1-3. a) ¿Nénaksï exesïni ánchikuarhitani uánikua kʼuiripuecha? b) ¿Ambe uandasïni Biblia ánchikuarhiteri ambe, ka ambechi exeni jaua ini kapituluni jimbo?

IÁSÏ, uánikua kʼuiripu no sési exesïndi ánchikuarhitani o komueska ambe ma enga kánikua kʼuetsapika. Pauani pauanksï úsïndi ambe engaksï no sáni tsitijka, ka ísïksï pʼikuarherasïndi enajkiksï no méni uéntaa imecheri ánchikuarhitarhu. Peruksï no jatsisti para eratsini eskaksï méntkisï ísï jauaka. Uátiksï exentani ambe ma enga jarhuatauaka paraksï tsípikua jingoni úni imecheri ánchikuarhitani ka para sési pʼikuastaani.

² Biblia uandasïndi eska sésiska uinhamu ánchikuarhini. Uandasïndi eska kóntperata máeska ánchikuarhita ka ístu ambe enga uérajka ánchikuarhita jimbo. Jánhaskati Salomoni karasti: “Eska iámindu kʼuiripu tʼireaka ka itsïmani ka eska exentaaka tsípikuarhitani imeri ambakiti ánchikuarhita jimbo. Tata Diosïri kóntperatesti” (Eclesiastés 3:13). Jeoba, kánikuajtsïni uékasïndi ka uékasïndi eskachi sési jauaka, ka jimbosï uékajti eskachi sési pʼikuarheraaka juchari ánchikuarhitarhu, ka eskachi tsípikuarhiaka kóntperatechani jimbo engaksï jurhajka ánchikuarhita jimbo. Engachi jorhenguarhiska ísï exeni ánchikuarhitani eska Tata Diosï na exejka, ka engachi chúxapaaska Bibliarhu anapu prinsipiuechani, Tata Diosïri uékperakuarhuchi jauaka (arhinta je Eclesiastés 2:24; 5:18).

 ³ Ini kapituluni jimbo, tʼámu ambechi exeaka: ¿Néna úsïni kristianu ma ‘exentani tsípikuarhitani imeri ambakiti ánchikuarhita jimbo’? ¿Ambe jásï ánchikuarhita no méni jatsiski para úni? ¿Néna uá úni imeri ánchikuarhitani no támu jurajkuparini Tata Diosïri ambe? ¿Náki ánchikuarhita jatsiski para úni enga sánderu jukaparhakueka? Peru ante de arini ambechi exeni, ju je jorhenguarhini tsimani sánderu kʼérati ánchikuarhiricheri ambe engaksï jaka: Jeoba ka Jesusi.

4, 5. ¿Ambe jimbo xarhatasïni Biblia eska Jeoba kánikua ánchikuarhisïnga?

⁴ Jeoba jindesti sánderu Kʼéri Ánchikuarhiri. Jimbosï Génesis 1:1 uandajti: “Uénakuarhu, Tata Diosï kueraasti auandani ka echerini”. Enga na kʼamarapkia kueraani iámindu ambe enga ixú parhakpinirhu jaka, uandaspti eska iámindu ambe enga kueraapka “kánikua ambakitispka” (Génesis 1:31). Ima kánikua sési pʼikuarheraspti imani ambe jimbo enga kueraapka. Xarharasïndi jiájkani eska ‘Tata Diosïni enga tsípijka’ kánikua sési pʼikuastasïnga uinhamu ánchikuarhini (1 Timoteo 1:11, TNM).

⁵ Jeoba kánikua tsitisïndi ánchikuarhini; jimbosï ima no méni ísku jarhajti. Jimbosï uánikua uéxurhini tátsekua enga na kʼamakupkia Jeoba kueraani iámindu ambe, tata Jesukristu uandaspti: “Juchiti Táti méntkisï ánchikuarhisïndi asta i jurhiatiku[a] jamberi” (Juanu 5:17). Peru ¿ambe úxaki asta iásï jamberi juchari Táti? Auandarhu uératini, pauani pauani ánchikuarhisïndi, kʼuiripuni kuidarisïndi ka arhisïndi ambesï jatsi para úni. Ka ístu, ‘jimbanhi kueraakata’ ma ústi: kristianuecha engaksï espiritu santu jimbo erakukateka, imecha engaksï Jesusini jingoni juramuaka auandarhu uératini (2 Korintu 5:17). Méntkisï  ánchikuarhixati paraka úkuarhiaka ima ambe enga eratsini jaka úni para kʼuiripuecha, parakaksï imecha engaksï uékajka Jeobani, irekaaka para méntkisï jimbanhi parhakpini ma jimbo (Roma 6:23). Ka sési pʼikuarherajti indeni ambe jimbo enga úkia, jimboka úskia eska uánikua kʼuiripu kurhaauaka Tata Diosïri Reinueri ambe, eskaksï imani marhuakuaka, ka eskaksï mójtakuaka jánguani paraksï úni Tata Diosïri xénchperakuarhu jarhani (Juanu 6:44).

6, 7. ¿Ambe ejemplu íntspeski tata Jesukristu de na enga ma jatsika para uinhamu ánchikuarhini?

⁶ Iónisï, Jesusi xarhatastia ejemplu jingoni eska kánikua tsitisïrenga ánchikuarhini. Ióni ante de Echerirhu jurhani, ima jindespti “ánchikuarhiri jánhaskati” ima enga jimbo Jeoba “kueraaka iámindu ambe” auandarhu ka echerirhu (Proverbios 8:22-31; Ebreu 1:2). Ka májkueni uinhamu ánchikuarhisti enga ixú echerirhu jámani japka. Desde sapichku uénasti jorhenguarhini chkarini ánchitani, ka niárasti mítinhani komueska “karpinteru” (Markusʌ 6:3). * Ju je miáni eska imani jurhiatikuechani jimbo, nóksï jarhaspka tiendecha engaksï materiali ambe íntspikuarhienga, ni mákinecha para chkarini kachukutarani ni erramienta engaksï lusiirika. I jásï ánchikuarhita puru jájki jimbo únhasïrendi ka kánikua uinhapikua uétarhisïrendi ka sési mítikuni. ¿Úsïnchi eranhaskani Jesusini chkarichani nirani jarhani jirinhaani, jamberi ima mísmu chʼapani jarhani anhatapuechani ka antsikuani chkarichani asta jima jamberi enga ima úraapiringa? ¿Ka tátsekua uáni jarhani bigaechani ka jatsikuani jarhani kʼumanchikuarhu, puertechani ambe jatsikuantaani jarhani ka asta  muebli ambe úni jarhani? Jo, ima mísmu pʼikuarheraspti na enga xáni sési pʼikuarherakuarhijka sési úni ambe ma.

⁷ Jesusijtu jánguarhintasti aianhpeni Jeobaeri ambe. Tanimu uéxurhini ka terujkani ini ánchikuarhitajku ústi enga xáni jukaparhakuepka. Uékasïrendi iáminduechani eianguani íri ambe, jimbosï sési úrendi tiempuni, xarhintku jauarasïrendi ka asta chúrikua jamberi aianhpisïrendi (Lukasʌ 21:37, 38; Juanu 3:2). Nirasïrendi “iápuru kʼérati iretecharhisï ka ranchuecharhisï uandajtsïkpini ka eianhpini ambakiti eianhperakua Diosïri juramukueri [ambe]” (Lukasʌ 8:1). Uánikua kilometru xanharasti tʼupurirhisï, para eianguani kʼuiripuechani ambakiti ambe Tata Diosïri Reinueri ambe.

8, 9. ¿Néna úspi Jesusi ‘exentani tsípikuarhitani imeri ambakiti ánchikuarhita jimbo’?

⁸ ¿Exentaspi Jesusi tsípikuani imeri ambakiti ánchikuarhita jimbo? Jo. Jesusi uánikuechani eianguaspti Tata Diosïri Reinueri ambe, jimbosï úpti uandani eskaksï kampuecha listu jarhaspkia para pʼikunhantani. Tata Diosïri ánchikuarhita uinhaperantasïrendi ka sési pʼikuastani, jimbosï no úkua exeandi ménisï no jamberi tʼireni para úni indeni ánchikuarhitani úni (Juanu 4:31-38). Enga na kʼamarani japkia imeri ánchikuarhita ixú Echerirhu, ¡na xáni sési pʼikuarherapi úni arhini imeri Tátini: “Ji úska eskari tʼu kʼéri ambe arhinhapiringa parhakpinirhu ka kʼamakuskania ini úkuani engarini tʼu íntskuka para eskani úpiringa”! (Juanu 17:4.)

⁹ No nemajtsïni íntskusti sánderu ambakiti ejemplu ma eska Jeoba ka Jesusi de na enga ma uáka ‘exentani tsípikuarhita ambakiti ánchikuarhitani jimbo’. Uékperakua engachi pʼikuarherajka imecha jimbo, manatasïndijtsïni parachi ‘terokukuntani Tata Diosïni’ ka parachi ‘ísï jámani eska tata Jesukristu na jámaenga’ (Efesu 5:1; 1 Pedru 2:21). Ju je iásï exeni, nénachi uá exentani tsípikuarhita juchari ánchikuarhita jimbo.

10, 11. ¿Ambejtsïni jarhuataa parachi tsípikua jingoni ánchikuarhini?

¹⁰ Kristianujtu jatsisti para ánchikuarhita ma jatsini. Ka uékasïngachi sési pʼikuarherani indeni ánchikuarhitani jingoni ka sési úni, xáni engachi xáni uáka. Peru no fásilisti ísï úni engachi no tsitiaka ambe engachi újka. Enga ísïuaka, ¿nénachi uá ‘exentani tsípikuarhitani juchari ambakiti ánchikuarhita jimbo’?

¹¹ Tsípikua jingoni úni. Nochi uáka mójtakuni ambe engachi újka, peruchi kʼóru uáka mójtakuni na engachi újka. Ma ambe engajtsïni jarhuataaka parachi ini ambe úni, jindesti eratsini na enga exejka Tata Diosï ambe ma. Exe je ejemplu ma, engachi jatsika para familiani mantenerini, ju je miáni eska Tata Diosï sési exesïnga eskachi uáka ini ambe, nájkiruka juchari ánchikuarhita no xáni kʼéri ambeuaka. Jo, Tata Diosïri Karakata uandasïndi eska ima enga no kuidarijka familiani, “sánderu no sési úsïndi eska ma no jakajkuti” (1 Timoteo 5:8). Engachi kurhangujka eska juchari ánchikuarhita jindeska parachi úni máteru ambe úni —parachi úni imani ánchikuarhitani engajtsïni Tata Diosï íntskuka—, sánderuchi sési pʼikuarheraaka ka sánderuchi sési ánchikuarhiaka eska juchari kompanieruecha.

12. ¿Andisï marhuajki uinhamu ánchikuarhini ka jurhimbitiini?

¹² Xarhataparini eskachi uinhamu ánchikuarhisïnga ka eskachi jurhimbitiiska. Kristianu jurhimbitichachi jatsiska para uinhamu ánchikuarhini ka jorhenguarhini sési úni ánchikuarhitani. Engachi jánguarhintaska sési ánchikuarhini, uánikua ambechi andasïnga, ma jindesti eskajtsïni patroni jukaparharaaka (Proverbios 12:24; 22:29). Ístu, engachi jurhimbitiijka, ka nochi sïpani materiali ambe, ni tumina, ni tiempu tsïtani, ístuchi máteru ambe andasïnga (Efesu 4:28).  Eskachi na exekia máteru kapitulu jimbo, sáno méntkisï juchari patronijtsïni mintsikasïndi. Ka engaksï ima no kuenta íntskukuarhiaka eskachi ambakiti ánchikuarhiriska, jucha uáka útasï sési pʼikuarherani jimbokachi irekaxaka “nómbe kʼamanharhintskua jingoni” ka jimbokachi mítiska eskachi sési pʼikuastasïnga juchari Tata Diosïni engachi xáni uékajka (Ebreu 13:18; Kolosasi 3:22-24).

13. ¿Ambechi andasïni juchari sési jángua jimbo ánchikuarhitarhu?

¹³ Jiókuarhiparini eska juchari jángua uáka sési pakatani Tata Diosïni. Enga juchari jángua ambakitiijka, máteruechaksï exesïndi ini ambe. ¿Ambechi andasïni ini ambe jingoni? Eska “juchari Diosï ka Pʼímutantspitiri jorhengua iámindu ambe jimbo sési arhikate[uaka]” (Titu 2:9, 10). Ambakiti jángua ma jatsini, úsïndi eska sési xarharaaka relijioni jurhimbiti, ka úsïndi eska kʼuiripu exeaka na enga xáni sési jáxeka i relijioni. ¡Na enga xáni sésiipiringa eska ánchikuarhitarhu anapu kompanieru ma, uékapiringa sánderu jorhenguarhini jurhimbikueri ambe juchari jángua jimbo! Nochi mirikurhiaka ma ambe enga sánderu jukaparhakueka: eska no jarhaska ma ambe engajtsïni sánderu sési pʼikuastaaka, ka eska mítini eska juchari jángua sési pʼikuastasïnga Jeobani ka eska sési pakatasïnga (arhinta je Proverbios 27:11; 1 Pedru 2:12).

14-16. ¿Náki tsimani kurhamarhikuechanchi jatsiski para úkuarhiani engachi uékaaka ánchikuarhita ma erakuni?

¹⁴ Biblia no íntspesïndi lista ma iámindu ambe jingoni enga sésiika ka enga no sésiika ánchikuarhitarhu ma. Peru i ambe no arhikuekasïndi eska ma uáka náki uéjki ánchikuarhita ma úni, no arhiparini ambe uéjki ánchikuarhiteni. Bibliajtsïni jarhuatasïndi parachi erakuni ánchikuarhita ma enga jurhimbitiiuaka, enga marhuakuauaka máteruechani,  ka enga sánderu jukaparhakueka, eska no no sési pʼikuastaaka Tata Diosïni (Proverbios 2:6). ¿Nénachi uá mítini jaiapanhintasïni Tata Diosïni ánchikuarhitani ma? Úkuarhiaparini tsimani kurhamarhikuechani.

¹⁵ ¿Jindeski ambe ma enga Biblia no jeiapanhintajka? Tata Diosïri Karakata no jeiapanhintasïndi enga nema sïpajka, chkuanderajka ka enga idoluechani uájka (Éxodo 20:4; Ukuecha 15:29; Efesu 4:28; Jaŋaskuecha 21:8). Ísï jimbo, nochi ánchikuarhisïnga jima enga uétarhiaka ini ambe úni. Uékperakua engachi pʼikuarherajka Jeoba jimbo, úsïndi eskachi no jiókuarhiaka ánchikuarhita  ma engachi jimbo uanajchakuauaka Jeobaeri juramukuechani (arhinta je 1 Juanu 5:3).

¹⁶ ¿Meru xarhatani japirini eskani ji apoiarixaka o etsakuani jarhani no sési járhati úkuechani? Ju je eratsini eskachi albaniliska. I ánchikuarhita no no sésisti. Peru eratsi je eska erachi ma arhinhasïnga eska tiosïorhu ma ánchikuarhiaka. Jo ísïsti, ini ánchikuarhitani úni, no arhikuekasïndi eska ima relijioni jingoni úkuarhixaka. Peru imeri ánchikuarhita jingoni, ¿no apoiarixaki relijionini ma enga etsakuajka ka jorhentpejka chkuanderakua ambe Tata Diosïri ambe? (Jaŋaskuecha 18:4.) Jimbokachi uékasïnga Jeobani, nochi ambe ma uékasïnga jatsini imani ambe jingoni enga Biblia no jeiapanhintajka.

17. a) ¿Ambejtsïni jarhuataa parachi sési ambe erakuni engachi ánchikuarhiteri ambe exeni jámaaka? (Exe je rekuadruni “ ¿Sési japirini jiókuarhini ini ánchikuarhitani?”.) b) ¿Nénachi uá úni eskajtsïni juchari konsiensia jarhuataaka parachi erakuni úni imani ambe enga sési pʼikuastaaka Tata Diosïni?

¹⁷ Para úni sési erakuni ambe úni engachi ánchikuarhiteri ambe exeni jámaaka, uétarhipirindi nomasi sési eratsiantani imani tsimani kurhamarhikuechani engaksï párrafurhu 15 ka 16 jimboksï jaka. Peru jarhasti máteru ambe engachi ístu jatsika para sési eratsintani. * Nochi jatsiska para erokuarhini eska jántspiri enga mintsinharhikueka ka enga jánhastika lista ma uáka iámindu ambe jingoni engachi no jatsika para úni. Ísïchisï uáka úrani eratsitarakuani. Eskachi na exekia kapitulu 2 jimbo, jatsiskachi para jorhendani konsiensiani jorhenguarhiparini Tata Diosïri Karakatani ka eratsiparini na engachi uáka úrani ini ambe juchari irekuarhu. Ísïchi uáka ‘eratsikua jukani’ jimbokachi ‘pʼindeskia eratsini parachi úni mítini’, ka juchari konsiensiajtsïni jarhuataati parachi imani ambe úni  enga Tata Diosï jeiapanhintajka ka engajtsïni jarhuataaka parachi imeri uékperakuarhu jarhani (Ebreu 5:14).

18. ¿Andisï no fásilii úni ambe enga Tata Diosï uékajka?

¹⁸ Ini “últimu jurhiatikuechani jimbo” enga xáni no sési jánhaskuarheni jaka, no fásilisti úni Tata Diosïri  ánchikuarhitani (2 Timoteo 3:1). Mítiskachi eska úkua jukaska ánchikuarhita ma exentani ka ióni jamberi jatsini. Ka mítiskachi eskachi jatsiska para mantenerini familiani. Peru engachi no jingontku jauaka, uákachi májkueni exeni ánchikuarhitani eska máteru kʼuiripuecha o uékani ístu kánikua jatsikuarhini eska na újka i parhakpini, ka i ambe, úpirindijtsïni ójkutani parachi sánderu sési marhuakuni Tata Diosïni (1 Timoteo 6:9, 10). Ju je exeni ambejtsïni jarhuataa parachi sési eratsikuni ka parachi imani ambe úni “ambe enga sánderu ambakitiika [o jukaparhakueni, TNM]” (Filipusʌ 1:10).

19. ¿Andichisï jatsi para meru mintsikani Jeobani, ka ambechi no uá engachi seguru jauaka eskajtsïni Jeoba kuidariuaka?

¹⁹ Mintsikaakachi Jeobani iámu mintsita jingoni (arhinta je Proverbios 3:5, 6). ¿A no eskachi uáka iámu  mintsita jingoni mintsikani Jeobani? Jo, jimbokajtsïni ima uékasïnga ka kuidarini (1 Pedru 5:7). Ima sánderu sési mítisti eska jucha ambe engachi uétarhinchajka, ka imajtsïni íntskusïndi iámindu ambe (Salmo 37:25). Jimbochisï no méni jatsika para mirikurhini i ambe engajtsïni Biblia arhijka eskachi uáka: “Asï jáma je jatsikuarhikuekani, sino tsípi je indeni ambe jingoni engajtsï jatsika, jimboka Diosï uandaska: ‘Jíkini no méni késtakuchiaka ka níjtukini méni jurajkuni’” (Ebreu 13:5). Uánikua engaksï míndakia imeri tiempuni paraksï sánderu marhuakuni Jeobani, sésiksï mítitixati eska Tata Diosï méntkisï íntsaasïnga ambe engaksï uétarhinchajka. Engachi seguru jarhajka eskajtsïni Jeoba kuidariuaka, nochi jukari uandanhiasïnga imani ambe jimbo enga juchari familia uétarhinchajka (Mateu 6:25-32). Nochi méni jatsiska para jurajkuni eska ánchikuarhita uáka eskachi nóteru niuakia eianhpini, tánguarhikuecharhu o máteru ambe enga Tata Diosïri ambeuaka (Mateu 24:14; Ebreu 10:24, 25).

20. ¿Ambe arhikuekasïni éskua ambakiti ma jatsini, ka néna úsïni ma ísï úni?

²⁰ Ju je éskua ambakiti ma jatsini (arhinta je Mateu 6:22, 23). Íksï uandakuecha arhikuekasïndi eskachi no jatsiska para jucha mísmu uandanhiatechani ambe jirinhakuarhiani. Kristianueri éskua, jatsisti para májku ambe exeni jarhani: úni ambe enga Tata Diosï uékajka. Engachi Tata Diosïri ambejku eratsini jauaka, nochi inchandimintaaka parachi kánikua tumina uékani andani o uékani kánikua jukaparhakua ambe jingoni irekani. Ístuchi no jámasïnga sóntku uékani jarhani imani ambe jatsini enga parhakpini uandajka eska modeska, ka eska uétarhisïnga jatsini enga ma uékaaka sési irekani. ¿Ambejtsïni jarhuataa parachi éskua ambakiti ma jatsini? No kántspini  jarhani enga no meru uétarhiaka. No puru imani ambe jatsini engachi jimbo jatsika para kánikua tiempu úrani, ka para kuidarintku jarhani. Eska na uandajka Biblia, agustu jarhani, nomasi konkirukachi “jatsikuarheaka tʼirekua ka xukuparhakua” (1 Timoteo 6:8). Jo, jánguarhintani arisku jásï irekua ma páni.

21. ¿Andichisï jatsi para exeni ambe sánderu jukaparhakueski, ka ambechi jatsiski para orheta pérani juchari irekuarhu?

²¹ Méntkisïchi orheta péraaka Tata Diosïri ambe. Tiempu sóntku nirasïndi, jimbosï jukaparhakueti eskachi eratsiaka ambe enga sánderu jukaparhakueka. Engachi no ísï úska, juchari tiempu jimachi úraaka enga no jukaparhakueka, ka nóteru tiempu jauatia para ima ambe enga sánderu jukaparhakueka. ¿Ka ambe jindeski enga sánderu jukaparhakueka? Nájkiruka uánikua kʼuiripu sánderu jukaparhakua exejka karrera ma estudiarini ka ánchikuarhita ma jatsini nani engaksï kánikua andaaka, peru Jesusi arhiaspti imeri jorhenguarhitichani: “Enga sánderu uétarhijka jindesti eskajtsï jirinhaaka Diosïri juramukueri ambe” (Mateu 6:33). Kristianu jurhimbitichachi méntkisï orheta pérasïnga Tata Diosïri Reinuni ka eska máteru ambeni. Juchari irekua jingoni, —juchari jángua, engachi eratsini jaka úni, ambe engachi újka— xarhatasïngachi eska para jucha, sánderu jukaparhakueska Tata Diosïri Reinu, ka úni ambe enga Tata Diosï uékajka ka eska jatsikuarhikua ambe ka iámindu máteru ambe enga parhakpini eiatspijka.

22, 23. a) ¿Nákiski juchari sánderu ambakiti ánchikuarhita, ka nénachi uá xarhatani eskachi kánikua jukaparharasïnga? (Exe je rekuadruni “ Kánikuarini sési pʼikuastasïndi i ambe engani erakuka úni”.) b) ¿Ambechi eratsitixaki úni enga ánchikuarhiteri ambeuaka?

²² Tata Diosïri jántspirichaksï mítisti eska nóteru  ióni pakarasïngia para jurhani kʼamajperakua. Jimboksïsï uinhamu ánchikuarhijti indeni ánchikuarhitani jimbo enga sánderu jukaparhakueka para kristianu ma: eianhpini Tata Diosïri Reinuni ka jorhendaani máteruechani íri ambe (Mateu 24:14; 28:19, 20). Ísï eska Jesukristu na úka, pauani pauanksï aianhpisïndi indeni ambe enga pʼímutantspiaka. ¿Nénaksï orheta pérasïni ini ánchikuarhitani? Uánikuechaksï jánguarhintasïndi ísï úni, publikadoriparini. Máteruechaksï sési eratsikuntasïndi paraksï prekursorini ka misionerueni. Uánikua tátichaksï jarhuaatasïndi imeri uájpechani paraksï úrani imeri tiempuni paraksï úni sánderu marhuakuni Jeobani komueska prekursori o máteru i jásï ambe, ka paraksï meta ambe jatsikukuarhini. Kristianu jurhimbitichaksï jánguarhintasïndi eianhpini, ¿úpirinchi jiájkani uandani eskaksï ‘exentaskia tsípikuarhitani imecheri ambakiti ánchikuarhita jimbo’? Jo. No ma ambe jarhasti enga sánderu sési pʼikuastpijka ka enga kóntperatechani íntspeajka ka eska iámu mintsita jingoni marhuakuni jarhani Jeobani (arhinta je Proverbios 10:22).

²³ Parachi úni familiani mantenerini, uánikuachi ióndakuarhu jamberi ánchikuarhisïnga ka nochi ambe ma úsïnga úni. Peru útasï ísï, uákachi “exentani tsípikuarhitani juchari ambakiti ánchikuarhita jimbo”, ísï eska Jeoba na uékajka. Engachi ísï eratsiaka eska Jeoba na eratsijka ka engachi chúxapaaska Bibliarhu anapu prinsipiuechani, sésichi pʼikuarheraaka juchari ánchikuarhita jingoni. Ka ístu, nochi jatsiska para jurajkuni eskajtsïni ambe ma ójkutaaka parachi no úni imani ánchikuarhitani enga sánderu jukaparhakueka: eianhpini jimbanhi eianhperakuani Tata Diosïri Reinueri ambe. Ísïchi uáka xarhata eskachi xénchasïnga Jeobani, ka eskachi mintsita jingoni uékasïnga imeri uékperakuarhu jarhani.