Iáminduechachi úsïnga kurhanguni na enga pʼikuarherajka kʼuiripu ma. Ka ísïchi úsïnga engachi eranhaskajka eskachi jucheeska engachi no sési nitamakuarhini jaka ka engachi pʼikuarherajka ambe enga ima kʼuiripu pʼikuarherani jarhajka. Doktori Rick Hanson enga sési mítekuka eratsekueri ambe, uandasïndi eskachi jucha ísï andajpenusïngia parachi úni kurhangutspini.

ERATSENTA JE INI AMBE: ¿Andichisï jucha újki kurhangutspini ka animalicha nómbe? Bibliajtsïni arhisïndi eskajtsïni Tata Diosï ísï kueraaska eska ima na jásïika (Génesis 1:26). I ambe arhikuekasïndi eskachi uaaka sáno májkueni jásïini eska ima ka xarhataani imeeri ambakiti kualidadichani. Ísï jimbo, enga nema kurhangukujka máteru kʼuiripuni, májkueni úni jarhasïndi eska juchaari Kueraajpiri, Tata Diosï Jeoba enga pʼamojpitiika (Proverbios 14:31).

Tata Diosïjtsïni kurhanguchisïndi ka no sési pʼikuarherasïndi engachi jucha no sési nitamakuarhini jarhajka. Enga Biblia uandajka na engaksï israelitecha xáni no sési kánhapka Ejiptu ka engaksï 40 uéxurhini jámapka desierturhu, ístu uandasïndi: “Iámu imani tiempu jimbo engaksï xáni uandanhiani japka, imajtu kánikua uandanhiaspti” (Isaías 63:9). Tata Diosï no solu mítespti na enga nitamakuarhini japka imeeri ireta, ístu mítespti na engaksï pʼikuarherani japka. Ka uandaspti: “Sési míteska na engaksï xáni no sési nitamakuarhini jaka” (Éxodo 3:7). “Imeecha engaksïni chánksïni pʼárhijka —uandasïndi Tata Diosï— jíndeni pʼonharhikusïndi” (Zacarías 2:8). Ísï jimbo, engajtsïni nema no sési kámajka, ísïipirindi komu Tata Diosïni no sési kámani jarhani.

Nájkirukachi no sési pʼikuarherani jauaka o eratseni eskachi no jukanchaska eskajtsïni Tata Diosï pʼamojkuaka, Biblia arhisïndi eska ima “sánderu kʼériska eska juchaari mintsita” ka eska ‘míteska iámindu ambe’ (1 Juanu 3:19, 20). Tata Diosïjtsïni sánderu sési, mítesti eska jucha mismu na mítekuarhika. Sési mítesïndi ambe engachi jimbo xáni nitamakuarhini jarhajka, ambe engachi eratsejka ka ambe engachi pʼikuarherajka ka kurhanguchisïndijtsïni.

 Bibliajtsïni aiachisïndi:

• “Jimajkani uandajpaakari, ka Tata Diosï Jeobakini mókuchintaati; uinhachaakari jarhuajperata kurhajkuarhini ka ima uandaati: ‘¡Ixú jarhaska!’” (ISAÍAS 58:9).

• “Jimbokani ji sési míteska ambe engani eratseni jaka para chá, ísï uandasïndi Tata Diosï Jeoba. Eratsexaka parajtsï pínandikua jatsini, ka no kómu nitamakua ambe. Parajtsï sánderu orhepani sési irekani ka parajtsï erokuarhikua ma jatsini. Chájtsïni uandajpaaka, kómarhikua jimbojtsïni andarhieraaka, ka jíksïni kurhajchaaka” (JEREMÍAS 29:11, 12).

• “Jatsira juchiiti uekua chiiti itsusïrhu enga sïkuiririka. ¿Nóksï chiiti librurhu jarhaski?” (SALMO 56:8).

¿Uaajtsïni jarhuatani orhepani uérakuani uandanhiatechani míteni eskajtsïni Tata Diosï kurhanguchisïnga? Ju je exeni ambe enga nitamanchapka María.

“Exeni na enga juchiiti sapi enga 18 jatiripka xáni jánguarhintapka tsimani uéxurhini jimbo para orhepani uérakuni kánserini ka enga tátsekua uarhipka, mintsitarini atachispti. ¿Andisï ma jatsi para xáni no sési jásï ambe nitamakuarhini? Kánikua ikiaxapka Tata Diosï Jeoba jingoni jimboka no ma ambe úspka paraka no ísï úkuarhipiringa.

Ísï pʼikuarherasïreenga enajkirini Tata Diosï Jeoba no xéncheeni. Seisi uéxurhini tátsekua, aianguspka na engani pʼikuarhereenga kúnguarhikuarhu anapu amigani ma enga sési kámpijka ka kurhangutspini. Engareni na ióni kurhajchapkia, miátantasptirini Biblieri karakata ma engareni mintsitarhu niárachepka: 1 Juanu 3:19, 20, enga arhijka eska Tata ‘Diosï sánderu kʼériska eska juchaari mintsita’ ka eska ‘míteska iámindu ambe’. Ka tátsekuarini arhispti eska Tata Diosï kurhangusïnga na engachi no sési pʼikuarherani jarhajka.

Peruni útasï ikiaxapka. Tátsekua arhintaspka Salmo 94:19, enga arhijka: ‘Engani uánikua uandanhiatechani jatsiapka, uinhaperantaspkarini ka sésirini pʼikuastantani’. Indeni ambesïni uétarhinchani japka kurhaani. Mintsikaparini eskarini Tata Diosï kurhajchapiringa ka kurhanguchini, úspka aianguni na engani no sési pʼikuarherani japka. Inde amberini kánikua sési pʼikuastantaspti”.

¡Kánikuachi sési pʼikuarherasïnga míteni eskajtsïni Tata Diosï sési kurhanguchisïnga! Peru, ¿andichisï xáni kómu nitamakuarhijki? ¿Tata Diosïjtsïni kastigarini jaki ambe ma jimbo engachi no sési úka? ¿Kʼamajkua ma jurhianisï kómu nitamakua ambe? Ini kurhamarhikuechanchi mókuantani jauaka máteru jorhenguarhikuecha jimbo.