Primeru ora enga sapi ma andajpenujka, kánikua jukaparhakuesti. ¿Andi? Jimboka ambe enga pʼikuarheraaka amamba sapini jimbo ka sapi amambani jimbo, kánikua jarhuataati sapini paraka ima sési kʼuiripeaka. *

¿Ambesï újki eska amamba ma uékperakua jingoni kuidariuaka imeeri sapini enga apenasi andajpenuaka? Rebistarhu The Journal of Perinatal Education, profesora Jeannette Crenshaw uandasïndi eska enga uarhiiti ma na kánguarhijkia sapini ma, jarhasïnga ormona ma “enga újka eska amamba xénchaaka sapini enga exejka, pʼárhijka ka enga tʼirerajka”. Enga i ambe úkuarhijka, amambeeri kuerpu ístu úsïndi eska jauaka máteru ormona enga “jarhuatajka para ima sési pʼikuarherani imeeri sapi jingoni” ka enga újka eskaksï sánderu xénchperaaka. ¿Andisï xáni jukaparhakue i ambe?

Tata Diosï Jeoba * enga xáni xénchpetika ka enga juchaari Kueraajpirika, imasï úti eska amamba ma xénchaaka imeeri sapini. Rei Dabidi diosmaiamukua arhispti Tata Diosïni jimboka úspka eska andajpenupiringa ka jimboka úsïreenga eska ima seguru pʼikuarherapiringa enga amamba kamanharhienga. Jiókuarhispti eska Tata Diosï Jeoba kuidarispka desde jiáni uératini enga ima andajpenupka. Kómarhikua jimbo arhispti: “Desde engani juchiiti naandiri matrisirhu japka, tʼuri jindeeska juchiiti Tata Diosï” (Salmo 22:9, 10).

ERATSENTA JE INI AMBE: Enga Tata Diosï úka eska naandi ma pendienti jauaka imeeri sapini jimbo ka paraka xénchperakua jingoni kuidariuaka, ¿nóchi jatsipirini para jiókuarhini eska Tata Diosïjtu pendienti jarhasïnga mándani juchantsïni jimbo engachi ísïika eska imeeri sapiicha? (Ukuecha [Hechos] 17:29).

Tata Jesukristu enga kánikua sési míteka Kueraajpirini, uandaspti: “¿Nóksï íntspikuarhinhasïni tsimani pájaruecha sinko sentabu jimbo? Ka nájkirukaksï xáni no jukaparhaka, no ma uarhisïndi enga chaari Taati no uékajka. Ka ístu asta chaari jauiri jamberi iámindu kuenta úkata jarhasti. Ísï jimbo asï jáma je chéni jimbokajtsï sánderu jukaparhaska chá ka eska uánikua pájaruecha” (Mateu 10:29-31).

Nóksï uánikuesti kʼuiripuecha engaksï exeajka pájaruechani ka menusia imeechani engaksï echerirhu andatserajka. Joperu juchaari Taati auandarhu anapu mándani exeasïndi. Ka nájkirukaksï pájaruecha uánikueka, nóksï méni xáni jukaparhakueuati para Tata Diosï komueska kʼuiripu ma. Ísï jimbo, uaakajtsï mintsikani eska Tata Diosï pendienti pásïnga chánksïni jimbo. Jo, Tata Diosïksïni kánikua jukaparharasïndi.

 Bibliajtsïni aiachisïndi:

• “Tata Diosï Jeobaeri eskuecha iápurisï exexa[ti] echerirhu para uinhapikua xarhatakuani imeechani engaksï iámu mintsita jingoni marhuakujka” (2 CRÓNICAS 16:9).

• “Tata Diosï Jeobaeri eskuechaksï exeaxati imeechani engaksï jurhimbitku jámajka ka kurhaasïndi engaksï uinhachaparini jarhuajperata kurhajkuarhijka” (SALMO 34:15).

• “Kánikua tsípiaka chiiti ambakiti uékperakua jimbo, jimbokari tʼu exeska na engani xáni kómu nitamakuarhini jaka, jingontkuri exexaka na engani no sési pʼikuarherani jaka” (SALMO 31:7).

¿Marhuachesïndijtsïni míteni eskajtsïni Tata Diosï uandanhiasïnga ka eskajtsïni xénchperakua jingoni kuidarisïnga? Jo. Hannah, * Inglaterra anapu, uandantasïndi:

“Mémindu eratsespka eskarini Tata Diosï Jeoba no xénchasïreenga ka eska no mókuantasïreenga juchiiti kómarhikuechani jimbokani ji no káni mintsikasïreenga. Eratsesïreenga eskarini kastigarixapka o eskarini no kasu úsïreenga jimbokani ji no sáni jukaparhakuespka. Ísï pʼikuarherasïreenga enajkirini ima no sáni uandanhiaueni”.

Joperu iásï Hannah segura jarhastia eska Tata Diosï Jeoba xénchasïnga ka eska uandanhiasïnga imani jimbo. ¿Ambe úspi eska ménderueni eratsepiringa? Ima uandasïndi: “No sóntkuni mójtakuspka ambe engani eratseenga. Iónistia engani kurhaapka Biblieri arhijtsïkperata ma enga uandeenga tata Jesukristueri uarhikuani, ískurini pakataspti ka jarhuatasptireni exeni eskarini Tata Diosï Jeoba xénchasïnga. Ístuni kuenta íntskukuarhespka eskarini xénchasïreenga engareni mókuchiantauenga kómarhikuechani ka indeni ambe jimbo, mémindu uerasïreenga. Ístu, jorhenguarhini Bibliani ka nirani tánguarhikuecharhu, jarhuatastirini parani sánderu sési míteni Tata Diosï Jeobani ka parani míteni na pʼikuarherasïni ima juchantsïni jimbo. Iásï míteskia eskajtsïni Tata Diosï Jeoba xénchasïnga, eskajtsïni jarhuatasïnga ka eskajtsïni uékasïnga kuidarini”.

¡Xáni ambakiti uandakuecha! Peru, ¿nénajtsï uaa míteni sini Tata Diosï jukaparharajki ambe engajtsï chá pʼikuarherajka ka eskaksïni kurhanguchisïnga? Máteru jorhenguarhikua jimbojtsï exentaaka mókuntskua.