1-3. ¿Andisï Pablu Korintu nípi, ka jamberi náki uandanhiata jatsipi?

 ENGA na kʼamarani japkia uéxurhini 50, Pablu Korintu jarhaspti, jima enga sánderu uánikua ambe ataranhanteenga ka engaksï uánikua grieguecha, romanuecha ka judiuecha irekapka. a Joperu Pablu no jima niraspti para ambe ma piáni o para ánchikuarhita jirinhani, sino para sánderu jukaparhakua ambe úni: aianhpini Tata Diosïiri Reinueri ambe. Uétarhinchasïreendi nani pakarani, joperu no uékasïreendi úkua jatsikukuni nemani. Ístu no uékasïndi eskaksï eratseaka eska, no jatsispka para ánchikuarhini, jimboka Tata Diosïiri Uandakuani aianhpini jámaxaka. ¿Ambe uaa?

² Pablu jorhenguarhispti ánchikuarhini: kʼumanchikua sïkuiriirichani uaani. Joperu no fásiliispti jimboka jájki jimbo únhaasïreenga, joperu Pablu jatsispti para ánchikuarhini para úni mantenerikuarhini. ¿Exentaa ánchikuarhita ini kʼéri ireta jimbo ka nani enga uaaka pakarani? Jamberi uandanhiajti ini ambe jimbo joperu mítesti eska imeeri ánchikuarhita enga sánderu jukaparhakueka jindeeska aianhpini Tata Diosïiri ambe.

³ Jamberi Pablu ióni tiempu pakarapti Korintu, nani enga úpka uánikua kʼuiripuechani aianguani Tata Diosïiri ambe. ¿Ambechi uaa jorhenguarhini imeeri ambe enga Pablu xáni úpka Korintu ka engajtsïni jarhuataa parachi juchajtu sési aianhpini Tata Diosïiri ambe juchaari territoriurhu?

4, 5. a) ¿Nani irekaspi apostoli Pablu enga Korintu japka, ka ambe ánchikuarhisïreeni? b) ¿Néna niáraspi Pablu jorhenguarhini kʼumanchikua sïkuiriirichani uaani?

⁴ Sáni tátsekua enga Pablu na niárapkia Korintu, mítespti temungurhirini ma engaksï kánikua sési eropienga: Ákila (enga judiu máepka) ka Prisila (ístu mítekateespti komu Priska). I temungurhiri Korintu mótsispti jimboka Roma anapu juramuti Klaudiu “juramuspka eskaksï iámindu judiuecha uéakuntapiringa Roma” (Úku. 18:1, 2). I temungurhiri jarhuataspti Pabluni exentani kʼumanchikua ka ánchikuarhita ma. Biblia arhisïndi: “Jimboka imajtu májkueni ambe ánchikuarhisïreenga. Imeechajtuksï kʼumanchikuechani sïkuiriiri uaasïreendi” (Úku. 18:3). Imani tiempu jimbo enga aianhpipka Korintu, Pablu i temungurhiiri kʼumanchikuarhu pakaraspti, ka jamberi jima uératini karaapka máru karteecha engaksï Bibliarhu jaka. b

⁵ ¿Andi néna niáraspi Gamalieliiri jorhenguarhiri ma kʼumanchikua sïkuiriirichani uaani jámani? (Úku. 22:3). Primeru siglurhu anapu judiuechaksï no no sési exesïreendi uájpeechani jorhendaani jájki jingoni ánchikuarhini nájkirukaksï ístu axapiringa eskuelecharhu. Ju je miáni eska Pablu Tarsu anapuespka, enga Silisia jaka. I ireta mítekateespti  sïrikukua jimbo enga arhinheenga cilicium ka enga úrakuerienga para kʼumanchikua sïkuiriirichani uaani. Jamberi jindeepti kachukunika ka sïrikuni sïkuirini enga xáni chopepka, chanhapitiini, o solu úrani.

6, 7. a) ¿Néna exesïreeni Pablu imeeri ánchikuarhitani, ka nénachi míteski eska Ákila ka Prisila májkueni eratsesïreenga? b) ¿Ambe jimbochi májkueniiski eska Pablu, Ákila ka Prisila?

⁶ Para Pablu imeeri ánchikuarhita no sánderu jukaparhakuespti. Anchikuarhisïreendi para úni mantenerikuarini ka aianhpini ambakiti aianhperakuani no ma sentabu jimbo (2 Kor. 11:7). ¿Májkuenksï eratsesïreeni Ákila ka Prisila? Jo. Jimboka enga uéxurhini 52 jimbo, apostoli Pablu mótsipka Korintu uératini, imajtuksï imani jingoni niraspti Éfesu. Ka kʼumanchikuarhu engaksï niárapka sánderu orhepani úrakuarhespti para tánguarhikuecha (1 Kor. 16:19). Sánderu tátsekua, Romaksï kʼuanhatsentaspti ka tátsekua ménderuksï Éfesu kʼuanhatsentaspti. Para imeecha, Reinueri ambe sánderu jukaparhakuespti, ka sánderuksï uandanhiasïreendi máteruechani jimbo ka eska solu imeecha jimbojku. Jimboksïsï ireteecharhisï anapu kúnguarhikuecha kánikua agradesidu japti (Rom. 16:3-5; 2 Tim. 4:19).

⁷ Iásï anapu Jeobaeri marhuariichaksï májkueni úsïndi eska Pablu, Ákilaka ka Prisila. Nájkirukaksï okupadu japka aianhperakuarhu, ístuksï ánchikuarhisïreendi parakaksï no máteruecha kéndaani japiringa (1 Tes. 2:9). Pori ejemplu, uánikua prekursorichaksï ánchikuarhisïndi manunitu oreecha jimbo o ma tiempuecha jimbojku paraksï úni mantenerikuarini ka únksï imani ambe enga sánderu jukaparhakueka para imeecha: aianhpini. Májkueni eska Ákila ka Prisila, sésiksï erokaasïndi sirkuitueri orhejtsïkutiichani imeecheeri kʼumanchikuecharhu. Ka jimbokaksï méntkisï sési kaasïnga máteruechani, jimboksïsï sési pʼikuarherajti engaksï erachiicha niuaka pʼorhembiani (Rom. 12:13).

8, 9. ¿Ambe úspi Pablu engaksï judiuecha no uékeenga kurhaani aianhperakuani, ka nani niraspi para seguiriini aianhpini?

⁸ Máteru ambe enga xarhatajka eska para Pablu ánchikuarhita jindeespka para solu mantenerikuarhini ka seguiriini aianhpini. Ma jurhiani Silasi ka Timoteu Masedonia uératinksï niáraspti ka kánikuaksï ambe íntskuspti enga Pablu uétarhinchani japka (2 Kor. 11:9). Pablu, “incharhetakuspti aianhpini Tata Diosïiri uandakuani” (Úku. 18:5). Joperuksï judiuecha no jiókuarhisïreendi ambe enga Pablu aianguani  japka. Nóksï uékasïreendi jiókuarhini aianhperakuani eskaksï úpiringa pʼímutanhantani Kristuni jimbo. Ísï jimbo Pablu uarauaratakuarhentaspti para xarhatakuani eska ima no kulpa jatsispka imeeri ambe engaksï nitamakuarhinchapiringa ka arhiaspti: “Chaari jimbo niuati engajtsï niáraska uarhini. Ji no ma ambe míteska. Iásï uératini, imeechani niuaka aianguani engaksï no judiueka” (Úku. 18:6; Ezeq. 3:18, 19).

⁹ ¿Nani aianhpipirinia Pablu? Biblia uandasïndi eska uéntaspka jima engaksï judiuecha kómarhienga Tata Diosïni ka niraspti Tisiu Justueri kʼumanchikuarhu enga jima máekandu japka. Achamasï ma enga jamberi judiu úkuarhipka (Úku. 18:7). Nájkiruka Pablu, Ákila ka Prisilaeri kʼumanchikuarhu irekani japka enga Korintu japka, joperu Tisiu Justueri kʼumanchikuarhu uératini aianhpisïreendi.

10. ¿Ambe xarhatasïni eska Pablu no jurajkuspa judiuechani aianguani Tata Diosïiri ambe?

¹⁰ Jiájkani enga Pablu iásï nipiringia no judiuechani aianguani. ¿Arhikuekasïreeni eska nóteru aianguapiringia judiuechani ka imeechani engaksï judiu úkuarhipka nájkirukaksï uékani japirini kurhaani? Nómbe. Pori ejemplu, Krispu “enga jima orhejtsïkuenga nani engaksï judiuecha tánguarhijka para Tata Diosïni kómarhini, niáraspti jakajkuni Tatani ka ístuksï iámindu imeeri kʼumanchikuarhu anapuecha jakajkuspti”. Ístu Biblia uandasïndi eska jamberi imeecha engaksï jima nireenga engaksï Tata Diosïni kómarhienga, májkuenksï úpti eska Krispu: “Uánikua Korintu anapuecha kurhaasptiksï ambakiti aianhperakuani ka ueenasptiksï jakajkuni ka itsï atakuarhisptiksï” (Úku. 18:8). Tisiu Justueri kʼumanchikua niáraspti jindeeni nani enga Korintu anapu jimbanhi kúnguarhikua tánguarhikuechani uaauenga. Enga Lukasï ísï karapka libru Úkuechani eska na úkuarhipani japka, jiájkani judiuecha ka imeecha engaksï judiu úkuarhipka, niárasptiksï jakajkuni ísï tátsekua enga Pablu uarauaratakuarhentapka. I ambe xarhatapirindi eska enga nema ueenga kuraani jurhimbikuani, Pablu úsïreendi mójtakuni imeeri aianhperakuani.

11. ¿Nénaksï májkueni úsïni eska Pablu iásï anapu Jeobaeri testiguecha engaksï aianguajka relijioni no jurhimbitiiri anapuechani?

¹¹ Iásï, jarhastiksï uánikua lugaricha engaksï iglesiecharhu anapu orhejtsïkutiicha kánikua kurhajchakateeka, jamberi jimbokaksï ióni páni jakaia jima o jimbokaksï uániiska. Májkueni eska Korintu  anapu judiuecha, kʼuiripuechaksï mámaru járhati pʼindekuechani jatsiasti. Juchajtuchi, májkueni eska Pablu, jánguarhintasïnga para jorhendaani inde kʼuiripuechani ka jarhuataani paraksï sési kurhanguni ambe engaksï jorhendanhajka Biblieri ambe. Nájkirukaksï no uékaaka eskachi aianhpiaka ojtsïni relijioniiri orhejtsïkutiicha no sési kámani, nóchi chkétakuarhisïnga. Ju je miáni eskaksï ístu jarhaska kʼuiripuecha engaksï kaxumbitiika ka engaksï jánguarhintajka “Tata Diosïni marhuakuni joperuksï no kurhangusïndi ambesï  uéjki Tata Diosïni” (Rom. 10:2). ¡Ju je ini járhati kʼuiripuechani jirinhantaani!

12. ¿Ambe aiakuspi Jesúsi Pabluni jánhaskakua ma jimbo?

¹² Jamberi Pablu no mítepti útasï na xáni ióni japirini Korintu. Joperu Jesúsi sési xarhakuspti jánhaskakua ma jimbo enga arhipka: “Asï jáma chéni. Seguirii ini ambe uandantani ka asï pínasku pakara jimbokani ji tʼungini jingoni jarhaska ka nókini nema no sési úchiati. Ini ireta jimbo, uánikua kʼuiripuechaksï jarhasti” (Úku. 18:9, 10). ¡Kánikua sési pʼikuastantapti i jánhaskakua! Jimboka tata Jesukristusï arhini japka eska kuájchakupiringa jiáni engaksï no sési kámapiringa ka eska uánikua kʼuiripuechani exeantapiringa imani ireta jimbo engaksï uékapiringa kurhaani. Ísï jimbo Pablu “jima pakaraspti ma uéxurhini ka terujkani para Tata Diosïiri uandakueri ambe jorhendaani” (Úku. 18:11).

13. ¿Jamberi ambe miántapi Pablu enga niárani japkia jima engaksï kʼérati juesiicha japka? ¿Joperu andisï seguru japi eska no májkueni úkuarhipiringa eska antesi?

¹³ Enga na ma uéxurhini ísïipkia enga Pablu Korintu japka, exespti ménderu Jesúsiiri jarhuajperatani. Jiánisï “judiuechaksï tánguarhintaspti paraksï kúnguarhikuntani Pabluni ka juesiicha jingonksï páspti” (Úku. 18:12). Imeecha engaksï kánikua mítekuka, uandasïndiksï eska jima engaksï juesiicha japka (griegu jimbo, bḗma) jindeespka paltaforma ma enga mámoli urapiti ka asuli jatandepka. Ka eska jamberi no iauani jarhaspka merkadurhu anapu plasarhu. Orhepani kánikua kóndespti nani enga ueenga uánikua kʼuiripu jatanheni. Arkeoluguechaksï ístu exentaspti eska jima no iauani jarhaspka nani engaksï judiuecha Tata Diosïni kómarhienga ka ístu Tisiu Justueri kʼumanchikua. Enga Pablu plataformarhu niárapkia, jamberi miántapti engaksï Estebanini uandikupka, enga ísï mítekateeka komu primeru kristianu enga uándikunhapka. Pablu jiánisï ísï mítekateespti komu Saulu ka enga sési exepka eska Estebani uándikunhapiringa (Úku. 8:1). ¿Májkueni nitamakuarhipirini Pablu? Nómbe, jimboka Jesúsi ini ambe aiakuspka: “Nókini nema no sési úchiati” (Úku. 18:10).

14, 15. a) ¿Náki chkuanderakua ambeksï uandaspi judiuecha Pablueri ambe, ka andisï Galióni no kasu úkuapi? b) ¿Ambe nitamakuarhispi Sóstenesi, ka ambe úspi sánderu tátsekua?

¹⁴ ¿Ambe úkuarhispi jiáni enga Pablu juesiicha jingoni niárapkia? Enga orhejtsïkuenga jindeespti Akaia anapu juramuti Galióni,  ka enga imeeri sánderu kʼéri ermanu jémba jindeepka Séneka, Roma anapu filosofu enga kánikua mítekateepka. Judiuechaksï ini chkuanderakua ambe uandaspti: “I achamasï támisï jánhastaaxati kʼuiripuechani paraksï ménderueni kómarhini Tata Diosïni ka paraksï no úni eska na uandajka ixú anapu lei” (Úku. 18:13). Ini ambe jingoni, arhikuekaxaptiksï eska imani ambe jorhentpixapka enga no terukunteenga Tata Diosïiri ambe jingoni. Joperu Galióni kuenta íntskukuarhespti eska Pablu no ma ambe no sési úspka (Úku. 18:14). Galióni no uékasïreendi inchamukuni judiuecheeri arhirperateecha jingoni. Ísï jimbo, ante de Pablu ueenani uandani para kuájpikuarhini, Galióni no uékaspti kurhajchaani judiuechani. I ambe kánikua ikiataspti judiuechani jimboksïsï Sóstenesi jupikapti, enga jamberi Krispueri kuenta jimbo orhejtsïkuni japkia nani engaksï Tata Diosïni kómarhienga “ka ueenasptiksï jamukuteni atani jima engaksï juesiicha jarhajka” (Úku. 18:17).

¹⁵ ¿Andisï Galióni no ma ambe úpi engaksï atani japka Sóstenesini? Jamberi eratsepti eska Sóstenesi ueenaspka indeni arhirperakuani judiuecha jingoni ka eska jandiajku jirinhakuarhispka ambe enga nitamanchani japka. Néna uéjkiniini, jamberi enga i ambe úkuarhipka sési japti, jimboka máru uéxurhiniichani tátsekua, enga Pablu orheta kartani Korintu anapuechani karakuapka uandaspti Sóstenesiri ma ka arhispti juchaari erachi (1 Kor. 1:1, 2). ¿Jindeespi ima Sóstenesi engaksï Korintu atapka? Enga ísïipka, ima ambe enga xáni no sési nitamakuarhipka jarhuatapti para kristianu úkuarhini.

16. ¿Nénajtsïni jarhuatasïni Jesúsiiri uandakuecha enga Pabluni aiakuapka?

 ¹⁶ Eskachi na exekia, Jesúsi arhispti Pabluni: “Asï jáma chéni. Seguirii ini ambe uandantani ka asï pínasku pakara jimbokani ji tʼungini jingoni jarhaska” (Úku. 18:9, 10). Joperu, ¿káni aiakuspi ini ambe? Ísï tátsekua engaksï judiuecha no jiókuarhipka imeeri aianhperakuani. Jimbosï sési jati eskachi méntkisï miáuaka Jesúsiiri uandakuechani ka sánderu jiánia engaksï kʼuiripuecha no uékaaka kurhaani aianhperakuani. Ju je no mirikurhini eska Jeobasï exejka ambe enga jaka kʼuiripuecheri mintsitecharhu ka eska úsïnga eskaksï andarhieraaka imeecha engaksï uékajka míteni (1 Sam. 16:7; Juanu 6:44). Míteni ini ambe, jarhuataatijtsïni parachi kánikua tsípikua jingoni aianhpini. Ístujtsïni kánikua uinhaperantasïndi míteni eska mándani uéxurhini uánikua kʼuiripuechaksï itsï atakuarhisïnga. Májkueni eska Pablu, jatsiskachi para kurhajchani Jesúsiiri juramukuani: “Ní je ka jorhendaa je iámindu ireteecharhu anapu kʼuiripuechani paraksï juchiiti chúxapatiini”. Engachi ísï úska seguruchi jauaka eska Jesúsi uaaka ambe enga aiatspeka: “Ji chánksïni jingoni jauaka pauani pauani astaka nóteru ióni kueratani jauakia para kʼamajkunhani parhakpini” (Mat. 28:19, 20).

17, 18. ¿Ambe miántapaxapi Pablu enga Éfesu nirani japka?

¹⁷ Nóchi míteska sini imani ambe jimbo enga eratsepka úni Galióni úpi eska japiringa pínandikua para Korintu anapu jimbanhi kúnguarhikua. Joperu ambe engachi kʼóru míteka jindeesti eska Pablu jima pakaraspka “máru jurhiatikua” ka eska tátsekua uandanuantaaspka jima anapu erachiichani. Uéxurhini 52 jimbo, eratsespti jatani barku ma para Senkreasi nirani, enga Korintu esterhisï japka para Siria nirani enga 11 kilometru (7 miia) iauanisï japka. Joperu, “kuinakuarhispti enga Senkreasi japka jimboka aiakuspka ambe ma Tata Diosïni” (Úku. 18:18). c Pájtaspti Ákilani ka Prisilani, ka parhimesptiksï mari Egeo, paraksï Éfesu niárani, Asia Menori.

¹⁸ Enga nirani japkia, jamberi Pablu miántani japti ambe enga xáni nitamakuarhipka 18 mesiicha jimbo enga Korintu aianhpini japka. Ambakiti ambe miántapaxapti ka uánikua ambe jarhaspti enga jimbo jatsipka para sési pʼikuarherani. Jimboka no jurajkuspka aianhpini úspi jarhani kúnguarhikua ma imani ireta jimbo ka ístu jarhasptia  lugari ma para tánguarhini, Tisiu Justueri kʼumanchikuarhu. Uánikuechaksï niárasptia kristianu úkuarhini komu Tisiu Justu, Krispu ka iámindu imeeri kʼumanchikuarhu anapuecha. Pablu kánikua xénchaasïreendi iáminduechani jimboka jarhuataaspka paraksï kristianu úkuarhini. Tátsekua karakuaspti ka terukutantaaspti karakata ma jingoni enga sési ambe uandeenga imeecheeri ambe imeeri mintsitarhu. Iásï, juchajtuchi kánikua sési pʼikuarherasïnga imeecha jimbo engachi jarhuataajka míteni jurhimbikueri ambe. ¡Nájtsïnisï sési pʼikuastajki i karakateecha engaksï sési uandajka juchaari ambe! (2 Kor. 3:1-3).

19, 20. ¿Ambe úspi Pablu enga na niárapkia Éfesu, ka nénachi uaa májkueni úni?

¹⁹ Enga Pablu na niárapkia Éfesu, jirejiresï ueenaspti aianhpini. “Ima jima inchaspti nani engaksï judiuecha tánguarhijka para Tata Diosïni kómarhini ka ueenaspti jánhastaani judiuechani” (Úku. 18:19). Joperu no ióni pakaraspti imani ireta jimbo. Nájkirukaksï Éfesu anapuecha “arhini japka eska útasï jima pakarapiringa, ima no uékaspti, ka uandanuantaspti ka arhiaspti: ‘Engareni Tata Diosï Jeoba íntskuska sésikua, ménderuksïni juuaka exeni’” (Úku. 18:20, 21). Sési mítetixapti eska útasï kánikua aianhpikua jarhaspka Éfesu. Ka eratsexapti kʼuanhatsentani, peru iámu ambe Jeobaeri jájki jimbo jurajkuspti. Juchajtuchi uaaka májkueni úni. ¿Néna? Jánguarhintani úni ambe ma ka jatsiani meteechani para sánderu marhuakuni Tata Diosïni, joperuchi méntkisï jatsiska para jirinhantani Jeobaeri jarhuajperatani ka ísï úni eska ima na uéjka (Sant. 4:15).

²⁰ Pablu, Ákila ka Prisilani Éfesu jurajkuaspti ka barkuni jatapaspti Sesaréa. Jamberi tátsekua Jerusaléni karhamapti para kúnguarhikuarhu anapuechani exeani (exe je notani enga jaka Úku. 18:22, Biblia de estudio). Tátsekua, Pablu kʼuanhatsentaspti Antiokía de Siria. ¡Xarharasïndi eska imeeri segundu biaji enga jámapka aianhpini iámu ambe sési uéraspka! Ju je exeni na enga nitamakuarhipka últimu biajirhu.