¿MÉNISÏJTSÏ niáraski xáni no sési pʼikuarherani engajtsï jamberi nóteru uéjkia irekani? Jimajkani, jamberijtsï kurhangukujka Adrianani. Ima kʼéri pʼamenchakua ma kámasïrendi enga jindepka méntkisï uandanhiani jarhani, kómu pʼikuarherani ka no jánhaskani ambe úni. Astaka arhinhapka eska inde ambe jindespka depresioni enga kánikua no sési úkuenga.

Exe je ambe enga nitamanchapka Kaoru, Japón anapu ma acheeti enga táti jembechani kuidariuapka engaksï jatiripkia ka pʼamenchanksï jarhani. Ima uandantasïndi: “Jiánisï, kánikua no sési pʼikuarherasïrenga jimbokani jukari uánikua ambe úsïrenga ánchikuarhitarhu. Sánhani arhispka nóteruni kʼarhimani ka no úni kʼuíni. Uékasïrenga uarhini parani nóteru kómu nitamakuarhinia”.

Nigeria anapu ma acheeti enga arhinhajka Ojebode, uandantasïndi: “Méntkisï kómu pʼikuarherani jarhasïrenga, ka ambe uéjki jimbo uerasïrenga. Niáraspka eratsïni eskani mejori uarhipiringia”. Adriana, Kaoru ka Ojebode nóksï uándikukuarhisti, peru xáni no sési enga mándani uéxurhini sáno ochosientusi mili kʼuiripu uándikukuarhijka.

Tatakechaksï sánderu uáni uándikukuarhisïndi ka uánikua engaksï ísï újka, nóksï jirhinhasïndi jarhuajperata jimbokaksï kʼuratsesïnga. Peru tata Jesukristu uandaspti eska imecha engaksï pʼamenchani jarhajka, uétarhinchasïngaksï doktorini (Lukasʌ 5:31). Ísï jimbo enga cha ísï pʼikuarherani jaka, asï kʼuratse je jarhuajperata jirinhani. Uánikua engaksï depresioni kámajka, sésiksï pʼikuarherastia jimbokaksï tratamientu ma páxaka. Adriana, Kaoru ka Ojebode iásïksï sánderu sési jarhastia jimbokaksï intsïnhaska ambakiti doktoricheri jarhuajperata.

Para atenderiuani imechani engaksï depresioni kámajka, doktorichaksï medisina ambe intsaasïndi, uandontskuarhini imecha jingoni o arhiani eskaksï ini tsimani ambe uáka. Ístu, ima enga pʼamenchakua ambe kámajka, uétarhinchasïndi eska imeri familia ka amiguecha jarhuataaka, kurhangukuaka ka tekakuntani. Jeoba jindesti sánderu ambakiti amigu engachi uáka jatsini ka ambakiti jarhuajperata májtsïni íntskusïndi: imeri Karakatani, Biblia.

Sáno méntkisï, imecha engaksï depresioni kámajka, uétarhinchasïndiksï eskaksï ióni jamberi atenderinhaaka ka jatsisïndiksï para máru ambe mójtakuni paraksï úni orhepani uérani pʼamenchakua jingoni. Jiájkani, enga cha jánguarhintani jaka orhepani uérani depresioni jimbo, uákajtsï seguru jarhani eskajtsï no ióni jimbo niáraaka ambakiti ambe jatsïni. Ísï exesïndi Ojebode enga uandajka: “Uékaxakaia eska úkuarhiaka ambe enga arhijka Isaías 33:24, nani enga uandajka eska niáraaka jurhiatikua enga nóteru ma kʼuiripu Echerirhu anapu uandaaka: ‘Pʼamenchaxaka’”. Chájtujtsï uáka sési pʼikuarherantani mítini eska Tata Diosï aiatspiska jimbanhi “parhakpini” ma, nani enga nóteru jauakia pʼamenchakua, ni uandanhiata o no sési pʼikuarherakua ambe (Jaŋaskuecha 21:1, 4). Nóterujtsï méni kómu pʼikuarherakia. Nóterujtsï méni niáraaka ísï pʼikuarherani ni sikiera miáni (Isaías 65:17).