Tata Diosï ústi eska kʼuiripueri kuerpu uaaka jandiajku tsinakuarhini, enga kʼuiripu ma akuarhijka, enga atakuarhijka o enga chájkujka, “kuerpu sóntku úsïndi ambe ma para tsinakuarhini, no arhiparini enga sántkueuaka o kánikueni enga atakuarhika” (Johns Hopkins Medicine). Kʼuiripuecheri kuerpu sóntku úsïndi ambe ma paraka anhaxurhiaka iurhiri, parakaksï benecha engaksï iurhirini pájka sánderu kʼéaka, para ueenani míkuarhentani jima enga atakuarhika ka para sóntku nimani.

ERATSENTA JE INI AMBE: Enga juchaari Kueraajpiri úka kuerpuni para jandiajku tsinakuarhini, ¿nóchi jatsipirini para mintsikani eskajtsïni ima uaaka sési pʼikuastantani engachi no sési pʼikuarhinheni jauaka? Salmista seguru jarhaspti eska Tata Diosï “sési pʼikuastaantasïn[ga] imeechani engaksï mintsitarhu no sési pʼikuarhinheni jarhajka” ka eska “benda jatsikuasïn[ga] nani engaksï atakuarhika” (Salmo 147:3). Peru, engajtsï chá no sési jásï ambe úkuarhinchaka ka engajtsï no úni jaka mirikurhini, ¿nénajtsï uaa seguru jarhani eskaksïni Tata Diosï uaaka jarhuatani iásï ka ístu sánderu orhepani?

Tata Diosïjtsïni arhisïndi: “Asï ché, jimbokani ji tʼungini jingoni jarhaska. Asï uandanhia, jimbokani ji chiiti Tata Diosïska. Jíkeni uinhaperantaaka. Jo, jíkeni jarhuataaka” (Isaías 41:10). Míteni eskajtsïni Tata Diosï Jeoba xénchasïnga sésijtsïni pʼikuastantasïndi ka uinhapikuajtsïni íntskusïndi parachi orhepani uérakuani uandanhiatechani. Apostoli Pablu uandaspti eska i ambe jindeeska Tata “Diosïri pínandikua enga no nema újka jánhaskani” (Filipusʌ 4:4-7, 9). Ístu uandaspti: “Iámindu ambe úsïnga úni imani jimbo engareni uinhapikua íntskujka” (Filipenses 4:13, TNM).

Biblia úsïndi eskachi sánderu mintsikaaka ambe enga Tata Diosï aiatspekia eska uaaka kʼuiripuecha jimbo. Jaŋaskuecha [Apocalipsis] 21:4, 5 (engachi máteru pájina jimbo exeaka) arhisïndijtsïni ambe enga uaaka Tata Diosï ka andichisï uaa mintsikani imani.

• “Kutsunharhikuauati iámindu uekua”. Tata Diosï Jeoba kʼamajkuati iámindu ambe engajtsïni no sési pʼikuastajka ka enga újka eskachi uandanhiauaka, no arhiparini enga sapichitu ambejkueuaka.

• Ima enga ‘uaxakatini jaka kʼéri uaxantskuarhu’, Rei enga uinhapitika ka enga kueraaka iámindu ambe, úraati imeeri uinhapikuani ka juramukuani para úni eskachi jucha nóteru méni kómu nitamakuarhiakia ka parajtsïni jarhuatani jiáni engachi uétarhinchaaka.

• Tata Diosï Jeobajtsïni arhisïndi eska ima ambe enga aiatspeka “mintsinharhikueska ka jurhimbikuenksï”. Ísïisti, Jeoba, Tata Diosï jurhimbiti úrasïndi imeeri nombrini parajtsïni aiachini eska uaaka imani ambe enga aiatspeni jaka.

Tata “‘Diosï kutsunharhikuauati iámindu uekua, ka nóteru jauatia uarhikua, ka ni uandanhiata, ka nóteru nema ueraati o pʼamenchani, jimboka nitamaakia iámindu ueenani anapu ambe’. Ka ima enga uaxakatini japka kʼéri uaxantskuarhu uandasti: ‘Ji jimbanhi úntaaka iámindu ambe’. Ka arhistirini jíndeni: ‘Kara ini ambe, jimboka íksï uandakuecha mintsinharhikueska ka jurhimbikuenksï’” (Jaŋaskuecha [Apocalipsis] 21:4, 5).

Kueraakata ambe ka Biblia, jarhuatasïndijtsïni parachi úni míteni juchaari Taati auandarhu anapuni. Kueraakata ambe no ma ambe uandaparini, pʼímarhisïndijtsïni parachi ambakiti amigueni Tata Diosïri. Ka Bibliajtsïni kʼóru arhisïndi: “Andarhiera je [Tata] Diosïni, ka imajtuksïni andarhieraati chánksïni” (Santiagu 4:8). Ka Ukuecha [Hechos] 17:27, ístu uandasïndi: ‘No iauani jarhasti chánksïni jingoni’.

Engajtsï sánderu tiempu úraska parajtsï míteni Tata Diosïni, sánderujtsï seguru jauaka eska ima uandanhiasïnga chánksïni jimbo (1 Pedru 5:7). ¿Nénaksïni marhuachea mintsikani Tata Diosï Jeobani?

Eratsenta je ambe enga úkuarhinchapka Toru, Japón anapu ma acheeti. Nájkiruka imeeri naandi jorhendapka Tata Diosïri ambe, inchamukuspti grupurhu ma enga arhinhajka Yakuza enga jindeeka mafia japonesa. Ima uandantasïndi: “Eratsesïrenga eskarini Tata Diosï kurhunhisïreenga ka engani exenga nemani uarhini, uandasïreenga eskarini Tata Diosï ísï kastigarini jarhasïreenga ka sánderu jiáni enga uarhienga nema engani xéncheenga”. Toru uandasïndi eska i ambe úspka eska ima no sáni pʼamojpipiringa ka eska kánikua no sési kámpipiringa. Enga uandani japka ambe enga uékeenga úni, uandaspti: “Uékasïreenga sapichku uarhini ka ísï mítekateni eskani uándikuspka nemani enga sánderu uinhapitipka eskani ji”.

 Joperu enga Toru ka imeeri uarhiiti Hannah, ueenapkaksï jorhenguarhini Bibliani, Toru uánikua ambe mójtakuspti imeeri irekuarhu ka ménderueni xarharasïreendia. Hannah uandasïndi: “Ískurini pakataspti na enga xáni mójtakurhipka juchiiti acheeti”. Iásï Toru uandasïndi: “Míteska eska Tata Diosï jarhaska ka eska uandanhiasïnga mándani juchantsïni jimbo. Ima no uékasïndi eska nema uarhiaka ka jingontku jarhasïndi para puákuntani imani enga mintsita jingoni móantajka. Uaakachi aianguni imani ambe engachi no nemani aiangupiringa ka enga no nema úpiringa kurhanguni. No ióni jimbo, Tata Diosï Jeoba kʼamajkuati iámindu uandanhiatechani ka imani ambe engajtsïni no sési pʼikuastajka ka enga újka eskachi kómu nitamakuarhiaka. Asta iásï mámarujtsïni jarhuatasïndi. Kánikua uandanhiasïndi juchantsïni jimbo ka kuidarisïndijtsïni engachi kánikua kómu pʼikuarherani jarhajka” (Salmo 136:23).

Májkueni eska Toru, míteni eska Tata Diosï uaaka kʼamajkuni iámindu ambe engajtsïni no sési pʼikuastajka ka eska no ióni jimbo ísï uaakia, úsïndi eskachi ambakiti erokuarhikua ma jatsiaka ka ístu eskachi sési irekuarhiaka iásï. Ísïisti, nájkiruka ini parhakpini jimbo xáni no sési jánhaskuarhini jaka, Tata Diosïri uékperakuaksïni kánikua marhuacheati.