KAPITULU 17
“Jarhuataaspti paraksï kurhanguni ambe engaksï Karakateecha arhijka”
Néna sési jorhentpini; Berea anapuecheeri ambakiti ejemplu
Pʼitakata jarhasti Úkuecha 17:1-15
1, 2. ¿Néksï niraxaki Filipusï uératini para Tesalónika niárani, ka ambeksï eratsepani jaki xanharu jimbo?
XANHARU ma engaksï Roma anapuecha úpka, kʼérati juáteecharhisï nitamasïreendi. Kurhaakuarhesïndi na engaksï xáni no sési kúskapani jaka karreteecha, engaksï burruecha uerani jaka ka uandontskuarhita sondaduecheeri, ambe ma atarantstiicheri, artesanuecheri ka ístu máteru kʼuiripuecheri. Ístu Pablu, Silasi ka Timoteu jimaksï niraxati Filipusï uératini para Tesalónika niárani enga 130 kilometru (80 miia) iauani jaka. I biaji no fasiliispti para Pablu ka Silasi jimbokaksï iásï apenasi sési pʼikuarherantaxaka engaksï Filipusï pirimu jimbo kʼuikirhiapka (Úku. 16:22, 23).
2 Engaksï uandontskuarhepani jarhajka úsïndi eskaksï no pʼikuarheraaka eskaksï iauani niraxaka. Nóksï mirikurhixati Filipusï anapu karseliiri kuárini enga ima ka imeeri familia jiókuarhipka jurhimbikuani. Inde ambe kánikua uinhaperaantaspti paraksï seguiriini Tata Diosïiri uandakuani aianhpini. Engaksï na niárani jarhajkia Tesalónika, jamberiksï kurhamarhikuarhijti: “¿Nénajtsïni erokaa judiuecha? ¿No sésijtsïni kámaa ka ataajtsïni ísï eska Filipusï?”.
3. ¿Andisï sési jaki eskachi jorhenguarhiaka Pablueri ejempluni?
3 Ísï tátsekua Pablu uandaspti na enga pʼikuarherapka jiáni enga Tesalónika anapuechani karakuapka: “Chájtsï míteska eskachi jucha kómu nitamakuarhiska ka eskachi no sési kánhaska Filipusï, joperujtsïni Tata Diosï jarhuatasti parachi jucha balori jukantani paraksïni aianguni ambakiti aianhperakuani Tata Diosïiri ambe nájkirukachi xáni no sési kánhani japka” (1 Tes. 2:2). Ini uandakuecha jimbo xarhatasïndi eska imani jimbo enga Filipusï úkuarhipka, chésïreenga inchaakuni Tesalónika, joperu Tata Diosï Jeoba jarhuataspti íntskuparini uinhapikua enga xáni uétarhincheenga. Májkueni eska Pablu, jamberichi juchajtu ménisï chéni pʼikuarherajka aianhpini. Ambe engajtsïni jarhuataaka parachi no ísï pʼikuarherani jindeesti jorhenguarhini Pablueri ejempluni ka májkueni úni eska ima (1 Kor. 4:16).
“Jarhuataaspti paraksï kurhanguni ambe engaksï Karakateecha arhijka” (Úkuecha 17:1-3)
4. ¿Ambe xarhatasïni eska Pablu jukari tanimu semana jarhaspka Tesalónika?
4 Karakata xarhatasïndi eska Pablu enga Tesalónika japka, tanimu sábadu aianhpispka sinagogarhu uératini. Jiájkani arhikuekasïndi eska tanimu semanajku jarhaspka indeni iretani jimbo? Nómbe. Nóchi míteska na xáni ióndapi nirani jima engaksï judiuecha tánguarhienga. Ístu, imeeri karakateecharhu uandantasïndi eska ima ka imeeri kompanieru jémbeecha jatsispkaksï para ánchikuarhini paraksï úni mantenerikuarhini ka eskaksï Filipusï anapu erachiicha tsimani xanhari intsïnhaspka jarhuajperata (Filip. 4:16; 1 Tes. 2:9; 2 Tes. 3:7, 8). Ini ambe jimbo uaakachi uandani eska apostoli Pablu jukari tanimu semana jima pakaraspka.
5. ¿Néna jánguarhintaspi Pablu aianguani kʼuiripuechani?
5 Jo, balori jingoni niraspti aianguani kʼuiripuechani engaksï sinagogarhu japka. Ísï eska na pʼindepkia, “jarhuataaspti paraksï kurhanguni ambe engaksï Karakateecha arhijka. Sési aianguasïreendi iámu ambe ka arhiasïreendi nani enga arhienga Karakateecharhu eska Kristu jatsispka para no sési nitamakuarhini ka tsíntani. Arhiasïreendi: ‘Jesúsi jindeesti Kristu ka jíksïni imeeri ambesï aianguni jaka’” (Úku. 17:2, 3). Pablu no imani ambe aianguaspti ambe enga ima tsitienga, sino jurhimbitku aianguaspti. Mítespti eska imeecha engaksï kurhaani japka sési mítekuspka ka eskaksï janhanharhiasïreenga Karakateechani, soluksï uétarhinchasïreendi sánderu sési kurhanguani. Jimbosï Karakateechani úrapariani aianguapti eska Jesúsi Nasareti anapu, jindeespka Mesíasi engaksï aiaminhapka.
6. ¿Néna úrasïreeni Kristu karakateechani para kurhangutaraani máteruechani, ka néna marhuakuaspi imeeri disipuluechani?
6 Pablu májkueni úsïreendi eska Jesúsi, enga méntkisï Bibliani úreenga para jorhentpini. Pori ejemplu, Jesúsi arhiaspti imeeri chúxapatiichani eskaksï profesiecha úkuarhipiringa, eska Acheetiiri Uájpa uándikunhapiringa ka eska tanimu jurhiatikua jimbo tsítanhantapiringa (Mat. 16:21). Ísï tátsekua enga na tsítanhantapkia, xarhakuaspti imeeri chúxapatiichani. Nájkiruka i ambe xarhatapka eska jurhimbitku ambe arhiaspka, útasï exeraaspti máteru ambe. Ménderu xarhakuaspti imeeri tsimani chúxapatiichani “ka ueenaspti aianguani ambe engaksï Karakateecha xáni uandeenga imeeri ambe, Moisésiiri karakateecha jingoni ueenani asta ambe engaksï xáni karapka Tata Diosïiri uandakua páriicha”. Ka arhijperasptiksï: “¿Andi nójtsïni mintsitarhu jamberi niárachexapi ambe engajtsïni ima uandontskuarhechipuni japka, engajtsïni sési aianguni japka ambe enga xáni arhijka Karakateecharhu?” (Luk. 24:13, 27, 32).
7. ¿Andisï uétarhijki eskachi Bibliani úraaka engachi aianhpini jauaka?
7 Jimboka Biblia uinhapikua jatsiska, iásï anapu kristianuechachi méntkisï úrasïnga aianhpikuarhu ísï eska Jesúsi, Pablu ka ístu máteru apostoliicha (Ebr. 4:12). Engachi uandontskuarhejka kʼuiripuecha jingoni aianhpikuarhu exeraasïngachi Biblia jingoni ambe engachi jakajkujka ka sésichi aianguasïnga. Engachi someni ka someni Bibliani exeraani jarhajka, úsïndiksï exeni eskachi no aianguaxaka juchaari eratsekueri ambe sino ambe enga Biblia uandajka. Juchantsïntu ístu marhuachesïndi. ¿Néna? Sánderuchi seguru pʼikuarherasïnga ka uékasïngachi balori jingoni aianhpini, ísï eska Pablu na úpka.
“Máruksï ueenaspti jakajkuni” (Úkuecha 17:4-9)
8-10. a) ¿Nénaksï jiókuarhispi Tesalónika anapuecha ambe enga Pablu aianhpienga? b) ¿Andiksïsï máru judiuecha enbidiariueni Pablu? c) ¿Ambeksï úspi máru judiuecha engaksï Pabluni ikiakuenga?
8 Apostoli Pablu exesptia eska ísïispka ambe enga Jesúsi uandapka: “Jántspiri no sánderu kʼéri ambeesti eska kʼumanchikuarhu anapu achamasï; engajtsïni imeecha ísï no sési kámaka jíndeni, chánksïntuksïni no sési kámaati; engajtsïni imeecha kurhajchaska jíndeni, ístuksïni kurhajchaati chánksïni” (Juanu 15:20). Joperu Tesalónika, máruksï tsípikua jingoni jiókuarhispti ka uékanksï kurhandini, ka máruksï nómbe. Lukasï i ambe karaspti imeecheeri engaksï uékapka kurhandini: “Máruksï ueenaspti jakajkuni ka tátsekua imeechajtu Pablu ka Silasi jingonksï jámasïreendia. Ka májkuenksï úspti uánikua kʼuiripuecha engaksï grieguepka ka engaksï Tata Diosïni kómarhienga ka ístu uánikua uarhiitiicha engaksï kʼéri ambeepka” (Úku. 17:4). Uaakachi seguru jarhani eskaksï i jimbanhi disipuluecha kánikua sési pʼikuarheraspka engaksï ueengia kurhanguani Karakateechani.
9 Nóksï iáminduecha tsitisïreendi ambe enga Pablu jorhentpienga. Maruksï kánikua ikiaspti. Máru Tesalónika anapu judiuecha enbidiaksï pákuspti Pabluni jimboka úspka eskaksï uánikua kʼuiripuecha engaksï grieguepka, Tata Diosïni marhuakupiringa. Jimbokaksï judiuecha jánguarhintaspkia parakaksï grieguecha mójtakukuarhipiringa ka jorhendasptiksïa ambe engaksï arhijka Karakata Ebreaecha. Jimboksïsï minkuariani japtia. ¡Ka iásï Pablu jurhasïndi Pablu sinagogarhu ka máteru ambe jorhendasïndi! ¡Jimboksïsï xáni ikiani japti!
Jirinhantasptiksï “Pabluni ka Silasini [...], paraksï imani kʼuiripuechani jurajkukuani engaksï no sési jámani japka” (Úkuecha 17:5).
10 Lukasï uandasïndi ambe engaksï uékapka úkuani Pabluni ka Silasini: “Judiuechaksï enbidia jimbo tánaantaspti máru acheetiichani engaksï no sési úriipka ka engaksï ísku jámani japka merkadurhisï, ka sánderu uánikua kʼuiripuechanksï tánaantaspti ka iichaksï ueenaspti no sési jámani iretarhu. Jimajkani, nirasptiksï jirinhantani Pabluni ka Silasini Jasóniiri kʼumanchikuarhu, paraksï imani kʼuiripuechani jurajkukuani engaksï no sési jámani japka. Ka jimbokaksï no exeantaspka, antsikupasptiksï Jasónini ka máru erachiichani paraksï iretarhu anapu juramutiichani jingoni paani ka uinhachasïreendiksï: ‘Ixúksï jamberi janostia ima achamasïicha engaksï iápurisï jámani jaka no sési ambe úni ka Jasóni jingonksï pakaraxati. Ka iámindu i achamasïichaksï no úxati ambe enga Roma anapu juramuti uandajka, jimbokaksï uandasïnga eska jarhaska máteru juramuti: Jesúsi’” (Úku. 17:5-7). ¿Ambeksï úpirini úkuarhinchani Pablu ka imeeri kompanieru jémbeecha?
11. ¿Ambe chkuanderakua ambeksï uandaspi Pablu ka imeeri kompanieru jémbeecheri, ka náki juramukua jimboksï jupikuarhixapi para ísï uandani? (Exe je nota).
11 No jarhasti máteru ambe enga sánderu no sésiika eska engaksï uánikua kʼuiripuecha ikiani jarhajka ka no sésiksï jámani jarhani. Sánderu no sésiisti eska kʼéri iurhekua ma enga iámu ambe pájtamajka. Ka i ambeksïsï úrapti judiuecha paraksï no sési úkuani Pabluni ka Silasini. Chkuanderakua ambe jingoni, úsptiksï eska iámu ireta ikiapiringa ka tátsekuaksï jánguarhintaspti juramutiichani eratsetaraani eskaksï Pablu ka Silasi no sési ambe úspka. Orheta chkuanderakua engaksï uandapka imeecheeri, jindeespti eskaksï ima achamasïicha iápurisï jámaxapka no sési ambe úni, nájkirukaksï no jindeepka Pablu ka imeeri kompanieru jémbeecha engaksï úpka eskaksï kʼuiripuecha xáni no sési jámapiringa. Máteru chkuanderakua, sánderu no sésiispti, uandasptiksï eskaksï no kurhajchaxapka Sésariiri juramukuani: uandaxaptiksï máteru juramutiiri, tata Jesukristueri ambe. a
12. ¿Ambe xarhatasïni eska i chkuanderakua engaksï uandapka Tesalónika anapu kristianuecheeri ambe úpiringa eskaksï kánikua no sési kánhapiringa?
12 Ju je miántani eskaksï relijioniiri orhejtsïkutiicha sáno májkueni ambe uandaspka Jesúsiiri ambe engaksï nípka Pilatuni arhini: “I achamasï támisï jánhastaaxapti iretarhu anapu kʼuiripuechani, [...] ka ístu uandaxapti eska inde jindeeska Kristu ka eska juramutiiska” (Luk. 23:2). Jamberi Pilatu chépti eska emperadori erastsepiringa eskaksï no kurhajchaxapka leiichani jimbosï jurajkupti eskaksï uándikupiringa Kristuni. Ka májkueni ambe úpti úkuarhini engaksï chkuanderakua ambe jauatakuapka Tesalónika anapu kristianuechani. Libru ma uandasïndi, “eska no jukari ambeeska uandani eskaksï no sési nitamakuarhipiringa, jimbokaksï ‘uándikupiringa imani enga uékapiringa no sési ambe uandani o uékani traisionariini emperadorini’”. ¿Ísï úkuarhipi eskaksï na uékeenga imeeri ikiatspitiicha?
13, 14. a) ¿Andisï no niárapi ísï úkuarhini eskaksï na uékeenga Pablueri ikiatspitiicha? b) ¿Néna xarhataspi Pablu eska jingontku jámasïreenga ísï eska Jesúsi na uandapka, ka nénachi uaa májkueni úni jucha?
13 ¿Andisï no marhuapi engaksï Pablueri ikiatspitiicha ka xáni uánikua kʼuiripu tánguarhintapka paraka nóteru aianhpinhapiringia Tesalónika? Ma ambe jindeesti jimbokaksï no exentaspka Pabluni ka ni Silasini. Ístuksï no úspti úni eskaksï juramutiicha jakajkupiringa imani chkuanderakua engaksï uandani japka. Ísï jimbo, Jasóni ka máteru erachiichaksï “maiampispti paraksï úni jurajkunhani” ka tátsekuaksï jurajkunhasptia (Úku. 17:8, 9). Jesúsi uandaspti: “Ísïi je komueska akuitsiicha engaksï jingontku jámajka, joperu ístu, ísï jáma je komueska palomasïicha engaksï no ma ambe útspijka”, ka Pablu xarhataspti eska jingontku jámasïreenga enga sïpakuarhipka para úni seguiriini támisï aianhpini (Mat. 10:16). Nájkiruka Pablu ísï sïpakuarhipka, no arhikuekasïndi eska chésïreenga. ¿Nénaksï uaa iásï anapu kristianuecha májkueni úni?
14 Májkueni eskaksï na kaapka primeru siglurhu anapu kristianuechani, iásïjtuksï májkueni uandasïndi Jeobaeri testiguecheeri ambe. Eskachi no kurhajchaasïnga juramutiichani, ka i ambe niárasïndi ísï úkuarhini jimbokajtsïni ikiachesïnga ka parakachi nóteru uaakia juchaari ánchikuarhitani ni úni aianhpini. Engachi exejka eskaksï uánikua kʼuiripuecha tánguarhisïnga parajtsïni no sési kámani, juchachi kéndikukuarhisïnga ka támuchi nirasïnga aianhpini. Jamberichi tátsekua kʼuanhatsentaakia enga nóteru peligru jauaka. Joperuchi jatsiska para miáni eskachi jucha no jirinhasïnga eska no sési ambe úkuarhiaka.
Imeechaksï “sánderu tsitisïreendi jorhenguarhini” (Úkuecha 17:10-15)
15. ¿Nénaksï jiókuarhispi Berea anapuecha ambakiti aianhperakuani?
15 Paraksï no no sési úkuni Pabluni ka Silasini, Bereaksï axaaspti enga 65 kilometru (40 miia) iauani japka. Engaksï na niárapkia, Pablu niraspti jima engaksï judiuecha tánguarhienga para Tata Diosïni kómarhini ka aianguaspti Karakateeri ambe. Enga exepka eskaksï jima anapuecha jiókuarhisïreenga ambe enga aianhpienga, sési pʼikuarheraspti. Lukasï uandasïndi eskaksï Berea anapu judiuecha “sánderu tsitisïreendi jorhenguarhini ka eska Tesalónika anapuecha, jimbokaksï mintsita jingoni jiókuarhispka Tata Diosïiri uandakuani ka pauani pauanksï arhintasïreendi ambe enga arhijka Karakateecharhu, paraksï exekuarhini sini ísïispi ambe engaksï arhinhani japka” (Úku. 17:10, 11). I ambe, ¿no sési pakataaspi Tesalónika anapuechani engaksï jiókuarhipka jurhimbikuani? Nómbe. Apostoli Pablu sánderu tátsekua karaspti: “Juchajtuchi méntkisï diosmaiamukua arhisïnga Tata Diosïni, jimboka jiáni engaksïni jucha aiangupka Tata Diosïiri uandakuani, chájtsï jiókuarhispka, joperujtsï no ísï jiókuarhispka komueska kʼuiripueri uandakua ambe, sánderu sési, komueska Tata Diosïiri uandakua, jo, jimboka sési jimbo Tata Diosïiri uandakueska ka iásï indeksïnisï jarhuatani jatiia chánksïni engajtsï jakajkutiika” (1 Tes. 2:13). ¿Andisï uandajki eskaksï Berea anapu judiuecha sánderu tsitisïreenga jorhenguarhini?
16. ¿Andisï sési jaki uandani eskaksï Berea anapuecha tsitisïreenga jorhenguarhini?
16 Jimbanhi ambeepka engaksï Berea anapuecha kurhaani japka. Peru, nóksï uandaspti eska inde ambe no ísïispka nijtuksï méntku jakajkupapi ambe engaksï kurhaapka. Orhetaksï jingontku kurhaaspti ambe enga Pablu aianguani japka ka tátsekua imeecha mismu exespti Karakateecha jingoni eska ísïispka ambe enga Pablu aianguani japka. Ka no solu sábaduechantkuksïsï jorhenguarhiendi sino pauani pauani ka ústiksï ini ambe jimbokaksï mintsita jingoni jiókuarhispka. Meruksï uékasïreendi míteni ambe engaksï karakateecha jorhentpienga. Ka últimu, xarhatasptiksï kaxumbikua ka mójtakukuarhinksï. “Ísï jimbo, uánikua kʼuiripuechaksï ueenaspti jakajkuni” (Úku. 17:12). Jimbosï Lukasï uandapti eskaksï imeecha tsitisïreenga jorhenguarhini.
17. ¿Andiksïsï Berea anapuecha ambakiti ejemplu máe para jucha, ka andichisï jatsi para májkueni úni jarhani nájkirukachi jiókuarhikia jurhimbikuani?
17 Berea anapuechaksï no méni eratsepti eska engaksï xáni sési jiókuarhipka ambakiti aianhperakuani, Tata Diosïiri Karakatarhu pakarapiringa imeecheeri ejemplu parachi juchajtu májkueni úni. Sánderuksï sési úspti eska Pablu na erokuarhini japka ka úsptiksï eska Tata Diosï Jeoba kánikua sési pʼikuarherapiringa. Iásï, juchajtuchi arhiasïnga kʼuiripuechani eskaksï májkueni uaaka eska ima judiuecha. Eskaksï jingontku jorhenguarhiaka Bibliani parakaksï exeaka eska no ískueska ambe engaksï jakajkujka. Jiájkani, enga ma na itsï atakuarhiakia, ¿arhikuekasïni eska nóteru jatsiskia para xáni tsitini jorhenguarhini? Nómbe. Sánderu sési, sánderuchi jatsiska para uékani kurhajchani Tata Diosï Jeobani ka ísï úni eskajtsïni ima na juramuchijka. Engachi ísï úska, jurajkuni jauakachi eskajtsïni ima jarhuataaka ambakiti jángua ma jatsini ka eskajtsïni jarhuataka úni ambe enga ima uéjka, ka ísïchi uaaka sánderu sési úni imeeri ánchikuarhitani ka sési pʼikuastani (Is. 64:8).
18, 19. a) ¿Andisï Pablu no pakarapi Berea, ambe seguiriispi úni ka nénachi uaa májkueni úni? b) ¿Ménderu na járhati kʼuiripuechani aianguapirinia ambakiti aianhperakua?
18 Joperu apostoli Pablu no ióni pakaraspti Berea jimboka Karakata uandasïnga: “Joperu engaksï Tesalónika anapu judiuecha mítepka eska Pablu ístu uandantaxapka Tata Diosïiri uandakueri ambe jini Berea, jiniksï niraspti paraksï kʼuiripuechani ikiataani ka ueenanksï no sési jámani. Jimboksïsï erachiicha jirejiresï nípti petaatantani Pabluni marirhisï, joperu Silasi ka Timoteu jimaksï pakaraspti. Joperu imeecha engaksï nípka Pabluni pámbetani, Atenasi jamberiksï páspti ka tátsekuaksï kʼuanhatsentaspti paraksï arhini Silasini ka Timoteuni eskaksï nipiringa kókuani Pabluni jingoni” (Úku. 17:13-15). Pablueri ikiatspitiichaksï méntku no ísku jarhaspti. Petaatantasptiksï Pabluni Tesalónika, tátsekuaksï niraspti asta Berea jamberi paraksï jimajtu no sési kámani. Joperuksï no úspti ísï úni. Pablu mítespti eska no jimajkusï jatsipka para aianhpini ísï jimbosï támisï mótsipti. Iásï juchajtuchi májkueni úsïnga. Nóchi uékasïnga eskajtsïni ójkutaaka imeecha engaksï no uéjka eskachi aianhpiaka.
19 Enga Pablu xáni sési jánguarhintapka aianguani ambakiti aianhperakuani Tesalónika ka Berea anapuechani, kurhangusïreendia na enga xáni jukaparhakueka balori jingoni aianhpini ka ísï aianhpini eskaksï Karakateecha na arhijka. Ka ini ambe jingoni engachi exekia, juchajtuchi kurhangusïnga na enga xáni jukaparhakueka ísï úni. Joperu iásï Pablu Atenasi nipirindia para no judiuechani aianguani. ¿Néna nikupirini imani ireta jimbo? Máteru kapitulu jimbochi exeaka.
a Acheeti ma enga kánikua mítekuka iiri ambe, uandasïndi eska jiánisï Roma jarhaspka juramukua ma enga uandeenga eskaksï no jatsispka para uandani jámani máteru juramutiiri ambe o juramukueri ma, ka sánderia enga ima kénditapiringa jima anapu juramutini. Ístuksï no jatsispti para no sési ambe uandani jima anapu juramutiiri. Pablueri ikiatspitiichaksï ménderueni uandantaspti ambe enga Pablu úni japka paraka ísï xarharapiringa eska ima no úxapka ambe enga uandeenga i juramukua (exe je rekuadruni “ Sésariicheeri ambe ka libru Úkuecha”).
