Jeoba erokuarhisïndi eskaksï tembuchaticha ísï uáka eskaksï na aiatspikuarhika jiáni engaksï tembuchaka. Enga ima tembuchataapka primeru temungurhirini, uandaspti: “Achati [...] kúnguarhi[ati] imeri uarhiitini jingoni, ka imaksï tsimarhani májku kuerpueuati”. Uánikua uéxurhini tátsekua, tata Jesukristu indeni mísmu uandakuechani úraaspti, ka ístu uandaspti: “Ísï jimbo, imechani enga Diosï kúndaaka, asï nema jáme jarhangutantaani” (Génesis 2:24; Mateu 19:3-6). Eskachi na exejka, Jeoba ka Jesusi ísïksï exesïndi eska temungurhirikua jindeska para méntkisï, enga solu jiáni kʼamakurhijka enga témba o uámba uarhijka (1 Korintu 7:39). Tata Diosï uaxastasti temungurhirikuani, jimbochisï no jatsika para eratsini eska ma uáka fásilku jurajperani. Jeoba kurhunhisïndi enga nema diborsiarikuarhijka no imani ambe jimbo enga Biblia uandajka (Malaquías 2:15, 16).

Peru Biblia, ¿ambe jimbo uandasïni eska ma uáka diborsiarikuarhini? Jeoba uandastia eska ima ikichasïnga ísku jándikua ambe (Génesis 39:9; 2 Samuel 11:26, 27; Salmo 51:4). Xáni ikichasïndi, enga jamberi uandajka eska nema uáka diborsiarikuarhini enga ísku jándikua ambe jauaka. (Kapitulu 9 jimbo párrafu 7, uandasïndi ambe ka ambeski ísku jándikua.) Tata Diosï sésikua íntskusïndi para erakuni diborsiarikuarhia o nómbe ima enga no kulpa jatsijka (Mateu 19:9). Ísï jimbo, enga erakuska diborsiarikuarhini, Jeoba no no sési exeati. Peru no ma erachi jatsisti para arhini eska uáka indeni ambe. Úpirindi jamberi úkuarhini eska  ima enga no kulpa jatsiaka, uánikua ambe eratsiaka, ka erakukuarheni no diborsiarikuarhini, enga exeaka eska meru moantaskia. Imani enga Biblia sésikua íntskukia para diborsiarikuarhini, imasï jatsiti para erakuni ambe úni ka jiókuarhini ambe enga jauaka imani ambe jimbo enga erakuaka úni (Galasia 6:5).

Ístu, úpirindi no sési jásï ambe jarhani enga jimbo kristianu ma erakuaka jurajkuni témbani o uámbani, o niárani jamberi diborsiarikuarhini nájkiruka témba o uámba no ísku jándikua ambe uáka. Enga i ambe úkuarhiska, Biblia uandasïndi eska ima enga erakuska jurajkuni témbani o uámbani eska ‘ísï pakaraaka ka no tembunhantani, o enga no, mejori eska kúrhintaaka’ (1 Korintu 7:11). Ísï jimbo, enga i ambe úkuarhiska, kristianu no uáti úndani máteru nemani mítini, eratsiparini eska uáka tembuchantani (Mateu 5:32). Exeakachi iásï ambe enga ménisï jarhajka, enga jimbo nema niárajka jurajkuni máteruni.

No uékani familiani mantenerini. Jarhastiksï máru engaksï no íntskujka imeri familiani ambe engaksï meru uétarhinchajka, peru no jimbokaksï no uáka, sino jimbokaksï no uékasïnga; ka ini ambe jimbo, imaksï kánikua kómu nitamakuarhisïndi. ¿Ambe uandasïni Biblia ícheri ambe? “Enga ma jakajkuti no jarhuataaka imeri [...] kʼumanchikuarhu anapuechani, ima negaristia juchari jakajkukuani ka sánderu no sési úsïndi ka eska ma no jakajkuti.” (1 Timoteo 5:8.) Enga achati no uékaska mójtakurhini, uarhiiti uáti exeni sini sési jaua nirani juramuticha jingoni para uaxastani eska jurajkuxaka uámbani, para kuájchakuani imeri sapiichani ka ístu ima mísmu. * Peru méntkisï enga nema uandaaka eska kristianusï ma no uékajka familiani mantenerini, orhejtsïkutichaksï jatsisti para sési inbestigarini, jimboka nema enga i ambe uáka uáti petanhantani kúnguarhikuarhu uératini.

Kánikua no sési kánhani. Jarhastiksï máru engaksï kánikua no sési kámpijka engaksï jimbo niáraaka jamberi pʼamenchakua úkuni o niáranksï jamberi uándikuni témbani, o uámbani. Enga kristianu máeuaka, enga ísï xáni no sési kámpijka, orhejtsïkutichaksï jatsisti para inbestigarini, jimboka no sési kurhuri jáxeni ka no sési kámpini, indeni ambe jimbo nema úsïndi kúnguarhikuarhu uératini petanhantani (Galasia 5:19-21).

 No sési úkuni imeri pájperakuani Tata Diosïni jingoni. Ménisï achati o uarhiiti uánikua ambe úsïndi para imeri uarhiiti o achati no marhuakuni Jeobani, oksï afuersa úni eskaksï no kurhajchaaka ambe enga Biblia uandajka. Enga i ambe úkuarhiska, kristianu jatsisti para jandiajku exeni sini uétarhia jurajkuni imeri uámbani o témbani para ima úni ‘sánderu janhanharhini Diosïni eska kʼuiripuni’ (Ukuecha 5:29).

Sési jarhasti miáni eska enga i no sési jásï ambe jauaka engachi exekia, nochi méni jatsiska para arhini erachini o pirenchini enga no kulpa jatsika, eska jatsiska para jurajkuni o nómbe uámbani o témbani. Nájkirukaksï orhejtsïkuticha o máteru erachicha engaksï kánikua jánhastika, uáka jarhuajperata íntsaani o arhiani ambe enga Biblia uandajka, jatsistiksï para miáni eska Jeobajkusï mítika ambe enga úkuarhijka temungurhirikuarhu. Enga pirenchi o erachi ma, jukari jamberi jatsikuaka enga uandantani jauaka ambe enga úkuarhijka imeri temungurhirikuarhu, nomasi para úni jurajkuni témbani o uámbani, no jukaparharani japirindi temungurhirikuani ka ni Tata Diosïni. Ístu, Jeoba sési mítisïndi enga nema jirinhakuntani jámajka para jurajkuni témbani o uámbani, nájkiruka uékaaka jískani. Jimboka, “iámindu ambe pʼenajchakurakata jarha[ska] imani japarini engachi jucha jatsika para kuenta íntskuntani” (Ebreu 4:13). Peru, enga meru no sési jásï ambe jauaka, ka nóteru ambe ma únia úkuarhini, ka enga kristianu erakuaka jurajkuni témbani o uámbani, no nema jatsisti para ambe ma arhini. Jimbokachi iámindu “mándani arhini, [Tata] Diosïni japarini uandakuarhintaaka” (Roma 14:11, 12).