Jamberi ambe engachi orheta újka engachi uéjka nemani mítini, jindesti kurhamarhini: “¿Nájtsï arhinhasïni?”. Engachi úpiringa ísï kurhamarhini Tata Diosïni, ¿ambejtsïni mókuchentapirini?

“Ji jindeska Jeoba. Inde jindesti juchiti nombri” (Isaías 42:8).

Jukaparhakuesti para Tata Diosï. No nema erakuspti nombri para Tata Diosï, ima mismu erakukuarhesti. Jeoba uandasïndi: “I jindesti juchiti arhinhakua para méntkisï, ka ísïsïni jatsiska parani miánhani para méntkisï” (Éxodo 3:15). Bibliarhu, Tata Diosïri nombri sánderu uáni xanhari úrakuarhisti ka eska nákinterku ma imeri títulu komu Ima enga iámindu ambe újka úni, Táti, Tata o Tata Diosï, ka sánderu eska náki uéjki máteru nombri komu Abraani, Moisesi, Dabidi o Jesusi. Ka Jeoba uékasïndi eskachi mítiaka imeri nombrini. Biblia arhisïndi: ”Parakaksï kʼuiripuecha mítiaka eska tʼu, engari arhinhajka Jeoba, tʼujkuri jindeska enga Sánderu Kʼéri ambeeka iámu parhakpinirhu” (Salmo 83:18).

Para Jesusi jukaparhakuesti. Imani kómarhikua jimbo enga ísï mítinhaka komu padrenuestru, Jesusi jorhendaaspti imeri chúxapatichani eskaksï arini uandakuecha jingoni kómarhipiringa: “Eska mítinhaaka chíti nombri eska pímbinhasïtiska” (Mateu 6:9). Ka Jesusi mismu kómarhispti Tata Diosïni: “Táti, u eska kʼéri ambe arhinhaaka chíti nombri” (Juanu 12:28). Para Jesusi, kánikua jukaparhakuespti kʼéri ambe arhini Tata Diosïri nombrini. Jimbosï arhipti: “Ji mítitaraaska né engari jindeka tʼu [o chíti nombri] ka útasïni mítitarauaka” (Juanu 17:26).

Jukaparhakuesti para imecha engaksï mítika Tata Diosïni. Ióntki anapu Tata Diosïri marhuarichaksï mítispti eska Tata Diosïri nombri jimboksï úpiringa kuájchakunhani ka pʼímutanhantani. Ma uandaspti: “Jeobaeri arhinhakua uiuinhasï torre máesti. Jima nirasïndi ima enga jurhimbitiika, ka kuájchakunhasïndi”. Ka máteru uandaspti: “Iáminduecha engaksï Jeobaeri nombrini úraaka pʼímutantskateua[tiksï]” (Proverbios 18:10; Joel 2:32). Biblia arhisïndi eska Tata Diosïri nombri xarhatapiringa néksï jindeski imeri marhuaricha. “Nájkirukaksï iámindu iretecha imecheri diosïcheri nombri jimbo jámaaka, juchachi Jeobaeri nombri jimbo jámaaka enga juchari Tata Diosïka para méntkisï” (Miqueas 4:5; Ukuecha 15:14).

Eska solu jindeska para Tata Diosï. Uánikua jorhenatichaksï májkueni uandasïndi, eska Jeoba arhikuekasïnga “Ima Úsïndi eska Iámindu ambe Úkuarhiaka”. Na enga arhikuarhipka Jeoba jiáni enga Moisesi jingoni uandontskuarhipka, jarhuatasïndijtsïni kurhanguni ambe enga arhikuekajka imeri nombri. Ima uandaspti: “Ji jindeuaka ambe engani uékaaka jindeeni” (Éxodo 3:14). Ísï jimbo, imeri arhinhakua no solu xarhatasïndi eska ima jindeska kueraajpiri, enga újka eska iámindu ambe niáraka jarhani. Imeri nombri ístu arhikuekasïndi eska ima úsïnga iámindu ambe jindeni o eska uáka úrani ambe enga ima kueraaka para imeri eratsikuani kumplirikuarhini. Nájkirukaksï imeri títuluecha xarhatajka na enga xáni kʼéri ambeka, na enga xáni juramukua jatsika o na enga xáni uinhapika, solu imeri nombri enga jindeka Jeoba, xarhatasïndi iámindu ambe enga ima jindeka ka ambe enga xáni újka úni.

Xarhatachisïndijtsïni eska Tata Diosï uandanhiasïnga juchantsïni jimbo. Ambe enga arhikuekajka Tata Diosïri nombri xarhatasïndi na enga xáni xénchajka imani ambe enga ima kueraaka, asta juchantsïni. Engajtsïni aiangujka imeri nombri, xarhatasïndi eska uékasïnga eskachi mítiaka. Buenu, imajtsïnisï uénati aianguni imeri nombri ante de juchachi kurhamarhikuarhini na arhinhasïni. Ísïsti, Tata Diosï no uékasïndi eskachi eratsiaka eska ima no jarhaska o iauani jarhani, sánderu sési, eska meru jarhaska ka eskachi uáka andarhierani (Salmo 73:28).

Engachi úrajka imeri nombri, xarhatasïngachi eskachi uékasïnga mítini. Eranhaska je eskajtsï uékasïnga amigueni nemaeri ka arhisïngajtsï eskaksïni chári nombri jimbo uandajpaaka. ¿Nájtsï pʼikuarherapirini enga ima kʼuiripu no uékapiringa ísï úni? Jamberijtsï uénapiringa kurhamarhikuarhini sini ima kʼuiripu meru uékasïni chári amigueni. Ka májkuenisti Jeoba jingoni. Imajtsïni aiangustia imeri nombri ka uékasïndi eskachi úraaka. Engachi ísï újka, xarhatasïngachi eskachi uékasïnga andarhierani imani. Biblia arhisïndi eska Tata Diosï mítisïnga né engaksï imeri nombrini eratsini jarhajka (Malaquías 3:16).

Jorhenguarhini na enga arhinhajka Tata Diosï kánikua jukaparhakuesti para uénani mítini. Peru uétarhisïndi sánderu ambe mítini. Jatsiskachi para mítini imani enga indeni nombrini jukaka, ka na enga jásï Tata Diosï máeka.