Tata Diosï arhispti Adanini: “Ima jurhiatikua engari indeni akuaka” uarhiakari (Génesis 2:17). Enga Adani ísï kuerakata japiringa para niárani tʼarhepini ka uarhini, no uétarhipirindi ambe enga Jeoba juramukupka. Adani mítespti eska enga no akupiringa imani anhatapuni, no uarhipirindi.

Paraksï Adani ka Eba úni tsípiti jarhani, nóksï uétarhinchasïrendi imani frutani arhani, jimbokaksï jardinirhu uánikua anhatapuecha jarhaspka engaksï fruta jukapka (Génesis 2:9). Engaksï no apiringa imani frutani, kurhajchapirindiksï Tata Diosïni enga tsípikua íntsaapka ka xarhatapirindiksï eska Jeobajkusï úpiringa arhiani ambe engaksï jatsipiringa para úni.

Parachi úni kurhanguni andiksïsï uarhi Adani ka Eba, ju je exeni uandontskuarhita ma engajtsïni asta iásï jamberi no sési úchini jaka. Noambakiti, ánjeli no sési úri ma, akuitsini ma úraspti para kʼéri chkuanderakua ma uandani. Biblia arhisïndi: “Ka akuitsi sánderu jingontku jámasïrendi eska iámindu juátarhu anapu animalicha engaksï no sési jámenga enga Jeoba uápka. Ísï jimbo, arhispti uarhiitini: ‘¿Meru ísïski eskaksïni Tata Diosï arhiska eskajtsï no jatsiska para arhani iámindu anhatapuecheri engaksï jardinirhu jaka?’” (Génesis 3:1).

Eba mókukuspti: “Jucha uáka fruta akuni iámindu anhatapuechani engaksï jardinirhu jaka. Peru Tata Diosï arini ambe uandasti inde fruteri enga anhatapurhu jukaka enga jardinirhu terojkani jaka: ‘Nójtsï jatsiska para arhani, nómbe, nójtsï jatsiska para pʼárhini; sinojtsï uarhiaka’”. Jimajkani akuitsi arhispti: “Nojtsï niáraaka uarhini. Jimboka Tata Diosï míteska eska ima mismu jurhiatikua jimbo engajtsï akuaka, niáraakajtsï uánikua ambe míteni ka ísïuakajtsï eska Tata Diosï, míteakajtsï ambe sésiski ka ambe nómbe”. Indeni ambe arhiparini, Noambakiti uandaspti eska Jeoba chkuanderari máespka ka eska no uékasïrenga ambakiti ambe íntsaani (Génesis 3:2-5).

Eba jakajkuspti. Ióni pakaraspti exeni anhatapuni. Xarharasïrendi eska kánikua anhenchakuarhispka. Pʼikuspti frutani ka uénaspti arhani. Biblia arhisïndi ambe enga úkuarhipka ísï tátsekua: “Ístu íntskuspti uámbani enga ima imani jingoni japka, ka imajtu uénaspti arhani” (Génesis 3:6).

¡Tata Diosï kánikua kómu pʼikuarherapti enga imeri uájpechaksï enga ima xáni xénchauenga ísï no kurhajchapka! ¿Ambe úspi Jeoba? Arhispti Adanini: “Kánikuari aparhentaaka parari úni t’irekua jatsini astakari k’uanhatsintaaka echerirhu, jimbokari jima uéraska. Jimbokari t’upuriska ka t’upuriri úkuarhintaaka” (Génesis 3:17-19). Ka ísï úkuarhispti, “iámindu jurhiatikuecha enga Adani irekapka, niárasptiksï nobesientusi treinta uéxurhinini,  ka tátsekua uarhispti” (Génesis 5:5). Enga Adani uarhipkia no niraspti auandarhu ni máteru nani ísï. Antesi de Jeoba kuerani Adanini tʼupuri jingoni, ima no ma ambespti, ka enga uarhipka, t’upuri úkuarhintaspti, o ménderu nóteru ambe máesptia. ¡Xáni no sési!

Jimbokaksï no kurhajchaspka Tata Diosïni, Adani ka Eba nóteruksï perfektuesptia ka nóteruksï úpirindia irekani para méntkisï. Jiáni uératini, imecheri kuerpu nóteru májkuenisptia: nóteruksï perfektuesptia ka imani ambeksï úpirindi enga no sési japiringa. Peru no imechajkuksïsï no sési ambe nitamakuarhipirindi indeni ambe jimbo, keritaasptiksï iámindu imeri uájpechani. Roma 5:12 arhisïndi: “Ísï jimbo eska pekadu na juka parhakpinirhu, máechakua kʼuiripuni jimbo ka pekaduni jimbo uarhikua, ka ísï uarhikua pakarani para iámindu kʼuiripuecha jimbokaksï iáminduecha pekadu úska”.

Biblia arhisïndi eska uarhikua ísïska komu takusï ma enga irhiriajka iámindu iretechani ka komu ambe ma enga ójchakueraajka iámindu kʼérati iretechani (Isaías 25:7). Takusï enga irhiriajka kʼuiripuechani ísïsti komueska sïraata enga uándikpijka enga no nema újka sïpakuarhikuni. Ísïsti, iámindu kʼuiripuechaksï uarhixati Adanini jimbo (1 Korintu 15:22). Iásï, ístuchi májkueni kurhamarhikuarhisïnga eska apostuli Pablu: “¿Nérini uá kestatachini ini kuerpuni engarini ísï uandikuni jaka?”. ¿Uájtsïni nema pʼímutantani? (Roma 7:24).