Para amigueni nemaeri, uétarhisïndi mítini na jásï kʼuiripu máeski. Májkueni, parachi Tata Diosïri amigueni uétarhisïndi mítiani imeri kualidadichani. Engachi sánderu sési mítiajka, sánderuchi andarherasïnga. Iámindu imeri sési járhati kualidadicheri enga jatsiaka, tʼámuestiksï enga sánderu xarhataajka: uinhapikua, jánhaskakua, jurhimbikua ka uékperakua.

“¡Oh Tata Jeoba, Kʼéri Juramuti! Exe, tʼuri Kueraaska auandani ka echerini chíti kʼéri uinhapikua jingoni” (JEREMÍAS 32:17).

Ambe enga Tata Diosï kueraaka xarhatachisïndijtsïni na enga xáni uinhapika. Por ejemplu, ¿nénachi pʼikuarhirikuarhisïni uérakua jarhani enga sési tsándini jarhajka? Pʼikuarherasïngachi na engaksïni jorheperajka Jurhiata. Inde ambe engajtsïni jorheperajka, jindesti ambe enga Jeoba kueraaka imeri uinhapikua jingoni. ¿Na xáni jorhepiski Jurhiata? Ima enga Jurhiatarhu terojkanikuarhu jaka (núcleo), ma 15,000,000 °C (27,000,000 °F) ísï jorhepisti. Mándani segundu jimbo, jurhiata xáni kombustible úsïndi eska uánikua miioni bomba nukliaricha.

Peru Jurhiata sánderu sapichuesti engaksï terokutantapiringa uánikua estreiecha jingoni engaksï unibersurhu jaka. Sientifikuechaksï uandasïndi eska estreia UY Scuti, jindesti ma enga sánderu kʼéka unibersurhu, 1,700 sánderu kʼésti eska Jurhiata. Enga UY Scuti niárapiringa jima jarhani enga jurhiata jaka ójchakurapirindi Echerini ka sánderu iauani niárapirindi ka eska jima enga Júpiter jaka. Ini ambe mítini, jamberijtsïni jarhuataati sánderu sési kurhanguni andisï Jeremiasi uandapi eska Jeoba kueraaska auandani ka Echerini, o sea unibersuni imeri uinhapikua jingoni.

¿Nénajtsïni marhuachisïni Tata Diosïri uinhapikua? Parachi úni irekani, uétarhisïndi iámindu ima ambe enga Tata Diosï kueraaka, por ejemplu Jurhiata ka iámindu ima ambe enga Echerirhu jaka. Ístu,  Tata Diosï úrasïndi imeri uinhapikua parajtsïni jarhuatani mándani arini. ¿Néna ísï úsïni? Primeru siglurhu, Tata Diosï íntskuspti Jesusini uinhapikua para milagruechani uáni. Biblia arhisïndi eskaksï sieguecha eskataranhantaspka, ka imecha engaksï no uénga xanharani, úsïrendiksïa xanharani, ka ístu ima engaksï lepra pʼamenchenga, ambakeranhantasptiksï, ka ima engaksï no uénga kurhandini, úsïrendiksïa kurhandini, ka eskaksï uarhiricha tambientu tsítanhantaspka (Mateu 11:5). ¿Ka ambe úkuarhixaki ini jurhiatikuecha jimbo? Biblia arhisïndi: “Íntskusïndi uinhapikua imani enga kuataratini jaka” ka ístu arhisïndi: “Ima engaksï mintsikajka Jeobani, uinhaperanhantaatiksï” (Isaías 40:29, 31). Tata Diosïjtsïni úsïndi íntskuni “uinhapikua enga xáni kʼéri ambeka” parachi úni orhepani uérakuani problemechani engachi jatsiajka o únchi aguantarini (2 Korintu 4:7). ¿Nójtsï ísï pʼikuarherasïni eskajtsï sánderu andarherasïnga Tata Diosïni engajtsï mítijka eskajtsïni xáni uékasïnga enga úrajka imeri xáni kʼéri uinhapikuani parajtsïni jarhuatani?

“¡Na enga xáni uánikua ambeka chíti úkuecha, oh Jeoba! Mímixekua jingoni úskari iámindu ambe” (SALMO 104:24).

Engachi sánderu mítijka Tata Diosïri kueraakateri ambe, sánderujtsïni ísku pakatasïndi imeri jánhaskakua. Astaksï jarhasti máru sientifikuecha engaksï puru Jeobaeri kueraakatani ambe estudiarini jaka (biomimética) paraksï sáno májkueni jásï ambe úni. Para desde sapichitu ambe úni asta kʼéri abioni ma.

Peru no jarhasti máteru ambe enga sánderu sési úkata jaka eska juchari kuerpu enga xarhatajka na enga xáni jánhastika Tata Diosï. Ju je eratsintani na enga niárajka úkuarhini charhaku ma. Iámindu ambe jima uénakuarhisïndi engaksï tsimani selulecha kúnguarhijka ka máechakuajku úkuarhintani nani enga jarhajka iámindu informasioni de na enga jásïuaka charhaku. I selula, arhukurhintasïndi uánikua máteru selulecha jimbo engaksï sáno májkueni jásïjka. Peru niárasïndi tiempu engaksï i selulecha uénajka mójtakuarhini ka niáranksï uánikua mámaru jásï selula úkuarhintani, máruksï jindesïndi para iurhiri, nerbiuecha ka para únicha. Tátsekuaksï úkuarhisïndi mámaru járhati organuecha ka uénasïndiksï marhuani. Nuebi mesi jimbojku, ima enga máechakua selulepka mójtakuarhisti asta niárani jindeni charhaku ma enga mili miioni selulecha jimbo úkata jaka. Exeparini na enga xáni mímixekua uétarhijka para inde ambe úni, uánikuaksï niárasti májkueni eratsini eska Bibliaeri karari ma enga uandapka: “Kʼéri ambekini arhiaka jimbokarini ísku pakatasïnga na engani xáni sési úkata jaka” (Salmo 139:14).

¿Nénajtsïni marhuachisïni Tata Diosïri jánhaskakua? Juchari Kueraajpiri mítisti ambe engachi uétarhinchajka para felisini. Jimboka ima xáni jánhaskatiska, úsïndijtsïni ambakiti konsejuechani íntsaani imeri Karakata jimbo. Por ejemplu, arini ambejtsïni arhisïndi eskachi uáka: “Tekatsperanta je ka puátsperantani” (Kolosasi 3:13). ¿Nójtsï ísï exeni eska i ambakiti konseju máeska? Inbestigadorichaksï uandasïndi eska puátspintani, jarhuajpisïnga para ma sánderu sési kʼuíni ka para no presioni karhatani. Ístu marhuasïndi para no depresioni pʼamenchani ka ístu máteru jásï pʼamenchakua ambe. Tata Diosï ísïsti eska amigu jánhaskati ma enga uandanhiajka  juchantsïni jimbo ka engajtsïni méntkisï ambarhati konsejuechani íntsaajka (2 Timoteo 3:16, 17). ¿Uékapirintsï inde jásï ma amiguni jatsini?

“Jeoba kánikua xénchasïndi jurhimbikuani” (SALMO 37:28).

Tata Diosï méntkisï imani ambe úsïndi enga sési jaka. Tata Diosï enga iámindu ambe újka úni, no méni niáraati no sési ambe úkuni nemani (Job 34:10). Méntkisï jurhimbikua jingoni jusgarpisïndi, ísï eska na uandapka salmueri karari: ‘Jurhimbikua jingoniri jusgarpiaka’ (Salmo 67:4). Ima exesïndi ambe enga juchari mintsitarhu jaka ka nochi uáka enganiarini engachi no mintsita jingoni úska ambe ma, Jeoba méntkisï mítisïndi ambe enga jurhimbitika ka jurhimbikua jingoni jusgarpisïndi (1 Samuel 16:7). Ima exesïndi iámindu imani ambe enga no jurhimbikua jingoni úkuarhini jaka parhakpinirhu ka aiatspesti eska no ióni jimbo, ‘no sési úrichaksï kʼamajkunhaaka’ echerirhu (Proverbios 2:22).

Peru inde ambe no arhikuekasïndi eska Tata Diosï juesi máeska enga tsitijka kastigarini kʼuiripuni. Enga ima sési exejka, pʼamojperakua xarhatasïndi. Biblia arhisïndi eska Jeoba pʼamojpisïnga ka sési kámpini, asta imechani engaksï mintsita jingoni moantajka. ¿Nójtsï uandapirini cha eska indesï jindeka meru jurhimbikua? (Salmo 103:8; 2 Pedru 3:9).

¿Nénajtsïni marhuachisïni Tata Diosïri jurhimbikua? Apostuli Pedru uandaspti eska Tata “Diosï no nani kʼuetsapisïnga, sino eska jeiapanhintasïnga nákinterku ma nasioni anapu kʼuiripuni enga janhanharhijka imani, ka sési úni” (Ukuecha 10:34, 35). Iáminduechantsïni marhuachisïndi enga Tata Diosï jurhimbikua jingoni jámajka, jimboka no nemani sánderu uékasïnga. Imajtsïni jiókuarhisïndi no arhiparini juchari rasa, nani engachi anapueka, ambe engachi estudiarika o ambe engachi jatsikuarhika, imajtsïni jurajkusïndi parachi kómarhini.

Juchari Kueraajpiri uékasïndi eskachi kurhanguaka na enga jurhimbikua jingoni jámajka ka eskajtsïni inde ambe marhuachiaka, jimbojtsïnisï íntskuti konsiensia ma. Tata Diosïri Karakata arhisïndi eska konsiensia ísïska komu lei ma enga juchari mintsitecharhu karakata jaka engajtsïni jarhuatajka parachi mítini sinchi  sési úxaki ambe ma o nómbe (Roma 2:15). ¿Nénajtsïni marhuachisïni i ambe? Konsiensia ma enga sési jorhendakata jaka úsïndi eskachi no imani ambe uáka enga no sési jaka o engajtsïni no sési úchiaka. Ka engachi no sési ambe uáka, jarhuataatijtsïni parachi uékani moantani ka nóteru no sési ambe únia. Ísïsti, kurhanguni na enga Tata Diosï jurhimbikua jingoni jámajka, marhuachisïndijtsïni ka úsïndi eskachi sánderu andarheraaka imani.

“Diosï jindes[ti] uékperakua” (1 JUANU 4:8).

Biblia no arhisïndi eska Tata Diosï uinhapikueska, jánhaskakua o jurhimbikua. Peru kʼóru arhisïndi eska Tata Diosï jindeska uékperakua. ¿Andi? Jimboka, nájkiruka ísïka eska imeri uinhapikua jimbo uáka úni iámindu ambe ka jurhimbikua ka jánhaskakua jingoni sési úni ambe ma, uékperakuasï manatajti para iámindu ambe úni. Iámindu ambe enga újka, uékperakua jimboesti.

Nájkiruka Jeoba no uétarhinchajka nemani ni ambe ma, imeri uékperakua ústi eska auandarhu kueraapiringa espirituechani ka Echerirhu kʼuiripuechani para xénchaani ka kuidariuani. No ma ambe erokuarhiparini, sési jásï ma lugari ústi paraksï kʼuiripuecha irekani: Echerini. Ka iásï seguirixati xarhatakuani kʼuiripuechani uékperakua, jimboka úsïnga “eska tsándiaka para ambarhaticha ka maluecha, ka janirani para sési úricha ka ístu para no sési úricha” (Mateu 5:45).

Ístu, Jeoba kánikua uékpisïndi ka pʼamojpini (Santiagu 5:11). Xarhatakuasïndi uékperakua imechani engaksï meru uéjka mítini imani ka andarhierani. Tata Diosï mítisti mándani arhini imani kʼuiripuni. Ima “no iauani” jarhasti juchantsïni jingoni (Ukuecha 17:27).

¿Nénajtsïni marhuachisïni Tata Diosïri uékperakua? Tata Diosïjtsïni mámaru ambe jimbo xarhatachisïndi imeri uékperakua, por ejemplu, tsípisïngachi enga charhaku ma tsípijka, na engajtsïni xáni xénchajka juchari familia, na enga xáni sési xarharajka enga jurhiata inchajtsïkuni jarhajkia... Ísïsti eska no ma i ambe uétarhisïnga para úni irekani, peru úsïndi eskachi sánderu felisiuaka.

Máteru ambe engajtsïni Tata Diosï xarhatachijka eskajtsïni uékasïnga jindesti kómarhikua. Biblia arhisïndi: “Asï pendienti jatsi je ni ma ambe jimbo, sino Diosïni kómarhi je, ka kurhakuntsï ambe engajtsï uétarhinchajka, diosmeiamukua arhiparini Diosïni iámindu ambe jimbo”. Juchari Táti Jeobajtsïni xénchasïndi ka uékasïndi eskachi eiangukuarhiaka iámindu juchari uandanhiatechani. Imajtsïni aiachesïndi eska engachi ísï úska, tsípikua jingontsïni íntskuaka imeri “pínandikua enga no nema újka jánhaskani” (Filipusʌ 4:6, 7).

Ini artikulu jimbo, exeaskachi Tata Diosïri kualidadichani enga sánderu xarhataajka: uinhapikua, jánhaskakua, jurhimbikua ka uékperakua. Iásïksïni pʼímarhisïnga eskajtsï seguiriuaka arhintani parajtsï mítini ambe enga ima úkia chánksïni jimbo ka ambe enga uáka.