ENGA cha nemani uarhirakuarhika, jamberijtsï ístu kómu pʼikuarheraka, jandiajku pʼikuarherani ka enajkijtsï úpirini ambe ma perujtsï no úni ísï úni ka jamberijtsï ikiani, kulpabli pʼikuarherani ka chéni. Asta jamberijtsï kurhamarhikuarhika sini jukaparhakueski seguirini jarhani irekani.

Uákajtsï seguru jarhani eska uerani no arhikuekasïnga eskajtsï no balori jukaska. Sánderu sési, arhikuekasïndi na engajtsï xáni jukaparharaenga imani kʼuiripuni. Peru ¿úsïni ma sáni sési pʼikuarherantani?

Nájkirukajtsï ísï exejka enajkiksïni no ma ambe uá sési pʼikuastantani, jamberiksïni ari ambe jarhuataati.

UERANI PARA UÉNHIKUARHINI

Nóksï iáminduecha májkueni xáni no sési pʼikuarherasïndi engaksï nemani uarhiranchajka, ni xáni ióni. Peru uerani, jarhuajpisïndi para nema uénhikuarhini na enga xáni no sési pʼikuarherani jarhajka. Vanesa engachi antesi uandaka, uandasïndi: “Puru uerani jarhasïrenga. Jatsispka parani uénhikuarhini”. Enga ma repentku uarhipka Sofiaeri ermana jemba, ima uandasïndi: “Kánikua no sési pʼikuarherasïnga uékani mirikurhini imani ambe enga úkuarhika. Ísïsti komuksïni eridarhu arhamachini paraksïni sési jupamachintani infeksionini. Ísïri pʼikuarherasïnga enajkiri no uá aguantarini, peru uétarhisïndi ísï úni para erida nimani”.

UANDANI AMBE ENGAKSÏ ERATSIJKA KA PʼIKUARHERANI

No no sési jarhasti engajtsï ménisï uéjka jandiajku jarhani, peru no sési pʼikuarherani jimbokajtsï nemani uarhiranchaska, ambe máesti enga kánikua úkua jukaka  parajtsï jandiajku orhepani uérani. Jared enga 17 jatirika ka uarhiranchani táti jembani, miásïndi: “Seguru eska ima ambe engani uandaenga, no xáni jukaparhakua ambesïrenga, perurini kánikua jarhuatasïrendi aianguani máteruechani na engani pʼikuarherani jarhaenga”. Eunice engachi primeru artikulurhu uandaka, uandasïndi máteru ambe enga jarhuataka: “Uandontskuarhini nemani jingoni, kánikuarini sési pʼikuastantaspti. Exespka eskajtsïni kurhanguchispka ka nóteruni xáni jandiajku pʼikuarheraspkia”.

JIÓKUARHINI MÁTERUECHERI JARHUAJPERATA

Doktora ma uandasïndi: “Imecha engaksï no sési pʼikuarherani jarhajka jimbokaksï uarhiranchaska nemani ka jurajkunksï eskaksï familiaricha ka amiguecha jarhuatauaka, sáno méntkisï úsïndi eskaksï nóteru xáni no sési pʼikuarheraakia ka únksï orhepani uérani”. Arhia je chári amiguechani ambe engaksï uáka úni paraksïni jarhuatani. Imechaksïni jamberi uékajti jarhuatani, peruksï no jánhaskani néna úni (Proverbios 17:17).

SÁNDERU ANDARHIERANI TATA DIOSÏNI

Tina uandantasïndi: “Enga juchiti acheeti matirku uarhipka kanseri jimbo, nóteruni jatsispkia imani kʼuiripuni engani xáni mintsinharhienga ka uénaspka iámindu ambe Tata Diosïni aiangukuarhini. Engani na tsinharhienga, kurhakusïrenga eskarini íntskupiringa uinhapikua parani úni pauani pauani orhepani uérani. Tata Diosïrini mámaru jásï jarhuatasti...”. Teresa 22 jatirispti enga amamba uarhika, miásïndi: “Kánikuarini sési pʼikuastasïrendi pauani pauani arhintani Bibliani. Méntkisï úsïrendi eskani ambakiti ambe eratsipiringa”.

ERANHASKANI TSÍNTSKUANI

Tina uandasïndi: “Uénani jámani, no úsïrenga sési pʼikuarherantani engani eratsienga eskaksï uarhiricha tsíntaaka. Ji uékasïrenga eska juchiti acheeti jíndeni jingoni japiringa ka juchiti sapiichajtuksï uétarhinchasïrendi táti jembani. Peru iásï enga tʼámu uéxurhini nitamakia, meru mintsikaxaka eskaksï uarhiricha tsíntaaka. Indeni ambe erokuarhini, jarhuatasïndirini orhepani uérani. Eranhaskani engachi ménderu exejperantaaka, úsïndi eskani sési pʼikuarheraaka ka pínandikua jatsini”.

Jamberijtsï no jirejiresï sési pʼikuarherantaaka, peru ambe enga Vanesa uandaka, jamberiksïni jarhuataati. Ima uandasïndi: “Ísïri exesïnga enajkiri no uá sési pʼikuarherantani, peruri no méntkisï no sési pʼikuarherani jarhasïnga”.

Miá je: nájkirukajtsï a lo mejori no niáraaka sési pʼikuarherantani, jukaparhakuesti irekani. Tata Diosïri jarhuajperata jingoni, uákajtsï seguirini jarhani chári amiguecha jingoni jarhani ka jatsintsï rasoni ma parajtsï seguirini jarhani irekani. No ióni jimbo Tata Diosï tsítantauati uarhirichani. Ima uékasïndi eska cha ménderu exeantauaka imechani engajtsï uarhiranchaaka ka eskajtsï nóteru méni niáraakia ísï pʼikuarherani eskajtsï iásï na pʼikuarherani jaka.