1-3. a) ¿Andiksïsï amambecha méntkisï exejki eskaksï sapiicha sési jásï jámaaka ka eskaksï sési xarharaaka? b) ¿Andisï uékajki Jeoba eskaksï imeri marhuaricha pímbinhasïuaka, ka andichisï jatsi para ísïini?

ANTE de sapi ma uérani kʼumanchikuarhu, amamba exesïndi jikuaskia sapi, mórhekuarhiskia ka sési xarharaxaki. ¿Andi? Jimboka mítiska eska enga sési jásï jámaaka, uáka sési kʼuiripeni ka ístu, mítisti eskaksï kʼuiripuecha uandaaka tátembecheri ambe, seguni eskaksï na exeaka sapini.

² Juchari Táti auandarhu anapu ístu uékasïndi eskaksï imeri marhuatspiricha pímbinhasï jámaaka. Bibliarhu aiatspesïndi eska “pímbinhasïuaka imani jingoni enga  pímbinhasïuaka” (Salmo 18:26). * ¿Andisï xáni uéjki Jeoba eskachi ini ambe uáka? Orheta, jimbokajtsïni uékasïnga ka mítisti eska i ambe sésiuaka para jucha. Peru ístu, jimboka na engachi jucha jámaaka uáti eska kʼuiripu sési exeaka Jeobani o no sési. Peruchi jucha no uékasïnga no sési pakatani Tata Diosïni ka ni imeri arhinhakuani enga xáni pímbinhasïka. Uékasïngachi sési pakatani. Jimbochisï jatsika para sési jásï jámani ka sési jásï jángua ma jatsini (Ezequiel 36:22; arhinta je 1 Pedru 2:12).

³ ¿Andichisï jatsi para méntkisï pímbinhasïni? Para uénani, jimbokachi mítiska eska Tata Diosï uékasïnga imechani engaksï pímbinhasïka. Peru ístu, juchachi uékasïnga Jeobani ka uékasïngachi sési pakatani juchari irekua jingoni. Ka máteru ambe, uékasïngachi imeri uékperakuarhu jarhani para méntkisï. Exeakachi jiájkani máru ambe pímbinhaxekueri: andisï uétarhijki, ambeski ka nénachi uá méntkisï ísïini. I ambejtsïni jarhuataati parachi úni mítini nanichi jatsiski para sánderu jánguarhintani.

4, 5. a) ¿Ambe jimbosï sánderu jukaparhakue eskachi pímbinhasï jauaka? b) ¿Néna xarhatasïni ambe enga Jeoba kueraaka eska Jeoba tsitisïnga pímbinhasïkuani?

⁴ Jatsiskachi para pímbinhasï jarhani iámindu ambe jimbo, jimbokachi marhuakusïnga Tata Diosïni ma, enga pímbinhasïka (arhinta je Levítico 11:44, 45). Jeobajtsïni jorhendasïndi imeri ejempluni jingoni. Imeri Karakatajtsïni pʼímarhisïndi: “Terokukunta je Diosïni” (Efesu 5:1). Eskachi na exekia orheta, ¿andisï xáni jukaparhakue eskachi méntkisï pímbinhasï jauaka? Jimbokachi marhuakusïnga Tata Diosïni ma enga pímbinhasïka.

 ⁵ Jeobaeri pímbinhasïkua, na enga jindeeka ima ka na enga jámajka, xarharasïndi engachi exejka ambe enga ima kueraaka (Roma 1:20). Ju je exeni ini Echerini, nani engachi jucha irekaka. Echeri pímbinhasï kueraanhasti parakaksï kʼuiripuecha úpiringa ixú irekani. Jeoba jatsikusti echerini mámaru ambe engaksï újka eska tarhiata ka itsï pímbinhasïksï jauaka. Echeri úsïndi jandiajku limpiarikuarhini. I ambe xarhatasïndi jiájkani, eska ‘Tata Diosï enga tsípitiika, ka enga kueraaka echerini’ kánikua jukaparharasïnga eska ambe ma pímbinhasï jauaka (Ukuecha 14:15). ¿Nochi jatsiski jiájkani para májkueni eratsini? Jo.

6, 7. ¿Néna xarhataspi Moisesiri Lei, eskaksï Jeobaeri marhuaricha jatsiska para pímbinhasï jarhani?

⁶ ¿Ambe máteru ambe jimbochi jatsiski para pímbinhasï jarhani? Eska Jeoba, juchari Juramuti, méntkisï kurhajkuarhisïnga eskaksï imeri marhuaricha pímbinhasï jauaka. Ari jindesti ejemplu ma, Lei enga israelitechani íntsaapka xarhatasïndi eska kómarhikuarhu kánikua jukaparhakuespka pímbinhasïkua. Uandasïrendi eska kʼéri saserdoti jatsispka para tsimani uelta jikuani ante de úndani marhuani, ima Jurhiatikua enga jindepka para Puáminhantani pekaduechani (Levítico 16:4, 23, 24). Ístu, uandasïrendi eskaksï iámindu saserdoticha jatsispka para jupajkuni ka para jupanduni, méntkisï engaksï jámapiringa kéjtsïtakua úkuni Jeobani (Éxodo 30:17-21; 2 Crónicas 4:6). Enga israelita ma jámapiringa marhuakuni Tata Diosïni ka no pímbinhasï jarhani, úpirindi uándikunhani (Levítico 15:31). Ístu, Moisesiri Lei uandasïrendi eska iámindu ima enga nóteru pímbinhasï japiringa, jatsispka para úni imani ambe engaksï jimbo uénga pímbinhasïntani, máru ambe jindespti jikuani ka jupantani imeri xukuparhakuani; enga no ísï úpiringa, jatsispti para “uándikunhani kúnguarhikuarhu” (Números 19:17-20).

⁷ Nájkirukachi iásï nóteru jatsikia para úni ambe enga Moisesiri Lei uandajka, íjtsïni jarhuatasïndi parachi úni  exeni na enga eratsijka Tata Diosï. Ini Leini jimbo, xarharasïndi eska Jeoba kurhajkuarhisïnga eska ma jatsiska para pímbinhasï jarhani para ma úni marhuakuni. Ka útasï iásï májkueni eratsisïndi (Malaquías 3:6). Iásï, ísï eska ióntki, jiókuarhisïndi imantku ‘jakajkukuani enga pímbinhasïka’ (Santiagueri 1:27, TDU). Ísï jimbo, sésichi uáka mítini nénajtsïni marhuachisïni iásï i ambe enga Tata Diosï kurhajkuarhienga.

8. ¿Ambe tʼámu jásï pímbinhaxekua erokuarhisïni Jeoba eskachi xarhataaka?

⁸ Enga Biblia pímbinhaxekueri ambe uandajka, no nomasi kuerpuni arhikuekasïndi. Sánderu sési, uandasïndi eska parachi pímbinhasï jarhani Tata Diosïni japarini, jatsiskachi para no ma ambe jimbo jáxetini jarhani iámu juchari irekuarhu. Jo, Jeoba erokuarhisïndi eskachi pímbinhasï jauaka tʼámu ambe jimbo: Tata Diosïni jingoni, jánguani jimbo, eratsikua jimbo ka kuerpurhu. Ju je exeni nénachi uá pímbinhasï jarhani mándani ini ambe jimbo.

9, 10. ¿Ambeski pímbinhasï jarhani Tata Diosïni jingoni, ambechi no úsïni kristianu jurhimbiticha?

⁹ Pímbinhasï jarhani Tata Diosïni jingoni. I ambe arhikuekasïndi no jeuetani relijioni jurhimbitini no jurhimbitini jingoni. Ju je miántaani israelitechani engaksï Babilonia jupikakata japka. Engaksï níntani japiringia ménderu Jerusaleni, jatsisptiksï para kurhajchani ini Tata Diosïri juramukuani: “¡Uéakunta je jini uératini, asï jáma je no sési jásï ambeni pʼárhini! [...] Méntkisï pímbinharhati ja je” (Isaías 52:11). Imaksï kʼuanhatsintapirindi Jerusaleni, paraksï ménderu úni sési kómarhini Jeobani. Ísï jimbo, imaksï jatsispti paraksï pímbinhasï marhuakuni, paraksï no úni imani ambe engaksï jimbo úpiringa ikiatani Tata Diosïni, jo, nóksï uáni pʼindekuechani, jorhenguarhikuechani, ka úkuechani enga Babilonia anapu relijioni uénga.

 ¹⁰ Ístu iásï, kristianu jurhimbitichachi jatsiska para jingontku jarhani parachi no jáxeni relijioni no jurhimbitini jingoni (arhinta je 1 Korintu 10:21). Iápurisï jarhasti relijioni no jurhimbiti, ka engachi no jingontku jauaka, uákachi no sési úkuarhinchani. Relijioni no jurhimbitichaksï jorhentpesïndi eskachi alma ma jataska enga no uarhijka, ka jorhentpesïndi uánikua máteru chkuanderakuechani. Ka jimbokaksï kʼuiripuecha jakajkusïnga ini ambeni, jimboksïsï kéjtsïtakua úkuajti uarhirichani, nobenariu, misechani ka máteru i jásï ambe (Eclesiastés 9:5, 6, 10). Peru jurhimbiti kristianuechachi no ma pʼindekua uékasïnga úni enga relijioni no jurhimbitiriiuaka. * Ísï jimbo, nochi jatsiska para jurajkutakuarhini eskajtsïni máteruecha afuersa úraaka eskachi no kurhajchaaka ambe enga Biblia uandajka pímbinhasï kómarhikueri ambe (Ukuecha 5:29).

11. ¿Ambeski pímbinhasï jángua jatsini ka andisï xáni jukaparhakue?

¹¹ Pímbinhasï jángua. I jásï pímbinhaxekua, ístu arhikuekasïndi no úni ísku jándikua ambe, i ambe, kánikua jukaparhakuesti parachi Tata Diosïri uékperakuarhu jarhani (arhinta je Efesu 5:5). Eskachi na exeaka máteru kapitulurhu, kánikua jukaparhakuesti eskaksï kristianuecha ‘késtakukuaka ísku jánguani’. Imecha engaksï ini ambe niátajka ka nóksï mójtakuni jánguani, nóksï intsïnhaati Tata “Diosïri juramukua[ni]” (1 Korintu 6:9, 10, 18). Jeoba no jeiapanhiantasïndi imechani “engaksï nánterkueni irekajka” ka engaksï no jurajkuaska no sési járhati úkuechani, “niáratiksï [...] uarhini para tsimani úni jámani” (Jaŋaskuecha 21:8).

12, 13. ¿Nénaksï manatasïni juchari úkuechani ambe engachi eratsijka, ka ambejtsïni jarhuataa para pímbinhasï jarhani juchari eratsikua?

¹² Pímbinhasï eratsikua. Eratsikuechaksïsï újti eskachi uáka ambe ma, ísï jimbo, engachi jurajkuska eska juchari eratsikuarhu ka mintsitarhu pakaraakaksï no sési járhati  eratsikuecha, iásï o no ióndani, ikichakuenchi jásï ambe niátaaka (Mateu 5:28; 15:18-20). Peru engachi pímbinhasï ambe eratsiska ka sési jásï ambe, tsitiakachi méntkisï pímbinhasï jángua ma jatsini (arhinta je Filipusʌ 4:8). Peru, ¿ambejtsïni jarhuataa parachi pímbinhasï jatsini eratsikuani? Orheta, no tsípikuarhini imani ambe jingoni enga uáka eskachi no sési jásï ambe eratsiaka. * Ka, ístu, ambakiti ambe jatsiraparini juchari eratsikuarhu, ini ambechi uáka úni engachi pauani pauani estudiariska Tata Diosïri Karakatani (Salmo 19:8, 9).

¹³ Eskachi na exekia, parachi Tata Diosïri uékperakuarhu jarhani, uétarhisïndi eskachi pímbinhasï jauaka Tata Diosïni jingoni, jánguarhu ka eratsikuarhu. Máteru kapituluechani jimbo, exeakachi ini librurhu na engachi uáka  pímbinhasï jarhani ini tanimu ambe jimbo. Peruchi orheta exeaka nénachi uá pímbinhasï jatsini kuerpuni.

14. Uandanta je andisï limpiueni no jindee ambe engachi táchanisï jatsika para exekuarhini.

¹⁴ Jukaparhakuesti pímbinhasï jatsini kuerpuni ka ístu ambe engajtsïni xáni uirhipandajka. Uánikuechaksï eratsisïndi eska i ambe táchanisïska ka eska no nema jatsiska para inchaakuni. Peru kristianu ma no méni jatsisti para ísï eratsini. Eskachi na exekia uénakuarhu, Jeoba uandasïndi eskachi jatsiska para pímbinhasï xarharani no nomasi jimboka sésiska para jucha, sino ístu jimbokachi úsïnga sési pakatani imani o no sési pakatani. Ju je miántani sapini engachi primeru párrafurhu uandapka: enga méntkisï jáxetini jámapiringa ka no mórhekuarhitini, ¿a no eskachi no sési exeapiringa imeri tátichani? Májkueni, engachi jucha no sési japiringa, jáxetini o engachi no sési irekapiringa, ¿a no eskachi no sési pakatapiringa juchari Táti auandarhu anapuni ka ístu imani ambe engachi eianhpijka? Jatsiskachi para méntkisï miáni jarhani ini uandakuechani enga Tata Diosï kararkuarhiaka: “Eska nómbe no sési arhinhaaka i úkua enga jucha enkargarinhaka, jucha jánguarhisïnga no úni ambe enga pekadu úraaka nemani, sino iámindu ambe jimbo jucha sési jámasïnga eska na jatsika para jámani ma Diosïri jarhuajpiri” (2 Korintu 6:3, 4). Ju je exeni jiájkani, nani ka nanichi jatsiski para xarhatani eskachi limpiueska.

15, 16. ¿Ambechi jatsiski para úni parachi limpiu jámani, ka na jásï xukuparhakuachi jatsiski para jukani?

¹⁵ Limpiu jámani ka sési xarharani. Nani uéjkisïchi anapueni o na uéjki pʼindekuechanchi jatsiani, jatsiskachi para seguidu jikuani. Kasi iáminduchi jatsisïnga itsï ka xapu ambe parachi limpiu jámani jucha ka juchari sapiicha. I ambe ístu arhikuekasïndi eskachi jatsiska para jupajkukuarhini  ante de tʼirenchi o engachi úmantani jámaaka tʼirekua, ka engachi niuaka baniurhu o engachi mórhetaaka sapini ma o paniali jatsikuntani. Jupajkuntani itsï ka xapu jingoni, uáti úni eskachi no xáni pʼamenchaaka ka asta úni eska nema no uarhiaka. Pʼamenchakua ambe komueska páni, úkuarhisïndi enga ma no jupajkuaka, jiájkani uétarhisïndi jupajkuni para no inde ambe pʼamenchani. Enga juchari iretarhu no jauaka drenaji ambe, sésichi uáka tújchakurani imani ambe engachi uáka, ísï eskaksï na uénga ióntki israelitecha (Deuteronomio 23:12, 13).

¹⁶ Ístuchi jatsiska para seguidu jupani takusïni. No uétarhisïndi eska takusï kánikua jukaparhaaka o eska imaeuaka enga iásï meru jukanhani jaka, ambe enga jukaparhakueka jindesti eska jupakata jauaka ka enga kaxumbikua xarhataaka (arhinta je 1 Timoteo 2:9, 10). Nani uéjkisï engachi jauaka ka jámani, uékasïngachi eska na engachi xukuparhaaka ka na engachi jásï jámaaka “juchari Diosï ka Pʼímutantspitiri jorhengua iámindu ambe jimbo sési arhikateaka” (Titu 2:10).

17. ¿Andichisï jatsi para limpiu jatsini ka para sési xarharani juchari kʼumanchikua ka ístu máteru ambe engachi jatsikuarhika?

¹⁷ Kʼumanchikua ka ambe engachi jatsikuarhika. Jatsiskachi para jánguarhintani, para juchari kʼumanchikua limpiu jarhani ka para sési xarharani, no arhiati nájkiruka kʼériuaka ka sési jáxeni o arisku jásïni. Ka májkuenchi jatsiska para úni juchari trokani jingoni, asta incharini jamberi, ka sánderu engachi úrajka para tánguarhikuarhu nirani o parachi nirani eianhpini. Juchari ambe jatsisti para méntkisï sési xarharani. Ísïchi uáka eska kʼuiripu sési uandaaka juchari jakajkukueri ambe. Jimbokachi jorhentpesïnga eska Jeoba tsitisïnga eska limpiu jauaka ka eska jimbosï ‘kʼamajkuantaauaka imechani engaksï ikichakua újka parhakpinini’ ka eska úraaka imeri Reinuni para echerini paraisu ma úntani (Jaŋaskuecha 11:18; Lucas 23:43, TNM). Ísï jimbo, na engachi limpiu jatsiaka kʼumanchikuani ka ístu  ambe engachi jatsikuarhika, jatsisti para xarhatani eskachi sánhani arhixaka pʼindeni ísï limpiu irekani eska na uétarhiaka jimbanhi parhakpinirhu.

18. ¿Ambechi jimbo xarhatasïni eskachi respetarisïnga Kʼumanchikua Reinuerini?

¹⁸ Juchari Kʼumanchikua Reinueri. Kánikuachi respetarisïnga ini kʼumanchikuani, jimbokachi ixusï kómarhijka juchari Tata Diosïni engachi xáni xénchajka. Uékasïngachi eska méntkisï kánikua sési xarharaaka, ka eskaksï sési exeaka imecha engajtsïni pʼorhembijka. Paraka méntkisï sési xarharaaka, uétarhisïndi programa ma chúxapani parachi sési jájkuntani ka parachi arreglarini ambe ma. Engachi jarhuajpijka para ini ambe úni, xarhatasïngachi eskachi kánikua uékasïnga ini kʼumanchikuani nani engachi kómarhijka Tata Diosïni. Jo, kʼéri kóntperata máesti sési jántskantani, “arreglarini ka sési jájkuntani” juchari Kʼumanchikua Reinuerini (2 Crónicas 34:10). Ka májkueni jatsisti para úkuarhini imani kʼumanchikuechani jingoni engachi jimbo kʼérati tánguarhikuechani jatsiajka.

19. ¿Ambechi no jatsiski para úni engachi no uéjka jájkuni juchari kuerpuni, ka nénajtsïni jarhuatasïni Biblia ini ambe jimbo?

¹⁹ ¿Ambe másteru ambe arhikuekasïni pímbinhasï jatsini kuerpuni? No úni imani ambe enga uáka jájkuni kuerpuni. Jimbochisï no jatsika para itsutani, kauini, o ísku úndani imani ambe arhani no jimbokajtsïni doktori ma arhiaka, enga újka eska ma pʼindeaka arhani o enga újka eska ma ménderueni pʼikuarheraaka. Ísïsti, Biblia no íntspesïndi lista ma iámindu bisiuecheri engaksï iásï jaka ka enga kʼuiripu pʼindekia uáni, peru kʼóru uandaasïndi prinsipiuechani engajtsïni jarhuataaka kurhanguni andisï Jeoba ikichaajki ini bisiuechani ka andisï no sési exeajki. Ju je exeani iúmu prinsipiuechani  engachi jatsika para uáni jimbokachi xénchasïnga Tata Diosïni ka engajtsïni jarhuataaka parajtsïni ima jeiapanhintani.

20, 21. ¿Ambe uékasïni Jeoba eskachi no niátaaka, ka ambe jimbojtsïni arhisïni eskachi no ísï uáka?

²⁰ “Mítiparini eskachi jatsiaska xárhati eiatsperakuechani, jaue pímbinhasïntani para iámindu indeni no sési jásï ambe jingoni enga kuerpu újka ka enga mintsita tamapu eratsijka, paraksï sési jimbo pímbinhasïni Diosïni janhanharhiparini.” (2 Korintu 7:1.) Eskachi na exejka, Jeoba uékasïndi eskachi no jámaaka imani ambe úni enga uáka jájkuni “kuerpuni” o enga no sési úkuaka ‘eratsikuani’ (o ima ambe enga újka eskachi eratsiaka ambe ma). Ísï jimbochisï no jatsika para imani ambe niátani engajtsïni uáka pʼinderani bisiu ma jatsini enga uáka no sési úkuni kuerpuni o eratsikuani.

²¹ Ini mísmu texturhu, Bibliajtsïni arhisïndi andichisï jatsi parachi “pímbinhasïntani para iámindu indeni no sési jásï ambe jingoni”. Uétarhisïndi exeni eska 2 Korintu 7:1 uandasïnga uénakuarhu: “Mítiparini eskachi jatsiaska xárhati eiatsperakuechani”. ¿Náki eiatsperakuechani? Imechani enga Jeoba uandaajka máru bersikuluecharhu antesi: “Jíksïni pʼíkuntaaka, ka jindeakani chári Táti” (2 Korintu 6:17, 18). ¡Xáni sési ambe! Jeobajtsïni aiachesïndi eskajtsïni ísï uékperakua jingoni kuidariuaka eska ma táti na kuidariajka uájpechani. Perujtsïni arhisïndi eskachi orheta jatsiska para ambe ma úni: eskachi jurajkuaka “iámindu indeni no sési jásï ambe [...] enga kuerpu újka ka enga mintsita tamapu eratsijka”. Jo, kánikua no sési japirindi engachi jurajkupiringa eska bisiu ma jimbo enga Jeoba ikichajka, jucha nóteru úpiringa sési pájperakua ma jatsini imani jingoni.

22-25. ¿Náki Bibliarhu anapu prinsipiuechajtsïni jarhuataa parachi no jámani bisiu ma kámani?

²² “Uékaakari chíti Tata Diosïni méntku iámindu chíti  mintsita jingoni, ka iámindu alma jingoni, ka iámindu chíti eratsikua jingoni.” (Mateu 22:37.) Jesusi uandasti eska i juramukua jindeska enga sánderu jukaparhakueka iáminduecheri (Mateu 22:38). Jo ísïsti, jucha jatsiska para uékani Jeobani iámu mintsita jingoni ka eratsikua jingoni ka iámu uinhapikua jingoni. Ka parachi ini ambe úni, nochi jatsiska para imani ambe niátani enga uáka úni eskachi sánderu sóntku uarhiaka o enga uáka eskachi nóteru sési eratsiaka, jimbokajtsïni Tata Diosï íntskuska eratsitarakuani.

²³ “[Jeoba] jindes[ti] enga tsípikua íntspijka ka jirejtakua ka iámindu ambe.” (Ukuecha 17:24, 25.) Mítiparini eskajtsïni juchari ambakiti Tata Diosï íntskuska tsípikuani, jimbochisï kristianuecha kánikua respetarijka tsípikuani. Jimbochisï no újka imani ambe engajtsïni uáka pʼamenchatarani. Engachi indeni ambe úpiringa, nochi respetarini japiringa tsípikuani enga Tata Diosïri intsïmperakua máeka (Salmo 36:9).

²⁴ “Uékaakari máteruni eska tʼujkumindu na uékakuarhijka.” (Mateu 22:39.) Uánikua uelta, no solu imajkusï no sési úkuarhinchajti enga bisiuni ma kámajka, sino ístu no sési úkuasïndi máteruechani. Ísï úkuarhisïndi imani jingoni enga itsutajka, ka enga no sési úkuajka imechani engaksï sïpirujka sïraatani enga ima itsutajka. Ima enga i ambe újka, xarhatasïndi eska no kurhajchaxaka Tata Diosïri juramukuani enga uandajka eskachi jatsiska para uékaani máteruechani, ka ístu xarhatasïndi eska no uékasïnga Tata Diosïni (1 Juanu 4:20, 21).

²⁵ “Jimajkani miátantaa kʼuiripuechani eskaksï janhanharhiaka gobiernuni ka juramutichani ka úni eska imecha na juramuaka.” (Titu 3:1.) Uápurisï, gobiernu no jeiapanhintasïndi eskaksï kʼuiripuecha kámaaka o eskaksï úraaka droga, jimbochisï kristianuecha no újka indeni ambe (Roma 13:1).

26. a) ¿Ambechi jatsiski para úni parachi Tata Diosïri uékperakuarhu jarhani? b) ¿Andichisï újki uandani eska no ma ambe jarhaska enga sánderu sésika ka eska pímbinhasï irekua ma páni Tata Diosïni japarini?

 ²⁶ Parachi Tata Diosïri uékperakuarhu jarhani, no solu uétarhisïndi ma o tsimani ambe jimbojku pímbinhasï jarhani, sino jatsiskachi para iámu ambe jimbo pímbinhasï jarhani. Ísïsti, úpirindi úkua jukani bisiuni ma jurajkuni, ka nóteru méni únia; peru ma úsïndi jurajkuni. * No ma ambe jarhasti enga sánderu sésiika ka eska pímbinhasï tsípikua ma páni. Jo ísïsti, engajtsïni Jeoba kurhachijka ambe ma, jindesti parachi sési jarhani (arhinta je Isaías 48:17). Ístuchi sési pʼikuarherasïnga jimbokachi mítiska eskachi sési pakatasïnga juchari Tata Diosïni engachi xáni uékajka ka engajtsïni xáni uékajka juchantsïni.