Eratsi je na engaksï xáni sési pájperajka jemeluecha engaksï májkueni járhatiijka. Direktora ma enga jima ánchikuarhijka engaksï jemeluecheri ambe estudiarijka, Nancy Segal ka enga ístu kánguarhijka jemelani ma, uandasïndi eskaksï máru jemeluecha sési kurhangutsperasïnga. Uarhiiti ma i ambe uandaspti na engaksï pájperajka imeeri jemela jingoni: “Kánikuachi sési mítperaska”.

¿Andiksïsï jemeluecha újki xáni sési pájperani? Ísïisti eska paraka i ambe úkuarhiaka, jindeeska jimbokaksï májku kʼéri kʼuiripesïnga ka ístu na engaksï kʼuiriperanhajka. Peru estudiuechaksï xarhatasïndi eska ístu jindeesïnga jimbokaksï imeecheri jenicha sáno májkueni jarhasïnga.

ERATSENTA JE INI AMBE: Tata Diosïjtsïni kueraasti, ísï jimbo, no nema jarhasti engajtsïni sánderu sési kurhanguchiaka eska ima. Jimbosï Dabidi karapti: “Tʼureni kuájchakuska juchiiti naandiri matrisirhu”. Ka ístu uandaspti: “Tʼuri exeaspka juchiiti únichani engani úkuarhini japka engareni no nema ueenga exeni [...]. Chiiti éskuechajtsïni exespti desde engani kánikua sapichuepka matrisirhu ka iámindu partichaksï karakata jarhaspti chiiti librurhu” (Salmo 139:13, 15, 16). Tata Diosï sési mítesti ka kurhangusïndi na engachi úkata jaka, peru ístu sési mítesti ambe engachi jimbo nitamakuarhika parachi ísïini eskachi na jindeekia iásï. Jimbochisï uaaka seguru jarhani eskajtsïni ima sési kurhanguchesïnga.

Rei Dabidi kómarhispti: “Tata Diosï Jeoba, tʼureni sési jimbo exeska na engani jásï kʼuiripu máeka ka míteskarini. Tʼuri míteska na engani jatini uaxakajka ka na engani jatini jauarajka. Tʼuri iauani jatini mítesïnga ambe engani eratsejka”. Ístu uandaspti: “Útasï nótki ma uandakua uérani jarhasïndi juchiiti katambarhu joperu t’u, oh Tata Diosï Jeoba sésiri mítetini jarhasïngia ambe” (Salmo 139:1, 2, 4). Ístu, Tata Diosï Jeoba sési mítesti ambe engachi pʼikuarhenhijka, asta imani ambe engachi jucha eratseni jarhajka úni (1 Crónicas 28:9; 1 Samuel 16:6, 7). ¿Ambejtsïni jorhendasïni i ambe Tata Diosïri?

Jorhendasïndijtsïni eska engachi no úni jauaka aianguni ambe engachi eratsejka ka na engachi pʼikuarherajka, juchaari Kueraajpiri mítesïndia. Ima exesïndi ambe engachi újka ka ístu kurhangusïndi andichisï ísï újki. Joperu ístu Tata Diosï úsïndi míteni ambe engachi úpiringa engachi jucha no ísï nitamakuarhini japiringa. Ka jimbokajtsïni Tata Diosïsï ísï kueraaska parachi úni xénchpeni, uaakachi seguru jarhani eska ima uékasïnga míteni ka kurhanguni ambe engachi eratseni jarhajka úni ka andichisï uéjki ísï úni (1 Juanu 4:7-10).

 Bibliajtsïni aiachisïndi:

• “Tata [Diosï Jeoba] méntku exeani jarhasïn[di] imeechani engaksï jurhimbitku jámajka, ka kurhajchaasïndi ambe engaksï kómarhijka” (1 PEDRU 3:12).

• Tata Diosï aiatspesïndi: “Uaaka eskari jánhastiuaka ka jorhendaakakini náki xanharu jimbori jatsiski para nirani. Arhistachiakakini tʼungini exeparini” (SALMO 32:8).

¿Uaajtsïni jarhuatani orhepani uérakuani uandanhiatechani míteni eskajtsïni Tata Diosï kurhanguchesïnga? Eratsenta je ambe enga nitamanchapka Anna enga Nigeria anapueka. Uandasïndi: “Xáni no sési pʼikuarheraxapka engani eratseenga eska para no ma ambe marhuasïreenga tsípiti jarhani. Engajtsïni aiangupka eskani kánseri de mama pʼamenchaxapka, juchiiti acheeti uarhisptia ka juchiiti nanaka ospitalirhu jarhaspti, pʼamenchaxapti hidrocefalia (enga kánikua itsï úkuarhijka serebrurhu). Kánikua úkua jukaspti para ji ospitalirhu jarhani juchiiti nanaka jingoni ka jatsini parani operarinhani, kimioterapia ka radioterapia úminhani”.

¿Ambe jarhuataspi Annani para úni orhepani uérani? Ima uandasïndi: “Kánikua tsitisïreenga eratseantani Biblieri karakatechani komu Filipusʌ 4:6, 7, nani enga uandajka eska Tata ‘Diosïri pínandikua enga no nema újka jánhaskani, kuájpiauaka chaari mintsitechani ka chaari eratsekuechani’. Méntkisï engani eratseantauenga ini uandakuechani, sánderuni no iauani pʼikuarherasïreenga Tata Diosï Jeoba jingoni. Mítespka eskarini ima sánderu sési kurhanguchisïreenga eska jíjkumindu. Ístujtsïni kánikua uinhaperantaspti juchiiti erachicha.

Nájkirukani útasï pʼamenchani jaka, iásïchi sánderu sési jarhaskia. Niáraskachi kurhanguni eskachi jatsijka para no xáni uandanhiani engachi problemechani jatsiauaka, jimboka Tata Diosï Jeoba méntkisï juchantsïni jingoni jauaka. Santiagu 5:11 arhisïndi: ‘Jimboka jucha uandasïnga eskaksï sési uérasïnga imeecha engaksï tekaantajka ka kurhandiskajtsï na enga xáni tekaantapka Jobu, ka ístu exesïngajtsï eska tátsekua jimbo [Tata] Diosï kánikua kóntpintasïnga ka pʼamojpini’”. Tata Diosï sési kurhangusïreendi ambe enga nitamakuarhini japka Jobu ka ístuchi uaaka seguru jarhani eska kurhangusïnga ambe engachi nitamakuarhini jaka jucha.