1, 2. ¿Néksï tsípini pʼikuarherasïni engaksï exejka eska itsï atakuarhinhasïnga?

¿IÓNTSÏ páxakia Jeobani marhuakuni? Jimajkani uánikua diskursuechantsï kurhauakia engaksï nitamatarakuarhijka para imecha engaksï itsï atakuarhijka. No arhiparini na engajtsï xáni uelta jakaia, ma no úsïndi no tsípini pʼikuarherani, enga exejka primeru filani, kʼéri tánguarhikuarhu ma, eskaksï jauarasïnga paraksï aiakukuarheni Jeobani uánikuechani japarini. Engaksï uémintajkia itsïrhu, kánikuaksï tsípisïndi imecha engaksï exeni jarhajka ka uinhamuksï pasajkusïndi, máruksï niárasïndi jamberi uerani xánksï tsípini. ¡Xáni enga sési pʼikuarherajka ma exeani íchani Jeobanksï jingoni úkuarhini jarhani!

² Jucha ini ambe namunitku ueltajkuchisï exejka ma uéxurhini jimbo. Peru ánjilichaksï kʼóru ambakiti kóntperata ma jatsisti, jimbokaksï uánikua uelta exesïnga ini ambe. ¿Úsïnchi eranhaskani na enga xáni “tsípikuarhita ja[rhajka] auandarhu” engaksï exejka eska mándani semana uánikua kʼuiripu andaparhakueraxaka Tata Diosïri iretarhu, interu parhakpinirhu? (Lukasʌ 15:7, 10.) Seguruchi jarhaska eskaksï ánjilicha kánikua tsípisïnga engaksï exejka na enga xáni kʼéni jaka Jeobaeri kúnguarhikua (Ageo 2:7).

3. ¿Andisï jámajki Noambakiti komueska “ma leoni apejpiti”, ka ambe uékasïni úni?

³ Peruksï no iámindu ánjilicha tsípisïndi engaksï exejka eskaksï uánikua nóteru uékasïnga úni ambe enga i parhakpini újka, ka engaksï itsï atakuarhijka. Demoniuechaksï kánikua ikiasïndi. Peru i ambejtsïni no jatsisti para ísku pakatani, jimboka Satanasi mísmu uandaspka eskaksï kʼuiripuecha, no uékperakua jimbo marhuakusïnga Jeobani ka eskaksï nóteru uékapiringia marhuakuani engaksï no sési nitamakuarhini japiringa (arhinta je Job 2:4, 5). Ísï jimbo, enga nema aiakukuarhejka Jeobani,  xarhatasïndi eska Noambakiti chkuandera máeska, ka pori ísï arhini, ísïsïndi enajki pasarhinharhikujki Noambakitini. Ka jimboka mándani semani uánikuechaksï pasarhinharhikusïnga, jimbosï xáni no sési ikiani jati, komueska “ma leoni apejpiti enga jirinhani jaka aberi néni anta [úni eska jurajkuaka Jeobani]” (1 Pedru 5:8). Ka para i ambe úni, jánguarhintasïndi paraka juchari pájperakua Tata Diosïni jingoni chkeaka o eska mátirku kʼamakurhiaka (Salmo 7:1, 2; 2 Timoteo 3:12).

4, 5. a) ¿Ambe tsimani ambe Jeoba no jurajkua eska uáka Noambakiti? b) ¿Ambe aiakuasïni Tata Diosïri Karakata kristianuechani?

⁴ Nájkiruka xáni no sési ikiani jauaka “leoni apejpiti”, nochi jatsiska para chérhini. ¿Andi? Jimboka Jeoba tsimani ambe no jurajkuaka para úni. ¿Ambe ka ambe? Orheta, no méni uáti iámu Tata Diosïri iretani kʼamajkuni. Ka i ambe, Noambakitijtu mítisti, jimboka Jeoba uandaskia eska “uánikua kʼuiripuecha” engaksï kristianueka, tsípitiksï pakaraaka enga juuaka ima jurhiatikua “engaksï xáni no sési kánha[a]ka”, ka ambe enga Jeoba uandajka méntkisï úkuarhisïndi (Jaŋaskuecha 7:9, 14).

⁵ Ka máteru ambe, Noambakiti no méni uáti antani imani enga no jarhariaka Jeobani. Ka i ambe ísïsti imani ambe jimbo enga profeta Asariasi arhipka rei Asani: “Jeoba méntkisï chánksïni jingoni jauati, engajtsï chájtu méntkisï imani jingoni [jauaka]” (2 Crónicas 15:2; arhinta je 1 Korintu 10:13). Uánikua ejempluechaksï jarhasti Bibliarhu imecheri engaksï no méni jurajkutakuarheka Noambakitini jimbo (Ebreu 11:4-40). Engachi juchajtu ísï eska imecha no méni jurajkuska Tata Diosïni, uákachi orhepani uérakuni ini xáni no sési jásï enemiguni, ka astachi uáka andani. Ísïjtsïni aiachesïndi Biblia: “Asï jiókuarhi je Noambakitini, ka ísïksïni ima késtakuchiati” (Santiagu 4:7).

6. ¿Ambe úrasïni Noambakiti para no sési úkuani kristianuechani?

⁶ Eskachi na exejka, Noambakiti no méni andaati uarhiperakuani enga Tata Diosïri ireta jingoni jatsika. Peru kʼóru uáti kánikua no sési úkuani imechani engaksï no jingontku jauaka. ¿Néna? Úparini eska sánhani arhiaka kʼamakurhini imecheri pájperakua Jeoba jingoni astaka antauaka. Para i ambe úni, tanimu ambe úrasïndi, no sési kaani, uarhiperani imecha jingoni ka enganiariuani máru ambe jimbo. Ju je ini tanimu ambe exeni.

7. ¿Andisï Noambakiti iásï sánderu no sési kámajki Tata Diosïri iretani?

⁷ No sési kaani. Apostuli Juanu uandaspti eskaksï “iámindu parhakpini anapuecha Noambakitiri juramukua jimbo jarhaska” (1 Juanu 5:19). Íksï uandakuecha xarhatasïndi eskaksï kristianu jurhimbiticha jatsiska para jingontku jarhani. Jimboka Noambakiti iámu parhakpinini, imeri jájki jimbo jatsiaskia, kʼuiripuni enga jarharitini jaka Tata Diosïni, sánderu no sési kámasïndi Jeobaeri iretani, jimboka i no jurajkutakuarhisïnga (Miqueas 4:1; Juanu 15:19; Jaŋaskuecha 12:12, 17). Ka jimboka nóteru ióni pakarakusïngia, sánderu no sési ikiaxati, ka jimbosï sánderu uinhamu ánchikuarhini jati. Iásïjtsïni sánderu no sési kámaxati, sánderu ikiatapu jingoni, ka uékasïndijtsïni kʼamajkuni.

8. ¿Ambejtsïni jorhendasïni uandakua griegu enga Pablu úraka para arhini jucha “uarhiperaxaka” Noambakitiri espirituechani jingoni?

⁸ Uarhiperani. Pablu karakuaspti kristianuechani: “Jucha [...] uarhiperaxaka [...] Noambakitiri espirituechani jingoni engaksï auandarhisï jámajka” (Efesu 6:12). ¿Ambe arhikuekaeni Pablu enga uandapka “uarhiperaxaka”? Uandakua griegu enga úrakuarhika ixú, arhikuekasïndi meru jupiperani. Ísï xarhatasti apostuli  Pablu eskachi mándani jucha jupiperaxaka demoniuechani jingoni. Ka májkuenisti engachi irekani jauaka paisi ma jimbo engaksï kʼuiripuecha jakajkujka eskaksï jarhaska demoniuecha o nómbe. Nochi jatsiska para mirikurhini eska ima jurhiatikua engachi aiakuka juchari tsípikua Jeobani, ísïspka enajkichi úndapi uarhipeni. Ísï jimbo, desdekachi itsï atakuarhika, pauani pauanchi uinhamu uarhiperaxaka. Jimbosï Pablu tanimu uelta arhiapti Éfesu anapu erachichani eskaksï uinhamu anhaxurhitini japiringa (Efesu 6:11, 13, 14).

9. a) ¿Andisï Noambakiti ka imeri demoniuechaksï mámaru ambe úrajki parajtsïni “kʼarhani”? b) ¿Andisï jánguarhintajki Noambakiti parajtsïni támisï eratsitarani, ka nénachi uá no jurajkutakuarhini? (Exe je rekuadruni “ ¡Xéparini je Noambakitiri trampechani jingoni!”.) c) ¿Ambe trampanchi exeni jaua?

⁹ Enganiarpini. Pablu arhiasïndi kristianuechani eskaksï no jurajkutakuarhiaka para Noambakiti “kʼarha[a]ni” (Efesu 6:11). ¿Andisï uandapi Pablu “kʼarha[a]ni”? Jimboka Noambakiti ka imeri demoniuechaksï no ma ambejkuksïsï úrajti parajtsïni enganiarini, sino mámaru ambe jingonksï jirinhakuntasïndi. Ka mítistiksï eskaksï sési úsïnga ísï úni. Exestiksïa eskaksï máru kristianuecha úsïnga orhepani uérakuni tsʼéjkukuani ma, peru eskaksï no úsïnga orhepani uérakuni engaksï ima mójtakukuska tsʼéjkukuani. Jimboksïsï jánguarhintajti no iauani uératintsïni exeni ambe engachi újka. Uékasïndiksï exeni, ambechi no úxaki Tata Diosïri ambe, parajtsïni jima tsʼéjkuni. Peruchi jingontku jarhaska, jimbokajtsïni Biblia eianguskia uánikua imani ambe enga Noambakiti ka imeri demoniuecha úrajka, parajtsïni enganiarini (2 Korintu 2:11). Ini libruni jimbo exeskachia máru trampechani, komueska jatsikuarhikuani, kúrhiani no sési úrichani ka ísku jándikua ambe. Peruchi iásï exeaka máteru ambe, enga jindeeka sïkuamikua ambe.

10. a) ¿Ambe ka ambeski sïkuamikua ambe? b) ¿Néna exesïni Jeoba sïkuamikuani, ka nájtsï exesïni cha?

¹⁰ Sïkuamikua, jindesti adibinarini, sïkuani jarhani nemani, uarhirichani jingoni uandontskuarhini, ka máteru i jásï ambe. Imecha engaksï i ambe újka, demoniuechanksï jingoni ánchikuarhini jarhasïndi, jimbokaksï meru Noambakitiri espirituechani jingoni pájperata jatsisïnga. Eskachi na mítikia, Jeoba iámindu ini ambe kánikua “ikichasïndi” (Deuteronomio 18:10-12; Jaŋaskuecha 21:8). Mítiparini eskajtsïni juchari Táti auandarhu anapu arhisïnga: “Asïmindu jáma je jiókuarhini indeni ambe enga no sésika”, jucha no méni jámapiringa jurajkuni Tata Diosïni parachi Noambakitiri espirituechani jingoni pájperata ma jatsini (Roma 12:9). Jiuanchasïngachi solu ini ambe eratsini.

11. ¿Ambe andapirini Noambakiti enga úpiringa eskachi sïkuamikua ambe niátaaka? Xarhata je ejemplu ma jingoni.

¹¹ Jo, sïkuamikua ambe jámani niátani jindesti Jeobani traisionarini. Ka jimbosï Noambakiti xáni jánguarhintajti parachi indeni pekaduni úni. Ka enga újka eska nema ini ambe niátaaka, ísïsïndi eska andani. ¿Néna jimbo? Eranhaska je ini ambe, eranhaska je eska no ambakiti kʼuiripu ma úsïnga eskaksïni chári amigu ma traisionariuaka. Ima kʼuiripu kánikua tsípipirindi ini ambe jimbo. Úpirindi asta jamberi kánikua arhikuarhini indeni ambe jimbo enga úka, ka úpirindi asta chári orhepatini jimbo nitamani paraksïni exerani eskaksïni chári amigu traisionariska. Sáno májkueni, enga kristianu ma sïkuamikua ambe niátapiringa, mítitini, traisionarini japirindi Jeobani, ka Noambakiti jingoni úkuarhini japirindi. ¡Eranhaska je na enga xáni tsípipiringa Noambakiti enga úpiringa xarhatani eskajtsïni juchantsïni úraxaka! ¿Uékapirinchi  ísï tsíperani Noambakitini? Méntku nómbe, jimbokachi jucha no traidori máeska.

12. ¿Ambe úrasïni Noambakiti parachi ménderueni exeni sïkuamikuani?

¹² Engachi ikichaaka sïkuamikuani, no fásiliuati eskachi indeni ambe niátaaka. Satanasi mítisti i ambe, ka jimbosï uékajti eskachi jucha ménderuni eratsiaka. ¿Néna? Enganiariparintsïni. Ima uékasïndi eskachi jucha eratsiaka, “eska sési jásï ambe, no sési jásï ambeska, ka eska no sési jásï ambe, sési jásï ambeska” (Isaías 5:20). Uánikua uelta jámasïndi ísï úni úraparini ambe ma enga marhuakukia: jámaparini úni eskachi no jakajkuaka jurhimbikuani.

13. Uandanta je ejempluecha jingoni, na enga Noambakiti jámajka úni eska ma no jakajkuaka jurhimbikuani.

¹³ Ju je exeani máru ejempluechani engaksï xarhatajka eska i ambe úrasïnga. Paraisurhu, Noambakiti kurhamarhispti Ebani: “¿Meru uandaski Tata Diosï eskajtsï cha no uáka arhani iámindu anhatapuecheri engaksï ini jardini jimbo jaka?”. Ióni tátsekua, tánguarhikuarhu ma inchaspti auandarhu nani engaksï ánjilicha tánguarhitini japka, ka i ambe kurhanguarhispti Jobueri ambe: “¿Kurhajchaxaki [...] Tata Diosïni no ma ambe jimbo?”. Ka uánikua uéxurhini tátsekua, enga tata Jesukristu apenasi uénani japka eianhpini ixú echerirhu, i ambe arhispti: “Engari tʼu jindeeka Diosïri Uájpa, ú eskaksï ari tsakapuecha kurhinda úkuarhintaaka”. Ka no sáni kʼuratsekua jingoni, i ambe arhixapti teresmarhuapariani imani uandakuechani enga Jeoba seisi semana antesi arhiapka tata Jesukristuni: “I jindesti juchiti Uátsï engani ji xáni uékajka ka engani jimbo xáni tsípikuarhijka” (Génesis 3:1; Job 1:9; Mateu 3:17; 4:3).

14. a) ¿Néna uékasïni Noambakiti eskachi ménderueni eratsiaka sïkuamikueri ambe? b) ¿Ambechi exea iáiasï?

 ¹⁴ Iásï, májkueni eska ióntki, Noambakiti seguirisïndi ini ambe úni. Úrasïndi ini ambe parajtsïni jakajkutarani eska sïkuamikua ambe no no sésiska. Ka ústia eskaksï uánikua erachicha kurhamarhikuarhiaka, ¿meru xáni no sési jarhaski iámindu jásï sïkuamikua, ísï eskaksï na uandajka máru? (2 Korintu 11:3). Peru, ¿ambechi uá arhiani ini erachichani paraksï mójtakuni imecheri eratsikuani? ¿Ka ambejtsïni jarhuataa parachi no jakajkuni ini ambe? Parachi úni mókuantani ini kurhamarhikuechani, ju je tsimani ambe exeni juchari irekuarhu, nani enga Noambakiti sánhani arhikia inchaatani sïkuamikua ambe: tsípikuarhitecharhu ka engachi pʼamenchani jauaka.

15. a) ¿Néna exenhasïni sïkuamikua ambe Europa ka América del Norte? b) ¿Nénaksï máru kristianuecha májkuenksï exexaki sïkuamikuani eska parhakpini anapuecha?

¹⁵ Pauani pauani sánderu normali exenhasïndi sïkuamikua ambe, sïkuajperata, ka máteru jásï majia ambe, sánderu Europa ka América del Norte. Uánikua pelikulecha, libruecha, programecha, ka bideojueguecha xarhatasïndiksï sïkuamikuani enajki jindee para tsípikuarhini, enajkiksï no no sési ambee, ka asta enajki kánikua sési jaki. Jarhastiksï jamberi libruecha ka pelikulecha, engaksï sïkuamikua ambeerika ka engaksï meru kánikua exenhajka. Xarharasïndi jiájkani eskaksï demoniuecha úskia úni eska kʼuiripu no no sési exeaka sïkuamikuani. ¿Májkuenksï eratsisïni máru kristianuecha? Jo. ¿Ambe jimbo? Ari jindesti ejemplu ma enga meru úkuarhini jaka, kristianu ma enga exeka pelikula ma enga sïkuamikua  ambe xarharaenga uandasti: “Jo, exeska pelikulani, peru inde ambe no jindesti sïkuamikua ambe niátani jarhani”. ¿Andisï xáni no sési jaki ísï eratsini?

16. ¿Andisï xáni no sési jaki tsípikuarhini imani ambe jingoni enga sïkuamikua amberiuaka?

¹⁶ Ísïsti eska exeni sïkuamikua ambe, no májkueniska eska úni jarhani, peru inde ambe no arhikuekasïndi eska ma no ma ambe úkuarhinchaaka. ¿Andi? Para uénani, jukaparhakuesti exeni ma ambe enga Biblia xarhatajka: Noambakiti ka imeri demoniuecha nóksï úsïndi mítini ambe engachi eratsijka. * Peru, jimbokaksï ima uékasïnga mítini ambe engachi eratsijka, ka ambechi no úsïni Tata Diosïri ambe, jimboksïsï exeni jarhajti, eskachi na exekia antesi, ambe engachi újka, ka asta na engachi tsípikuarhijka. Ísï jimbo, enga nema xarhatani japiringa imeri jángua jingoni eska tsitiasïnga pelikulechani ka libruechani engaksï sïkuamikua amberijka o majia amberi, o demoniuecheri ambe, o inde jásï ambe, indeni jingoni uánikua ambe arhiani japirindi demoniuechani. Arhiani japirindi ambe engaksï jimbo uáka no sési úkuni. Ka imaksï ini ambe úrapirindi paraksï sánderu no sési kámani imani ‘uarhiperatani’ jimbo enga ima jatsika imecha jingoni, ka ini jingoni úpirindiksï kuaskuni ka andani. Máruksï sïkuamikua ambe jingoni úndasti tsípikuarhini, astakaksï úndaka xáni tsitini indeni ambe, engaksï niáraka jamberi indeni ambe niátani (arhinta je Galasia 6:7).

17. ¿Néna úpirini Noambakiti úrani indeni ambe enga pʼamenchati ma kómu pʼikuarherani jauaka?

 ¹⁷ Noambakiti no nomasi uékasïndi úrani indeni ambe engachi jingoni tsípikuarhijka, sino ístu engachi jucha ménisï pʼamenchani jarhajka ka uékanchi sési pʼikuarherantani. Exe je ejemplu ma, erachi ma enga méntku pʼamenchani jarhajka, úpirindi kómu pʼikuarherani enga exejka eska no ma medisina úsïnga jarhuatani (Markusʌ 5:25, 26). ¿Néna úpirini Noambakiti ka imeri demoniuecha ini ambe úrani? Imaksï úpirindi tsʼéjkuni pʼamenchatini úparini eska indeni ambe jimbo enga xáni no sési pʼikuarherani jaka, no kurhajchaaka ambe enga Biblia uandajka, ka eska jiókuarhiaka sïpiata o ambe engaksï újka “majia jingoni” o sïkuamikua jingoni, sïkuamicha (Isaías 1:13). Ini ambe úni, jindesti trampa ma Noambakitiri, ka i ambe úsïndi eska no sési úkuarhinchaaka juchari pájperakua Tata Diosïni jingoni. ¿Néna úkuarhisïni i ambe?

18. ¿Ambe sïpiata ambe ka imani ambe engachi jingoni tsinakuarhiaka nochi jiókuarhisïni kristianuecha, ka andi?

¹⁸ Jeoba arhiaspti imani israelitechani engaksï “majia” ambe úrapka: “Engajtsï cha iójkurhantani jarhajka, jíksïni no exesïnga. Nájkirukajtsï uánikua kómarhikuechani uáuaka, ji no kurhaauasïnga” (Isaías 1:15). Seguruchi jarhaska eskachi no méni uékapiringa ini ambe úni. Nochi ambe ma uékasïnga úni, enga uáka eska Jeoba no kurhauaka juchari kómarhikuechani ka eskajtsïni jurajkuaka, ka menosi engachi pʼamenchani jauaka (Salmo 41:3). Jimajkani, ¿ambechi uá engachi kuenta íntskukuarhiska eska sïpiata ma o ambe ma engajtsïni jingoni arhiaka ambechisï pʼamenchani jaki, sïkuamikua amberiuaka? Méntkuchi no jiókuarhiaka (Mateu 6:13). * Engachi ísï úska, Jeoba nójtsïni  méni jurajkuati (exe je rekuadruni “ ¿Sïkuamikua ambee?”).

19. a) ¿Néna enganiariuaskia máru kʼuiripuechani Noambakiti? b) ¿Ambe jásï uandantskuechanchi no jatsiski para jiókuarhiani kristianu jurhimbitiicha?

¹⁹ Europa ka América del Norte jimbo, nóksï no sési exesïndi Noambakitini, peru máteru paisichani jimbo, ménderueni úkuarhisïndi. Uánikuechaksï enganiarinhastia jakajkuparini eska Noambakiti sánderu uinhapitiiska, eska enga naeka meru. Ka irekasïndiksï, tʼiresïndiksï, ánchikuarhini ka kʼuísïndiksï chérhipariani demoniuechani. Peru ístuksï kánikua tsitisïndi kurhaani ka meru uandantaani uandantskuechani ima amberi engaksï máru demoniuecha újka. Peru, ¿sési japirini eskaksï Tata Diosïri jántspiricha kurhaapiringa o etsakuani inde jásï uandantskuechani? Nómbe, ka tsimani ambe jimbo enga kánikua jukaparhakueka.

20. ¿Néchani úpirini mítitaraani jarhani Noambakitini máteruechani no kuenta íntskukuarhiparini?

²⁰ Ma ambe jindesti, engachi uandantaani jámapiringa uandantskuechani ima amberi engaksï no ambarhati espirituecha újka, jucha kurhajchani japiringa  Satanasini. ¿Néna? Nájtuka Biblia uandajka eska Noambakiti úsïnga kánikua kʼéri ambe úni, ístu uandasïndi eska ima úraasïnga “míndechani ka milagruechani engaksï puru chkuanderakua [ambeejka]” ka “ikichakueni jásï ambe” (2 Tesalonika 2:9, 10). No nema jarhasti enga sánderu chkuanderajka eska ima, ka mítisti néna támisï jánhastaani imechani engaksï tsitijka sïkuamikua ambe. Ísïsï újti eskaksï imecha jakajkuaka eskaksï exeska o kurhaani ambe ma enga no ísï úkuarhika. Tátsekuaksï ísï uandantasïndi enajki meru ísï úkuarhi, ka íksï aianhperapasïndi ka sánhani arhisïndiksï kánerantani. ¿Ambe úkuarhipirini enga kristianu ma ístu ima máepiringa enga ístu eianguajka máteruechani? Eska apoiarini japiringa “tátemba chkuanderaricheri[ni]”. ¡Mítitaraani japirindi  Noambakitini máteruechani! (Juanu 8:44; 2 Timoteo 2:16.)

21. ¿Amberi ambejkuchisï jatsi para méntkisï uandontskuarhini?

²¹ Ka nájkiruka meru ísïpiringa eskaksï demoniuecha no sési úkuska nemani, jarhasti máteru ambe engachi jimbo no jatsika para eianguani jarhani erachichani. Uékasïngachi tata Jesukristueri ambe uandantani ka no Noambakitiri ambe. Jatsiskachi para jámani “solu Jesukristuni eraaparini, enga úka eska jucha uénaaka mintsikani imani” (Ebreu 12:2). Enga Jesusi ixú Echerirhu japka, no méni jámasti Noambakitiri ambe eianguani imeri jorhenguarhitichani, ka Jesusi uánikua ambe mítispti ambe enga újka úni ka ambe enga no újka úni Noambakiti. Sánderu sési, ima méntkisï puru Tata Diosïri Reinueri ambe uandantasti. Sésichi uáka engachi juchajtu májkueni uáka eska Jesusi ka imeri jorhenguarhiticha, engachi puru imani uandontskuarhiaka enga jarhuatauaka máteruechani, komueska ima “kʼéri ambe enga Diosï úka” (Ukuecha 2:11; Lukasʌ 8:1; Roma 1:11, 12).

22. ¿Nénachi uá jucha úni eska “tsípikuarhita jauaka auandarhu”?

²² Eskachi na exekia, Noambakiti uékasïndi kʼamajkuni juchari pájperakuani Jeoba jingoni, úrapariani uánikua trampechani, komueska sïkuamikua ambe. Peru engachi jucha méntkisï ikichaaka no sési jásï ambeni, ka engachi jánguarhintaska sési jásï ambe úni, nochi íntskuaka sésikua Noambakitini, para úni eskachi tsitiaka sïkuamikua ambe, ka iámindu inde jásï ambe (arhinta je Efesu 4:27). ¡Na enga xáni “tsípikuarhita jauaka auandarhu” engachi “uinhamu anhaxurhiku[aka] Noambakitini enga[jtsïni] ima uékaaka kʼarhani” astaka kʼamajkunhaaka! (Lukasï 15:7; Efesu 6:11.)