Para sánderu sési mítini nemani, uétarhisïndi mítini ambe enga úkia. Májkueni, engajtsï uéjka sánderu sési mítini Tata Diosïni, uétarhisïndi eskajtsï mítiaka ambe ka ambe úskia. Ískuksïni pakataati engajtsï mítiaka na engajtsïni xáni marhuachijka ima ambe enga ima úkia ka ambe enga arhikuekajka para jucha inde ambe para sánderu orhepani.

Jeoba jindesti juchari ambakiti kuerajpiri ka imeri kualidadichaksï “xarhara[sïndi] desde jimajkantki úndani enga parhakpini kueraanhaka, jimboka mítinhasïnga iámindu ambe jimbo enga úkateka” (Roma 1:20).“Ima jindesti enga úka echerini imeri uinhapikua jingoni, Ima enga imeri mímixekua jingoni uaxastaka echerini para mámaru ambe andarani, ka Ima enga jánhaskakua jingoni kueraaka auandani” (Jeremías 10:12). Inde xáni sési jásï kueraakata ambejtsïni xarhatachisïndi na engajtsïni Tata Diosï xáni uéjka.

Eratsi je na engajtsïni xáni sési pʼikuastajka engajtsïni Jeoba ísï kueraaka eska ima na jásïika (Génesis 1:27). Ini ambe jimbo, úsïngachi sánisï xarhataani imeri ambarhati kualidadichani. Ístujtsïni kueraasti parachi uékani imeri ambe jorhenguarhini, o sea, parachi úni kurhanguani imeri juramukuechani ka na enga eratsijka. Engachi jurajkuska eskajtsïni inde ambe jarhuataaka, sánderuchi sési irekaaka ka uékaakachi seguirini irekani. Ístuchi uáka Tata Diosïri amigueni.

Jeobajtsïni xarhatachisïndi na engajtsïni xáni xénchajka enga kueraaka parhakpinini. Meru ísï eska na uandapka apostuli Pablu, Tata Diosïjtsïni mítitarasïndi “eska imamindu jindeska, jimbokajtsïni kóndintasïnga ka janirani paraka jucha ambakiti pʼikuntskua jatsiaka. Ka kánerachisïndijtsïni juchari tʼirekuani ka tsípini pʼikuastantsïni juchari mintsitecharhu” (Ukuecha 14:17). Enga Tata Diosï kueraapka Echerini no solu imani ambejtsïni íntskusti ambe engachi meru uétarhinchajka, sino uánikua ambejtsïni íntskusti parachi tsípikua jingoni irekani. Ka i solu máru ambejkuesti iámindu imani amberi engajtsïni íntskuaka sánderu orhepani.

Jeoba kueraasti Echerini parachi jucha jima irekani para méntkisï. Biblia arhisïndi eska “echerini kʼuiripuechani íntsaas[ka]” ka eska ‘no ísku kueraska  sino paraka irekanhapiringa’ (Salmo 115:16; Isaías 45:18). ¿Né irekapirini ka na xáni ióni? Biblia arhisïndi: “Echeri jurhimbiticheriuati, ka jimaksï irekaati para méntkisï” (Salmo 37:29).

Tata Diosï indeni ambe eratsiparinisï kueraapti Adani ka Ebani. Ini primeru temungurhirini paraisurhu péraspti paraksï ikarani ambe ma ka kuidarini (Génesis 2:8, 15). Tata Diosï ambakiti ánchikuarhita ma íntsaaspti: “Kánguarhia je sapiichani ka uánikua úkuarhi je ka uinira je echerini ka ánchita je” (Génesis 1:28). Ísï jimbo, Adani ka Eba úpirindiksï tsípikua jingoni irekani para méntkisï ixú Echerirhu. Peru xáni no sési engaksï no uékapka kurhajchani Tata Diosïni ka indeni ambe jimboksï nóteru jatsistia sésikua paraksï jurhimbiticha jingoni kuentukuarhini engaksï echerirhu irekaaka. Ka eskachi na exeaka, inde ambe engaksï imecha úpka, no mójtakusti ambe enga Tata Diosï uéjka úni kʼuiripuecha ka Echeri jimbo. Peru antesi, ju je exeni máteru ambe enga Jeoba úkia.

¿Andijtsïnisï Jeoba íntsku imeri Karakatani, Bibliani? Ma rasoni jindesti jimboka uékasïnga eskachi mítiaka (Proverbios 2:1-5). Ísïsti eska Biblia nójtsïni mókuchiantasïnga iámindu kurhamarhikuechani engachi úpiringa úkuarhiani Tata Diosïri ambe; no ma libru úpirindi mókuantani (Eclesiastés 3:11). Peru ambe enga xáni Biblia arhijka, jarhuatasïndijtsïni mítini Tata Diosïni. Úsïngachi mítini na enga jásï Tata Diosï máeka engachi exejka na enga kaajka kʼuiripuechani. Kurhangusïngachi na enga járhati kʼuiripuechani jaiapanhiantajka (Salmo 15:1-5). Jorhenguarhisïngachi na enga jásï kómarhikua jeiapanhintajka, imeri juramukuechani ka na enga exejka jatsikuarhikua ambe. Ístujtsïni Biblia jarhuatasïndi sánderu sési mítini juchari kueraajpirini, imani ambe jimbo enga uandapka ka úni imeri Uájpa, Jesukristu (Juanu 14:9).

Ístujtsïni Jeoba íntskusti imeri Karakatani parachi mítini néna sánderu sési irekani ka tsípikua jingoni. Biblia jingontsïni arhisïndi ambe engachi jatsika para úni para sési irekani familia jingoni, sésichi pʼikuarherani ka orhepani uérakuani uandanhiatechani. Eskachi na exeaka sánderu orhepani, Biblia mókuantasïndi imani kurhamarhikuechani engaksï sánderu jukaparhakueka tsípikueri, por ejemplu, andisï xáni kómu nitamakua ambe jaki ka ambechi úkuarhinchaa sánderu orhepani. Ístujtsïni eiangusïndi ambe enga Tata Diosï úkia para kumplirikuarhini ambe enga uéjka úni.

Jarhasti uánikua máteru ambe enga xarhatajka eska Biblia libru máeska enga kánikua ambakitika ka engaksï xarhatajka eska Tata Diosï kararkuarhiska. Nájkirukaksï máru 40 achaticha karaka, máru 1,600 uéxurhini jimbo, iámindu Biblia májku temeri ambe uandasïndi, jimboka Tata Diosïsï kararkuarhika (2 Timoteo 3:16). Terokutantaparini máteru ióntki anapu libruecha jingoni, ambe enga Biblia arhijka no ma ambe mójtakunhasti desde enga xáni ióni nitamakia, ísï eskaksï na xarhatajka uánikua ióntki anapu karakatecha. Ka nájkiruka mámaru ambe únhaka para eska no tradusirinhapiringa, etsakunhani ni arhinhantani, no niárasti ísï úkuarhini. Iásï, inde libru jindesti enga sánderu ataranhantajka ka tradusirikuarhini interu parhakpinirhu. Engachi iásï jamberi jatsika Bibliani, xarhatasïndi eska Tata Diosïri Karakata ‘méntkisï jauaka’ (Isaías 40:8).

Máteru ambe enga Tata Diosï úka para xarhatani eska imeri eratsikua kumplirikuarhiaka, jindesti eska íntspiska ambe ma enga kánikua jukaparhakueka. Eskachi na exekia antesi, Tata Diosï uékasïrendi eskaksï kʼuiripuecha irekapiringa Echerirhu para méntkisï. Peru enga Adani no uékapka kurhajchani Tata Diosïni ka pekarini, nóteru jatsisptia sésikua para irekani para méntkisï ka indeni ambe jimbo, ni imeri uájpecha. “Ísï jimbo eska pekadu na juka parhakpinirhu, máechakua kʼuiripuni jimbo ka pekaduni jimbo uarhikua, ka ísï uarhikua pakarani para iámindu kʼuiripuecha jimbokaksï iáminduecha pekadu úska” (Roma 5:12). Enga Adani ísï no kurhajchapka Tata Diosïni, ísï xarharasïrendi eska no úpiringia kumplirikuarhini ambe enga Tata Diosï uéjka úni. Peru jiájkani, ¿ambe úspi Jeoba?

Ambe enga úpka Jeoba, sési terokuntasïndi na enga jásïika. Jurhimbikua jingoni úspti ambe ma ka  kastigarispti Adani ka Ebani engaksï ísï no kurhajchapka, peru ístu uékperakua jimbo, seguirispti úni ambe ma paraksï kʼuiripuecha úni jatsini erokuarhikua ma. Jeoba úraspti imeri jánhaskakuani para exeni néna sési péntani imani ambe enga úkuarhipka ka seguirispti aianhpeni ambe enga úpiringa (Génesis 3:15). Pʼímutantapirindijtsïni pekadueri ka uarhikueri imeri Uájpani jimbo, tata Jesukristu. ¿Néna úpirini inde ambe?

Paraka Jeoba úpiringa imani ambe sési péntani enga Adaniri kulpa jimbo niáraka úkuarhini, Jesusini axaspti Echerirhu paraka jorhendaapiringa kʼuiripuechani imani xanharuni enga tsípikuarhu pájpijka ka para “íntspini imeri tsípikuani para uánikuechani euajpiantani” a (Mateu 20:28; Juanu 14:6). Jesusijtsïni ústi pʼímutantani jimboka májkueni perfektuespka eska Adani ka ima kʼóru méntkisï kurhajchaspti Jeobani asta uarhikuarhu jamberi. Jimboka Jesusi no jukanchaspka para uarhini, Jeoba tsítantaspti ka jurajkuspti eska ménderu auandarhu kʼuanhatsintapiringa. Indeni ambe úparini, Jesusi úpirindi íntsaani kʼuiripuechani imani ambe enga Adani no úpka íntsaani: tsípikua para méntkisï. “Jimboka máechakua kʼuiripuni jimbo enga no janhanharhipka Diosïni, uánikuecha pekadori eratanhaska, ka ístu máechakua kʼuiripuni jimbo enga janhanharhipka Diosïni, uánikuecha ambakikua exeminhaati” (Roma 5:19). Jesusiri uarhikua jimbo, Tata Diosï uáti eska kumplirikuarhiaka ambe enga eiatspika: kʼuiripu irekaati para méntkisï ixú Echerirhu.

Ambe enga Jeoba úpka para sési péntani imani ambe enga Adaniri kulpa jimbo niárapka úkuarhini, jarhuatasïndijtsïni sánderu sési mítini Jeobani. Jorhenguarhisïngachi eska no ma ambe úsïnga ójkutani paraka niáraka ísï úkuarhini ambe enga ima eratsijka úni; ambe enga ima uandajka méntkisï niáraati kumplirikuarhini (Isaías 55:11). Ístujtsïni xarhatachisïndi na engajtsïni xáni uéjka. “Ísï jimbo xarharasïndi na engajtsïni xáni uékajka Diosï, jimboka ima axaska imeri máechakua Uájpani parhakpinirhu paraka jucha jatsipiringa tsípikua imani jimbo. Ka indeni jimbochisï újka jánhaskani na enga jásïka Diosïri uékperakua para juchantsïni jingoni, no jimboka jucha uékaska Diosïni, sino jimboka imasïjtsïni uékaka juchantsïni ka axani imeri Uájpani para jindeni puátperantskua juchari pekaduecheri” (1 Juanu 4:9, 10).

Tata Diosï uékaspti íntspini imeri Uájpani iámindu juchantsïni jimbo. Inde ambejtsïni asegurarichisïndi eskajtsïni íntskuaka “iámindu ambe imani jingoni” (Roma 8:32). ¿Ambe máteru ambejtsïni aiachiski Tata Diosï? Ju je exeni.