1-3. a) ¿Ambejtsïni intsïkuarhiski Jeoba, ka néna úpirini no sési úrakuarhini? b) Engachi uékajka Tata Diosïri xénchperakuarhu jarhani, ¿nénachi jatsiski para úrani uandakua enga jindeka regalu ma?

JU JE eranhaskani eskachi intsïkuarhisïnga troka ma, nemani engachi kánikua uékajka ka eska i no sési úrasïnga, eska no sési kámasïnga ka eska no sési úkuasïnga máteruechani. ¿Nénachi pʼikuarherapirini? Kánikua no sési, ¿no ísïski?

² Jeoba jindesti enga íntspijka “iámindu ambakiti intsïmperakua, ka ístu iámindu ambe enga sésiika” (Santiagu 1:17). Imajtsïni intsïkuarhisti uandakuani, ambe ma enga újka eskachi no májkueniuaka eska animalicha ka enga újka eskachi uáka uandani ambe engachi eratsijka ka pʼikuarherani. Peru i regalu, komueska ima troka engachi uandaka, uáti no sési úrakuarhini. Uánikua kʼuiripuechaksï no eratsisïndi na engaksï úrajka ka no sésiksï úkuaasïndi máteruechani. ¿Kurhangusïnchi jiájkani na enga Jeoba kómu pʼikuarherajka?

³ Engachi uékajka Tata Diosïri uékperakuarhu jarhani, jatsiskachi para ini regaluni ísï úrani eska ima na uékajka. O enga májkuenika, jatsiskachi para úni ambe enga ima uandaka Bibliarhu: “Ka asï uanda je ni ma uandakua enga no sési jásïika, sino uanda je indeni ambe enga marhuajka para uinhaperpintani, para eska ima engaksïni kurhajchaaka, uinhapini pʼikuarheraaka” (Efesu 4:29). Ísï  jimbo, iásïchi exeni jauaka ambe jásï uandakuachi no jatsiski para úrani ka nénachi uá úraani uandakuechani para uinhaperantaani máteruechani. Peru ante de i ambechi exeni, exeakachi andisï xáni jukaparhakue pʼímukukuarhini.

4, 5. ¿Ambeksï uandasïni máru Bibliarhu anapu proberbiuecha na engaksï xáni uinhapika uandakuecha?

⁴ Ma ambe jimbo engachi jatsika para pʼímukukuarhini, jindesti jimbokaksï uandakuecha kánikua uinhapiska. Ini uinhapikuanisï uandajti Proverbios 15:4: “Katamba ma enga iatsitakuarhu uandajka, jindesti anhatapu ma tsípikueri, peru ima enga no jurhimbiti uandajka no sési útspisïndi”. * Uandakuecha engaksï iatsitakuarhu ka pʼamojkukua jingoni uandanhaajka, ísïksï pʼikuastpisïndi eska janintserakua, ka ísïksï sési pʼikuastpisïndi eska pomada ma. Peru ima uandakuecha engaksï uékajka no sési útspini, né uéjkinksï chkerasïndi. Eskachi na exekia, uandakuechaksï úsïndi sési pʼikuastpini o no sési pʼikuastpini (Proverbios 18:21).

⁵ Ístu Proverbios 12:18 xarhatasïndi na engaksï xáni uinhapika uandakuecha. Jimini uandasïndi eska ima enga “no eratsiparini uandajka” ísïsïinga eska “espada [jingoni] chʼurhurpini jarhani”. Enga ma no eratsiparini uandajka, kánikua no sési útspisïndi ka ma úsïndi amiguechani tsïtaani. Jo ísïsti, uandakuechaksï sánderu pʼamesïndi ka eska engajtsïni mintsitarhu atapiringa espada ma jingoni. Peru, eska na seguirijka uandani proberbiu, ístu úsïndi ménderueni pʼikuastpini: “Mímixeticheri katamba sési pʼikuastpisïndi”. Ima enga  jánguarhintajka Tata Diosïri mímixekuani xarhatani, sési eratsintasïndi ambe enga uandajka. Uandakuecha pʼamojkukua jingoni, sési pʼikuastaasïndi mintsitechani engaksï no sési pʼikuarherani jarhajka ka úsïndi eskaksï ménderu amiguecha sési pájperaaka. Iáminduchi úskia exeni eskaksï uandakuecha úsïnga sési pʼikuastpentani (arhinta je Proverbios 16:24). Kánikua uinhapisti ambe enga juchari penchumikuarhu uérajka; jiájkani ju je úrani para sési úkuani máteruechani ka no para no sési úkuani.

6. ¿Andisï xáni úkua juka pʼímukukuarhini?

⁶ Peru, nájkirukachi jánguarhintajka pʼímukukuarhini, ménisïchi no úsïnga. Ka i ambejtsïni xarhatachisïndi máteru ambe engachi jimbo jatsika para pʼímukukuarhini engachi uandaaka: eskachi no eratsiparini no sési úrasïnga uandakuechani. Uandakuechaksï mintsitarhu uérasïndi ka “kʼuiripueri mintsita, no sési ambejku uékasïndi úni” (Génesis 8:21; Lukasʌ 6:45). Jimbosï xáni úkua jukajti pʼímukukuarhini (arhinta je Santiagu 3:2-4). Peru nájkirukajtsïni pekadu no jurajkujka parachi úni meru sési pʼímukukuarhini, uákachi sánitu sánderu pʼímukukuarhini. Enga kʼuiripu ma uékajka iorhekuarhu ma nitamani, jatsisti para jánguarhintani para iorhekua  no páni, májkueni úkuarhisïndi juchantsïni jingoni, juchachi uarhipexaka pekaduni jingoni jimbochisï jatsika para méntkisï jánguarhintani jarhani parachi pʼímukukuarhini.

7, 8. Juchari uandakuecha, ¿na xánksï uá sési o no sési úkuni marhuakukuani engachi Jeobani íntskujka?

⁷ Máteru ambe engachi jimbo jatsika para pʼímukukuarhini jindesti jimbokachi kʼéri responsabilidadi ma jatsiska Jeobani jingoni. Ambe engachi uandajka, no solu úsïndi eska jucha sési o no sési pájperaaka nema jingoni, sino ístu úsïndi eskachi sési o no sési pájperakua ma jatsiaka Tata Diosïni jingoni. Ísï uandasïndi Santiagu 1:26: “Enga ma kʼuiripu exekuarhijka eska Diosïni janhanharhisïnga, ka no pʼímukukuarhini, jandiajku kʼarhakuarhixati, ka ískuesti enga uandajka eska janhanharhisïnga Diosïni”. Eska na uandapka máteru kapitulu, na engachi uandajka uáti sési o no sési úkuni kómarhikuani engachi íntskujka Tata Diosïni. Engachi no pʼímukukuarhipiringa ka engachi no sési pʼikuastpipiringa juchari uandakuecha jingoni o uandanchi ambe ma parachi no sési útspini, ískuepirindi juchari marhuakukua engachi Tata Diosïni íntskujka. I ambejtsïni jatsisti para kánikua eratsitarantani (Santiagu 3:8-10).

⁸ Exeskachia tanimu ambe engachi jimbo jatsika para pʼímukukuarhini. Iásïchi exeaka ambe jásï uandakuechanchi no méni jatsiska para úraani, ka nákinchi jatsiski para úraani para uinhaperantaani máteruechani.

9, 10. a) ¿Ambe jásï uandakua meru úrakuarhisïni iásï? b) ¿Andichisï jatsi para no úrani no sési járhati uandakuechani? (Exe je notani.)

⁹ Kíchakueni jásï uandani. Ini jurhiatikuecharhu, meruksï kánikua úrakuarhisïndi maldisionicha, no sési  uandanhasïndi máteruecheri ka ísku ambe uandanhani. Uánikuechaksï maldisioni ambe uandasïndi engaksï ikiani jarhajka, o úraasïndiksï no sési járhati uandakuechani sexueri ambe, paraksï tsíperaani máteruechani. Ístuksï i jásï uandakua úrasïndi imecha engaksï telebisionirhu uérajka o engaksï radiurhu kurhaakuarhejka para tsíperaani kʼuiripuechani. Peru i ambe no chʼanakua ambesti. Dosmili uéxurhini ísïstia enga Pablu axakuapka karakata ma Kolosasi anapuechani, enga Tata Diosï kararkuarhipka, nani enga arhiapka eskaksï no jámapiringa úraani “uandakuecha enga no terokuntajka” (Kolosasi 3:8). Ka Éfesu anapu erachichani karakuaspti: “Asï jáma je ni sikiera [uandani] ísku jángua ambe [komueska ima ambe] enga no marhuajka” (Efesu 5:3, 4).

¹⁰ Juchari Tata Diosïni engachi xáni uékajka, ikichasïndi no sési járhati uandakuechani. Ísï jimbochisï juchajtu ikichaajka ka nochi úraasïnga inde jásï uandakuechani. Sésichi mítitixaka eska i ambe úpiringa ístu jindeni “ikichakueni jásï ambe”, engaksï jindeka “mintsita tamapueri úkuecha” enga Pablu uandapka eskachi no jámapiringa niátani (Galasia 5:19-21). Jo, i ambe méntku no chʼanakua ambesti. ¿Ambe úkuarhinchaa ima enga méntkisï sexueri ambe uandani jauaka o ísku jándikua amberi, no sáni kʼuratseparini o úraaparini uandakuechani engaksï máteru ambe arhikuekajka? Orheta mémindu arhinhaati eska mójtakurhiaka. Peru enga no arrepentirikuarhiska ka mójtakurhini, petanhantaati kúnguarhikuarhu uératini. *

11, 12. a) ¿Káni no sési jarhasïni uandani máteruecheri irekakueri ambe? b) ¿Andichisï no jatsi para chkuanderakua ambe uandani máteru nemaeri?

 ¹¹ Chismiarini ka chkuanderakua ambe uandani máteruecheri. Uandani máteru nemaeri ambe, no no sési jarhasti engachi ambakiti ambe uandaaka imeri ambe, komueska imeri ambe enga apenasi itsï atakuarhika o enga uétarhinchajka uinhaperanhantani. Primeru siglurhu anapu kristianuechaksï ístu uandanhiasïrendi imeri erachicha jimbo, ka imecheri ambeksï uandasïrendi peru sési jásï ambe (Efesu 6:21, 22; Kolosasi 4:8, 9). Ambe enga kʼóru no sési jaka jindesti imani ambe uandani nemaeri enga no meru ísïuaka o enga imeri irekuaeri ambeuaka. Pʼindeni indeni ambe úni, úpirindijtsïni sánderu no sési ambe úrani, komueska chkuanderakua ambe uandani máteruecheri, enga jindeeka “uandani ambe ma enga no ísïka máteru nemaeri meru uékaparini ísï úni nomasi para no sési úkuni o no sési pakatani” (Diccionario del español usual en México). Ari jindesti ma ejemplu chkuanderakuecheri ambe enga uandanhajka nemari para no sési útspini, ima chkuanderakuecha engaksï fariseuecha uandaapka Jesusiri ambe paraksï no sési pakatani (Mateu 9:32-34; 12:22-24). Ma ambe enga meru ísïika, jindesti eska chkuanderakua ambe uandani nemaeri para no sési úkuani uánikua problemechani juaasïndi (Proverbios 26:20).

¹² ¿Néna exeasïni Jeoba imechani engaksï chkuanderakua ambe uandajka para no sési útspini o engaksï újka eskaksï máteruecha no sési arhijperaaka? No sési exeasïndi. Niárasïndi jamberi ikiakuni imani enga újka eskaksï “ermanuecha uarhiperaaka” (Proverbios 6:16-19). Ju je miáni eska uandakua griegu enga ísï tradusirikuarhijka “nema enga chkuanderakua ambe uandajka máteru nemaeri” jindeska diábolos, inde mísmu uandakua  enga úrakuarhijka para Satanasini arhini “Noambakiti”, jo, komueska ima enga no sési járhati chkuanderakua ambe uandajka Tata Diosïri (Jaŋaskuecha 12:9, 10). Jo ísïsti, nochi ma jucha uékapiringa jindeeni “noambakiti” ma (jo, nema enga no sési járhati chkuanderakua ambe uandajka máteru nemaeri). Jo ísïsti, kúnguarhikuarhu no jatsisti para jarhani no sési járhati chkuanderakua ambe ka ni úkuecha enga mintsita tamapu tsitijka, komueska “atajpikuekani” ka “nómindu [úni] pájperani máteru ka máteruni jingoni” (Galasia 5:19-21). Ísï jimbo, ante de jámanchi uandani ambe ma máteru nemaeri, jatsiskachi para kurhamarhikuarhini: “¿Seguru jarhaski eska ísïska? ¿Uékperakua xarhatapirini engani uandantapiringa ini ambe? ¿Uétarhijki o sési jaki eskaksï máteruechajtu mítiaka ini ambe?” (arhinta je 1 Pedru 4:15).

13, 14. a) ¿Néna pʼikuastaasïni máteruechani no sési járhati uandakuecha? b) ¿Ambeksï úpirini úkuarhinchani imecha engaksï no sési járhati uandakuechani úraajka?

¹³ No sési arhijpini. Eskachi na exekia, uandakuechaksï uáti kánikua no sési útspini. Ka ísïsti eska pekadu úsïnga eskachi uandaaka ambe engajtsïni tátsekua no sési pʼikuastani jarhajka. Perujtsïni Biblia arhisïndi eska jarhaska ma jásï uandakua engachi no jatsika para úrani ni kúnguarhikuarhu, ni familiarhu. Pablu arhiaspti kristianuechani: “Késtata je chári mintsitecharhu iámindu ikiakua, ka kurhuraxekua, ka uinhachatsperakua ambe ka arhinchperakua” (Efesu 4:31). Enga uandajka “arhinchperakua”, ístu máru Bibliaechaksï jatsikusti “groseria úraani”, “no sési arhijpini” ka “uandakuecha engaksï no sési pʼikuastpijka”. I jásï uandakua, enga jindeeka uandakuecha para kʼuratsetpini, no pʼamojkukua jingoni uandani ka no sési jásï uandatspini, no sési pʼikuastaasïndi máteruechani ka no sáni respetu xarhatatspisïndi. Ka sánderu no sési úkuasïndi sapiichani, jimbokaksï  no xáni no sési jásï ambe útspisïnga ka jimbokaksï apenasi tʼarhexexaka (Kolosasi 3:21).

¹⁴ Biblia méntku no jeiapanhiantaasïndi imechani engaksï uandajka ambe ma nomasi para no sési útspini, ka xarhatasïndi eska no sési nikuauaka. ¿Ambeksï úkuarhinchaa imecha engaksï pʼindejka úraani no sési járhati uandakuechani, no respetu jingoni o para kʼuratsetpini? Orheta méminduksï arhiati eska mójtakurhiaka. Peru enga no ísï úska, petanhantaati kúnguarhikuarhu uératini. Peru sánderu no sési, úpirindi tsïtani irekuani para méntkisï enga Tata Diosïri Reinu juaaka (1 Korintu 5:11-13; 6:9, 10). Sési xarharasïndi jiájkani eska ima enga uékaaka Jeobaeri uékperakuarhu jarhani, méntku no jatsiska para úraani groseriechani, chkuanderakuechani, uandakuechani engaksï no sési pʼikuastpiaka ka iámindu jásï uandakuechani engaksï chkeraaka máteruechani.

15. ¿Na jásï uandakua uinhaperantaasïni máteruechani?

¹⁵ ¿Néna uékasïni Jeoba eskachi úraaka uandakuechani? Ju je miántani eskajtsïni Biblia arhisïnga eskachi úraaka “para uinhaperpintani” (Efesu 4:29). Jeoba sési pʼikuarherasïndi engachi jánguarhintajka para jirinhaani ambarhati uandakuechani engaksï uinhaperantauaka máteruechani. Peru Biblia no jatasti lista ma o regla ma engachi jatsika para chúxapani parachi úni mítini nákiskiksï “uandaku[echa] [engaksï] sési eratsikateuaka” (Titu 2:8). Parachi úni mítini sienga uandakua ma uá uinhaperpentani, solu uétarhisïndi eska i tanimu ambe arhikuekaaka: eska sésiuaka, eska ísïuaka ka eska pʼamojkukua jingoniuaka. Ju je ini tanimu ambe eratsini jarhani engachi jamberi exeni jauaka máru ejempluechani (exe je rekuadruni “ ¿Uinhaperpentasïni na engani ji uandajka?”).

16, 17. a) ¿Andichisï jatsi para sési arhiani máteruechani engaksï ambe ma sési uáka? b) ¿Nénchi uá sési arhini kúnguarhikuarhu o kʼumanchikuarhu?

 ¹⁶ Uinhaperpentani uandakuecha jingoni. Jeoba ka Jesusi mítistiksï eska kánikua jukaparhakueska uinhaperantaani máteruechani ka sési exeni ambe engaksï sési újka (Mateu 3:17; 25:19-23; Juanu 1:47). Ka iámindu jucha kristianuecha jatsiskachi para májkueni úni. Jo ísïsti, “uandakua ma ima tiempu jimbo enga uétarhini jauaka, ¡xáni enga sésiika!” (Proverbios 15:23). Engajtsïni nema sési ambe arhijka mintsitarhu uératini engachi újka ambe ma, sésijtsïni pʼikuastasïndi ka uinhaperantasïndijtsïni. Ka sési jarhasti ísï pʼikuarherani, jimboka interesi páxaka juchantsïni jimbo ka indeni ambe jimbo engachi úni jaka. I ambejtsïni xarhatachisïndi eskachi sési úska engachi jánguarhintaka, úsïndi eskachi sánderu balori jukaaka ka eskachi pauani pauani sánderu tsípikua jingoni uáka ambe ma. Jo ísïsti, iáminduchi tsitisïnga eskachi sési arhinhaaka ambe ma jimbo engachi uáka, jimajkani, ¿nochi jatsipirini juchajtu para máteruechantu sési arhiani imani ambe jimbo engaksï uáka? (Arhinta je Mateu 7:12.)

¹⁷ Engachi pʼindeaka exekuani máteruechani ambe engaksï sési újka, méntkisïchi exentaaka ambe ma parachi sési arhiani. Exe je ejemplu ma, ¿ambechi úpirini exeni kúnguarhikuarhu? Erachini ma enga ambarhati diskursuechani nitamataraajka, tumbini ma enga jánguarhintani jaka para úni sánderu sési marhuani kúnguarhikuarhu o erachini ma enga jatiriikia ka enga no méni kueratajka tánguarhikuecharhu nájtuka pʼamenchakua ambe kánguarhijka. Máru sapirhati uandakuecha para sési arhiani, uáti mintsitarhu niárakuani ka uinhaperantaauati. ¿Ka kʼumanchikuarhia? Temungurhirichajtuksï ístu uétarhinchasïndi uinhaperperantani uandakuechani  jimbo engaksï sési pʼikuastperaaka ka engaksï jindeuaka paraksï diosmeiamukua arhijperani (Proverbios 31:10, 28). Ka sapiichajtuksï uétarhinchasïndi eskaksï kuenta únhaaka ka eskaksï jukaparharanhaaka. Para imecha, sési pʼikuastaani ka arhiani eskaksï sési úxaka, xáni ísï jukaparhakuesti eska itsï ka tsánda para tsïtsïkicha. Ísï jimbo, tátichaksï jatsisti para listu jarhani paraksï sési arhiani engaksï sési jámaaka ka engaksï sési ambe uáka. Ísïksï uáti sánderu jukaparhakua exekuarhini ka sánderuksï konfiansa jatsini, ka i ambe manataauati paraksï uinhapikuarhintani úni ambe engaksï jatsika para úni.

18, 19. ¿Andichisï jatsi para jánguarhintani parachi uinhaperantaani ka sési pʼikuastaani juchari erachichani, ka nénachi uá ísï úni?

¹⁸ Sési pʼikuastpini ka uinhaperpentani. Jeoba kánikua interesi pásïndi imechani jimbo “engaksï no kʼéri exenhajka” ka “engaksï kánikua kómu pʼikuarherani jarhajka” (Isaías 57:15). Bibliarhu i ambejtsïni arhisïndi eskachi uáka: “Uinhaperperantani [ja je] máteru ka máteruni jingoni [...] ka uinhaperaantani imechani engaksï kuatantani jaka” (1 Tesalonika 5:11, 14). Uákachi seguru jarhani eska Jeoba sési pʼikuarherasïnga enga exejka eskachi jánguarhintasïnga para uinhaperantaani ka sési pʼikuastaani imechani engaksï no sési pʼikuarherani jarhajka.

 ¹⁹ ¿Ambechi uá úni imani kristianuni jimbo enga chkerini jarhajka? Orheta, uinhaperantani uandakuecha jimbo. Nájtukachi ini ambe jingoni no uáka sési péntaani imeri uandanhiatechani, nochi jatsiska para uandanhiani. Ambe enga jukaparhakueka, jindesti eskachi imani jingoni jarhaska ka eskachi uandanhiasïnga imani jimbo. Ístuchi uáka kómarhikua ma úni imani jingoni, parachi kurhakuni Jeobani eska jarhuataaka kurhanguni eska jindeska nema enga kánikua xénchakateka máteruecha jimbo, ka ístu Tata Diosïni jimbo (Santiagu 5:14, 15). Jatsiskachi para arhini eska kúnguarhikua uétarhinchasïnga, ka eska jukaparharasïnga (1 Korintu 12:12-26). Máteru ambe engachi uáka úni, jindesti arhikuntani Bibliarhu anapu uandantskuechani enga miátantaaka na enga xáni interesi pájka Jeoba imani jimbo (Salmo 34:18; Mateu 10:29-31). Engachi arhutaska tiempu parachi sési pʼikuastani “ambakiti uandakua ma” jingoni, enga juchari mintsitarhu uéraaka, ima pʼikuarheraati eskachi uékasïnga ka eskachi jukaparharasïnga (arhinta je Proverbios 12:25).

20, 21. ¿Ambe tanimu ambe úsïni eska marhuauaka konseju?

²⁰ Ambakiti konsejuecha. Iáminduchi pekadoriska, jimbochisï ménisï uétarhinchajka eskajtsïni jurhimberantaaka. Jimbosï Biblia uandajti: “Kurhaa jarhuajperatani ka jiókuarhi engaksïni jurhimberantaaka, parakari mímixeti úkuarhiaka sánderu orhepatini” (Proverbios 19:20). Kúnguarhikuarhuchi intsïnhasïnga konsejuechani engajtsïni orhejtsïkuticha íntsaajka. Peruksï no imajkusï újti konseju íntspini. Tátichaksï jatsisti para jarhuataani uájpechani (Efesu 6:4). Ka pirenchicha engaksï sánderu jánhaskajka Tata Diosïri Karakatani, ístuksï uáti jarhuataani pirenchichani engaksï sánderu sapirhatiika (Titu 2:3-5). Peru méntkisï, uékperakua engachi pʼikuarherajka máteruechani jimbo, jatsisti para úni, eska ima enga konseju íntspiaka no ísï pʼikuastauaka máteruechani enajki  xukaani jaki. Iásïchi exeaka tanimu ambe enga uáka úni eska konseju marhuauaka: eska iatsitakuarhu íntspiaka ka para jarhuaatpini, Tata Diosïri Karakatarhu pʼitani ka eska sési íntspiaka.

²¹ Uétarhisïndi jiájkani eska konseju iatsitakuarhu íntspinhaaka ka para jarhuaatpini. ¿Ambejtsïni jarhuataa parachi tsípekua jingoni jiókuarhini konseju ma? Mítini eskajtsïni íntskuxaka konsejuni jimboka uandanhiasïnga juchantsïni jimbo ka no jimboka ikiani jarhasïnga o jimboka no uandanhiasïnga máteruni jimbo. Jimajkani jatsiskachi para i ambe úni engachi máteruni konseju íntskuaka. Máteru ambe parachi konseju íntspini jindesti Tata Diosïri Karakatarhu pʼitani (2 Timoteo 3:16). Iámindu ambe engachi uandaaka jatsisti para Bibliarhu pʼitakata jarhani seachi jima uératini arhintani o nomasi uandani. Orhejtsïkutichaksï jingontku jarhasïndi paraksï no jámani imecheri eratsikua ambe arhijpini. Nójtuksï mójtakuasïndi Bibliarhu anapu textuechani paraksï kuájpiani imecheri eratsikuechani. Ka tanimu úni jámani, para ma úni konseju ma íntspini jatsiskachi para sési íntspeni. Engachi pʼamojperakua jingoni íntspiska, respetariaparini méntkisï máteruechani, méntkisï sánderu fásiliuati eskaksï jiókuarhiaka (Kolosasi 4:6).

22. ¿Nénachi jatsiski para úrani uandakuani?

²² Engajtsïni Jeoba íntskuka sésikua parachi úni uandani, ambakiti regalujtsïni ma íntskusti. Ka jucha uékasïnga sési úrani jimbokachi kánikua uékasïnga juchari Tátini. Nochi méni jatsiska para mirikurhini eskaksï uandakuecha uáka uinhaperpentani o no sési pʼikuastpini. Jimbochisï jatsika para méntkisï ísï úrani eska Jeoba na uékajka: “para uinhaperpintani”. Ísïchi uáka kóntperata máeni para máteruecha, ka ístuchi uáka Tata Diosïri uékperakuarhu jarhani.