Ambakiti amigu ma imaesti engachi mítijka eskajtsïni jarhuataaka engachi uandanhiata ambe jatsiaka. Jimboksïsï jati máru kʼuiripuecha engaksï uandajka eska Tata Diosï no juchari amigueska, jimbokaksï eratsisïnga eska no ma ambe úsïnga parajtsïni jarhuatani. Peru ima uánikua ambakiti ambe ústia juchantsïni jimbo ka ístu, no ióni jimbo sési péntaati iámindu juchari uandanhiatechani ka kʼamajkuati kómu nitamakua ambe. ¿Ambe uá Tata Diosï?

Tata Diosï kʼamajkuati imani enga újka eska jauaka no sési jásï ambe. Biblia arhisïndi néski ima: ‘Iámindu parhakpini anapuecha Noambakitiri juramukua jimbo jarhasti’ (1 Juanu 5:19). Satanasi imaesti enga Jesusi arhipka eska jindeska “parhakpini anapu juramuti” (Juanu 12:31). Noambakiti jindesti enga újka eskaksï kʼuiripuecha xáni uáni problemechani jatsiauaka. ¿Ambe uá Tata Diosï para sési péntani ini ambe?

No ióni jimbo, Jeoba úraati imeri Uájpani para kʼamajkuni “imani enga juramukua jatsika uarhikueri, enga jindeka Noambakiti” (Ebreu 2:14; 1 Juanu 3:8). Biblia arhisïndi eska Noambakiti mítiska eska no ióni jimbo kʼamajkunhaaka (Jaŋaskuecha 12:12). Tata Diosï ístu kʼamajkuauati kʼuiripuechani engaksï no sési úrika (Salmo 37:9; Proverbios 2:22).

Eska na kʼamajkuakia no sési jásï ambe, juchari Kuerajpiri uáti ambe enga xáni uétarhiaka para kumplirini imeri eratsikuani para kʼuiripu ka para Echeri. Jiáni, ¿na jásïchi irekua ma jatsia?

Pínandikua ka seguridadi para méntkisï. “Peru echeri kaxumbiticheriuati, ka sésiksï pʼikuarheraati jimboka kánikua pínandikua jauaka” (Salmo 37:11).

Ambakiti ka kánikua tʼirekua. “Kánikua tʼirekua jauati echerirhu; juátecharhu karakua, kánikua tʼirekua jauati” (Salmo 72:16).

Sési járhati kʼumanchikuecha ka ánchikuarhita enga sési pʼikuastpiaka. “Uátiksï kʼumanchikuechani ka jimaksï irekaati; ikaraatiksï frutani ka imaksï akuati. [...] Juchiti erakukatechaksï marhuataati ambe engaksï uáka imecheri jájkicha jingoni” (Isaías 65:21, 22).

¿Uékapirintsï inde jásï parhakpini ma jimbo irekani? No ióni jimbo iámindu i ambe meru niáraati ísï úkuarhini.

Ini jurhiatikuecha jimbo, iáminduechachi pʼamenchasïnga ka uarhini, peru no ióni jimbo nóteru ísïuatia. No ióni jimbo, Jesusiri uarhikua jimbo Jeoba uáti eska “nákinterku nema enga imani jakajkuaka, no tsïnchiaka sino jatsini tsípikua para méntkisï” (Juanu 3:16). Jiáni, ¿na jásïchi irekua ma jatsia?

Nóteru jauatia pʼamenchakua ambe. “No nema enga jima irekaaka uandaati: ‘Pʼamenchaxaka’. Kʼuiripu enga echerirhu irekaaka, puáminhantaati pekaduechani” (Isaías 33:24).

Nóteru jauatia uarhikua. “Ima, ántaati uarhikuani para méntkisï, ka juchari Juramuti Jeoba kutsunharhikuauati uekua iáminduechani” (Isaías 25:8).

Kʼuiripu irekaati para méntkisï. “Diosïri intsïmperakua jindesti tsípikua para méntkisï juchari tata Jesukristuni jimbo” (Roma 6:23).

Uarhirichaksï tsíntaati. “tsíntaa[tiksï] uarhiricha imecha engaksï ambarhatika, ka ístu imecha engaksï malueka, [imecha engaksï no úka mítini Jeobani]” (Ukuecha 24:15). Enga Tata Diosï íntspika imeri Uájpani, ístu marhuakuauati imechani engaksï uarhikia.

¿Ambe uá Tata Diosï paraka úkuarhiaka iámindu i ambe?

Tata Diosï kumpliriuati ambe enga eratsika para kʼuiripuecha ka para Echeri, úraparini gobiernu ma auandarhu anapu enga tata Jesukristu juramutika (Salmo 110:1, 2). Inde mismu gobiernuesti o reinu  enga Jesusi jorhendaapka imeri chúxapatichani paraksï kurhajkuarhini arini uandakuecha jingoni: “Juchari Táti engari auandarhu jaka [...]. Jaue ixú parhakpinirhu chíti juramukua” (Mateu 6:9, 10).

Tata Diosïri Reinu juramuati Echerirhu ka kʼamajkuati iámindu no sési jásï pʼikuarherakua ambe ka kómu nitamakua enga parhakpinirhu jaka. I jindesti sánderu ambakiti gobiernu enga kʼuiripu uáka jatsini. Ini ambe jimbo, Jesusi kánikua jánguarhintaspti para eianhpini “ambakiti eianhperakua Diosïri juramukueri” jiáni enga Echerirhu japka ka arhiaspti imeri chúxapatichani eskaksï májkueni úpiringa (Mateu 4:23; 24:14).

Jeobajtsïni ini ambakiti ambe eiachisti jimbokajtsïni kánikua uékasïnga. Ini ambe mítiparini, ¿nójtsï uékapirini sánderu sési mítini Tata Diosïni ka jánguarhintani imeri amigueni? ¿Nénaksïni marhuachipirini engajtsï ísï úpiringa? Ju je exeni máteru artikulurhu.