KAPITULU 1
“Ní je ka jorhendaa je [...] paraksï juchiiti chúxapatiini”
Ambe enga xáni uandajka Apostoliicheeri Úkuecha ka na enga xáni jukaparhakueka para jucha
1-6. Uandanta je eksperiensia ma na engaksï Testiguecha iápurisï aianhpijka.
REBECCA, uátsï máesti enga Ghana irekaka ka Jeobaeri testiguesti, kánikua tsitisïreendi Tata Diosï Jeobaeri ambe aianhpini eskuelarhu. Jimbosï méntkisï mochilarhu páuendi Biblieri anapu publikasionichani, ka méntkisï jánguarhintasïreendi aianhpini rekreu jimbo. Asta niáraspti jorhendaani máteruechani Biblieri ambe.
2 Isla ma jimbo jini Madagascari enga África jaka, temungurhiri ma engaksï prekursoriika, 25 kilometruksï (15 miia) xanharasïreendi paraksï jorhendaani máru kʼuiripuechani Biblieri ambe. Ka nirasïreendiksï imani ireta jimbo nájkiruka kánikua aparhikuarhienga.
3 Paraksï úni aianhpini jimeesïsï enga riu Paraguay ka Paraná jaka, Paraguay anapu Jeobaeri testiguecha ka máteru 15 paisirhu anapuecha, úsptiksï barku ma enga 12 kʼuiripu jatanhejka. I ambe jarhuataasïreendi aianhpiriichani paraksï Reinueri ambe aianhpini jimeesïsï.
4 Polo nortisï beranu jimbo, Alaska anapu Testiguechaksï jánguarhintasïreendi aianhpini. Jimboka imani mesiicha jimbo sánderu jorhepikuarhisïnga, kʼérati barkuechaksï niárasïreendi mámaru jásï kʼuiripuecha jingoni. Ísï jimbo, jimeesïsï engaksï barkuecha anhaxurhienga erachiichaksï karrituecha jingoni jarhasïreendi mámaru járhati publikasionicha jingoni ka mámaru jásï idiomecha jimbo. Ka paraksï úni imani isleechani jimbo aianhpini engaksï sánderu iauanisï japka, abioneta jimboksï nirasïreendi. Pori ejemplu, nirasïreendiksï aianhpini jima engaksï ari idiomeecha uandanhajka aleutiana, atabaskana, chimesiana ka koluchana.
5 Larry enga Texas (Estados Unidos) anapueka, ambakiti territoriu ma jatsispti: jima aianhpisïreendi engaksï jatiriicha kuidarinheenga. Nájkiruka aksidenti ma jimbo nóteru ueengia xanharani, no ísku jarhasïreendi. Aianguasïreendi máteruechani Reinueri ambe, ka eska mintsikasïreenga eska jimbanhi parhakpinirhu ima ménderu xanharaaka (Is. 35:5, 6).
6 Máru Testiguecha Myanmar (antesi Birmania) anapuecha, tanimu jurhiatikuaksï niraspti barku ma jimbo paraksï kʼéri tánguarhikuarhu ma jarhani enga paisirhu norterhisï úkuarhipiringa ka ireta Mandalay uératinksï niraspti. Jimbokaksï tsitisïreenga aianhpini, mámaru jásï Biblieri publikasionichanksï paaspti paraksï íntsaani imeechani engaksï barkurhu nirani japka. Ka nani enga barku anhaxurhienga, aianhpirichaksï kétsesïreendi paraksï sóntku etsakuani publikasionichani. Ka engaksï kʼuanhatsenteengia, ménderuksï úsïreendia aianhpini jimbokaksï máteru kʼuiripuecha jatasïreengia.
7. ¿Tata Diosï Jeobaeri marhuariichaksï néna aianhpisïni Reinueri ambe ka andiksïsï ísï újki?
7 I erachiicheeri ka pirenchiicheeri ejempluechaksï xarhatasïndi na engaksï Tata Diosï Jeobaeri marhuariicha aianhpini jaka Reinueri ambe iámu parhakpinirhu (Úku. 28:23). Aianguasïndiksï kʼuiripuechani kʼumanchikuecharhu, xanharuecharhu, karteecha ka telefonu jimbo. Ístuksï aianhpisïndi engaksï autobusirhu nirani jauaka, engaksï xanharani jauaka o engaksï mintsikuarhini jauaka ánchikuarhitarhu. Mámaru ambeksï úsïndi paraksï aianhpini Tata Diosïiri Reinueri ambe nani uéjkisï enga kʼuiripu jauaka (Mat. 10:11).
8, 9. a) ¿Andisï milagru máe enga iápurisï aianhpinhani jaka Reinueri ambe? b) ¿Ambechi kurhamarhikuarhisïni, ka ambechi uaa parachi mókuntani?
8 ¿Ka cháia? ¿Jindeeskijtsï ima uánikua aianhpiriicheeri engaksï aianhpini jaka jukari 235 paisiicha jimbo ka territoriuecharhu? Enga ísïika, chájtujtsï kánikua jarhuajpexaka paraka seguiriuaka aianhpinhani Tata Diosïiri Reinueri ambe interu parhakpinirhu. ¡Jatsiskachi para kánikua sési pʼikuarherani indeni ambe jimbo! Ambe engachi úni jaka Jeobaeri testiguecha ísïisti eska milagru ma. Nájkirukachi úkua jukanchani jarhajka ménisï, ojtsïni máru juramutiicha no sési kámani oksï uékani anhaxustani juchaari ánchikuarhitani, Testiguechachi úxaka eskaksï interu parhakpini anapuecha “iámindu ambe sési aiangunhaaka” Tata Diosïiri Reinueri ambe.
9 Engachi exejka ambe engachi xáni úni jaka juchaari ánchikuarhita jingoni, jamberichi kurhamarhikuarhijka: ¿andisï no nema újki pʼínguni, ni sikiera Noambakiti? Parachi mókuntani ini kurhamarhikuani, ju je miántani primeru siglurhu anapu ambe. Ka nóchka ini jurhiatikuechani jimbo, jucha Jeobaeri testiguecha, solu imani ánchikuarhitanisï seguiriini jaka úni enga jiáni ueenakuarhipka.
Kʼéri ánchikuarhita ma
10. ¿Náki ánchikuarhitani úspi Jesúsi, ka ambe mítespi indeni ánchikuarhiteeri ambe?
10 Tata Jesukristu enga kristianuecheeri kúnguarhikuani uaxastaka, kánikua jánguarhintaspti aianhpini ambakiti aianhperakuani, indeni ambesï sánderu jánguarhintapti úni. Jimbosï uandapti: “Jatsiska para máteru ireteecharhisï nirani aianhpini ambakiti aianhperakua Tata Diosïiri Reinueri, jimbokani inde ambesïni juka úni” (Luk. 4:43). Peru Jesúsi sési mítespti eska no úpiringa kʼamarani indeni ánchikuarhitani enga ueenapka, jimboka sánisï ante de uarhini, uandaspti eska “iámindu ireteecharhisï” aianhpinhapiringa ambakiti aianhperakua (Mar. 13:10). Jiájkani enga Jesúsi no kʼamarapiringa indeni ánchikuarhitani, ¿né kʼamarapirini ka néna?
“Ní je ka jorhendaa je iámindu ireteecharhu anapu kʼuiripuechani paraksï juchiiti chúxapatiini” (Mateu 28:19).
11. ¿Ambe arhiaspi Jesúsi eskaksï úpiringa imeeri chúxapatiicha, ka ambe aiakuaspi?
11 Enga Jesúsi na tsíntapkia, xarhakuaspti imeeri chúxapatiichani ka íntsaaspti ini ánchikuarhitani: “Ní je ka jorhendaa je iámindu ireteecharhu anapu kʼuiripuechani paraksï juchiiti chúxapatiini. Itsï ataa je Taatiiri, Uájpeeri ka espiritu santueri nombri jimbo. Jorhendaa je paraksï úni iámindu ambe engaksïni ji juramuchika. Ka miá je, ji chánksïni jingoni jauaka pauani pauani astaka nóteru ióni kueratani jauakia para kʼamajkunhani parhakpini” (Mat. 28:19, 20). Enga Kristu uandapka “ji chánksïni jingoni jauaka”, arhikuekaxapti eska jarhuataapiringa paraksï Reinueri ambe aianhpini ka chúxapatiichani uaani. Ka meruksï uétarhinchapirindi, jimboka arhiaspka: “Iámindu ireteechaksïni kurhunhiati jíndeni jimbo” (Mat. 24:9). Ka meru jiáni ante de auandarhu karhanchentani, ístu arhiaspti eskaksï jatsipiringa máteru ambe: espiritu santu enga íntsaapiringa uinhapikua paraksï úni aianhpini “asta jima jamberi enga sánderu iauaniika parhakpinirhu” (Úku. 1:8).
12. ¿Ambechi úpirini kurhamarhikuarhini, ka andisï xáni jukaparhakue míteani mókuntskuechani?
12 ¿Joperu ambeksï úspi apostoliicha ka primeru siglurhu anapu kristianuecha? ¿Úspiksï sési aianhpini Tata Diosïiri Reinueri ambe? ¿Jukaparharaspiksï imeecheeri ánchikuarhitani nájkirukaksï namunituepka ka no sésiksï kánhani? ¿Tata Diosï Jeoba jarhuataaspi ka ístu íntsaaspi espiritu santu? Mókuantauakachi ini ka máteru kurhamarhikuechani exeparini ambe enga karakata Úkuecha uandajka. Ka kánikua jukaparhakuesti ini ambe míteni. ¿Andi? Jimboka ísï eska Jesúsi na uandapka, i ánchikuarhita enga jindeeka aianhpini ka imeeri chúxapatiichani uaani jiáni jamberi úkuarhiati “astaka kʼamaraaka i tiempu”. Ísï jimbo, iámindu kristianuechachi jatsiska para úni ini ánchikuarhitani, asta iásï jamberi engachi últimu jurhiatikuechani jimbo irekani jaka. Jimbosï xáni jukaparhakueti eskachi exeaka ambe enga uandajka karakata Úkuecha.
Ambe enga uandajka Apostoliicheeri Úkuecha
13, 14. a) ¿Né karaspi libru Apostoliicheeri Úkuecha, ka néna mítespi ambe karani? b) ¿Ambeeri ambe uandasïni Úkuecha?
13 ¿Né karaspi ini libruni? Nájkiruka imeeri nombri no karakata jaka indeni librurhu, na enga ueenajka xarhatasïndi eska Lukasï karaspka (Luk. 1:1-4; Úku. 1:1, 2). Desde iónisïa, uandanhasti eska ini karakatani Lukasï karaska, doktori “engachi xáni xénchajka”, ka ístu istoriadori máespti enga jánguarhinteenga sési sési míteni ambe ma (Kol. 4:14). I libru uandantasïndi ambe enga úkuarhipka ma 28 uéxurhini jimbo: ueenasïndi uéxurhini 33 jimbo enga Jesúsi auandarhu karhanchentapka, ka kʼamarasïndi uéxurhini 61 jimbo enga Pablu Roma ónhakata japka kʼumanchikua ma jimbo. Uánikua ambe enga karakata Úkuecha uandajka xarhatasïndi eska Lukasï exespka, jimboka ménisï enbesi de uandani imeecha, someni ísï kurhangukuarhisïndi eska imajtu jima jarhasïreenga enga ambe ma úkuarhienga (Úku. 16:8-10; 20:5; 27:1). Ka jimboka Lukasï uékasïreenga sési míteni iámu ambe, jamberi meru imeechani kurhamarhiapti engaksï exepka iámu ambe, komu Pabluni, Bernabéni, Felipeni ka ístu máteruechani ante de karani libruni.
14 ¿Ambeeri ambe uandasïni Úkuecha? Enga Lukasï imeeri Ebanjeliuni karapka uandantasïndi ambe enga xáni úpka ka uandani Jesúsi, joperu Úkuecha jimbo, sánderu uandasïndi Jesúsiiri chúxapatiicheeri ambe. Jiájkani uaachi uandani eska i libru kʼuiripuecheeri ambe uandasïnga engaksï kʼéri ánchikuarhita ma úpka, nájkirukaksï parhakpinirhu “ísïipka eska náki uéjki kʼuiripu ma ka nájkirukaksï no ióni jámapka eskuela” (Úku. 4:13). I libru uandantasïndi na enga uaxastanhapka kúnguarhikua ka na enga sánhani arhini japka sánderu uánikuecha kristianu úkuarhini. Ístu uandantasïndi ambe engaksï úreenga primeru siglurhu anapu kristianuecha paraksï aianhpini ka na engaksï ueenga (Úku. 4:31; 5:42). Ístu xarhatasïndi na enga jarhuataani japka espiritu santu paraksï iápurisï aianhpini ambakiti aianhperakuani (Úku. 8:29, 39, 40; 13:1-3; 16:6; 18:24, 25). Ístu, ménderu ueenasïndi uandani ambe enga Biblia sánderu uandajka: eska imani Reinuni jimbo enga Kristu juramutiika pímbinhajkunhantaaka Tata Diosïiri nombri. Ka últimu uandantasïndi na engaksï Jesúsiiri chúxapatiicha aianhpipka Reinueri ambe nájkirukaksï xáni no sési kánhapka (Úku. 8:12; 19:8; 28:30, 31).
15. ¿Nénajtsïni jarhuataa sési jorhenguarhini ambe enga arhijka libru Úkuecha?
15 Ísïisti, míteni ambe engaksï xáni úpka Kristueri chúxapatiicha primeru siglurhu, jukaparhakuesti ka marhuasïndi, jimbokajtsïni jarhuatasïnga parachi sánderu mintsikani Tata Diosïni. Ístu na engaksï xáni balori xarhatapka, mintsikani Tata Diosïni ka jánguarhintani aianhpini, jarhuataatijtsïni parachi juchajtu májkueni uékani úni. Ísïchi uaaka sánderu sési preparadu jarhani para indeni ánchikuarhitani úni engajtsïni Jesúsi íntskuka: “Ní je ka jorhendaa je [...] paraksï juchiiti chúxapatiini”. I publikasioni engajtsï arhintani jaka jarhuataatijtsïni parachi jingontku estudiarini ambe enga arhijka libru Úkuecha.
Jarhuajperata ma para Bibliani estudiarini
16. ¿Náki tanimu ambechi jorhenguarhia ini libru jimbo?
16 I publikasionijtsïni tanimu ambe jorhendaati: 1) Jorhenguarhiakachi eskajtsïni Tata Diosï Jeoba jarhuataxaka imeeri espiritu jingoni aianhpini Reinueri ambe ka Jesúsiiri chúxapati uaani, 2) jarhuataatijtsïni parachi sánderu mintsita jingoni aianhpini ísï eskaksï primeru siglurhu anapu kristianuecha ka 3) eskachi respetariuaka Tata Diosï Jeobaeri kúnguarhikuani ka erachiichani engaksï orherukuni jaka ini ánchikuarhitani ka engaksï orhejtsïkuani jaka kúnguarhikuechani.
17, 18. ¿Néna úkata jarhaski i publikasioni, ka náki jarhuajperateechaksï jarhaski parachi jucha jorhenguarhini?
17 ¿Néna úkata jarhaski i publikasioni? Ochu parti jimbo arhukurhitixati, mándani parti uandantasïndi ambe enga uandajka Úkuecha. No uandantasïndi ambe engaksï mándani bersikuluecha arhijka, sino ambe engachi uaaka jorhenguarhini i librueri enga Bibliarhu anapueka ka xarhatachesïndijtsïni nénachi uaa juchajtu májkueni úni. Mándani kapitulu i publikasioniiri xarhatasïndi nákiiski tema ka náki tekstuecharhu pʼitakata jarhaski.
18 Ístu, ini publikasioni jimbo jarhasti máteru ambe engajtsïni jarhuataaka sési estudiarini ambe enga uandajka Úkuecha. Ístuksï jarhasti sési járhati imajeniicha engajtsïni jarhuatajka eranhaskani ambe enga úkuarhini japka jiánisï. Uánikua kapituluecharhu, jarhastiksï rekuadruecha enga sánderu informasioni uandajka, komu Tata Diosïiri marhuaricheeri engaksï mintsikeenga imani ka engaksï ejemplu máeka para jucha, ístuksï inde rekuadruecha lugaricheeri ambe uandasïndi o ambe enga xáni úkuarhipka, pʼindekuecheeri ambe ka máteru kʼuiripuecheeri enga Úkuecha uandaajka.
Jukaparhakuesti eskachi jánguarhintaaka aianhpini juchaari territoriurhu.
19. ¿Ambechi jatsiski parachi ménisï úni?
19 I librujtsïni jarhuatasïndi parachi jandiajkumindu exekuarhini. No arhiparini na xánchi ióni páxakiia Reinueri ambe aianhpini, uétarhisïndi eskachi ménichani eratsentaaka ambechi sánderu jukaparharasïni ka na xánchi tsípikua jingoni aianhpisïni ka uaani Jesúsiiri chúxapatiichani (2 Kor. 13:5). Ju je kurhamarhikuarhini: “¿Seguirixaki májkueni jukaparharani ini ánchikuarhitani?” (1 Kor. 7:29-31). “¿Seguirixaki balori jingoni aianhpini ka tsípikua jingoni?” (1 Tes. 1:5, 6.) “¿Jánguarhintaxaki xáni eskani xáni uaaka aianhpini?” (Kol. 3:23).
20, 21. ¿Andisï xáni jukaparhakue juchaari ánchikuarhita, ka ambechi jatsiski para úni?
20 Jatsiskachi para méntkisï kánikua jukaparharani ini ánchikuarhitani. Pauani pauani jatsiskachi para sánderu jánguarhintani jimboka nóteru ióni kuerataxakaia para parhakpini kʼamarani ka uaatiksï uánikua kʼuiripuecha uarhini. ¿Na xáni uáni kʼuiripuechaksï uékaa kurhaani ka jiókuarhini ini aianhperakuani? (Úku. 13:48). Nóchi míteska, peruchi kʼóru jatsiska para jarhuatani ante de niárani ima jurhiatikua (1 Tim. 4:16).
21 Jukaparhakuesti eskachi juchajtu májkueni aianhpiaka eska primeru siglurhu anapuecha. Engachi jingontku jorhenguarhiska ini publikasionini, jarhuataatijtsïni parachi pauani pauani tsípikua jingoni aianhpini ka balori jingoni, ka parachi seguiriini chúskutani ‘aianhpini Tata Diosïiri Reinueri ambe’ (Úku. 28:23).
