1, 2. a) Engachi nirajka tembuchakuarhu ma, ¿ambechi úpirini kurhamarhikuarhini, ka andi? b) ¿Náki kurhamarhikuechanchi exeani jaua ini kapitulurhu?

¿TSITISÏNTSÏ tembuchakuechani? Uánikuechaksï jo, jimbokaksï kʼuínchikuesïnga enga kánikua tsípinhajka. Nobiuechaksï sési xukuparhantasïndi, ka xarhanharhisïndiksï eskaksï tsípini jarhasïnga. Kánikuaksï tsípiparini, erokuarhisïndi ka mintsikasïndiksï eskaksï méntkisï sési irekaaka.

² Peruchi mítiska eskaksï iásï temungurhiricha nóteru ísïskia eska ióntki. Ísï jimbo, engachi tembuchakuarhu ma nirajka erokuarhiparini eskaksï nobiuecha sési irekaaka, ménisïchi kurhamarhikuarhisïnga: “¿sésiksï irekaa, ka para méntkisï?”. Uátiksï ísï úni, engaksï mintsikaska ambe enga Tata Diosï arhiajka, ka engaksï jánguarhintaska ísï úni (arhinta je Proverbios 3:5, 6). Jatsistiksï para jánguarhintani indeni ambe úni, engaksï uékaaka sési irekani ka engaksï uékaaka Tata Diosïri uékperakuarhu jarhani. Peru, nájkirukachi tembuchatiuaka o nómbe, kánikua jukaparhakuesti exeni ambe enga Biblia uandajka ari tʼámu kurhamarhikuecheri: ¿Ambe jimbo sési jarhaski tembuchani? ¿Néna uá ma sési erakuni né jingoni tembuchani? ¿Néna úsïni ma prepararikuarhini para tembuchani? ¿Ambe jarhuataua temungurhirichani paraksï tsípikua jingoni irekani?

3. ¿Andisï no sési japirini tembuchani nomasi jimbokaksï máteruecha arhisïnga eska ísï uáka?

³ Máruksï uandasïndi eska para ma tsípikua jingoni irekani uétarhisïnga tembuchatini jarhani ka eska no nema uáka agustu pʼikuarherani astaka no exentaaka né jingoni tembuchani. ¡Peru i ambe no ísïsti! Ju je eratsintani Jesusini. Ima no méni tembuchasti, ka niárasti uandani eska kóntperata máeska no tembuchatini jarhani, ka pʼímarhiaspti imechani engaksï úpiringa ísï pakarani eskaksï ísï úpiringa (Mateu 19:11, 12). Apostuli Pablujtu uandaspti máru kóntperatechani engaksï jatsiajka imecha engaksï no tembuchatijka (1 Korintu 7:32-35). Peru Pablu no uandaspti eska afuersespka i ambe úni níjtu Jesusi; Biblia uandasïndi eska enga nema jorhentpijka eska ma no jatsiska para tembuchani jindeskaksï ‘noambakitiri espirituecheri jorhenguecha’ (1 Timoteo 4:1-3). Peru, para imecha engaksï no uékajka tembuchani sino solu marhuakuni Jeobani, sánderuksï uánikua ambe úsïndi úni engaksï ísï pakarajka. Ísï jimbo, no sési japirindi uékani tembuchani, solu jimbokaksï máteruecha arhisïnga eska ísï uáka.

4. ¿Andisï tembuchatini jarhani jinde para ma úni sapiichani kʼuiriperani?

⁴ Peru ¿jarhaski ambe ma enga jimbo ma uáka tembuchani? Jo. Tembuperani kóntperata máesti engajtsïni Tata Diosï íntskuka, enga ístu kóntperatechani íntspeajka ka enga uáka eskaksï kʼuiripuecha tsípikua jingoni irekaaka (arhinta je Génesis 2:18). Ísï úsïndi ma sapiichani kʼuiriperani, jimbokaksï sapiicha uétarhinchasïnga irekua ma engaksï táticha uékperakua xarhatakuauaka, jorhendaauaka ka jurhimberantaani (Salmo 127:3; Efesu 6:1-4). Peru jarhasti máteru ambe jimbo engaksï uáka tembuchani.

5, 6. a) Eska na uandajka Eclesiastés 4:9-12, ¿andisï sésii ambakiti amigueni? b) ¿Néna uá temungurhiri ma, sïndari máeni enga tanimu sïndari jimbo tepekukata jauaka?

⁵ Exeakachi ambe enga uandajka kontextu bersikulueri  enga uénakuarhu jaka ini kapitulurhu: “Sánderuksï sésisti tsimani ka eska máechakuajku, jimbokaksï ambakiti kóntperata jatsisïnga imecheri ambakiti ánchikuarhitani jimbo. Jimboka enga máechakua kuarhatsejka, máteru uáti jauatani. Peru ¿néna nikua imani enga kuarhatseaka ka enga no jatsiaka né enga jarhuataaka? Ka engaksï tsimani májku kʼéri apondijka, jimajkanksï no tsʼiraati; peru ¿néna uá máechakuajku no tsʼirani? Ka enga nema uáka no sési úkuni máechakuani, engaksï tsimaniijka úsïndiksï kuájpikuarhini. Ka sïndari ma enga tanimu sïndari jimbo tepekatejka, no uáti katsïkunhani” (Eclesiastés 4:9-12).

⁶ Íksï bersikuluecha uandasïndi na enga xáni jukaparhakueka pájperakua. Peru ¿úpirini úrakuarhini i para temungurhiri? Jo, jimboka xásï pájperakua ma jarhasïnga temungurhirikuarhu ka ístuksï uáti májkueni jarhuajperani, sési pʼikuastperani ka kuájchakukua ma jatsini ísï eska na uandajka textu. Peru paraka temungurhiri ma uáka uinhapiti jarhani, uétarhisïndi máteru nema. Ka ísïksï uáti jindeni sïndari ma enga tanimu sïndari jimbo tepekukata jaka, ka eska na uandajka Eclesiastés sánderu uinhapiti jarhasïndi ka eska enga tsimani jimbo tepekukatejka. ¿Peru ambeski ima máteru “sïndari” enga újka eska sánderu uinhapiaka? Jeobaesti. Engaksï temungurhiricha kuenta újka Jeobani ka engaksï tsimarhani jánguarhintajka paraksï sési pʼikuastani, sánderuksï uinhapiti jarhasïndi temungurhiri.

7, 8. a) ¿Ambe arhiaspi Pablu imechani engaksï no tembuchatini jaka ka enga úkua jukakuajka pʼínguani eratsikuechani relasioni sexualiri ambe? b) ¿Ambejtsïni arhisïni Biblia eska úpiringa jarhani tembuchatichani jingoni?

⁷ Ka ístu, temungurhirichajkuksïsï uáti relasioni sexuali jatsini. Solu engaksï temungurhirijka, jiájkantkuksïsï újti relasioni sexuali jatsini sési pʼikuarheraparini (Proverbios 5:18). Ísï jimbo, ¿ambeksï uá úni imecha engaksï no tembuchatini jaka ka engaksï sésku ‘jatiriikia’, jo, enga nitamajkia ima tiempu engaksï uénajka kánikua uinhapini eratsikuecha relasioni sexualiri ambe? Engaksï eratsiaka eskaksï no uáka pʼíngukuarhini,  ka engaksï exeaka eskaksï uáka no sési jásï ambe niátani, Pablu i ambe arhiaspti eska uandasïnga Tata Diosï: “Peru engajtsï no uáka pʼíngukuarhini, mejori tembucha je, jimboka sánderu sésiska tembuchani ka eska ísku ambe úkuekani jarhani” (1 Corintios 7:9, TNM; 1 Korintu 7:36; Santiagu 1:15).

⁸ No arhiparini ambe enga jimbo tembuchaaka nema, ima enga uékaaka tembuchani jatsisti para sési mítitini jatsini máru ambe. Pablu uandasti eska imecha engaksï tembuchaaka ménisïksï ‘sufririuaka’ (1 Korintu 7:28). Tembuchatichaksï jatsiauati problemechani engaksï no jatsiajka no tembuchaticha. Ísï jimbo, enga nema eratsini jaka tembuchani, ¿ambe uá para no xáni problemechani jatsiani ka para sánderu kóntperatechani jatsiani? Ma ambe enga jatsika para úni jindesti sési erakuni né jingoni tembuchani.

9, 10. a) ¿Néna xarhataspi apostuli Pablu eska no sési uéraaka enga nema uékaaka no jakajkuti ma jingoni tembuchani? b) ¿Ambeksï úkuarhinchasïni imecha engaksï no kurhajchajka ambe enga Biblia uandajka ka no jakajkutini ma jingoni tembuchani?

⁹ Tata Diosï úspti eska Pablu karapiringa prinsipiu ma engaksï jatsika para chúxapani imecha engaksï uékani jaka jirinhani né jingoni tembuchani. Uandaspti: “Asï jáma je májkuentani no jakajkutichani jingoni” (2 Korintu 6:14). ¿Ambe úkuarhipirini engaksï májku kʼéri pérapiringa tsimani animalichani paraksï márku tarheni? Enga ma sánderu kʼéripiringa o uinhapini eska máteru, nóksï úpirindi agustu ánchikuarhini ka úpirindiksï lastimarikuarhini. Ka májkueni úkuarhisïndi enga kristianu ma, ‘májkuentajka’ o tembuchajka no jakajkuti ma jingoni. Uánikua problemechanksï jatsiasïndi, jimboka ma, ma ambe tsitisïnga ka máteru, máteru ambe: ma kánikua uandanhiasïndi para Tata Diosïri uékperakuarhu jarhani ka máteru méntku no sáni. Ka tsimarhanksï no uáti agustu jarhani. Jimbosï Pablu arhiapti  kristianuechani eska engaksï tembuchapiringa “eska imajtu jakajkuti[piringa]” (1 Korintu 7:39).

¹⁰ Peruksï máru kánikua jandiajku pʼikuarherasïndi ka niárasïndiksï eratsini eskaksï sánderu sési jauaka engaksï “no jakajkutichani jingoni” tembuchaska. Ménisïksï no kurhajchasïndi ambe enga Biblia uandajka, ka niárasïndiksï tembuchani imani jingoni enga no marhuakujka Jeobani. Peru tátsekuaksï kurhangusïndi eskaksï no sési úska. Eskaksï erakuska tembuchani imani jingoni engaksï no méni uáka márku tsípikuarhini imani ambe jimbo enga sánderu jukaparhakueka, ísï jimbo, niárasïndiksï sánderu jandiajku pʼikuarherani ka eskaksï na pʼikuarheraenga orheta. Peru uánikua kristianuechaksï jarhasti engaksï no újka ini ambe, jimbokaksï mintsikasïnga Jeobani ka pauani pauanksï kurhajchasïndi (arhinta je Salmo 32:8). Nóksï tembuchasïndi, jimbokaksï erokuarhisïnga eskaksï Tata Diosïri iretarhu ménisï exentaaka né jingoni tembuchani.

11. ¿Ambe jarhuajperata jarhaski para ma úni sési erakuni né jingoni tembuchani? (Exe je ístu rekuadruni “ Ambe engajtsïni jarhuataaka sési erakuni”.)

¹¹ Peru ísïsti, para ma úni sési erakuni né jingoni tembuchani no solu uétarhisïndi jirinhani imani enga marhuakuaka Jeobani. Engari eratsini jaka tembuchani, jirinha imani enga májkueni eratsiaka eska tʼu ka eska májkueni jásï uékaaka marhuakuni Jeobani ka eska kánikua uékaaka Tata Diosïni. Jántspiri enga mintsinharhikueka ka enga jánhastika, mémindu íntspiastia konsejuechani engaksï Bibliarhu jaka, ka engaksï íri ambe uandajka enga xáni uétarhijka, ísï jimbo, kánikua sési japirindi kómarhikua jingoni eratsiani indeni prinsipiuechani ka tátsekua ísï úni eskaksï na uandajka (arhinta je Salmo 119:105). *

12. ¿Nénaksï erakuasïni máru iretecharhu né jingoni tembuchani, ka náki ejemplu jarhaski Bibliarhu enga uáka jarhuataani imechani engaksï ini kóntperatani jatsiaka?

¹² Uánikua iretecharhu pʼindenhasti eskaksï máteruecha  jirinhakuauaka né jingoni tembuchani. Uandasïndiksï eskaksï táticha sánderu jánhastiska ka jimbokaksï sánderu ióni irekaskia, sánderuksï sési uáti jirinhakuani uájpechani né jingoni tembuchani. Ka májkueni eska jiáni enga Biblia uandajka, i temungurhirichaksï niárasïndi sési irekani. Ima táticha engaksï ini kóntperatani jatsiaka, uánikua ambeksï jorhenguarhiati Abraaniri ejemplu jingoni. Enga Abraani eratsipka jirinhakuni témbani ma imeri uájpa Isakini, no kuenta úspti na enga xáni jatsikuarhipka uátsï ka ni na enga xáni mítikatepka. Sánderu sési, úraspti imeri jántspirini, para jirinhani uátsïni ma enga marhuakuenga Jeobani (Génesis 24:3, 67). *

13-15. a) ¿Néna jarhuatasïni Proverbios 24:27 tumbini enga jirinhani jaka né jingoni tembuchani? b) ¿Néna uá uátsï prepararikuarhini para uambuchani?

¹³ Engachi eratsini jaka tembuchani, sési japirindi kurhamarhikuarhini: “¿Meru listu jarhaskia?”. Para ini kurhamarhikuani mókuntani, no solu uétarhisïndi eratsini nachi exesïni jucha uékani nemani, na engachi exejka relasioni sexualini, jandiajku jarhani, o sapiichani kaani. Uátsï ka tumbi, jatsistiksï para eratsiantaani responsabilidadichani engaksï jatsiauaka engaksï tembuchaakia.

¹⁴ Ju eratsini orheta tumbini enga jirinhani jaka né jingoni tembuchani. Jatsisti para eratsintani ini textuni: “Orheta, ú chíti ánchikuarhita uérakua, ka listu jatsi iámu ambe kampurhu. Ka tátsekua uaxasta chíti kʼumanchikuani” (Proverbios 24:27). ¿Ambe arhikuekasïni i textu? No arhikuekasïndi úni kʼumanchikua ma. Enga uandajka: “uaxasta chíti  kʼumanchikuani” arhikuekaxapti jatsini familiani ma, ka i ambe úkuarhisïndi enga ma tembuchajka ka enga sapiichani kaajka. Ka i prinsipiu ístu marhuasïndi para iásï anapu tumbiicha. Engaksï uékaaka tembuchani, jatsistiksï para sési eratsintani paraksï úni kumplirini ambe engaksï jatsika para úni. Engaksï no pʼamenchani jauaka, jatsistiksï para ánchikuarhini. Tata Diosïri Karakata uandasïndi eska ima enga no kuidariuaka imeri familiani, enga no íntskuaka ambe enga uétarhinchaaka, ka enga no jorhendaauaka Tata Diosïri ambe, sánderu no sési úsïndi ka eska no jakajkuti ma (arhinta je 1 Timoteo 5:8).

¹⁵ Uátsïjtu jatsisti para preparadu jarhani jimboka kʼérati responsabilidadichani jatsiauaka. Biblia uandasïndi na enga jatsika para jindeeni ka ambe enga jatsika para úni, para úni jarhuatani uámbani ka para kuidarini imeri familiani (Proverbios 31:10-31). Uátsï o tumbi enga no sáni eratsiparini tembuchajka, imajkumindu jimbo uandanhiasïndi. ¿Andi? Jimboka no eratsintasïnga ambe jimbo uá jarhuatani imani enga jingoni tembuchaaka. Peru, sánderu jukaparhakua ambe enga jimbo ma uáka prepararikuarhini para tembuchani, jindesti Tata Diosïri ambe jimbo. Ju je exeni ambe arhikuekasïni i ambe.

16, 17. ¿Náki Bibliarhu anapu prinsipiuechanksï jatsiski para eratsintani imecha engaksï prepararikuarhini jaka para tembuchani?

¹⁶ Uénani jámani, uátsï ka tumbi jatsistiksï para eratsintani ambe enga Tata Diosï uéjka eskaksï uáka engaksï tembuchaakia. Tumbi jatsisti para sési mítitini jarhani ambesï jatsi para úni jimboka ima orhejtsïkutiuaka familiarhu. No méni jatsisti para juramuni uandaparini eska no nema uáka ambe ma arhini, sino jatsisti para ísïni eska Jesusi (Efesu 5:23). Ístu, pirenchi jatsisti para kurhanguni ambe enga xáni arhikuekajka imeri ánchikuarhita. Jimbosï sési jati eska kurhamarhikuarhiaka: “¿Jiókuarhia ji pararini juchiti achati ‘juramuchini’?” (Roma 7: 2). Uátsï ma enga no uambuchatini jarhajka, jatsistia para respetarini Jeobaeri juramukuani ka ístu Kristueri (Galasia 6:2). Ka enga uambuchaska, jatsiati para respetarini máteru juramukuani: uámberini. Jimbosï ménderu jatsiti para kurhamarhikuarhini: “¿Uá  respetarini ka méntkisï apoiarini juchiti achatini enga pekadorika?”. Enga exeaka eska no tsitisïnga ini ambe, jamberi sési japirindi eska no uambuchapiringa.

¹⁷ Ístu, ima enga tembuchajka, jatsisti para listu jarhani para íntskuni témbani o uámbani ambe enga uétarhinchajka, mítiparini eskaksï no májkueni ambe uétarhinchasïnga (arhinta je Filipusʌ 2:4). Pablu karasti: “Chájtu uéa je chári uarhiitichani komueska chájkumindu na uékakuarhijka. Ka ístu uarhiiticha janhanharhiaueksï imeri achatichani”. Eskachi na exejka, Tata Diosï úspti eska apostuli Pablu kurhangupiringa eska kánikua jukaparhakueska para achati eska respetarinhaaka, ka eska para uarhiiti kánikua jukaparhakueska eska xénchanhaaka (Efesu 5:21-33).

18. ¿Andisï jukaparhakue jorhenani pʼíngukuarhini enga ma nobiueni jámaaka?

¹⁸ Ísï jimbo, engaksï nema nobiuejkia no jindesïndi nomasi paraksï tsípikuarhini jámani. Nobiuechaksï jatsisti para ini tiempuni úrani paraksï jorhenguarhini sési kámberani ka paraksï exeni sési jaua tembuchani o nómbe. Ístu, ini tiempu jimbojtuksï jatsisti para pʼíngukuarhini. ¿Andi? Jimboka normaliska eskaksï xénchperaaka, peruksï úpirindi no úni pʼíngukuarhini ka no sési ambeksï niátani engaksï xarhatatsperani jauaka na engaksï xáni xénchperajka. Peru, engaksï meru uékperajka, nóksï méni uáti imani ambe enga uáka úni eskaksï tsïtaaka imecheri pájperakua Tata Diosïni jingoni (1 Tesalonika 4:6). Ísï jimbo, imecha engaksï nobiu úkuarhiaka jatsistiksï para jorhenguarhini pʼíngukuarhini, i ambe méntkisï marhuakuauati imecheri irekuarhu, no arhiparini engaksï tembuchaaka o nómbe.

19, 20. Uandanta je, ejempluechani úrapariani, nénaksï exesïni uánikua kʼuiripuecha temungurhirikuani ka na engachi jatsika para exeni jucha kristianuecha.

¹⁹ Paraka temungurhiri ma ióni durariuaka jatsistiksï para meru tsimarhani jukaparharani temungurhirikuani. Pelikulecharhu  ka libruecharhu, tembuchakua jindesïndi “nani enga tsípikua jingoni kʼamarhujka”. Peru irekakuarhu, no jindesïndi kʼamarhukua; apenasi uénakuarhuesti. Jo, ixú uénasïndiksï márku irekuarhini ísï eska Jeoba na uékajka eskaksï méntkisï jauaka (Génesis 2:24). Peru iásï anapu parhakpini ménderueni exesïndi ini ambe. Uánikua iretecharhuksï uandasïndi “jópchastiksïa”. Ka kʼuiripuechaksï ísï exesïndi tembuperakuani, uékasïndiksï márku jarhani peru solu jiáni engaksï konbenirinchaaka, peruksï ístu uékasïndi eska fásiliuaka jurajperani.

 ²⁰ Jo, uánikuechaksï eratsisïndi eska tembuperakua no ióni jamberiuaka. Jimboksïsï tsípekua jingoni ísï újti, jimbokaksï seguru jarhasïnga eskaksï uáka jurajperani engaksï no úska sési irekani o engaksï úndaaka problemechani jatsiani. Peru uétarhisïndi miáni eska Biblia ísï terokutantasïnga ambakiti pájperakuani ka temungurhirikuani, eska sïndari ma. Jo ísïsti, uánikua sïndarichaksï jarhasti engaksï meru uinhapitiika. Máru sïndaricha engaksï marirhu úrakuarhijka nóksï katsïkurhisïndi niksï xerekuarhintani, nájkiruka no sési jásï janiaka o uinhamu tarhiani. Ka májkueni úkuarhisïndi temungurhikua jingoni: Jeoba ústi paraka ióni jamberiuaka. Ju je miáni eska Jesusi uandaska: “Imechani enga Diosï kúndaaka, asï nema jáme jarhangutaantani” (Mateu 19:6). Ka ísïchisï jatsika para eratsini kristianuecha. Peru, xáni ísï komprometidu jarhani, ¿no úsïni eska temungurhikua ísï exenhaaka eska kʼuetsapiti ambe? Nómbe.

21. ¿Ambeksï jatsiski para jorhenguarhini tembuchaticha, ka náki ejempluksï jatsiski?

²¹ Temungurhirikua úsïndi íntspini máru ambe enga ma uétarhinchajka ka tsípikuarhita. Peru para i ambe úkuarhini, uétarhisïndi jorhenguarhini sési exeni témbani o uámbani, exeni ambe enga sési újka ka na enga jánguarhintajka, ka no exeni ambe enga no sési újka. Peru i ambe úni, ¿no jindepirini no uékani exeni ambe enga ísïka? Nómbe. Jeoba no méni no uékasïndi exeni ambe enga ísïka, peruchi jucha erokuarhisïnga eska Jeoba méntkisï exeaka ambakiti ambe juchari ambe. Májkuenichi eratsisïnga eska salmista enga uandapka: “Enga tʼu méntku imani ambe exeni japiringa engachi no sési újka, jimajkani né oh Jeoba, ¿né úpirini anhaxurhitini jarhani?” (Salmo 130:3). Ísï jimbo, temungurhirichajtuksï jatsisti para jorhenguarhini kurhangutsperani ka puátsperantani (arhinta je Efesu 4:32).

22, 23. ¿Ambe ejempluksï íntsaaski tembuchatichani Abraani ka Sara?

²² Temungurhirichaksï úsïndi sánderu tsípikua jingoni  irekani enga na nitamapajka uéxurhinicha. Ju je exeni Saraeri ka Abraaniri ejempluni, engaksï tʼarhepipkia, íksï úspti uánikua problemechani orhepani uérakuani. No fásilipti para Sara, enga 60 uéxurhini ísï jatiripkia, jurajkuni imeri ambakiti kʼumanchikuani ka ima ambakiti iretani enga Uri arhinhaenga, ka irekani kʼumanchikuechani jimbo engaksï sïkuiriri úkatepka astaka uarhipka. Peru ísï úspti, jimboka respetarisïrenga uámberi juramukuani. Méntkisï apoiaristi paraka sési uérapiringa ambe enga uámba eratsienga úni. Méntkisï jarhuatasti ka no méni jandiajku jurajkusti. No úsïrendi i ambe paraksï máteruecha sési exeni, jimboka asta “imeri eratsikuarhu” arhisïrenga juchiti tata (Génesis 18:12; 1 Pedru 3:6). Iámu mintsita jingoni respetarisïrendi uámbani.

²³ Peru ísïsti, nóksï méntkisï májkueni eratsisïrendi. Ma uelta, Sara kurhakuspti ambe ma enga Abraani “kánikua no sési exepka”. Peru Jeobaeri jarhuajperata jimbo Abraani úspti kaxumbikua xarhatani ka kasu úkuspti témbani ka i ambe sési úkuspti imeri familiani (Génesis 21:9-13). Iásï, temungurhirichaksï, no arhiparini na engaksï xáni ióni páni jakaia tembuchatini, uánikua ambeksï uáti jorhenguarhini i temungurhiriiri enga no méni jurajkuka Tata Diosïni.

24. ¿Náki temungurhirichaksï sési pakatasïni Jeobani, ka andi?

²⁴ Iásï, Jeobaeri kúnguarhikuarhu uánikua temungurhirichaksï jarhasti nani enga uámba respetarinhajka, ka témba xénchanhani ka jukaparharanhani ka nani enga orheta péranhajka ambe enga Jeoba uékajka. Jo, úsïndi ma sési irekani temungurhiri. Eskachi na exekia, ima enga uékajka i ambe jatsini, jatsisti para sési erakuni né jingoni tembuchani, jatsisti para sési prepararikuarhini, ka jatsisti para jánguarhintani paraka pínandikua ka uékperakua jauaka imeri kʼumanchikuarhu. Temungurhiri ma enga ísï irekajka, sési pakatasïndi Jeobani, ka ístu jarhuatasïndi kristianuni para Tata Diosïri uékperakuarhu jarhani.