísï újka” (Sant. 3:17, 18). Enga Santiagu karaapka ini uandakuechani, ¿mítepi ambe enga úkuarhipka tánguarhikuarhu Jerusaléni máru uéxurhiniichani antesi? Nóchi uaaka míteni. Peru ambe engachi kʼóru míteka jindeesti ambe enga xarhatajka Úkuecha kapitulu 15. Parachi úni jatsini Jeobaeri kóntperatani, jatsiskachi para májku kʼéri jarhani ka úni ambe engajtsïni arhistachijka imeecha engajtsïni orhechepajka.
19, 20. a)¿Nénachi míteski eskaksï Antiokía anapu erachiicha ménderu uéntaspka pínandikua jatsini ka sésiksï pájperani? b) ¿Ambeksï úpirinia úni iásï Pablu ka Bernabé?
19 Engaksï Antiokía anapu erachiicha kurhaapka ambe enga kuerpu gobernanti uandapka eskaksï jatsispka para úni, ménderuksï niáraspti pínandikua jatsini ka sésiksï pájperani. Sésiksï jiókaaspti erachiichani engaksï Jerusaléni uératini jupka. Kánikuaksï tsípispti enga Judasï ka silasi nípkaksï pʼorhembiani. Ísï jimbo, engaksï ióni sáni jima pakarapkia, “tátsekuaksï erachiicha uandanuantaspti ka imaksï Jerusaléni kʼuanhatsentaspti” (Úku. 15:33). d Engaksï Judasï ka Silasi na niántapkia Jerusaléni, jima anapuechaksï kánikua tsípispti kurhaani na enga nikuapka. ¡Tata Diosï Jeobaeri jarhuajperata jingoni, iámindu ambe sési uéraspti!
20 Pablu ka Bernabé Antiokíaksï pakaraspti ka jiáni uératinksï seguiriixapti jarhuataani kúnguarhikuechani paraksï sánderu aianhpini (Úku. 13:2, 3). Ka ini ambeksïsï újti sirkuitueri orhejtsïkutiicha engaksï nirajka kúnguarhikuechani pʼorhembiani. ¡Xáni kʼéri kóntperata ma enga Tata Diosïiri ireta jatsiaka ini járhati erachiichani! ¿Peru néna seguiriispi úraani Tata Diosï Jeoba ini tsimani aianhpiriichani? Máteru kapitulu jimbochi exeaka.
Iásï Grupu enga Orhejtsïkuajka iámindu kúnguarhikuechani ka imeeri jarhuajpiriicha, jarhuatasïndijtsïni parachi sánderu andarhierani Tata Diosïni.
a Exe je rekuadruni “ Santiagu ‘enga Tateeri ermanu jémbeeka’”.
b Santiagu jánhaskua jingoni úraaspti Moisésiiri karakateechani. Ka iichaksï no solu arhisïndi ambe enga Lei uandajka, sino ístu ambe enga uéjka úni Tata Diosï, ka ístu uandantasïndi na enga pájpereenga Tata Diosï imeeri marhuariichani jingoni ante de Lei jarhani. Pori ejemplu libru de Génesis jimbo arhisïndi na enga exejka Tata Diosï Jeoba iurhirini, ísku jándikuani ka ístu para diosï úkateechani kómarhiani (Gén. 9:3, 4; 20:2-9; 35:2, 4). Tata Diosï Jeoba iámindu kʼuiripuechani íntsaasti prinsipiuechani engaksï jatsika para kurhajchaani, na uéjkiksï judiueni o nómbe.
c Exe je rekuadruni “ Néna organisadu jarhaski grupu enga orhejtsïkuajka iámindu kúnguarhikuechani”.
d Bersikulu 34 jimbo, máru engaksï Bibliani tradusiriintaka jatsikuastiksï uandakuechani para ísï kurhangukuarhini eska Silasi Antiokía pakaraspka (Reina-Valera). Joperu xarharasïndi eskaksï i uandakuecha ísï tátsekua jatsikunhaspka enga na libru Úkuecha kʼamaranhapkia karanhani.
