“Tata Diosï Jeoba, ¿asta na jatini jamberi uinhachaa jarhuajperata kurhajkuarhini parari tʼu kurhaani? ¿Asta na jatini jamberi kurhajkuarhia parareni pʼímutantani uarhiperakuarhu parakari uaaka ambe ma?” (Habacuc 1:2, 3). Ísï uandaspti Abakuki ambakiti achamasï ma enga Tata Diosï jaiapanhenteenga. ¿Uandaspi i ambe jimboka no mintsikasïreenga Tata Diosïni? Nómbe. Tata Diosï arhispti eska ima uaxastakata jatsispkia jurhiatikua ma para kʼamajkuni kómu nitamakuani (Habacuc 2:2, 3).

Engachi kómu nitamakuarhini jarhajka o enga no sési nitamakuarhini jarhajka nema engachi xénchajka, úpiringachi eratseni eska Tata Diosï jatsipiringia para úni ambe ma. Peru Bibliajtsïni aiachisïndi ari ambe: “Juchaari Tata [Diosï Jeoba] no ióndaati kumplirini eska na aiakuarhika, ka no eskaksï na uandajka máru kʼuiripuecha eska ima ióndaxaka, sino ima tekaantskua jukasti para juchantsïni jingoni, jimboka no uékasïnga eska nema tsïncheaka sino eska iáminduecha andajkuarhiaka móantani” (2 Pedru 3:9).

No ióni jimbo Tata Diosï uaati ambe ma. Jesúsi uandaspti eska úkuarhipiringa máru ambe engaksï xarhatapiringa eska kʼamakurhixamkia i tiempu ka eska iásï anapu kʼuiripuecha úpiringa exeni (Mateu 24:3-42). Ini jurhiatikuecha jimbo, úkuarhixatia i profesia ka i ambe xarhatasïndi eska no ióni jimbo Tata Diosï uaaka ambe ma. *

Peru, ¿uaa Tata Diosï kʼamajkuni kómu nitamakuani? Enga Jesúsi Echerirhu jámani japka, xarhataspti eska Tata Diosï uaaka kʼamajkuni kómu nitamakuani. Ju je exeani máru ejempluechani.

Desastresi naturalicha. Ma xanhari Jesúsi ka imeeri apostolichaksï mari de Galileaisïksï niraxapti ka ueenaspti uinhamu tarhiani ka janini ka barku sáno inchamespti marirhu. Jesúsi xarhataspti eska ima ka imeeri Taati jémba, úsïnga anhaxustaani desastresi naturalichani (Kolosasi 1:15, 16). Jesúsi uandaspti: “‘Ísku ja pínasku’. Ka tarhiata anhaxurhispti ka ístu japonda méntku pímbinhajtsïkurhantaspti” (Markusʌ 4:35-39).

Pʼamenchakuecha. Uánikua kʼuiripuechaksï mítespti eska Jesúsi úsïreenga tsinaani imeechani engaksï no ueenga exeni, xanharani, engaksï ataki pʼireenga, leprosuechani ka máteru pʼamenchatichani. Biblia uandasïndi eska Jesúsi ambakeraantaspka “iámindu pʼamenchatichani” (Mateu 4:23, 24; 8:16; 11:2-5).

Kʼarhingua. Enga Jesúsi Echerirhu jámani japka aianhpini, tsimani xanhari úraspti imeeri uinhapikua enga imeeri Taati jémba íntskuka para kánikua úntani tʼirekua enga sántkuepka ka para uánikuechani tʼireraani (Mateu 14:14-21; 15:32-38).

Uarhikua. Enga Jesúsi Echerirhu jámani japka, tanimu kʼuiripuechani tsítaantaspti, ma tʼámu jurhiatikua páxaptia uarhirini. I ambe sési xarhatasïndi eska Tata Diosï Jeoba úsïnga tsítaantani uarhirichani (Markusʌ 5:35-42; Lukasʌ 7:11-16; Juanu 11:3-44).