1, 2. ¿Ambechi jatsiski para úni parachi uinhapiti jarhani ka nochi pʼamenchani, ka andisï xáni jukaparhakue i ambe?

IÁMINDUCHI tsitisïnga uinhapiti jarhani ka no pʼamenchani. Peru parachi ísï jarhani, jatsiskachi para sési tʼireni, ejersisiu úni ka kuidarikuarhini parachi no pʼamenchani. Peru parachi i ambe úni, jatsiskachi para méntku jánguarhintani jarhani, peruchi no kuatantasïnga jimbokachi mítiska eskajtsïni kánikua marhuachiaka iáiasï ka sánderu orhepatini engachi ísï kuidarikuarhiska. Peru jarhasti máteru nani engachi ístu jatsika para uinhapiti jarhani. ¿Ambe jimbo?

² Jorhenguarhiri Judasï íri ambe uandaspti enga arhipka kristianuechani: “Tata Diosïri xénchperakuarhu ja je”. Ini mísmu textuechani jimbo, ístu uandaspti na engachi úpiringa ini ambe úni enga uandapka: “Chári pímbinhasï jakajkukua jimbo uinhaperpentsï je” (Júdasïri 20, 21, TDU). ¿Nénachi uá eska juchari jakajkukua uiuinhasï jauaka, parachi úni Tata Diosïri xénchperakuarhu jarhani? Exeparini tanimu ambe engachi jatsika para úni.

3-5. a) ¿Ambe chkuanderakuajtsïni uékasïni jakajkutarani Noambakiti, Jeobaeri leicheri? b) Ejemplu ma jingoni, uanda je na engachi jatsika para exeni ambe engajtsïni Tata Diosï kurhachijka ka nénachi pʼikuarhera engachi ísï exeaska.

³ Ma ambe engachi orheta jatsika para úni, parachi uinhapiti  jarhani Tata Diosïri ambe jimbo, jindesti eskachi sánderu mintsikaaka Jeobaeri juramukuechani. Ini libruni jimbo, uánikua ambechi jorhenguarhiskia na engaksï uandajka Jeobaeri leicha eskachi jatsiska para jámani. Peru kurhamarhikua jindesti, ¿nachi exeasïni ini leichani? Noambakiti kánikua tsitipirindi eskachi eratsipiringa eskaksï Jeobaeri leicha, prinsipiuecha ka mandamientuecha, nójtsïni jurajkusïnga parachi eratsikuarhini. Ka jimboka exeskia eska i ambe kánikua sési marhuakuspka jardini Edenirhu, jimbosï no kuatantajti úrani (Génesis 3:1-6). Peru ¿marhuakua juchantsïni jingoni? Kánikua jukaparhakueuati na engachi exeajka Jeobaeri leichani ka ambe engajtsïni kurhachijka.

⁴ Exe je ini ejempluni. Eranhaska je eskachi parkirhu ma nirasïnga xanharani, ka eskachi exesïnga eska kʼéri ka uiuinhasï serka ma jarhaska jimesïsï enga kánikua sési jándeka ka eskachi no úsïnga nitamani. Uénani jámani, ísï xarharasïndi eska ójkutakua máeska enga újka eskachi no uáka ambe engachi uékapiringa úni. Peru engachi sési eraajka serkarhu, kʼéri leoni ma jarhasïndi enga kánikua ikiani jarhajka. Iásï kʼóruchi kurhangusïngia para ambe úrakueski serka: parajtsïni kuájchakuni. Peru juchari irekuarhu, ¿jarhaski leoni ma engajtsïni uékani jaka no sési úcheni? Jo, jimbokajtsïni Tata Diosïri Karakata arhisïnga: “Sési eratsi je ka jingontku jarhantsï, jimboka chári ikiatspiti enga jindeeka Noambakiti, ma uirhipandani jámasïnga ísï eska ma leoni apejpiti enga jirinhani jámajka aberi néni anta” (1 Pedru 5:8).

⁵ Jo ísïsti, Satanasi apejpiti máesti enga no sáni pʼamojpijka. Ka parachi no jurajkutakuarhini eskajtsïni ‘kʼarhaaka’, Jeobajtsïni íntsaasïndi leichani engajtsïni kuájchakujka (Efesu 6:11). Ísï jimbo, engachi eratsiantauaka imeri leichani, ju je jánguarhintani ísï exeani eskaksï naeka: engaksï xarhatajka na engajtsïni xáni uékajka juchari Táti auandarhu anapu. Engachi ísï úska, kurhanguakachi  eskaksï jarhaska parajtsïni kuájchakuni ka parachi sési irekani. Jimbosï jiájkani jorhenguarhiri Santiagu karapti: “Peru enga nema sési eratsintaaka indeni ambakiti jorhenguani enga pʼímutantpijka, ka méntku jauenani patsani [...] ima tsípiati enga ísï uáka” (Santiagu 1:25).

6. ¿Nénachi uá sánderu mintsikaani Tata Diosïri ambakiti leichani ka imeri prinsipiuechani? Íntspi je ejemplu ma.

⁶ Ambe engachi jatsika para úni, parachi úni sánderu mintsikaani Jeobaeri leichani, ka Jeobani, Kʼéri Juramutini, jindesti úraani juchari irekuarhu Jeobaeri mandamientuechani. I ambejtu arhikuekasïndi eskachi jatsiska para kurhajchani “Kristueri mandamientuni”, enga ístu jindeka jorhentpini “iámindu ambe enga[jtsïni] [ima] juramuchika” (Galasia 6:2; Mateu 28:19, 20). Kristianuechajtuchi jatsiska para kurhajchani juramukuani enga uandajka eskachi jatsiska para tánguarhini parachi kómarhini Tata Diosïni ka parachi uinhaperpentani (Ebreu 10:24, 25). Máteru Tata Diosïri juramukua jindesti eskachi jatsiska para pauani pauani kómarhini Tata Diosïni mintsitarhu uératini (Mateu 6:5-8; 1 Tesalonika 5:17). Engachi kurhajchaaska ini juramukuechani, sánderuchi jakajkuaka eskajtsïni uékperakua jimbo íntsaaska Tata Diosï. Jo, kurhangusïngachi eskajtsïni tsíperasïnga ka sésijtsïni pʼikuastani, ma ambe enga i no ambakiti parhakpini no újka úni. Sánderuchi mintsikaasïnga Tata Diosïri leichani engachi eratsiajka imani kóntperatechani engachi jatsiajka jimbokachi kurhajchaasïnga.

7, 8. ¿Ambe arhiasïni Tata Diosïri Karakata imechani engaksï chéjka jimbokaksï eratsisïnga eskaksï no uáka méntkisï sési marhuakuni?

⁷ Jamberiksï máru no agustu jarhajti eratsiparini eska no fásiliuaka pauani pauani kurhajchaani Jeobaeri leichani, ka ini jimboksï chéjti eskaksï ménisï niáraaka no sési úni. Engachi niáraaka ísï pʼikuarherani, ju je miántaani arini uandakuechani: “Ji, Jeoba, chíti Tata Diosïska, Ima engakini jorhendajka parari sési jarhani, Ima engakini  arhini jaka nani engari ísï xanharaaka. ¡Engari meru kurhajchaapiringa juchiti mandamientuechani! Jimajkani chíti pínandikua niárapirindi ísïini eska riu ma ka chíti jurhimbikua komueska marirhu anapu olecha” (Isaías 48:17, 18). ¿Niáraskichi ménisï eratsintani na engaksï xáni sési pʼikuastpijka i uandakuecha?

⁸ Ixujtsïni Jeoba aiachesïndi, eskachi tsimani kóntperatechani jatsiauaka engachi kurhajchaska. Orheta, juchari pínandikua ísïuati eska riu ma: enga ísku jarhajka, enga kánijka ka enga no kʼamakurhijka. Ka ístu, eska juchari jurhimbikua ísïska eska marirhu anapu olecha. ¿Ambe jimbo? Engachi plaiarhu uératini, ísku pakaraska olechani exeani, méntkusï jurhani ka nirani jarhasïndi, pʼikuarherasïngachi eska inde ambe úkuarhiaka para méntkisï: mítiskachi eskaksï para méntkisï ísï nirani jauaka olecha, nóksï méni anhaxurhiati. Ísï jimbo, i textuechajtsïni xarhatachisïndi eska juchari jurhimbikua, engachi irekajka úparini ambe enga sésiika, ístu májkueni no méni kʼamakurhiati. Engachi jánguarhintaska parachi sési marhuakuni Tata Diosïni, imajtujtsïni no méni jurajkuati (arhinta je Salmo 55:22). Engachi méntku miántani jauaka ini xáni ambakiti eiatsperakuechani, sánderu uinhapiti úkuarhisïndi juchari mintsikakua Jeobani jimbo ka imeri ambakiti juramukuechani jimbo.

9, 10. a) ¿Andisï jukaparhakue jánguarhintani uinhapiti jarhani Tata Diosïri ambe jingoni? b) ¿Andijtsïnisï sési pʼikuastaa engachi ambakiti pájperakua ma jatsiaka Jeoba jingoni?

⁹ Máteru ambe engachi jimbo uáka uinhapiti jarhani Tata Diosïri ambe jingoni, jindesti chúxapaani ini uandakuechani: “Sino jaue jorhenguarhini sánderu para[jtsï] sési jánhaskatini jarhani” (Ebreu 6:1). Ini tiempuni jimbo, no nema jarhasti enga no pekadu jukaraka, peruchi kʼóru uáka iáminduecha kánikua jánhaskatiini Tata Diosïri  ambe jingoni. Eskachi na jánhaskapani jauaka Tata Diosïri ambe jingoni, sánderuchi sési pʼikuarheraaka marhuakuni Jeobani. ¿Andi?

¹⁰ Kristianu enga jánhaskatikia, jánguarhintasïndi para sánderu sési marhuakuni Tata Diosïni, ka para ísï exeni ambe ma eska Jeoba na exejka (Juanu 4:23). Pablu uandasti eskaksï “imecha engaksï mintsita tamapuni jimbo juramuminhajka, solu indeni ambeksï eratsisïnga enga mintsita tamapu tsitirpijka, peru ima engaksï Espiritu Santuni jimbo juramuminhajka eratsisïndiksï indeni ambe enga Espiritu Santuni jimboeka” (Roma 8:5). Imecha engaksï ísï exejka ambe ma eska mintsita tamapu, o eska kʼuiripu ma, nóksï úsïndi tsípikua jingoni irekani, jimbokaksï no nemani jimbo uandanhiasïnga, nóksï eratsikua jukasïnga ka puru jatsikuarhikua ambeksï tsitisïndi. Peru imecha engaksï espiritu santu jimbo juramuminhajka, kánikuaksï tsípikuarhisïndi, jimbokaksï pauani pauani úni jarhasïnga ambe enga Jeoba uékajka, ka Jeoba, Tata Diosï máesti enga tsípikua jingoni irekajka. Uékasïndiksï sési pʼikuastani Jeobani, ka tsípikuarhisïndiksï nájkiruka tsʼéjkunhani jauaka imecheri jakajkukua. ¿Néna úsïni ísï úkuarhini? Jimbokaksï mítiska eska engaksï méntkisï kurhajchaska Jeobani, uákaksï  xarhatani eska Noambakiti chkuandera máeska, ka sésiksï pʼikuastaati imecheri Táti auandarhu anapuni (Proverbios 27:11; arhinta je Santiagu 1:2, 3).

11, 12. a) Uandanta je ambe uandasïni Pablu eskachi uáka juchari “eratsikua” jingoni, ka ambe arhikuekasïni uandakua enga úrakuarhika para arhini “pʼindeskia”. b) ¿Ambe uétarhisïni para charhaku ma niárani ísïini eska deportista ma?

¹¹ Engachi jánhastiuakia Tata Diosïri ambe jimbo, uákachi prepararini juchari eratsitarakuani. Exe je ini textuni: “Peru inde tʼirekua enga xaxanhajka, jindesti para imecha engaksï kʼératiikia, ka para imecha engaksï eratsikua jukaka jimbokaksï pʼindeskia eratsini paraksï úni mítini ambe enga jindeka ambakiti ambe ka ambe enga no sésika” (Ebreu 5:14). Enga Pablu ixú eratsikueri ambe uandani japka ka enga uandapka “pʼindeskia”, úraxapti uandakua griegu ma enga meru úranhenga primeru siglurhu jima engaksï deportistecha entrenariuenga jini Gresia, jimboka i uandakua arhikuekasïrenga “entrenadu jarhasti eska deportista ma”. Ju je iásï exeni ambe uétarhisïni para ísï úni.

¹² No nema andajpenusïndi mítiparini néna sési úrani imeri kuerpuni. Charhakuechaksï ménisï no jamberi mítisïndi naniksï jukaasïni jájkichani o jantsirichani, nóksï úsïndi sési úrani jájkichani, ménisïksï niárasïndi jamberi kánharhikuarhu atakuarhini, ka ískuksï pakarasïndi ka ménisïksï ikiani. Peru engaksï sánhani arhijka úrani imecheri kuerpuni, jorhenguarhisïndiksï sési úrani: orhetaksï úndasïndi chʼanchakuarhini, tátsekuaksï xanharani ka tátsekuaksï uiriinia. Imecha engaksï sánderu sési jorhenajka úrani kuerpuni jindestiksï deportistecha. Engachi exeajka eskaksï sési jorhenguarhisïnga manakuarhini, tsanguarani, uantsïkuarhini ka kʼuanikurhini, eratsisïngachi eskaksï sántku kueratasïnga paraksï ambakiti mákina máeni. Peruksï no ísku jatini úndasti indeni xáni sési jásï ambe úni, uánikua uéxurhinksï entrenarisïndi. Biblia mísmu uandasïndi eska entrenarini jarhuajpisïnga para “uinhaperantani kuerpuni”, nájkiruka  ístu uandajka eska sánderu sésiska eratsitarakuani entrenarini Tata Diosïri ambe jimbo (1 Timoteo 4:8).

13. ¿Nénachi uá entrenarini juchari eratsitarakuani?

¹³ Ini libruni jimbochi jorhenguarhiskia uánikua ambe engajtsïni jarhuataaka parachi entrenarini juchari eratsikuani, parachi úni jindeni kʼuiripuecha engaksï tsitiaka Tata Diosïri ambe, ka engajtsïni jarhuataaka parachi no méni jurajkuni Jeobani. Pauani pauani ante de eratsinchi ambe ma úni, ju je kómarhikua jingoni exeani Tata Diosïri prinsipiuechani ka leichani. Ju je kurhamarhikuarhini: “¿Náki leicha o Bibliarhu anapu prinsipiuecha íri ambe uandasïni? ¿Néna uá úraani? ¿Sési exejki juchiti Táti auandarhu anapu ambe engani eratsini jaka úni?” (arhinta je Proverbios 3:5, 6; Santiagu 1:5). Engachi pʼindeaka méntkisï ini ambe kurhamarhikuarhini, sánhani arhiakachi entrenarini juchari eratsitarakuani. Ísïchi uáka sánderu uinhapiti jarhani ka méntkisï eratsini jarhani puru Tata Diosïri ambe úni.

14. Para juchari jakajkukua uinhapini, ¿ambechi jatsiski para tsitini arhani ka ambechi no jatsiski para úni?

¹⁴ Nájkirukachi jánhaskatiuakia Tata Diosïri ambe jimbo, jatsiskachi para útasï jorhenguarhini jarhani. Parachi no jima pakarani, jatsiskachi para exeni ambechisï arhani jaki. Exeskachi eska Pablu uandaska, eska “tʼirekua enga xaxanhajka, jinde[ska] para imecha engaksï kʼératiikia”. Ísï jimbo, paraka juchari jakajkukua uinhapiti jauaka, jatsiskachi para pori ísï arhini imani ambe arhani engajtsïni uinhaperantaaka Tata Diosïri ambe jimbo. Ístu, uétarhisïndi mímixekua jatsini, i ambe arhikuekasïndi eskachi jatsiska para ísï úni eskachi na jorhenguarhijka. Ka i ambe kánikua jukaparhakuesti, jimboka eska na uandajka Biblia, “mímixekua jindesti enga sánderu jukaparhakua ambeeka”. Ísï jimbo, ju je kánikua tsitini imani jurhimbikua ambe arhani o jorhenguarhini engajtsïni juchari Táti jorhendajka (Proverbios 4:5-7; 1 Pedru 2:2). Peru, nájkirukachi kánikua jánhaskaaka  ka mímixekua jatsini, nochi méni jatsiska para sánderu sési xékuarhini eska máteruecha. No xáni iónichani, jatsiskachi para exekuarhini para no ma repentku juchari mintsitarhu kʼérichi pʼikuarherani jarhani o máteru no sési jásï ambe jatanheni. Pablujtsïni arhisïndi eskachi ‘tsʼéjkukuarhiaka juchajkumindu’ parachi mítini “si[nchi] sési jimbo jakajkuni ja[ki]” (2 Korintu 13:5).

15. ¿Andisï xáni uétarhijki uékperakua para ma úni uinhapiti jarhani Tata Diosïri ambe jimbo?

¹⁵ Nema uáti uinhapiti jarhani ka no pʼamenchani, peru para méntkisï ísï jarhani, jatsisti para pauani pauani sési tʼireni ka sési kuidarikuarhini. Ka májkuenisti Tata Diosïri ambe jimbo. ¿Ambechi uétarhinchasïni para juchari jakajkukua sési jarhani ka parachi sánderu uinhapiti úni? Uékperakuasï sánderu uétarhijti. Jo, jatsiskachi para pauani pauani sánderu uékani Jeobani, ka juchari erachichani. Engachi no uékpipiringa, juchari mímixekua ka juchari úkuecha nóksï ambe ma jimbo marhuapirindi (1 Korintu 13:1-3). Uékperakuasï uétarhijti para ma úni uiuinhasï ka sési jánhaskati jarhani Tata Diosïri ambe jimbo.

16. ¿Ambe jásï jánguechani etsakuasïni Noambakiti, ka ambe kuájchakukuajtsïni íntskusïni Jeoba?

¹⁶ Máteru ambe engachi jatsika para úni, jindesti imani mintsikakuantku eratsini jarhani engajtsïni Jeoba íntskujka. Ka parachi ísï úni, jatsiskachi para méntku  kuidadu páni jarhani na engachi eratsijka. Noambakiti, enga jindeeka juramuti i parhakpiniri, sési jorhenasti ménderueni jánhastpini, eska ma no uáka ambe ma úni, no mintsikpini ka para ma no uékani erokuarhini ambe ma (Efesu 2:2). Ka i jásï jánguecha, xánksï no sési útspisïndi eska seperi na no sési úkujka kʼumanchikuani ma enga chkaririjka. Peruchi diosmeiamukua arhisïnga Jeobani, jimbokachi jatsiska ambakiti jarhuajperata, enga jindeeka erokuarhikua ma.

17. ¿Ambe jingoni terokutantasïni Biblia erokuarhikuani?

¹⁷ Biblia xarhatasïndi eska “erokani jarhani juchari pʼímutantskuani” kánikua marhuasïnga parachi uarhiperani Noambakiti ka imeri parhakpinini jingoni. Ka ísï terokutantasïndi eska kájtsïkua tiámueri ma o eska kasku ma, enga armadurarhu ma anapuejka (1 Tesalonika 5:8). Bibliarhu anapu tiempuechani jimbo, sondadu ma, kasku ma úrasïrendi enga tiámueripka, peru orhetaksï gorra ma jukajtsïsïrendi enga sïkuiririipka, para tsanguantsïntani engaksï éjpurhu atapiringa ka paraksï no xáni no sési úkuni, mítisïrendi eska sóntku uándikunhapiringa enga no jukajtsïpiringa indeni kaskuni enga nipiringa uarhipeni. Májkueni eska i kasku na kuájchakujka éjpuni, erokuarhikua ístu kuájchakuasïndi juchari eratsikuechani.

18, 19. ¿Néna xarhataski Jesusi ambe enga arhikuekajka miáni erokuarhikuani, ka nénachi uá májkueni úni?

¹⁸ Jesusi kánikua sési xarhataspti ambe enga arhikuekajka erokuarhikua jatsini. Ju je miántani na enga xáni no sési nitamakuarhinchapka, ima últimu chúrikua enga ixú echeri japka. Ma imeri amigu, tumina jimbo íntspikuarhispti. Máteru, uánikuechani japarini uandaspti eska no mítispka. Ka máteruechaksï jandiajku jurajkuspti, ka sïpakuarhisptiksï. Imeri iretarhu anapuechaksï ikiakuspti ka uinhachaparini, kurhajkuarhisptiksï eskaksï Roma anapu sondaduecha uándikupiringa kánikua no sési kámaparini.  Úsïngachi uandani eska Jesusi sánderu no sési járhati tsʼéjkukuechani tekaantaska eska né uéjki jucha. ¿Ambe jarhuataspi úni orhepani uérakuani ini tsʼéjkukuechani? Ebreu 12:2 mókuntasïndi: “Jimboka ima tekantaaska [...], no kasu úparini indeni kʼuratsekua ambeni enga arhinhapka, jimboka aiaminhaspka ma kʼéri tsípikuarhita. Ka tátsekua uaxakasti Diosïri jurhijkandani ladu jimbo”. Eskachi na exekia, ima no méni mirikurhisti eska “aiaminhaspka ma kʼéri tsípikuarhita”.

¹⁹ Peru ¿ambe tsípikuarhitespi inde? Eska mítispka ambe enga úkuarhipiringa enga ima no jurajkupiringa Tata Diosïni: jarhuajpini paraka Tata Diosïri arhinhakua pímbinhajkunhantapiringa ka para xarhatani sánderu sési eska né uéjki, eska Noambakiti chkuandera máeska. ¡No ma erokuarhikua úpirindi sánderu tsíperani Jesusini! Ístu mítispti eska no ióndani imeri Táti auandarhu anapu sánderu kʼéri kóntperata ma íntskupiringa ka jurajkupirindi para ménderu imani jingoni jarhani auandarhu, nani enga xáni sési pʼikuarheraenga. Jiáni enga xáni no sési nitamakuarhini japka, Jesusi no méni mirikurhisti indeni xáni ambakiti erokuarhikuani. Ka juchajtuchi jatsiska para májkueni úni. Májkueni eska Jesusi, juchajtuchi no méni jatsiska para mirikurhini indeni tsípikuarhitani engajtsïni Jeoba aiachini jaka. Imajtsïni kʼéri kóntperata ma íntskuxati, para jarhuajpini paraka imeri xáni ambakiti arhinhakua pímbinhajkuntaaka ka parachi xarhatani eska Noambakiti chkuanderaxaka. ¿Nénachi uá ísï úni? Méntkisï jiókuarhiparini Jeobani eska juchari Juramuti, ka no arhiparini na engachi jásï tsʼéjkukuechani jatsiauaka, méntkisïchi jurajkuaka eskajtsïni Tata Diosï imeri uékperakua jimbo kuájchakuaka.

20. ¿Ambejtsïni jarhuataa parachi no támisï ambe eratsini ka parachi erokuarhikua ma jatsini?

²⁰ Jeoba no nomasi uandasïndi eskajtsïni kóntperatechani íntsaauaka engachi no méni jurajkuska, ima  uékaxati ísï úni (Isaías 30:18; arhinta je Malaquías 3:10). Ima meru tsitisïndi íntsaani imeri marhuarichani ambe engaksï xáni uékajka jurhimbikua jingoni (Salmo 37:4). Ísï jimbo, ju je no méni mirikurhini imani eiatsperakuani engachi jatsiaka sánderu orhepatini. Ju je no méni jámani, támisï ambe eratsini, no jurhimbikua jingoni ka no sési jámani ísï eska na jánhajka ini Noambakitiri parhakpini jimbo, enga no ióni jimbo kʼamajkunhaakia. Engachi exeaka eskachi úndaskia sánisï ísï jámani, kánikua uinhapikua jingonchi kurhakuaka Jeobani eskajtsïni íntskuaka “pínandikua enga no nema újka jánhaskani”, i ambe kuájchakuati juchari mintsitani ka juchari eratsikuechani (Filipusʌ 4:6, 7).

21, 22. a) ¿Ambeksï ambakiti erokuarhikua jatsiski ima engaksï jindeka “uánikua kʼuiripuecha”? b) ¿Ambe sánderu jukaparhakueski para cha, eska ima erokuarhikua engaksï kristianuecha jatsika, ka ambejtsï jatsiski para sési eratsitini jatsini úni?

²¹ ¡Xáni ambakiti erokuarhikua engachi jatsika! Engachi kuenta úkuarhiska ima “uánikua kʼuiripuecha” jingoni, engaksï tsípikua jingoni nitamaaka jiáni engaksï “xáni no sési kánhaaka”, ju je eranhaskani na engachi xáni ambakiti erokuarhikua ma jatsika (Jaŋaskuecha 7:9, 14). Nochi jamberi úsïnga jánhaskani na engachi xáni  sési pʼikuarheraaka enga Satanasi ka imeri demoniuechaksï nóteru jauakia. Jimboka, ¿né jarhaski iásï enga no jatsiajka tsʼéjkukuechani Noambakitini jimbo? Engaksï nóteru jauakia Noambakitiri tsʼéjkukuecha, kánikuachi sési pʼikuarheraaka jarhuajpini paraka iámu Parhakpini paraisu máeuaka, enga juramuni jauakia tata Jesukristu ka 144,000 kʼuiripuecha auandarhu uératini. ¡Ka na engachi xáni uékajka exeni eska nóteru jauakia pʼamenchakuecha, eroantani imechani engachi uarhiranchaakia engaksï tsíntaaka, ka ima jásï ambakiti tsípikua ma jatsini eska Tata Diosï na uékaenga desde uénakuarhutki! Engachi nóteru pekadu jukaraakia, sánderuchi no iauani jauaka parachi jatsini kóntperatani enga jindeka ‘nóteru juramuminhania uarhikua jimbo ka ni pekaduni jimbo [...] engaksï Diosïri uájpecha xarhantaaka tʼíntskua jingoni’ (Roma 8:21).

²² Jeoba uékasïndi eskajtsï cha uáka úni ambe engajtsï cha uékajka. Ka xanharu parachi úni ambe engachi uékajka, jindesti kurhandini. Ísï jimbo, ¿a no eska kánikua sésiska jánguarhintani pauani pauani kurhajchani Jeobani? Jimajkani, ¡seguiri je chári pímbinhasï jakajkukua jingoni, uinhaperpentani jarhani, parajtsï úni Tata Diosïri xénchperakuarhu jarhani para méntkisï!