Ambakiti aianhperakua Tata Diosïiri Reinueri aianhpinhaxati iápuru Parhakpinirhu, ísï eska Jesúsi na uandapka (Mateu 24:14). Biblieri libru Daniel, uandasïndi eska Tata Diosïiri Reinu auandarhu anapueska. Kapitulu 2 i librueri uandasïndi eskaksï uánikua juramukuecha japiringa enga Babilonia jingoni ueenapiringa asta juchaari jurhiatikuechani jamberi ka bersikulu 44 jimbo uandasïndi ambe enga úkuarhiaka sánderu orhepatini, jimini uandasïndi:

“Tata Diosï auandarhu anapu, gobiernu ma uaxastaati enga no méni kʼamajkunhaaka ka no jindeuati para máteru ireta. I gobiernu purundurhiauati ka kʼamajkuauati iámindu ini gobiernuechani, ka íjkusï jauati para méntkisï”.

I profesia ka ístu máteruecha engaksï Bibliarhu jaka, aiatspesïndiksï eska Tata Diosïiri Reinu kénditauaka iámindu kʼuiripuecheri juramukuechani ka eska uaaka eska pínandikua jauaka ka eska sési irekanhaaka Echerirhu. ¿Nénaksï irekaaka kʼuiripuecha enga Tata Diosïiri Reinu juramuni jauakia? Ju je exeni máru ambakiti ambe engachi aiaminhaka ka engaksï no ióni jimbo ísï úkuarhiakia.

• NÓTERUKSÏ JAUATIA GUERRECHA

  Salmo 46:9. Tata Diosï “úsïndi eskaksï guerrecha kʼamakurhiaka iámu parhakpinirhu. Kuarhakusïndi arkuni ka kuarhakuni lansani; chpirirhu kurhiraasïndi karretechani”.

  ¿Eranhaskasïntsï na engachi irekapiringa engaksï kʼuiripuecha sési úrapiringa sentabuni ka ambe engaksï xáni míteka paraksï kʼuiripuechani jarhuatani ka no paraksï armechani uaani? Enga Tata Diosïiri Reinu juramuni jauakia, kumplirikuarhiatiksï profesiecha engaksï uandajka eskaksï guerrecha nóteru jauakia.

• NÓTERUKSÏ JAUATIA PʼAMENCHAKUECHA

  Isaías 33:24. “No nema enga jima irekaaka uandaati: ʻPʼamenchaxakaʼ”.

  Eranhaska je eska parhakpinirhu nóteru nema pʼamenchaakia mintsitarhu, kánseri, diabetisi ni máteru ambe. Engachi ísï irekani japiringa, nóksï uétarhipirindi ospitaliicha ni medisina ambe. Ísïksïsï irekaati iámindu kʼuiripuecha ixú Echerirhu, no ma pʼamenchakua jingoni.

• NÓTERU JAUATI KʼARHINGUA AMBE

  Salmo 72:16. “Kánikua tʼirekua jauati echerirhu; juáteecharhu karhakua kánikua tʼirekua jauati”.

  Echeri kánikua tʼirekua íntspiati para iáminduecha ka iáminduechaksï uaati jatsini tʼirekua. Kʼarhingua ka pʼamenchakuecha engaksï kʼarhingua jimbo jaka nóteruksï jauatia.

• NÓTERU NEMA NO SÉSI PʼIKUARHERAATI NI KÓMU NITAMAKUARHINI NI UARHINI

  Jaŋaskuecha (Apocalipsis) 21:4. Tata “Diosï kutsunharhikuauati iámindu uekua ka nóteru jauati uarhikua ka ni uandanhiata ka nóteru nema ueraati o pʼamenchani, jimboka nitamaakia iámindu ueenani anapu ambe”.

   Kʼuiripuechaksï perfektueuati ka irekaatiksï para méntkisï Echerirhu enga paraisu máeuakia. I ambejtsïnisï aiachijti juchaari Kuerajpiri, Tata Diosï Jeoba engajtsïni kánikua xénchajka.

¿Exesïntsï eska ambe engachi aiaminhani jaka no méni niáraaka ísï úkuarhini? Nájkirukaksï sáno iámindu kʼuiripuecha tsitijka ísï irekani eska Biblia na uandajka, uánikuechaksï úkua jukanchasïndi jakajkuni eskachi uaaka irekani para méntkisï. Ka na engaksï eratsejka nójtsïni ísku pakatasïndi jimboka no ma kʼuiripu jarhaska enga irekakia para méntkisï.

Ióniistia engaksï kʼuiripuecha pekadu ka uarhikuani jingoni irekani jaka, jimboksïsï uánikuecha eratsejti eska pʼamenchani ka kómu nitamakuarhini, normaliiska. Joperu Tata Diosï no indeni ambesï eratsekata jatsipti para kʼuiripuecha.

Parachi sánderu mintsikani ambe engajtsïni aiachijka Tata Diosï, ima i ambe uandaspti imeeri uandakueri ambe: “No kʼuanhatseati jíndeni jingoni enga no ísï úkuarhiaka, sino uaati ambe engani jí tsípikua jingoni uéjka ka meru kumpliriuati imani ambe engani jimbo uandakia” (Isaías 55:11).

Biblia uandasïndi eska Tata Diosï no úsïnga chkuanderani (Titu 1:2). Ka jimboka imajtsïnisï aiachijka ini ambakiti ambe, kánikuajtsïni jarhuataati eratseantani ini kurhamarhikuechani: “¿Meruchi uaa irekani para méntkisï paraisurhu ma jimbo ixú Echerirhu? ¿Ambechi jatsiski para úni parachi úni jatsini iámindu ambe engajtsïni Tata Diosï aiachijka?”. Máteru jorhenguarhikuechaksïni jarhuataati ini ambe míteni.