MÁTERU artikuluecha jimbochi exeskia eska niárasïnga jarhani máru ambe engajtsïni kánikua no sési pʼikuastajka. Jamberijtsï cha iáiasï no sési nitamakuarhini jaka ka eratsintsï eska no jukaparhakueska irekani o eska no nema uandanhiasïnga chánksïni jimbo. Peru uákajtsï seguru jarhani eska Tata Diosï kánikua no sési pʼikuarherasïnga engaksïni exejka kómu nitamakuarhini jarhani. Imaksïni kánikua jukaparharasïndi.

Ima enga Salmo 86 karaka, arini uandakuecha jingoni xarhataspti na enga xáni mintsikaenga Tata Diosïni: “Uandajpaakakini imani jurhiatikua engani uandanhiani jauaka, jimbokarini tʼu kurhachiaka” (Salmo 86:7). Peru, jamberijtsï cha kurhamarhikuarhijka: “¿Nénajtsïni jarhuatasïni Tata Diosï engachi uandanhiani jarhajka?”.

Nájkirukajtsïni Tata Diosï no jirejiresï jarhuataaka juchari uandanhiatecha jingoni, aiachesïndijtsïni pínandikua íntskuni parachi úni orhepani uérani. Imeri Karakata jimbo enga jindeka Biblia, arhisïndijtsïni: “Asï pendienti jatsi je ni ma ambe jimbo, sino Diosïni kómarhi je, ka kurhakuntsï ambe engajtsï uétarhinchajka, diosmeiamukua arhiparini Diosïni iámindu ambe jimbo, ka ísï Diosïri pínandikua enga no nema újka jánhaskani, kuájpiauati chári mintsitechani ka chári eratsikuechani” (Filipusʌ 4:6, 7). Arhianta je arini Bibliaeri karakatechani ka exeakajtsï na enga xáni uandanhiajka Tata Diosï chánksïni jimbo.

Tata Diosï ‘ni sikiera maerhakua’ pájaruni mirikuarhijki. “Jimbokajtsï sánderu jukaparhaska cha ka eska uánikua pájaru sapirhaticha” (Lukasʌ 12:6, 7).

ERATSI JE INI AMBE: Tata Diosï kánikua jukaparharasïndi asta pájaru sapichuni ma enga ambe máeka enga tsípiti jaka. Ísï jimbo, para Tata Diosï, kʼuiripuechachi kánikua sánderu jukaparhakueska eska pájaruecha. Ambe enga sánderu xarharajka echerirhu enga Tata Diosï kueraaka, jindeskachi kʼuiripuecha, jimbokachi ísï kuerakata jarhaska eska ima ka uákachi sánderu xarhataani imeri ambarhati kualidadichani (Génesis 1:26, 27).

 “Oh Jeoba, tʼurini sési jimbo exeska na engani jásï kʼuiripu máeka ka mítiskarini”. ‘Mítisïngari ambe engani eratsijka’. “Exe ambe engarini xáni uandanhiatani jaka” (Salmo 139:1, 2, 23).

ERATSI JE INI AMBE: Tata Diosïksïni sési mítisti. Mítisti ambe engaksïni uandanhiatajka ka ambe engajtsï meru pʼikuarherajka. Nájkirukaksï máteruecha no iámindu ambe kurhanguaka na engajtsï xáni kómu nitamakuarhini jaka, Tata Diosï uandanhiasïndi chánksïni jimbo ka uékasïndiksïni jarhuatani. Indeni ambe mítiparini, exesïngachi eska jukaparhakueska irekani.

“Oh Jeoba, kurhaa juchiti kómarhikua; eskari niáraaka kurhaani na engakini uinhachaparini jarhuajperata kurhachini jaka. [...] Kʼutitsi pararini kurhaani; sóntkurini mókuchintsï engakini uandajpaaka”. Jeoba “kurhauati imecheri kómarhikuani engaksï no ma ambe jatsikuarhika” (Salmo 102:1, 2, 17).

ERATSI JE INI AMBE: Ísïsti enajki Tata Diosï patsa mándani arhini uekua enga kʼuiripu xáni ueka desdeka uénaka irekani (Salmo 56:8). Ístu patsaxati chári uekua. Jimbokaksïni Tata Diosï kánikua jukaparharasïnga, miáxati iámindu uandanhiata ambe enga cha nitamakuarhika ka na engajtsï xáni ueka.

“Asï uápurisï eraa, jimbokani ji chíti Tata Diosïska. Jíkini uinhaperantaaka. Jo, jíkini jarhuataaka”. Jeoba chíti Tata Diosï, arhisïndikini: “Asï jáma chéni. Jíkini jarhuataaka” (Isaías 41:10, 13).

ERATSI JE INI AMBE: Tata Diosïksïni uékasïndi jarhuatani, enga cha niáraska ísï pʼikuarherani enajkijtsï nóteru uáia, imaksïni uinhaperantaati.

Tata “Diosï xáni uéasti parhakpini anapuechani, ísï jimbosï íntspiti imeri máechakua Uájpani paraka nákinterku nema enga imani jakajkuaka, no tsïnchiaka sino jatsini tsípikua para méntkisï” (Juanu 3:16).

ERATSI JE INI AMBE: Tata Diosïksïni xáni xénchasïndi enga íntspika chánksïni jimbo imeri Uájpani, Jesusini. Imeri uarhikua jimbo, uákajtsï tsípikua jingoni irekani ka para méntkisï. *