¡XÁNI AMBAKITI AMBE ENGACHI EROKUARHINI JAKA! Juchaari Kuerajpirijtsïni aiachisti eskachi uaaka irekani para méntkisï ixú Echerirhu. Peru uánikuechaksï úkua jukanchasïndi ini ambe jakajkuni. Eratsesïndiksï eskachi iáminduecha ióndani o kókuani niáraaka uarhini ka eskachi ísï kueraakata jarhaska. Máteruechaksï eratsesïndi eskachi uaaka para méntkisï irekani, peru solu jiáni engachi uarhiaka ka engachi auandarhu niuaka. ¿Chá ambe uandapirini?

Ante dejtsï mókuntani ini kurhamarhikuani, orheta exe je ambe enga Biblia uandajka ari kurhamarhikuecheeri ambe: ¿náchi xáni ióni jatsipirini para irekani míteparini na engachi kueraanhaka?, ¿andisï kueraa Tata Diosï Echerini ka kʼuiripuni? ka ¿andichisï uarhijki?

Engachi terukukuarhintaska máteru ambe jingoni enga Tata Diosï kueraaka Echerirhu, kuentachi íntskukuarhesïnga eskachi kʼuiripuechajkusï kánikua ménderueniika. ¿Andi? Biblia uandasïndi eska juchajkuchisï ísï kueraakateeka eska Tata Diosï “na jásïika” (Génesis 1:26, 27). ¿Ambe arhikuekasïni i ambe? Eskajtsïni Tata Diosï kueraaska parachi imeeri kualidadichani xarhataani ka májkueni ambe úni eska ima, komu xénchpeni ka jurhimbikua jingoni jámani.

Ístu Tata Diosïjtsïni kueraasti parachi úni eratseni ka míteni ambe sésiiski ka ambe nómbe, ka parachi uékani imani míteni ka imeeri amigueni. Ísï jimbo, úsïngachi exeni na enga xáni kʼéka unibersu ka sési jásï ambe enga naturalesarhu jaka. Ístuchi úsïnga exeni na enga xáni sési jásïika arti ambe, kurhaani kústakua ka poesia ambe. Joperu ambe engachi jimbo kánikua ménderueniika, jindeesti eskachi jucha úsïnga kʼéri ambe arhini juchaari Kuerajpirini. I kualidadiichaksï úsïndi eskaksï kʼuiripuecha kánikua ménderueniuaka máteru kueraakata ambe jingoni enga Echerirhu jaka.

Eratsenta je ini ambe: enga Tata Diosï uékapiringa eskachi kʼuiripuecha no ióni irekapiringa, ¿andijtsïnisï kueraa parachi mámaru ambe úni ka parachi méntkisï jorhenguarhini jarhani sánderu sési úni ambe ma? Jimboka ima uékasïnga eskachi jucha tsípikua jingoni irekaaka para méntkisï ixú Echerirhu.

Máru kʼuiripuechaksï uandasïndi eska Tata Diosï no méni uékaska paraksï kʼuiripuecha irekani para méntkisï Echerirhu. Uandasïndiksï eska planeta jindeeska paraksï kʼuiripuecha ma ratku jarhani ka paraksï xarhatani sinksï uaa irekani para méntkisï auandarhu Tata Diosïni jingoni. Enga i ambe ísïipiringa, ¿no Tata Diosïiri kulpeepirini enga xáni no sési ambe úkuarhini  jaka Echerirhu? I ambe no terukuntapirindi Tata Diosïni jingoni. Jimboka Biblia ari ambe uandasïnga imeeri ambe: “Jimboka iámindu imeeri xanharuecha jurhimbitiskaksï. Tata Diosï ma enga no méni jurajpejka, enga no no sési ambe újka; ka enga jurhimbikueka” (Deuteronomio 32:4).

Biblia uandasïndi andisï Tata Diosï kueraa Echerini: “Auanda Tata Diosï Jeobaeristi, peru echerini acheetiiri uájpeechani íntsaasti” (Salmo 115:16). Ísïisti, Tata Diosï kueraasti juchaari planetani parachi ixú irekani para méntkisï ka ústi iámindu ambe jingoni enga uétarhijka parachi úni irekani ka kánikua tsípikua jingoni (Génesis 2:8, 9).

“Auanda Tata Diosï Jeobaeristi, peru echerini acheetiiri uájpeechani íntsaasti” (Salmo 115:16).

Bibliarhu, Tata Diosï ístu uandasïndi andisï kueraa kʼuiripuni. Ima ini ambe arhispti Andani ka Ebani: “Uinira je echerini ka ánchita je, ka juramukua je [...] iámindu animaliichani engaksï echerirhu jámajka” (Génesis 1:28). ¡Xáni ambakiti ánchikuarhita ma! ¡Kuidarini Echerini ka paraisu ma úntani! Adáni ka Eba úpirindiksï irekani imeecheeri uájpeecha jingoni para méntkisï ixú Echerirhu ka no auandarhu.

Biblia uandasïndi eska ánjeli ma enga Tata Diosï kueraaka enga tátsekua Satanási arhinhapka, no kurhajchaspka Tata Diosïni ka eska jánguarhintaspka paraka no úkuarhipiringa ambe enga ima eratsetini jaka úni. ¿Ambe úspi?

Satanási úspti eska juchaari orheta taatiicha, Adáni ka Eba, nóksï kurhajchapiringa Tata Diosïni. Uandaspti eska ima no jurajkuaxapka paraksï imeecha mismu uandani ambe enga sésiika ka ambe enga no sésiika. Ka imeechaksï Satanási jingoni úkuarhispti ka nóksï kurhajchaspti Tata Diosïni. ¿Ambe úkuarhispi engaksï indeni ambe úpka? Tiempu jingoni, niárasptiksï uarhini ísï eska Tata Diosï na arhiapka. Nóteruksï úpirindia irekani para méntkisï Echerirhu Paraisu ma jimbo (Génesis 2:17; 3:1-6; 5:5).

Desde engaksï Adáni ka Eba pekarika, kʼuiripuechaksï kánikua kómu nitamakuarhixati. Tata Diosïiri Karakata uandasïndi eska pekadu jurhaska parhakpinirhu “ma echakua kʼuiripuni jimbo [Adánini jimbo], ka pekaduni jimbo uarhikua, ka ísï uarhikua pakarani para iámindu kʼuiripuecha” (Roma 5:12). Ísï jimbo, uarhisïngachi jimbokajtsïni Adáni ka Eba kéritaska pekaduni ka uarhikuani ka no jimboka Tata Diosï ísï eratsetini japiringa.

Ambe enga Edénirhu úkuarhipka, no ústi eska Tata Diosï nóteru uékaakia úni ambe enga eratsetini jaka para Echeri ka para kʼuiripuecha. Jimbokajtsïni Tata Diosï kánikua xénchasïnga ka iámindu ambe jurhimbikua jingoni úsïnga, ústi ambe ma parajtsïni pʼímutantani pekadueri ka uarhikueri. Apostoli Pablu i ambe uandaspti indeeri ambe: “Maianhpekua pekadueri jindeesti uarhikua, peru Diosïiri intsïmperakua jindeesti tsípikua para méntkisï juchaari tata Jesukristuni jimbo” (Roma 6:23). Jimbokajtsïni Tata Diosï kánikua xénchasïnga, “ísï jimbosï íntspiti imeeri máechakua Uájpani [tata Jesukristuni] paraka nákinterku nema enga imani jakajkuaka, no tsïncheaka sino jatsini tsípikua para méntkisï” (Juanu 3:16). Enga Jesúsi uékaka uarhini juchantsïni jimbo, maianhpentasti iámindu ambe enga Adáni tsïtapka. *

No ióni jimbo úkuarhiatia ambe engajtsïni Tata Diosï aiachika: eska Echeri paraisu máeuaka. Parakajtsï chá uaaka jima jarhani, jatsiskajtsï para úni ini ambe enga Jesúsi uandapka: “Incha je imani puerta jimbo enga no kómukurhaka, jimboka kómukurhaska puerta ka kórhurani xanharu enga tsïnchekuarhu pájpejka, ka uánikuestiksï engaksï inchajka imani jimbo, jimboka no kómukurhaska puerta ka no kórhurani xanharu enga tsípikuarhu pájpejka, ka nóksï uánikuesti imeecha engaksï exentajka” (Mateu 7:13, 14). Ísïisti, chájtsï uaaka erakuni na engajtsï uéjka irekani sánderu orhepani. ¿Ambejtsï erakua?