TATA DIOSÏ no uékasïrendi eskachi ísï irekapiringa eskachi na irekani jaka. Ima uékasïrendi eskaksï Echerirhu irekapiringa kʼuiripuecha engaksï janhanharhipiringa imeri juramukuani, marhuataani imeri konsejuechani ka eskaksï xarhatapiringa na enga jásïka Tata Diosï. Uékasïrendi eskaksï kʼuiripuecha pínandikua jingoni irekapiringa, japiringa familiecha engaksï felisipiringa, eskaksï jorhenguarhini japiringa jimbanhi ambe ka iámindu Echerini paraisu úntani.

• “Úsïndi eskaksï guerrecha kʼamakurhiaka iámu parhakpinirhu” (Salmo 46:9).

• “Iásïstia engari tʼu sési jimbo xarhatakuauaka chíti ikiatapu [...] para eskari kʼamajkuantaauaka imechani engaksï ikichakua újka parhakpinini” (Jaŋaskuecha 11:18).

• “No nema enga jima irekaaka uandaati: ‘Pʼamenchaxaka’” (Isaías 33:24).

• “Juchiti erakukatechaksï marhuataati ambe engaksï uáka imecheri jájkicha jingoni” (Isaías 65:22).

¿Nénaksï uá ísï úkuarhini i profesiauecha? Tata Diosï, Rei ústi imeri Uájpa Jesusini para auandarhu uératini juramukuani iámindu Echerirhu anapuechani. Biblia arhisïndi eska Tata Diosïri Reinueska (Daniel 2:44). Ka ístu arini ambe uandasïndi Jesusiri: “Diosï íntskuati juramukuani [...], ka imeri juramukua no méni kʼamaraati” (Lukasʌ 1:32, 33).

Enga Jesusi Echerirhu japka, kʼérati milagruechani uáspti para xarhatani eska jiáni enga juramuni jauakia, kʼuiripu sánderu sési irekaaka.

• Iámindu jásï pʼamenchakua ambe jimbo tsinajpespti, ísï xarhataspti eska úsïnga méntku kénditaani (Mateu 9:35).

• Úspti eska marirhu nóteru no sési jánhaskuarhipiringuia, ísï xarhataspti eska úsïnga pʼinguni naturalesani (Markusʌ 4:36-39).

• Uáni kʼuiripuni tʼireraspti, ísï xarhataspti eska úsïnga kéndaani kʼuiripuechani ambe engaksï uétarhinchajka (Markusʌ 6:41-44).

• Boda ma jimbo, itsïni binu úntaspti. Ísï xarhataspti eska imeri juramukua jimbo, tsípikua jingonchi irekaaka (Juanu 2:7-11).

¿Nénajtsï uá jatsini imani ambe enga Tata Diosï xáni aiakuaka imechani engaksï xénchajka? Xanharu ma jarhasti engajtsï jimbo jatsika para jámani. Biblia arhisïndi eska xanharu máeska “enga tsípikuarhu pájpijka” ka eska no uánikua kʼuiripu exentasïnga (Mateu 7:14).

¿Ambe arhikuekasïni inde xanharu enga tsípikuarhu pájpijka para méntkisï? Arhikuekasïndi iámindu imani ambe engajtsïni Tata Diosï arhijka eskachi uáka. Imajtsïni mismu arhisïndi: “Ji, Jeoba, chíti Tata Diosïska, Ima engakini jorhendajka parari sési jarhani, Ima engakini arhini jaka nani engari ísï xanharaaka” (Isaías 48:17). Engachi ini xanharu jimbo jámaska, sánderuchi sési irekaaka.

 Jesusi uandaspti: “Ji jindeska xanharu, ka ji jindeska engani sési jimboeka, ka ístu ji jindeska tsípikua” (Juanu 14:6). Jakajkuni ambe enga Jesusi jorhentpika ka májkueni úni eska ima, uáti eskachi andarheraaka Tata Diosïni ka úsïndi eskachi sánderu sési irekaaka.

¿Nénajtsï uá exentani ini xanharuni? Nájkirukaksï uánikua relijionicha o xanharuecha jaka, Jesusi uandaspti: “No iáminduecha engajtsïni arhijka: ‘Tata, Tata,’ inchaatiksï auandarhu anapu juramukuarhu, solu imecha engaksï újka eska juchiti Táti auandarhu anapu na jeiapanhintajka” (Mateu 7:21). Ístu uandaspti: “Chájtsï mítiantauaka indeni ambe jimbo engaksï újka” (Mateu 7:16). Bibliaksïni jarhuataati míteni nákiski relijioni jurhimbiti (Juanu 17:17).

¿Ambejtsï uá úni parajtsï indeni xanharu jimbo jámani? Uétarhisïndi eskajtsï míteaka imani engajtsïni tsípikua íntskuka. Míteni néski ima, na arhinhasïni, na jásïski ima, ambe úni jaki juchantsïni jimbo ka ambe uékasïni eskachi uáka. *

Tata Diosï no uékasïndi eskachi solu ánchikuarhiaka, tʼireni, tsípikuarhini ka familia ma jatsini. Ima uékasïndi eskachi míteaka ka imeri amigueni. Engachi kurhajchajka, xarhatasïngachi eskachi xénchasïnga. Jesusi uandaspti: “I jindesti tsípikua para méntkisï, eskaksïni mítiaka tʼun[guini] engari tʼujku jindeeka Diosï engari sési jimboeka” (Juanu 17:3).

Parajtsï tsíperani imani Tata Diosïni enga sési jimboeka, jamberijtsï jatsiaka para máru ambe mójtakuni. Jamberijtsï ísï exeaka enajki úkua jukaa, peru indeni xanharu jimbo jámani uáti kánikua sési ambeni, solu uétarhisïndi eskajtsï uénaaka ísï úni. Engajtsï uéjka sánderu míteni Tata Diosïri ambe, kurhajkuarhi je juchari pájina Internetirirhu www.pr418.com parajtsï Bibliaeri ambe jorhenguarhini. Jeobaeri testiguechaksïni tsípikua jingoni pʼorhembiaka jima ka ima jandora enga cha uáka.