1-3. ¿Náki jánhaskuani exesïni Pedru ka andisï xáni jukaparhakue eskachi míteaka ambe enga arhikuekajka?

 Otoniurhu uéxurhini 36 jimbo, Pedru kʼumanchikuarhu ma jarhasti karhakua, marirhu no iauani, iretarhu ma enga Jope arhinhajka ka jima kómarhixati. Uánikua jurhiatikuechani páxatiia jima pakarani, i ambe xarhatasïndi eska ima no nemani menusi úsïnga. ¿Andichisï ísï uandajki? Jimboka Simóniiri kʼumanchikuarhu pakaraxaka, achamasï ma enga sïkuiri jingoni ánchikuarhijka. a Ka ísï jimbo, no ma judiu jima pakarapirindi Simóni jingoni, joperu Pedru jorhenguarhiati eska Tata Diosï Jeoba iáminduechani májkueni kaasïnga.

² Enga Pedru kómarhini japka, ima úndaspti jánhaskua ma exeni, enga judiu ma ini ambe exepiringa kánikua chérakuarhepirindi. Exesïndi uekorheni jarhani auandarhu uératini komu sábaneeni jásï ma ka jimaksï mámaru járhati animaliicha jarhaspti engaksï no pímbinharhatiipka leini jimbo. Jiájkani uandakua ma kurhaakuarhisïndi enga arhijka Pedruni eska uándikuaka ka eska auantauaka, joperu Pedru no uékasïndi auantani, ima uandasïndi: “Ji no méni arhaxaka imani ambe engani no jatsika para arhani o imani ambe enga no pímbinhasï jaka”. Jiájkani tanimu xanhari kurhaakuarhisïndi eskaksï arhisïnga Pedruni: “Ásteru uandaia eska no pímbinhasï jarhaska ima ambe enga Tata Diosï pímbinhajkuntakia” (Úku. 10:14-16). Inde ambe ísku pakatasïndi Pedruni, joperu no ióndaati kurhanguni ambe arhikuekasïni i ambe.

 ³ ¿Ambe arhikuekasïreeni Pedrueri jánhaskakua? Parachi míteni, jatsiskachi para exeni ambe engaksï arhijka máteru karakateecha. Kánikua jukaparhakuesti eskachi kurhanguaka ambe enga arhikuekajka, jimboka i jánhaskakua xarhatasïnga na enga exeajka Tata Diosï Jeoba kʼuiripuechani. Ka engachi uéjka iámindu ambe sési aianhpini Tata Diosïiri Reinueri ambe, jatsiskachi para májkueni eratseni eska Tata Diosï.

4, 5. ¿Neespi Korneliu ka ambe úkuarhispi enga ima kómarhini japka?

⁴ Pedru no mítespti eska Sesarea, enga ma 50 kilometrisï (30 miia) iauani japka Jope, jarhaspka máteru achamasï enga ma jurhiatikua antesi imajtu exepka jánhaskua ma. Korneliueri ambechisï uandani jaka enga Roma anapu sondaduechani orhejtsïkuauenga b ka “enga chénharhienga Tata Diosïni”. Ístu ambakiti ejemplu máespti para familieri orhejtsïkutiicha jimboka chénharhisïreenga Tata Diosïni “iámindu imeeri kʼumanchikuarhu anapuecha jingoni”. Nájkiruka i achamasï no niárapka judiu úkuarhini, jimboka no sirkunsidarikuarhespka, kánikua pʼamojperakua jingoni kaasïreendi judiuechani ka jarhuataasïreendi imani ambe jingoni engaksï uétarhincheenga. Ístu, “méntku kómarhini jarhasïreendi Tata Diosïni” (Úku. 10:2).

⁵ Ka inchatiru tresisï, Korneliu kómarhixapti ka exespti jánhaskua ma jimbo enga ánjeli ma arhipka: “Tata Diosï kurhaasïndi engari tʼu kómarhijka ka  ístu exesïndi na engari jarhuataajka imeechani engaksï no ma ambe jatsikuarheka ka miáni jarhasïndi ambe engari xáni újka” (Úku. 10:4). Tátsekua ánjeli arhisïndi Korneliuni eska axauaka máru achamasïichani paraksï nirani jirinhantani apostoli Pedruni ka ísï úsïndi. Ísï jimbo, Korneliu kurhaapirindia ambakiti aianhperakuani enga úpiringa pʼímutantani ka ima jindeepirindi primeru kʼuiripu no judiuecheeri enga ueenapiringa kristianu úkuarhini.

6, 7. a) Uandanta je ejemplu ma enga xarhatajka eska Tata Diosï mókuntasïnga engaksï kʼuiripuecha mintsita jingoni kómarhijka. b) ¿Ambechi uaa jorhenguarhini i eksperiensieri?

⁶ ¿Kurhaasïni Tata Diosï engaksï kʼuiripuecha mintsita jingoni kómarhijka? Jo, ísï nitamakuarhispti Albania anapu uarhiiti ma. Pirenchi ma enga kústapka imeeri puertarhu, aiakuspti rebista ma Aianhpiri enga uandeenga néna tʼarhexeraani sapiichani. c Ka uarhiiti arhispti: “Nóreni uaaka jakajkucheni, apenasi kʼamaraska kurhakuni Tata Diosïni eskarini jarhuataaka tʼarhexeraani juchiiti nanakeechani. Imakeni axasti, jimbokani meru ini ambesïni uétarhinchani jaka”. Ima uarhiiti ka imeeri sapiichaksï ueenaspti jorhenguarhini Biblieri ambe ka ísï tátsekua imeeri uámbajtu.

⁷ ¿Inde ejemplujkusï jaki? Nómbe, uánikua i járhati eksperiensiechaksï jarhasti interu parhakpinirhu ka no ísku jatinisï ísï úkuarhijti. Jimajkani, ¿ambejtsïni jorhendasïni? Orheta, eska Tata Diosï Jeoba mókuntasïnga engaksï kʼuiripuecha mintsita jingoni kómarhijka (1 Rey. 8:41-43; Sal. 65:2). Ka tsimani eskaksï ánjeliicha jarhuajpexaka aianhpikuarhu (Apok. 14:6, 7).

8, 9. ¿Ambe xarhatakuspi espiritu santu Pedruni, ka ambe úspi ima?

⁸ Enga útasï Pedru kʼumanchikuarhu karhakua japka, no jánhaskasïreendi ambesï úkuarhini japi ka méntku úndaxapti eratsentani ambe arhikuekasïreeni ima jánhaskakua. Ka jimajkuksï niáraspti ima achamasïicha enga Korneliu axaapka (Úku. 10:17). Pedru no uékaspti auantani animaliichani engaksï no pímbinharhatiipka leini jimbo, jiájkani ¿ambe úpirini? ¿Nipirini imani achamasïichani jingoni ka inchapirini imani kʼumanchikuarhu nani no judiu ma irekapka? Tata Diosï espiritu santu jimbo xarhatakuspti Pedruni ambe enga jatsipka para úni, ka arhispti: “¡Exe! Tanimu achamasïichaksïni jámaxati jirinhantani. Ísï jimbo, jauara, kétsenta ka ní imeecha jingoni jimbokani ji axaaska”  (Úku. 10:19, 20). Inde jánhaskakua enga Pedru exepka, jiáni enga sábaneeni jásï ma exepka, preparariispti paraka úpiringa ambe enga espiritu santu jimbo arhinhapiringa.

⁹ Jiájkani achamasïichaksï aianguspti Pedruni eska Korneliusï axaapka, jimboka ánjeli masï ísï arhipka Korneliuni. “Jimajkani Pedru arhiaspti eskaksï inchaakupiringa ka eskaksï jima pakarapiringa” (Úku. 10:23a). Pedru sánhani arhixapti kuenta íntskukuarheni ambesï uékeeni úni Tata Diosï, ísï jimbo, kurhajchaspti ka úndaspti ísï úni eska na arhinhani japka.

10. ¿Néna jarhuatasïni Tata Diosï Jeoba imeeri iretani ka ambechi jatsipirini para kurhamarhikuarhini?

¹⁰ Ini jurhiatikuechani jimbo, Tata Diosï Jeoba májkueni úxati imeeri iretani jingoni (Prov. 4:18). Imeeri espiritu santuni jingoni, jarhuatasïndi ‘jántspirini enga mintsinharhikueka ka jánhaskatiini’ (Mat. 24:45). Ísï jimbochisï ménichani sánderu sési kurhangujkia Biblieri tekstu ma, ochi ménderueni únia ambe ma. Enga ísï úkuarhijka, ju je kurhamarhikuarhini: “¿Ambe úsïni ji enga inde ambe úkuarhijka? ¿Tsípikua jingoni úsïni ambe enga espiritu santu uandajka?”.

11, 12. ¿Ambe úspi Pedru enga niárapka Sesarea ka ambe kurhanguspi?

¹¹ Ísï pauandikua enga Pedru na jánhaskakua exepka, niraspti Sesarea máteru nuebe achamasïichani jingoni, tanimu enga Korneliu axaapka ka seisi erachiicha jingoni engaksï judiuepka ka engaksï Jope irekani japka (Úku. 11:12). Korneliu uékaxaptiia exeni Pedruni, jimbosï ‘tʼuini tánaantaptia parienti jémbeechani ka amigu jémbeechani’, jamberiksï íjtu no judiuepti (Úku. 10:24). Enga Sesarea japkia, apostoli úspti ambe ma enga no méni eratsepka eska úpiringa, inchaakuspti kʼumanchikuarhu ma enga no judiu ma irekapka. Jimbosï ini ambe uandapti: “Chájtsï sési mítetixaka eska lei uandasïnga eska judiu ma no jatsiska para sési pájperani imani jingoni enga no judiueka o andarhierani. Joperureni Tata Diosï exerastia eskani no jatsiska para uandani eska kʼuiripu ma no pímbinhasï jarhaska” (Úku. 10:28). Iásï kʼóru Pedru kurhangusptia eska Tata Diosï no solu uékaxapka jorhendani ambe ka ambe úpirini arhani, sino eska no jatsispka para uandani eska kʼuiripu ma, o eskaksï no judiuecha, nóksï pímbinhasï jarhaska.

¹² Korneliueri kʼumanchikuarhu, iáminduechaksï tsípikua jingoni erokaxaptia Pedruni, jimbosï Korneliu uandapti: “Iásïchi iáminduecha ixú tánguarhintatixakaia Tata Diosïni japarini parachi kurhaani  ambe engakeni xáni Tata Diosï Jeoba arhika eskajtsïni aianguaka” (Úku. 10:33). Eranhaska je náchi xáni tsípipirini jucha engachi exentapiringa nemani enga ísï uékapiringa kurhaani Tata Diosï Jeobaeri ambe. Jiájkani, ¿ambe úspi Pedru? Ima ísï uandaspti: “Iásï kʼóruni sési míteskia eska Tata Diosï iáminduechani májkueni kaasïnga, ka eska jaiapanheantasïnga imeechani engaksï chénharhijka ka engaksï újka ambe enga sési jaka, nani uéjkiksï anapueni” (Úku. 10:34, 35). Pedru iásï kʼóru kurhangusptia eska Tata Diosï iáminduechani májkueni kaasïnga, no arhiparini na jásï kʼuiripueski o nani anapueski. Ísï jimbosï apostoli ueenapti aianguani ambe enga xáni úpka tata Jesukristu, ka ístu imeeri uarhikueri ka tsíntskueri ambe.

13, 14. a) ¿Andisï xáni jukaparhakuepi enga Korneliu Jesúsiiri chúxapati úkuarhipka ka ístu máteru no judiuecha uéxurhini 36 jimbo? b) ¿Andichisï no nemani jatsi para jusgariini?

¹³ “Enga Pedru útasï uandani japka”, ma repentku úkuarhispti ambe ma, “imeecha engaksï no judiuepka” espiritu santuksï intsïnhaspti (Úku. 10:44, 45). I ueltajkusï uandajti Bibliarhu eskaksï máru kʼuiripuecha espiritu santu intsïnhaspka ante deksï itsï atakuarhini. I ambe xarhataxapti eska Tata Diosï jaiapanheantaxapka imeechani engaksï no judiuepka, jimbosï Pedru uandapti eskaksï “itsï atanhapiringa” (Úku. 10:48). Ka enga i ambe úkuarhipka, Pedru ísï úraxapti terseru ka últimu iabeni “auandarhu anapu Reinueri” (Mat. 16:19). Jiáni uératini, iámindu imeecha engaksï  no judiuepiringa ka engaksï niárapiringa Jesúsiiri chúxapatiini, jatsipirindiksï sésikua paraksï auandarhu nirani. Ísï jimbo, uéxurhini 36 jimbo, kʼamaraspti ima tiempu engaksï judiuechajku jindeepka Tata Diosïiri ireta (Dan. 9:24-27).

¹⁴ Iámindu jucha engachi Tata Diosïiri ambe jámajka uandantani, míteskachi eska Tata Diosï “iáminduechani májkueni kaasïnga” (Rom. 2:11). ‘Ima uékasïndi eskaksï iámindu jásï kʼuiripuecha pʼímutanhantaaka’ (1 Tim. 2:4). Ísï jimbo, nóchi jatsipiringa para jusgariuani kʼuiripuechani. Juchaari ánchikuarhita jindeesti iámindu ambe sési aianguani Tata Diosïiri Reinueri ambe, iámu parhakpinirhu anapuechani, no arhiparini na engaksï xarharaaka, imeecheri rasa, nani engaksï anapueuaka o imeecheeri relijioni jimbo.

15, 16. ¿Ambeksï ueenaspi arhini Pedruni máru kristianu judiuecha, ka ambe arhiaspi Pedru?

¹⁵ Pedru kánikua tsípikua jingoni uékaxaptia nirani Jerusaléni para uandantani eskaksï no judiuecha jakajkuspkia Tata Diosïiri uandakuani. Joperu enga na niárapkia Jerusaléni, ueenasptiksï no sési arhini imeecha engaksï uandeenga eskaksï tatakeecha jatsispka para pasïri pʼikujtsïkunhani tsʼiuerakuani. Imeechaksï ikiaxapti ka arhisptiksï: “¿Andiresï niki pʼorhembiani imani achamasïichani engaksï no pʼikujtsïkujka pasïri tsʼiuerakuani ka andiresï imeecha jingoni tʼire?” (Úku. 11:1-3). Imeechaksï no no sési exesïreendi eskaksï no judiuecha niárapiringa Jesúsiiri chúxapatiini. Ambe engaksï no sési exeenga ,jindeespti eskaksï no ísï úxapka eska Moisésiiri Lei na uandeenga, eskaksï jatsispka para sirkunsidarikuarheni. I ambe xarhatasïreendi eskaksï uánikua kristianu judiuecha no úxapka jurajkuni Leini.

¹⁶ ¿Ka ambe arhiaspi Pedru? Úkuecha 11:4-16 uandasïndi tʼámu rasoniichani enga jimbo Pedru seguru japka eska Tata Diosï Jeobasï ísï uékapka: Orheta, Tata Diosïsï exerapti jánhaskakua ma (bersikuluecha 4-10). Tsimani, Tata Diosï Jeoba espiritu santu jimbosï ísï juramukupti (bersikuluecha 11, 12). Tanimu, ánjeli ma pʼorhembispti Korneliuni (bersikuluecha 13, 14). Tʼámu, no judiuechaksï intsïnhaspti espiritu santu (bersikuluecha 15, 16). Ka últimu Pedru ísï arhiaspti: “Enga Tata Diosï imeechantu íntsaaka indeni intsïmperakuani [espiritu santu] engajtsïni juchantsïni íntskuka, juchantsïni engachi jakajkuka tata Jesukristuni, ¿andisïni ji ójkutani japirini Tata Diosïni?” (Úku. 11:17).

17, 18. a) ¿Néna niáraspi tsʼéjkukua máeni para kristianuecha engaksï judiuepka ambe enga Pedru uandapka b) ¿Andisï no méntkisï fásilii májku kʼéri jarhani kúnguarhikuarhu ka náki kurhamarhikuechanchi úpirini úkuarhiani?

 ¹⁷ Engaksï na kurhajchapkia Pedruni, ima judiuechaksï jatsipirindi para exeni ambeksï úpirini: ¿mójtakurhipirinksï ka nóteruksï ísï exeapirinia eska antesi?, ¿sésiksï erokaapirini indeeni kʼuiripuechani engaksï no judiuepka ka engaksï apenasi itsï atakuarhipka? Karakateechaksï ísï uandasïndi: “Engaksï na kurhaapka ini ambe, imeechaksï nóteru ambe ma arhisptia ka kʼéri ambeksï arhispti Tata Diosïni. Uandasptiksï: ‘¡Jiájkani Tata Diosï sésikua íntsaaxati no judiuechani paraksï móantani ka paraksï tsípikua intsïnhani!’” (Úku. 11:18). Imeechaksï kurhanguspti, ka ísï jimbo, jarhuajpesptiksï para kúnguarhikuarhu iáminduechaksï sési pájperani.

¹⁸ Ini jurhiatikuechani jimbo, no méntkisï fásiliisïndi májku kʼéri jarhani. Jeobaeri marhuariichachi ‘iámindu kʼérati ireteecharhu anapuespka, iámindu kʼumanchikuecharhu anapueskachi, ireteecharhu ka táchani jásï idiomachi uandasïnga’, ísï jimbo uánikua kúnguarhikuecharhuksï erachiicha mámaru tʼarhexeranhasti, raseenksï ka pʼindekuechanksï jatsiani (Apok. 7:9). Sési japirindi eskachi kurhamarhikuarhipiringa: “¿Nóteruni sáni pʼikuarhinhesïnia juchiiti mintsitarhu parani menusi uaani máteruechani? ¿Eratsetixakia parani no jurajkuni eska ima ambe engaksï kʼuiripuecha eratsejka komu kʼéri pʼikuarherani juchaari paisi jimbo, rasa jimbo o pʼindekuecha jimbo uaaka eskani ji no májkueni káuaka erachiichani ka úni eska no májku kʼéri jauaka kúnguarhikua?”. Ju je miáni eska Pedru (enga jindeeka Sefasi) no sési úspka máru uéxurhiniichani tátsekua engaksï no judiuecha na niárapkia kristianu úkuarhini: úspti ambe engaksï máteruecha ueenga ka no májkueni kaaspti máteruechani, ka “jarhariaspti” imeechani engaksï no pʼikujtsïkuenga pasïri tsʼiuerakuani ka Pablu jatsispti para xukani (Gal. 2:11-14). Ísï jimbo, uétarhisïndi eskachi méntkisï jingontku jauaka parachi no menusi uaani máteruechani.

19. ¿Neechanksï ueenaspi predikarikuani Jesúsiiri chúxapatiicha Antiokía, ka ambe úkuarhispi?

¹⁹ Iásï engaksï mítepkia ambe enga uékeenga Tata Diosï, ¿Jesúsiiri chúxapatiichaksï ueenaspi aianguani no judiuechani? Jo. Ju je exeni ambe enga úkuarhipka ísï tátsekua Antiokía de Siria. d Ini ireta jimbo, uánikuaksï judiuecha irekaspti engaksï sési pájpereenga no judiuechani jingoni, ísï jimbo, sési jarhaspti para predikarikuani  no judiuechani. Ka jimaksï ueenaspti máru Jesúsiiri chúxapatiicha engaksï judiuepka predikarikuani imani “kʼuiripuechani engaksï griegu uandeenga” no arhiparini sinksï pasïri pʼikujtsïkusïreeni tsʼiuerakuani o nómbe (Úku. 11:20). Tata Diosï Jeobaeri jarhuajperata jimbo, “uánikua kʼuiripuechaksï ueenaspti jakajkuni” (Úku. 11:21).

20, 21. ¿Néna xarhataspi kaxumbikua Bernabé ka nénachi uaa májkueni úni jucha aianhpikuarhu?

²⁰ ¿Neechaksï jatsipirini para aianhpini Antiokía? Jerusaléni anapu kúnguarhikua Bernabéni axaspti, joperu ima exespti eska no úpiringa jandiajku úni imani ánchikuarhitani jimbokaksï uánikuecha uékasïreenga kurhaani ambakiti aianhperakuani. Ka enga úpiringa jarhuajpeni jindeepirindi Saulu, enga erakunhapiringa para apostoliini para jarhuataani iámindu iretarhu anapuechani (Úku. 9:15; Rom. 1:5). Bernabé no ikiaspti, sánderu sési, kaxumbitiispti ka exespti eska ima no úpiringa jandiajku úni imani ánchikuarhitani. Ima niraspti jirinhantani Pabluni Tarsu ka tátsekuaksï tsimarhani ma uéxurhini pakaraspti Antiokía de Siria paraksï uinhaperaantani chúxapatiichani (Úku. 11:22-26a).

²¹ ¿Nénachi uaa xarhatani eskachi kaxumbitiiska aianhpikuarhu? Jatsiskachi para miáni eskachi no iámindu ambe úsïnga úni. Jarhasti máru ambe engachi jorhenaka sési úni ka máru ambe nómbe. Pori ejemplu, uánikuaksï úsïndi sési aianhpini kʼumanchikuecharhu, joperuksï úkua jukanchasïndi pʼorhembiantani kʼuiripuechani o ueenani Biblieri ambe jorhendani nemani. Engachi uéjka jorhenguarhini sánderu sési aianhpini, ju je kurhajkuarhini jarhuajperata. Engajtsï ísï uaaka, sésiksïni nicheati ka tsípikua jingontsï aianhpiaka (1 Kor. 9:26).

22, 23. ¿Nénaksï xarhataspi uékperakua Antiokía anapu kristianuecha, ka nénachi májkueni úsïni iásï eskaksï ima kristianuecha?

²² “Ka Jesúsiiri chúxapatiichaksï Antiokía ueenaspti ‘kristianu’ arhinhani, jimboka Tata Diosï ísï uékaspka” (Úku. 11:26b). Inde nombri, enga Tata Diosï erakuka, sési pakarakuasïndi Kristueri chúxapatiichani, jimbokaksï ísï irekasïnga eska ima na jorhentpika. ¿Joperuksï no judiuecha ka judiuechaksï úpirini ísï uékperani komueska erachiicha? Jo, ju je exeni ambe enga úkuarhipka uéxurhini 46 jimbo jiáni enga kʼarhingua japka. e Imeecha engaksï no jatsikuarhienga, kánikuaksï kómu  nitamakuarhisïreendi, jimbokaksï no úsïreenga patsani sentabu o tʼirekua ambe. Ka uánikua kristianuecha engaksï judiuepka ka engaksï Judea irekapka, ini ambeksï nitamakuarhixapti. Engaksï Antiokía anapu erachiicha —judiuecha ka no judiuecha—, mítepka ini ambe, axakuasptiksï ambe ma paraksï jarhuataani (Úku. 11:29). ¡Kánikuaksï xénchaasïreendi!

²³ Ini jurhiatikuecha jimbojtu engachi mítejka eskaksï juchaari erachiicha no sési nitamakuarhini jarhasïnga, jánguarhintasïngachi jarhuataani, nájkirukaksï máteru paisirhu anapuejka. Grupuecha engaksï Beteliichani orhejtsïkujka, sóntkuksï uaasïndi grupuechani paraksï jarhuataani imeechani engaksï no sési nitamakuarhini jarhajka urakaniicha jimbo, jenchekua ambe jimbo, tsunamiicha jimbo o máteru ambe jimbo. Ini ambe úparini, xarhatasïngachi eskachi ísï uékperasïnga komueska ermanuecha (Juanu 13:34, 35; 1 Juanu 3:17).

24. ¿Nénachi xarhataa eskachi jukaparharasïnga imani jánhaskakuani enga Pedru exepka?

²⁴ Jurhimbiti kristianuechachi míteska na enga xáni jukaparhakueka inde jánhaskakua enga Pedru exepka Jope. Míteskachi eska Tata Diosï Jeoba iáminduechani májkueni kaasïnga ka uékasïndi eskachi iámindu ambe sési aianhpiaka Tata Diosïiri Reinueri ambe. Ísï jimbo, jatsiskachi para jánguarhintani paraksï iámindu járhati kʼuiripuecha, nani uéjkisïksï anapueni, na uéjki jásï irekuaksï jatsini, kurhauaka ambakiti aianhperakuani ka niáranksï jakajkuni (Rom. 10:11-13).