KAPITULU 18
“Parakaksï jirinhantapiringa Tata Diosïni ka únksï exentani”
Pablu exentasïndi ambe enga uaaka uandontskuarhekuani kʼuiripuechani engaksï kurhajchani jaka.
Pʼitakata jarhasti Úkuecha 17:16-34
1-3. a) ¿Andisï Pablu no xáni sési pʼikuarherajki Atenasi? b) ¿Ambechi úsïni jorhenguarhini Pablueri ejempluni jingoni?
ENGA Pablu Atenasi japka, kánikua no sési pʼikuarheraxapti. Jima anapuechaksï uánikua ambe jakajkusïreendi enga no sési japka. Ístu, máru jánhaskatiicha komu Sócrates, Platón ka Aristóteles niárasptiksï jima jorhentpini. Nani uéjkisï enga nireenga, exesïreendi templuecha plaseecharhu ka xanharuecharhu eskaksï uánikua idoluechani kómarhiasïreenga. Apostoli Pablu sési mítespti na enga Tata Diosï Jeoba exeajka idoluechani ka májkueni eska Jeoba imajtu ikimchaasïndi (Éx. 20:4, 5).
2 Enga na niárajkia plasa anapu merkadurhu, uánikua ambe exesïndi enga ísku pakatajka: noroesteriisï, inchani ísï jámani, exeasïndi uánikua diosï Ermesirii úkateechani. Iámu plasa uinindeesti nani engaksï ueenga ini idoluechani kómarhiani. ¿Néna uaa aianhpini Pablu jima engaksï xáni uánikua idoluechani kómarhiajka? ¿Uaa no xarhatani ikiatapu ka exentani ambe ma engaksï kʼuiripuecha míteka ka úrani parakaksï uékaaka kurhaani? ¿Uaa jarhuataani nemani enga uékaaka jirinhani Tata Diosïni para exentani?
3 Úkuecha 17:22-31 jimbo, exentasïngachi ambakiti arhijtsïkperata ma enga apostoli Pablu nitamatarapka para Atenasi anapu acheeti jorhenatiicha. Ju je jingontku exeani imani ambakiti uandakuechani enga úraapka imeeri ambakiti arhijtsïkperatarhu ka na enga janhanharhikua jingoni uandeenga parakachi juchajtu uaaka májkueni úni imeecha jingoni engachi uandontskuarheaka.
“Merkadurhisï” (Úkuecha 17:16-21)
4, 5. Atenasi, ¿naniisïsï aianhpispi Pablu, ka andisï úkua jukakupi para jima anapuechani aianguani?
4 Pablu, imeeri segundu biajini jimbo, uéxurhini 50 jimboisï niraspti Atenasi. a Silasi ka Timoteu, Bereaksï pakaraspti ka engaksï jamberi niárapiringia Atenasi, Pablu jánhastaaxapti judiuechani jima engaksï tánguarhienga para Tata Diosïni kómarhini ísï eskaksï na pʼinderini japka. Ístu, exentaspti lugarini ma nani enga úpiringa uandontskuarheni Atenasi anapuecha jingoni engaksï no judiuepka, ka jindeespti plasa o “merkadurhisï” (Úku. 17:17). Ka Akrópolisiiri oesteisï jarhaspti ka 5 ektaria (12 acres) kʼéspti. Peru no solu jindeespti nani engaksï ueenga piáni o íntspikuarhini ambe; jindeespti sánderu kʼéri plasa enga japka o eska na uandajka acheeti ma enga kánikua mítekuka, jindeespti jima enga sentabu andanheenga, politikeeri mabe uandaneenga ka nani engaksï úpiringa ireteeri anapu ambe exerpini. Jindeespti nani engaksï Atenasi anapuecha tánguarhienga ka ístu nani engaksï jánhaskatiicha uandontskuarheega ambe engaksï eratseenga.
5 Ka imani lugari jimboksï jarhaspti kʼuiripuecha engaksï kánikua jánhaskatiipka, engaksï tsimani eskueleecha jimbo nípka jorhenguarhini ka engaksï no ueenga sési pájperani: epikuriuecha ka estoikuecha. b Orheta grupu, uandasïreendi eska tsípikua ambe ísku jatini úkuarhiska ka uandasïreendiksï: “Nóchi jatsiska para Tata Diosïni janhanharhini. Enga ma uarhijka, no ma ambe pʼikuarherasïndi. Uaakachi ambakiti ambe úni ka tekaantani no sési ambe”. Estoikuecha, imani ambejku jakajkusïreendi engaksï ueenga exeni ka nóksï jiókuarhisïreendi eska Tata Diosï interesi pásïnga kʼuiripuecha jimbo. Ístu, i tsimani grupuecha nóksï jakajkusïreendi tsíntskueri ambe, ambe engaksï Jesukristueri disipuluecha jorhentpienga. Ambe engaksï iicha jakajkuenga ka eratseni, no terukuntasïreendi jurhimbiti jorhentperakuechani jingoni enga apostoli Pablu aianhpienga.
6, 7.¿Náksï exespi máru Gresia anapu filosufuecha ambe enga Pablu aianhpini japka, ka nénaksï májkueni úsïni iásï anapu kʼuiripuecha?
6 ¿Nénaksï jiókuarhispi i tsimani grupuecha ambe enga Pablu aianhpienga? Máruksï uandasïreendi eska Pablu ísku apari máespka o eska jindeespka kʼuiripu ma enga semiia kʼaranteenga (exe je nota enga jaka Hechos 17:18, Biblia de estudio). ¿Ambeksï arhikuekasïreeni inde uandakuecha? Achamasï ma uandasïndi eska inde uandakua griegu jimbo, arhikuekasïnga ma pajaru enga ixuani ka ixuani ladu kʼaranteenga semiiechani; sánderu tátsekua niáraspti arhikuekani kʼuiripuechani engaksï merkadurhisï jámeenga kʼarantani tʼirekua enga jimeesïsï jántenega. Ka sánderu tátsekua, inde uandakua niáraspti arhikuekaani imani kʼuiripuechani engaksï niáreenga kurhaani mámaru ambe ka engaksï tátsekua kúndanteenga peruksï no ueenga eksplikarintani. Ima tsimani grupuecha uandaxaptiksï eska Pablu xásï ma kʼuiripuespka enga iámu ambe kopiariuenga. Joperu eskachi na exeaka, Pablu no chérakuarhespti indeni ambe jimbo.
7 Ini tiempu jimbo májkueniisti. Uánikuajtsï teresmarhusïndi jimbokachi jucha jakajkusïnga ambe enga Biblia uandajka. Pori ejemplu, jarhastiksï maestruecha engaksï uandajka eska ebolusioniiri ambe jindeeska ambe ma engachi jatsika para jakajkuni. Ka jimbokachi jucha no jakajkujka ebolusioniiri ambe, teresmarhusïndijtsïni. I kʼérati jorhentpiriicha, ísï exesïndijtsïni komueska kʼuiripuecha engachi no ma ambe míteka o engachi semiia kʼarantajka. Ísïjtsïni exesïndi eska tontuecha jimbokachi jorhentpisïnga ambe enga Bibliarhu arhijka ka jorhentpisïngachi eska jarhaska nema enga kueraaka ambe. Peruchi jucha no chésïnga, níjtuchi menusi ukuarhijki, sánderu sési, balori jingonchi kuájpisïnga ambe engachi jakajkujka eska iámindu ambe enga jaka, jindeeska Jeobani jimbo (Apok. 4:11).
8. a) ¿Nénaksï kurhaaspi máru kʼuiripuecha Pablueri aianhpikuani? b) ¿Ambe úpirini arhikuekani Areópagu? (Exe je notani).
8 Máteruechaksï ménderueni kurhanguspti jiáni enga Pablu plasarhu aianhpipka. Uandasptiksï: “Enajki no ixú anapu diosïicheeri ambe aianhpini jaki” (Úku. 17:18). Enga Pablu máteru diosïicheeri ambe aianhpini japiringa jandiajku jirinhakuarhini japirindi paraksï uándikuni. Jimboka uánikua siglu antesi Sókratesi uándikunhaspti indeni ambe jimbo. Enga Pablu indeni ambe uandapka, Areópagurhu c pánhaspti paraka úpiringa sési aianguani indeeri ambe imeechani engaksï no méni kurhaapka. ¿Néna úpirini Pablu kuájpintani jurhimbikuani, imani kʼuiripuechani japarini engaksï no méni kurhaapka Biblieri ambe?
“Atenasi anapu achamasïicha, ji ísï exesïnga...” (Úkuecha 17:22, 23)
9-11. a) ¿Ambe úspi Pablu para úni aianguani kʼuiripuechani ambe engaksï tsitienga? b) ¿Nénachi uaa májkueni úni aianhpikuarhu?
9 Ju je miáni. Pablu kánikua ikiaspti jiáni enga exeapka xáni uánikua diosï úkateechani. En besi de no sési arhiani jimbokaksï diosï úkatechani kómarhiasïreenga, Pablu iatsitakuarhu uandajpaaspti. Pablu jirinhakuntaspti para aianguani kʼuiripuechani ambe engaksï tsitienga; jimbosï arhiapti: “Atenasi anapu achamasïicha, ji ísï exesïnga enajkijtsï chá iámindu ambe jimbo sánderu janhanharhiajki diosïichani ka eska máteru kʼuiripuecha” (Úku. 17:22). Sáno ísï arhiaspti: “Chájtsï kánikua janhanharhisïnga relijioniiri ambe”. Sési jimbo Pablu felisitariuaspti, jimbokaksï jánguarhintasïreenga jirinhantani Tata Diosïni. Pablu kurhanguspti eska nájkirukaksï kʼuiripuecha chkuanderakua ambe jorhendanhapka, úpiringaksï jatsini ambakiti mintsita ma para jorhenguarhini jurhimbikueri ambe. Jimboka ima mismu miántasïreenga na enga jásïipka antesi, karaspti: “Ka nájkirukani no sési káuenga [...] no míteparinisïni ísï jámeenga ka jimbokani méntku no mintsikasïreenga” (1 Tim. 1:13).
10 Tátsekua uandaspti eskaksï jima anapuecha kánikua tsitisïreenga relijioniiri ambe jimbokaksï jatsispka altari ma enga arhienga: “I altari jindeesti para ima Tata Diosï engachi no míteka”. Libru ma uandasïndi: “Grieguecha ka máteru iretarhu anapuechaksï uaasïreendi altariichani para diosïicha engaksï no míteapka jimbokaksï chésïreenga ikiatani diosïni ma engaksï no mítepka”. Indeni altariicha jimbo, Atenasi anapuechaksï jiókuarhixapti eska jarhaspka Tata Diosï ma engaksï no ma ambe mítepka imeeri ambe. Pablu indeni ambe úraspti para úni aianguani ambakiti aianhperakuani. Jimbosï arhiapti: “Jíksïni ima Tata Diosïiri ambesï aianguni jaka engajtsï chá kómarhijka joperujtsï no míteni” (Úku. 17:23). Ambe enga ima uandapka, kánikua jarhuataaspti. Nájkiruka ima no jimbanhi diosïicheeri ambe uandani japka ísï eskaksï máru na uandeenga. Ambe enga ima aianguani japka jindeespti Tata Diosï jurhimbitiiri engaksï ima no mítepka.
11 ¿Nénachi uaa májkueni úni eska apostoli Pablu juchaari aianhpikuarhu? Engachi jánguarhintaska exeni ambe enga jimeesïsï jarhajka, jamberichi uaaka exeni eska ima kʼuiripu jatsiskia relijionini ma, komu ambe enga jukajchatini jaka, kʼumanchikuarhisï jatsini o engaksï jardiniicharhisï jatsirini jaka. Úpiringachi arhiani: “Kuenta íntskukuarhesïnga eska chá jakajkusïnga Tata Diosïni ka kánikua tsitisïnga uandontskuarheni imeecha jingoni engaksï uékajka Tata Diosïiri ambe míteni”. Engachi felisitariuaska jimbokaksï uékasïnga míteni Tata Diosïiri ambe, uaakachi sési jásï uandontskuarhita ma jatsini. Nóchi jatsiska para no sési jásï ambe uandani ima ambeeri engaksï jakajkujka. Miá je eskaksï jarhaska uánikua erachiicha engaksï antesi jakajkuenga imani ambe enga no jurhimbitiika.
Ju je jánguarhintani exeni ambe engachi uaaka uandontskuarhekuani kʼuiripuechani.
Tata Diosï “no iauani jarhaska juchantsïni jingoni” (Úkuecha 17:24-28)
12. ¿Ambe úspi Pablu para úni aianguani ambakiti aianhperakuani?
12 Pablu míteparini eska imeecha engaksï kurhaani japka jorhenaspkaksï filosofía griegueri ambe, joperu eskaksï no ma ambe mítespka Biblieri ambe. Jatsispti para jirinhakuntani néna aianguani. Orheta, aianguaspti Biblieri ambe joperu no meru arhiasïnga eska Biblia ísï uandasïnga. Segundu, ísï arhiaxapti enajki ima imeechani jingoniipi úrapariani uandakuechani juchantsïni o juchachi. Terseru, úraaspti grieguecheeri karakateechani para xarhatani eskaksï imeecha tʼuini uandaspkia indeni ambe. Jimajkani, ¿ambe jukaparhakua ambe aianguaspi Pablu Atenasi anapuechani ima Tata Diosïiri ambe engaksï no mítepka? Ju je exeni.
13. ¿Ambe uandaspi Pablu auandeeri ka echeriiri ambe, ka ambe sési xarhataspi?
13 Tata Diosï kueraasti auandani ka echerini. Pablu uandaspti: “Tata Diosï enga parhakpinini úka ka ambe enga xáni jaka parhakpinirhu, ima jindeesti auandarhu ka echerirhu anapu Tata, ísï jimbo, ima no irekasti templuecharhu engaksï kʼuiripuecha uaajka” (Úku. 17:24). d Pablu xarhataspti eska unibersu no jandiajku xarharakuarhispka sino eska Tata Diosï jurhimbiti kueraaska (Sal. 146:6). Paraksï úni kʼéri ambe arhinhani Atenea ka ístu máteru diosï úkateecha uétarhinchasïreendiksï templuechani, kapiiechani ka kéjtsïtakuechani. Joperu ima enga kueraaka únibersuni no ma templu jimbo jatanhesïndi engaksï kʼuiripuecha uaaka (1 Rey. 8:27). Pablu xarhataspti eska Tata Diosï enga iámindu ambe kueraaka, sánderu kʼéri ambeeska eska diosï úkateecha engaksï templuecharhu kómarhinhajka (Is. 40:18-26.
14. ¿Néna xarhataspi Pablu eska Tata Diosï no uétarhinchasïnga kʼuiripuechani?
14 Tata Diosï no nemani uétarhinchasïndi. Kʼuiripuechaksï diosï úkateechani jatsikuasïreendi xukuparhakuechani ka kéjtsïtakusïreendiksï kánikua jukaparhakua ambe, ístu tʼirekua ka itsïmakua ambe, ¡enajkiksï uétarhinchani japirini! Joperu máru filosofuecha engaksï Pabluni kurhajchani japka jamberiksï no jakajkuendi eskaksï diosï úkateecha uétarhinchasïreenga eskaksï kʼuiripuecha kuidariuapiringa. Májkuenksï eratsesïreendi eska apostoli Pablu, eska Tata Diosï no uétarhinchasïnga “eskaksï kʼuiripuecha marhuakuni jauaka”. No ma ambe jarhasti echerirhu engachi uaaka íntskuni Tata Diosïni. Sánderu sési, ima jindeesti engajtsïni íntskujka tsípikua ka iámindu ambe engachi uétarhinchajka, komu tsánda, janikua ka ístu ambakiti echerini (Úku. 17:25; Gén. 2:7). Tata Diosï no uétarhinchasïndi kʼuiripuecheeri jarhuajperata. Imajtsïnisï íntskujti iámindu ambe.
15. ¿Ambe úspi Pablu para mójtakuni ambe engaksï eratseenga Atenasi anapuecha, ka ambechi jorhenguarhisïni Pablueri ejemplu jingoni?
15 Tata Diosï kuerauasti kʼuiripuechani. Atenasi anapuechaksï jakajkusïreendi eskaksï sánderu kʼéri ambeespka eska imeecha engaksï no grieguepka. Peru Biblia no jorhentpisïndi eska ma sánderu kʼériiska eska máteruecha (Deut. 10:17). Pablu indeni ambe kánikua kuidadu jingoni arhiaspti. Eratsentanksï pakarapti jiáni enga Pablu arhiapka: “Ma achamasïni jimbojku, uánikua ireteechani kuerauasti parakaksï niárapiringa iámu parhakpinirhisï irekani” (Úku. 17:26). Pablu úraxapti relatuni enga libru Génesis jimbo jaka, enga uandajka Adániiri, iáminduecheeri taati (Gén. 1:26-28). Jimbokachi iáminduecha Adániiri uájpeeska, no jarhasti rasa o nasioni enga sánderu kʼéri ambeuaka eska máteru. Kánikuaksï sési kurhangupti ambe enga Pablu arhiapka. I ambakiti ejemplueri, jorhenguarhisïngachi ma ambe. Nájkirukachi jánguarhintaaka sési aianhpiaka ka sési arhiani, nóchi jatsiska para mójtakuni Biblieri ambe nomasi parakaksï kʼuiripuecha sánderu fásili jiókuarhiaka.
16. ¿Andisï Tata Diosï kueraa kʼuiripuecha?
16 Tata Diosï uékasïndi eskaksï kʼuiripuecha imani andarhieraaka. Jamberiksï ima filosofuecha engaksï kurhajchani japka Pabluni, iónksï kurhamarhikuarhiptia andiksïsï kueranhaapi. Néna uéjkiini, nóksï méni úpirindi ambakiti mókuntskua ma exentani. Peru, apostoli Pablu sési aianguaspti eska Kueraajpiri uaaska kʼuiripuechani parakaksï “jirinhantapiringa Tata Diosïni ka únksï exentani nájkirukaksï pʼapʼajkurhaparini jámapiringa jirinhantani, jimboka ima no iauani jarhaska juchantsïni jingoni” (Úku. 17:27). Diosï engaksï no mítepka Atenasi anapuecha, no jindeespti diosï engachi no uaaka míteni. Ima no iauani jarhasïndi imeecheri engaksï jánguarhintajka jirinhantani ka jorhenguarhini imeeri ambe (Sal. 145:18). Jiáni enga Pablu uandapka “jucha”, uandaxapti eska imajtu jatsipka para jirinhantani Tata Diosïni, nájkirukajtsï pʼapʼajkurhaparini jámapiringa.
17, 18. ¿Andichisï jatsipirini para uékani andarhierani Tata Diosïni? ¿Ambechi jorhenguarhisïni na enga Pablu jirinhakuntapka para úni uandontskuarheni ima ambeeri engaksï kʼuiripuecha tsitienga?
17 Kʼuiripuechaksï jatsipirindi para uékani míteni Tata Diosïni. Pablu uandaspti: “Jimboka imani jimbochisï tsípikua jatsika ka jámanchi jarhani ka jindeenchi”. Máru engaksï mítekuka iiri ambe, uandasïndiksï eska Pablu úraaxapka uandakuechani enga Epiménidesi uandaapka, poeta ma enga Kreta anapuepka ka enga siglu seisini jimbo irekapka ka enga “kʼéri ambeepka relijioniirhu para Atenasi anapuecha”. Tátsekua, Pablu uandaspti andichisï jatsi para uékani míteni Tata Diosïni: “Ísï eskaksï na uandapka chaari karariicha máru: ‘Jimbokachi juchajtu imeeri uájpeeska’” (Úku. 17:28). Jatsiskachi para iáminduecha pʼikuarherani eskachi Tata Diosï Jeobaeri familieska, jimboka ima kueraaska primeru achamasïni ka juchachi jima uératini jurhasïnga. Para úni seguiriini uandontskuarhekuani, Pablu úraaspti uandakuechani engaksï imeecheeri karariicheeriipka ka engaksï imeecha kánikua respetariuenga. e Ísï eska Pablu, juchajtuchi ménisï uaaka úraani libruechani istorieri, ensiklopedia ambe o máteru libruechani engaksï kʼuiripuecha míteaka. Pori ejemplu, engachi úraska libru ma engaksï kʼuiripuecha respetarijka ka mintsinharhini, uaakachi exeraani nani engaksï uéraka pʼindekuecha ka kʼuínchikuecha enga Tata Diosï no jaiapanheantajka.
18 Ixú jamberi, apostoli Pablu Atenasi anapuechani jukaparhakua ambe aianguasptia Tata Diosïiri ambe ka imani uandakuechani úraaspti engaksï Atenasi anapuecha kurhangupiringa. Joperu, ¿ambe uékasïreeni Pablu eskaksï úpiringa indeni ambe jingoni engaksï xáni kurhaapkia? No ióndasïndi arhiani ambe engaksï jatsipka para úni.
“Iásï iápurisï arhiaxati iáminduechani eskaksï móantaaka” (Úkuecha 17:29-31)
19, 20. a) ¿Néna xarhataspi Pablu janhanharhikua jingoni eska no sési jarhaska diosï úkateechani kómarhiani? b) ¿Ambeksï jatsipirini para úni Atenasi anapuecha?
19 Apostoli Pablu listu jarhaspti para pʼímarhiani imeechani engaksï kurhaani japka parakaksï úpiringa ambe ma. Úraparini ambe engaksï grieguecha karapka, uandaspti: “Ísï jimbo, jimbokachi Tata Diosïiri uájpeeska, nóchi jatsiska para eratseni eska Tata Diosï xáxeska komueska ambe ma enga oru, plata o tsakapu jingoni úkata jaka. Ima no xáxesti komueska ima ambe engaksï kʼuiripuecha eranhaskajka ka tátsekuaksï jájki jimbo úni” (Úku. 17:29). Ísï jimbo, engaksï Tata Diosïni Kueraaka kʼuiripuechani, ¿néna uaa Tata Diosï ísïini eska idolu ma engaksï kʼuiripuecha uaajka? Kánikua janhanharhikua jingoni, Pablu arhiaspti na enga xáni no sési jaka diosï úkateechani kómarhiani (Sal. 115:4-8; Is. 44:9-20). Enga pablu arhiani japka “nóchi jatsiska”, indeni ambe jingoni úxapti eskaksï sánderu fásili jiókuarhipiringa ambe enga arhiani japka.
20 Tátsekua arhiaspti: “Tata Diosï ísï úspti enajki no ma ambe exe jiáni engaksï kʼuiripuecha no ma ambe mítepka imeeri ambe, joperu iásï iápurisï arhiaxati iáminduechani eskaksï móantaaka” (Úku. 17:30). Nóteru tiempuesptia para eratseni eska Tata Diosï uékasïreenga eskaksï kʼéri ambe arhipiringa diosï úkatechani úraparhiani. Ísï jimbosï Pablu sési xarhatakuapti ambe engaksï jatsispka para úni, móantanksï. Jamberiksï máru ískuksï pakarapti. Peru, Pablu uandakuecha jimbo xarhataspti eska Tata Diosï íntsaaspka tsípikua ka, eska ísï jimbosï, derechu jatsipti para arhiani ambe engaksï jatsipka para úni. Jatsisptiksï para jirinhantani Tata Diosïni, jorhenguarhini imeeri ambe ka ísï irekani eska ima na jaiapanhentajka. Para Atenasi anapuecha, inde ambe arhikuekasïreendi eskaksï jiókuarhipiringa eska no sési jarhaspka diosï úkateechani kómarhiani ka eskaksï jurajkuapiringa.
21, 22. ¿Néna kʼamarasïni Pablu imeeri arhijtsïkperatani, ka ambeksï arhikuekasïni inde uandakuecha?
21 Pablu kʼamarasïndi imeeri arhijtsïkperatani ini uandakuecha jingoni: “Jimboka [Tata Diosï] uaxastaskia na jatini sési jusgariuaua iámu parhakpini anapu kʼuiripuechani ka achamasïni ma erakusti para ísï úni. Ka iámindu kʼuiripuechaksï uaati mintsikani eska ísï úkuarhiaka jimboka ima tsítantaska ini achamasïni” (Úku. 17:31). Míteni eska japiringa jurhiatikua ma enga Tata Diosï Jusgarpiaka, úpirindi eskaksï jirinhantapiringa ka exentani Tata Diosï jurhimbitini. Nájkiruka Pablu no uandajka neeski inde Juesi. Uandasïndi ambe ma engajtsïni ísku pakatajka: eska irekaspka ísï eska achamasï ma, eska uarhispka ka eska Tata Diosï tsítantaska.
22 Juchachi sési kurhangusïnga ambe enga arhikuekajka eska Pablu na kʼamarajka arhijtsïkperatani. Míteskachi eska juesi enga Tata Diosï erakuka jindeeska tata Jesuskristu (Juanu 5:22). Ístuchi míteska eska mili uéxurhini durariuaka enga Tata Diosï jusgarpiaka ka eska axuterku jarhaskia (Apok. 20:4, 6). Joperuchi no chésïnga jimbokachi míteskia eskaksï mámaru járhati kóntperateechani jatsiauaka imeecha engaksï jurhimbitku jámaaka. ¿Ambe xarhatasïni eska inde ambe meru ísï úkuarhiaka? Kʼéri milagru, enga jindeeka, tata Jesukristueri tsíntskua.
“Máru [...] ueenasptiksï jakajkuni” (Úkuecha 17:32-34)
23. ¿Sésiksï jiókuarhispi iáminduecha Pablueri arhijtsïkperatani?
23 Pablueri arhijtsïkperatani, nóksï iáminduecha sési jiókuarhispti. Enga ima ueenapka aianguani eskaksï uarhiriicha úsïnga tsíntani, “máruksï ueenaspti teresmarhuni”. Máteruechaksï, janhanharhikua xarhataspti joperuksï nóteru uékasptia kurhaani ka arhisptiksï: “Máteru jimbojtsïni aianguakia indeeri ambe” (Úku. 17:32). Joperu máruksï sési jiókuarhispti. Biblia arhisïndi: “Máru achamasïichaksï niraspti imani jingoni ka ueenasptiksï jakajkuni. Máruksï jindeespti Dionisiu, enga kuenta úkuarhienga imani juesiichani jingoni engaksï Areópagurhu japka, ka uarhiiti ma enga Dámarisi arhinheenga ka ístu máteru kʼuiripuecha” (Úku. 17:34). Iásïjtu aianhpikuarhu uánikuechaksï májkueni ambe úsïndi. Engajtsïni jamberi máru teresmarhujka ka nóksï uékani kurhaani ambe engachi aianguajka, ístuchi exeantasïnga máteruechani engaksï uéjka kurhaani Reinueri ambe ka niáranksï Tata Diosïni marhuakuni.
24. ¿Ambejtsïni jorhendasïni Pablueri diskursu?
24 Engachi eratsentaska apostoli Pablueri diskursuni, uaakachi pruebechani úraani ka engaksï ísïika ka imeeri ambe uandani engaksï kʼuiripuecha mítekia. Ístuchi exesïnga na enga jukaparhakueka tekaantskua ka janhanharhikua jingoni aianguani imeechani enga relijioni no jurhimbiti no sési jorhendaaka. Ístuchi jorhenguarhisïnga máteru ambe enga kánikua jukaparhakueka, nóchi jatsiaka para mójtakuni Biblieri jurhimbikuani nomasi parakaksï kʼuiripuecha no ikiauaka. Engachi májkueni úska eska Pablu, sánderuchi sési preparadu jauaka para úni máteruechani jarhuataani ka sánderuchi sési aianhpiaaka: aianhpiriicha, aianhpikuarhu ka orhejtsïkutiicha, kúnguarhikuarhu. Niáraakachi ísïini eska Pablu, enga jarhuataapka máteruechani parakaksï “jirinhantapiringa Tata Diosïni ka únksï exentani” (Úku. 17:27).
a Exe je rekuadruni “ Atenasi, ióntki anapu kapitali kultureeri ambe”.
b Exe je rekuadruni “ Epikuriuecha ka estoikuecha”.
c Areópagu norestisï jarhaspti Akrópolisiiri. Juáta enga Areópagurhu japka jindeespti nani engaksï japka sánderu kʼérati orhejtsïkutiicha engaksï Atenasi anapuepka. Ísï jimbo, uandakua Areópagu úpirindi tsimani ambe arhikuekani, 1) mismu juátani, ka 2) kʼérati orhejtsïkutiichani engaksï Atenasi anapuepka. Jimboksïsï máru eratsejti eska Pablu juátarhu pánhaspka ka ístuksï máterucha eratsesïndi eska pánhaspka kʼérati orhejtsïkutiichani japarini engaksï Atenasi anapuepka, enga Ágora japka o plasarhu.
d Uandakua griegu enga Pablu úrapka para “parhakpini” (jindeesti kósmos) engaksï ístu úrenga para unibersu. Jamberi Pablu uékeendi uandani ambe engaksï kʼuiripuecha tsitienga jimbosï úrapti i uandakuani imani signifikadu jingoni engaksï imeecha úreenga ka no ísï eska Biblia na úreenga.
e Pablu úraaspti poeteeri uandakuechani Fenómenos, enga karaka karari estoiku Arato. Ístuksï máteru griegu karariicha úraasti uandakuechani engaksï sáno májkueniika, komu “Himno a Zeus”, enga Cleantes karaka, enga ístu estoikueeka.