LUCÍA NO ÚSÏNDI SÉSI XANHARANI. Enga sapichuepka kérikuarhispti poliomielitis, pʼamenchakua ma enga sóntku kérikuarhinhajka ka enga nerbiuecharhu niárajka. Enga 16 uéxurhini jatiripka, jima anapu uarhiiti enga ima ánchikuarhienga, arhispti: “Tata Diosïkeni kastigaristi parari no úni sési xanharani jimbokari no kurhajchaska ka ni janhanharhini chiiti naandini”. Nájkiruka ióni nitamakia, Lucía útasï miásïndi na engaksï xáni no sési pʼikuastapka inde uandakuecha.

ENGA DÁMARIS MÍTEPKA ESKA TUMORI MA JUKASPKA SEREBRURHU, imeeri taati jémba arhispti: “Kánikuari no sési ambe úka parari ísï úkuarhinchani jimbokenisï Tata Diosï kastigarini jati”. Dámaris kánikua kómu pʼikuarheraspti.

Desde iónisïa, eratsenhasti eskaksï pʼamenchakuecha Tata Diosïri kastigu máeska. Libru Usos y costumbres de las tierras bíblicas uandasïndi eska Jesúsiri jurhiatikuecha jimbo, jakajkunhasïreenga eskaksï “pʼamenchakuecha jindeespka jimboka ima enga pʼamenchani jarheenga, no sési ambe úspka o imeeri parienti ma ka eskaksï pʼamenchakuecha kastigu máeska imeeri pekadu jimbo”. Ka libru Medieval Medicine and the Plague (libru ma enga ióntki anapu medisineri ambe uandajka ka pʼamenchakuecheri) uandasïndi eska ióntki, “máru kʼuiripuechaksï uandasïreenga eska Tata Diosï pʼamenchakuechani úraasïreenga para kastigariuani kʼuiripuechani imeecheri pekaduecha jimbo”. Peru, ¿Tata Diosïri kastigu máepi enga Europa xáni kʼéri pʼamenchakua ma japka siglu 14 jimbo? ¿O eskaksï na uandapka máru inbestigadoricha eska inde pʼamenchakua bakteria ma jimboespka? Jamberijtsï chá kurhamarhikuarhijka sini Tata Diosï úraajki pʼamenchakuechani para kastigariuani kʼuiripuechani imeecheri pekaduecha jimbo. *

ERATSENTA JE INI AMBE: Engaksï pʼamenchakuecha ka kómu nitamakua ambe Tata Diosïri kastiguepiringa, ¿andisï Jesúsi tsinaapi pʼamenchatichani? ¿No ísïipirini inde ambe komu uandani jarhani eska Tata Diosï no jurhimbitku úsïnga ambe ma? (Mateu 4:23, 24). Jesúsi méntkisï kurhajchaspti imeeri taati jémbani, ima uandaspti: “Siemprini imani ambesïni újka enga ima jaiapanhentajka” ka ísï úsïnga “eskarini Taati na juramuchika” (Juanu 8:29; 14:31).

Biblia uandasïndi eska Tata Diosï Jeoba no méni ‘no sési ambe úsïnga’ (Deuteronomio 32:4). Pori ejemplu, Tata Diosï no méni úpirindi eskaksï uánikua kʼuiripuecha uarhipiringa abioni ma jimbo para kastigarini máechakua kʼuiripuni. Abraáni, ambakiti Tata Diosïri marhuari ma mítespti eska ima enga Sánderu Kʼéri ambeeka no méni ísï úpiringa. Jimbosï uandapti eska no méni “uándikupiringa ambakiti kʼuiripuni ma, no sési úri jingoni” (Génesis 18:25). Ístu, Biblia uandasïndi eska Tata Diosï no “no sési jásï ambe niátasïnga” ka eska no méni “no jurhimbikua jingoni uaaka ambe ma” (Job 34:10-12).

Engachi kómu nitamakuarhini jaka no jindeesti jimbokajtsïni Tata Diosï kastigarini jaka pekadu ma jimbo engachi úka. Jesúsi sési xarhataspti ini ambe jiáni enga ima ka imeeri chúxapaticha kuperapka achamasï ma jingoni enga no ueenga exeni. Imeeri chúxapatichaksï kurhamarhispti: “Jorhentpiti, ¿né pekadu úski para eska inde ísï siegu kánguarhinhapiringa, inde o indeeri taati jémbeecha?”. Ka Jesúsi arhiaspti: “No ísï jimboesti jimboka í pekadu úska nijtu indeeri taati jémbeecha” (Juanu 9:1-3).

Jimboka imani tiempuni jimbo ménderueni eratsenhasïreenga, Jesúsiri chúxapatichaksï ísku pakarapti enga ima arhiapka, eska ni ima achamasï ni imeeri taati jémbeechaksï pekadu úpi paraka ima ísï kastigarinhapiringa. Jesúsi no solu úspti eska i achamasï úpiringa exeni, ístu xarhataspti eska ambe engaksï kʼuiripuecha  jakajkuenga no ísïispka (Juanu 9:6, 7). Míteni eska no Tata Diosïsï újka eskachi kómu nitamakuarhiaka, sési pʼikuastaasïndi imeechani engaksï kʼéri pʼamenchakua ma kánguarhijka.

Bibliajtsïni aiachisïndi:

• “Jimboka [Tata] Diosï no úsïnga para terungutanhani para no sési úni ka nijtu ima újki terungutpini” (SANTIAGU 1:13). Ka no solu inde ambe, no ióni jimbo, Tata Diosï kʼamajkuati no sési ambe enga desde iónisï jakaia parhakpinirhu, komu pʼamenchakuechani, kómu nitamakuani ka uarhikuani.

• Tata Jesukristu “ambakeraantaspti iámindu pʼamenchatichani” engaksï kómu nitamakuarhini japka (MATEU 8:16). Enga Jesúsi ísï tsinaapka pʼamenchatichani, xarhataxapti ambe enga uaaka Tata Diosïri Juramukua iámu parhakpinirhu.

• Tata “Diosï kutsunharhikuauati iámindu uekua, ka nóteru jauati uarhikua, ka ni uandanhiata, ka nóteru nema ueraati o pʼamenchani jimboka nitamaakia iámindu ueenani anapu ambe” (JAŊASKUECHA [APOCALIPSIS] 21:3-5).

Jimajkani, ¿andisï xáni kómu nitamakuarhinhani jaki parhakpinirhu? Enga no Tata Diosï újka eskachi kómu nitamakuarhiaka, ¿né kulpa jatsiski? Kʼuiripuechaksï desde iónisï kurhamarhikuarhisti ini ambe. Máteru jorhenguarhikua jimbo exeantauakajtsï mókuntskuechani.