¿MERUJTSÏ UAA ERAKUNI NÉNA IREKANI SÁNDERU ORHEPATINI? Máru kʼuiripuechaksï jakajkusïndi eska karakata jarhaskia ambe engachi úkuarhinchaaka ka máteruechaksï uandasïndi eska Tata Diosï uaxastakata jatsiskia ambe engachi úkuarhinchaaka. Ísï jimbo, engaksï no újka úni ambe engaksï eratsekata jatsijkia, uandasïndiksï eska ísï “karakata jarhaspkia”.

Máru kʼuiripuechaksï no sési pʼikuarherasïndi exeni eska no nema jurhimbikua jingoni jámasïnga ka eskaksï kʼuiripuecha no sési kánhasïnga. Jamberiksï jánguarhintajti sési irekani, peruksï no úsïndi ísï úni guerrecha jimbo, atajperakua jimbo, pʼamenchakuecha jimbo ka desastre naturalicha jimbo. Ka niárasïndiksï eratseni eska para no ma ambe marhuasïnga ísku xáni jánguarhintani.

Ísïisti, ambe enga pauani pauani úkuarhijka úpirindi úni eskachi no uaaka úni imani ambe engachi eratsetini jaka (Eclesiastés 9:11). Peruchi iáminduecha uaaka erakuni irekani para méntkisï sánderu orhepatini. Biblia ístu jorhentpisïndi eskachi jucha uaaka erakukuarhini na engachi uéjka irekani sánderu orhepatini. ¿Andichisï ísï uandajki?

Ante deksï israeliteecha imani Echerini jimbo inchani engaksï Aiaminhapka, Tata Diosï arhispti Moisésini eska ini ambe arhipiringa iretani: “Jimbokaksïni jurajkuxaka parajtsï erakuni tsípikuani o uarhikuani, paraksïni sési nicheni o no sési. Ka parajtsï irekani jarhani chá ka chaari uájpeecha, jatsiskajtsï para tsípikuani erakuni, xénchaparini Jeobani chaari Tata Diosïni, kurhajchaparini imeeri uandakuani ka no méni jurajkuparini imani” (Deuteronomio 30:15, 19, 20).

“Jimbokaksïni jurajkuxaka parajtsï erakuni tsípikuani o uarhikuani, eskaksïni sési nicheaka o no sési. Ka [...] jatsiskajtsï para tsípikuani erakuni” (Deuteronomio 30:19).

Ísïisti, Tata Diosï petaantaspti israeliteechani Ejiptu uératini, jima engaksï jántspiriipka ka sésikua íntskuaspti parakaksï libriipiringa ka paraksï úpiringa tsípikua jingoni irekani imani Echerini jimbo engaksï Aiaminhapka. Joperuksï jatsipirindi para úni ambe ma engaksï uékapiringa pʼiuani indeni kóntperateechani: jatsisptiksï para tsípikuani erakuni. ¿Nénaksï úpirini indeni ambe? Jatsisptiksï para xénchani Tata Diosïni, kurhajchani imeeri uandakuani ka no méni jurajkuni.

Chájtujtsï jatsiska para sáno májkueni ambe erakuni úni, ka sánderu orhepatini ísïjtsï irekaaka seguni ambe engajtsï erakuaka úni. Engajtsï erakuska xénchani Tata Diosïni, kurhajchani imeeri uandakuani ka no méni jurajkuni, erakuntsï jauaka irekani para méntkisï paraisurhu ma ixú Echerirhu. Peru, ¿ambe arhikuekasïni inde tanimu ambe?

Tata Diosï úspti eska apostoli Juanu karapiringa eska Tata Diosï “jindeeska uékperakua”, jimboka i jindeeska kualidadi enga ima sánderu xarhatajka (1 Juanu 4:8). Ísï jimbo, jimboka Jesúsi mítespka ini ambe, jiáni engaksï kurhamarhipka náki jindeeski mandamientu enga sánderu jukaparhakueka, ima uandaspti: “Uékaakari chiiti Tata Diosïni méntku iámindu chiiti mintsita jingoni, ka iámindu alma jingoni, ka iámindu chiiti eratsekua jingoni” (Mateu 22:37). Xénchani Tata Diosïni úsïndi eskachi uékaaka sési pájperani imani jingoni ka no jimbokachi chérhisïnga o jimbokachi ísku jatini uékasïnga kurhajchani. Peru, ¿andichisï jatsi para xénchani Tata Diosïni?

Tata Diosï Jeoba ísï xénchaasïndi kʼuiripuechani ísï eska taati ma na xénchaajka imeeri uájpeechani. Nájkirukaksï taatiicha no perfektueka, jánguarhintasïndiksï para jorhendaani imeecheeri sapiichani, uinhaperantaani, apoiariuani ka jurhimberantaani uékperakua jingoni, jimbokaksï uékasïnga eskaksï tsípikua jingoni irekaaka ka eska sési nikuauaka. Ka, ¿ambeksï erokuarhisïni taatiicha eskaksï uaaka imeecheeri sapiicha? Eskaksï xénchauaka, kurhajchaani ka eskaksï kurhanguaka eska ambe engaksï taati jémbeecha arhiajka jindeeska para sési nikuani. Ka sáno májkueni, juchaari Taati enga perfektueka, erokuarhisïndi eskachi xénchaaka ka eskachi agradeserikuaka iámindu ambe enga ima úkia juchantsïni jimbo.

Imani idioma jimbo enga Biblia orheta karanhaka, uandakua kurhajchani uánikua xanhari arhikuekasïndi “ísï úni”. Ka, ¿a no eska indeni ambesï erokuarhijka taati ma enga arhijka imeeri uájpani eska “Kurhajchaaka”? Ísï jimbo, kurhajchani Tata Diosïiri uandakuani, arhikuekasïndi míteni ambe enga ima erokuarhijka juchaari ambe ka ísï úni. Ka jimboka iásï Tata Diosï no meru uandontskuarhejka kʼuiripuecha jingoni, parachi úni kurhajchani, jatsiskachi para imeeri Karakatani arhintani, Bibliani ka úni ambe engachi jima jorhenguarhiaka (1 Juanu 5:3).

Ka para xarhatani na enga xáni jukaparhakueka kurhajchani Tata Diosïni, Jesúsi ma xanhari i ambe uandaspti: “No solu kurhinda jimbo uaati irekani ma kʼuiripu, sino iámindu uandakua jimbo enga Diosï uandaka” (Mateu 4:4). Ísïisti, tʼireni kánikua jukaparhakuesti, peru sánderu jukaparhakuesti míteni Tata Diosïiri ambe. ¿Andi? Rei Salomóni enga jánhastiipka i ambe uandaspti indeeri ambe: “Jánhaskakua kuájchakukua máesti, májkueni eska tumina na kuájchakukua máeka. Peru ini ambe jimbo sánderu jukaparhakuesti jánhaskakua: úsïndi eska uaaka tsípiti jarhani ima enga jánhaskakua jatsiaka” (Eclesiastés 7:12). Jánhaskakua ka míteni Tata Diosïiri ambe kuájchakusïndijtsïni iásï ka jarhuataatijtsïni parachi imani xanharu jimbo nirani enga pájpejka tsípikuarhu para méntkisï.

Ju je miántani ambe enga Jesúsi uandapka ka engachi máteru jorhenguarhikua jimbo exeka, ima uandaspti: No kómukurhasti “puerta ka no kórhurani xanharu enga tsípikuarhu pájpejka, ka nóksï uánikuesti imeecha engaksï exentajka” (Mateu 7:13, 14). Para indeni xanharu jimbo jámani kánikuajtsïni jarhuatapirindi nemani jingoni jámani enga sési miiuka indeni xanharuni ka engajtsïni jarhuataaka niárani jima engachi uékani jaka: tsípikuarhu para méntkisï. Ísï jimbo, jatsiskachi para no méni jurajkuni Tata Diosïni (Salmo 16:8). Peru, ¿nénachi uaa ísï úni?

Pauani pauanichi uánikua ambe jatsisïnga para úni ka uánikua máteru ambe engachi tsitipiringa úni. Xánchi úkua ambe jatsisïnga ochi máteru ambe eratseni jarhani engachi nóteru xáni tiempu jatsijkia parachi imani ambe eratsentani enga Tata Diosï uéjka eskachi uaaka. Ísï jimbojtsïnisï Biblia i ambe miátantajti: “Kuidadu jingoni jáma je, ka no komueska imeecha engaksï no sáni eratsekua jukaka, sino komueska imeecha engaksï sési eratsejka, ka nójtsï xáni ísku tiempu tsïtani jámani, jimbokaksï i jurhiatikuecha xáni malueska” (Efesu 5:15, 16). Jiájkani, no méni jurajkuni Tata Diosïni, arhikuekasïndi orheta peerani juchaari pájperakua Tata Diosïni jingoni eska ambe uéjki máteru ambe (Mateu 6:33).

Nájkirukajtsï no uaaka mójtakuni ambe engajtsï ióntki úpka, uaakajtsï kʼóru úni eska chá ka chaari familia sési irekaaka sánderu orhepatini. Biblia jorhentpisïndi eska juchaari Taati auandarhu anapu, Tata Diosï Jeoba, kánikuajtsïni xénchasïnga ka arhisïndijtsïni ambe engachi jatsika para úni. Exe je ambe enga uandapka profeta Mikeasi:

“Imakeni arhisti, oh, achamasï, ambe enga sési jaka. ¿Ka ambekinisï kurhacheni jaki Tata Diosï Jeoba? ¡Solu eskari jurhimbitku jámaaka, eskari xénchpeaka ka no jurajpini ka eskari kaxumbikua jingoni jámaaka chiiti Tata Diosïni jingoni” (Miqueas 6:8).

¿Ka chaia? ¿Jámaajtsï Tata Diosïni jingoni? Engajtsï jiókuarhiska imeeri pʼímarperakuani, jatsiauakajtsï imani kóntperateechani enga ima íntsauaka imeeri amiguechani ka engaksï jindeuaka para méntkisï. Chaari jájki jimbo jarhasti ambe engajtsï uéjka úni.