¿Andisï kʼuiripu uéjki irekani para méntkisï? Biblia arhisïndi eska Tata Diosï úska para juchari mintsita uékani irekani para méntkisï (Eclesiastés 3:11). Ka ístujtsïni arhisïndi eska Tata Diosï uékperakueska (1 Juanu 4:8). Ini ambe mítiparini, ¿sési japirini eskajtsïni Tata Diosï ísï kueraapiringa indeni ambe uékaparini ka jinichi no úni ísï irekani?

No nema uékasïndi uarhini. Biblia arhisïndi eska uarhikua “ikiatspiti” máeska (1 Korintu 15:26). Ménisïchi sapichku uarhisïnga ka ménisïchi ióndasïnga, peruchi niárasïnga uarhini. Uánikua kʼuiripu no uékasïndi eratsini uarhikueri ambe, astaksï chésïndi. ¿Niáraa ma jurhiani enga nóteru nema uarhiakia?

¿Mítespijtsï eska Tata Diosï no méni uékaspka eskaksï kʼuiripuecha uarhipiringa? Ambe enga Biblia uandajka ixú Génesis, xarhatasïndi eska Tata Diosï uékasïrenga eskachi irekapiringa para méntkisï Echerirhu. Jeoba kuerasti Echerini iámindu ambe jingoni enga kʼuiripu uétarhinchapiringa para úni irekani ka felisini. Jiájkani kueraspti orheta acheetini, Adanini, ka paraisurhu peraspti enga Edeni japka. Tátsekua, Tata Diosï exespti “iámindu ambe enga kueraapka ka ¡exe je!, kánikua ambakiti ambespti” (Génesis 1:26, 31).

Tata Diosï ísï kueraspti Adanini eska ima, kʼuiripu máespti enga perfektuepka (Deuteronomio 32:4). Ka ístu Eba enga Adaniri témbaepka, imeri kuerpu ka eratsikua perfektuesptiksï. Jeoba juramukuaspti: “Kánguarhia je sapiichani ka uánikua úkuarhi je ka uinira je echerini ka ánchita je, ka juramukua je marirhu anapu kuruchechani ka iámindu animalichani engaksï kárajka ka iámindu animalichani engaksï echerirhu jámajka” (Génesis 1:28).

Úni eska Adani ka Ebaeri uájpechaksï uánipiringa Echerirhu, ióni nitamapirindi. Para úni úkuarhini ambe enga Tata Diosï uéjka, Eba jatsipirindi para sapiichani kánguarhiani, ka imeri uájpechajtuksï kánguarhiapirindi sánderu sapiichani, astaka iámindu Echerirhu irekanhapiringa (Isaías  45:18). Engaksï Adani ka Eba no niárapiringa exeni na enga kumplirikuarhipiringa Tata Diosïri eratsikua ka soluksï irekani para uájpechani ka jamberi nimakua jembechani exeani, ¿sési japirini eska Jeoba indeni ambe juramukuapiringa?

Iásï, eratsi je para animalichani kuidariuani. Adani jatsispti para nombrichani jirinhakuani ka inde ambe kánikua ióndakuarhipirindi (Génesis 2:19). Ístu, jatsipirindi para sési míteni imani ambe enga Jeoba kueraapka para úni kuidarini ka inde ambe sánderu tiempu pápirindi.

Ísï jimbo, ima tsimani juramukuecha enga Tata Diosï íntsaapka Adani ka Ebani, paraksï kuidariuani animalichani ka úni eska uáni kʼuiripu irekapiringa Echerirhu, xarhatasïndi eska kuerauaspka paraksï ióni irekani. Ka Adani ióni irekaspti.

Biblia arhisïndi eska antesi de Dilubiu úkuarhini, kʼuiripuechaksï sánderu ióni irekasïrenga eska iásï. Génesis 5:5 arhisïndi: “Iámindu jurhiatikuecha enga Adani irekapka, niárasptiksï nobesientusi treinta uéxurhinini”. Ka ístu uandaasïndi seisi kʼuiripuechani engaksï jukari nobesientu uéxurhini irekapka: Seti, Enosi, Kenani, Jaredi, Matusaleni ka Noe enga seisientu jatiripkia enga Dilubiu úkuarhipka (Génesis 5:6-27; 7:6; 9:29). ¿Andiksïsï xáni ióni irekapi?

Iámindu indechaksï jiáni andajpenuspti enga nótki xáni iónipka engaksï Adani ka Eba pekaripka. Jamberi jimboksïsï xáni ióni irekapti. Peru para úni ióni irekani, ¿néna marhuasïni perfektueni? ¿Nénachi uá nóteru uarhinia? Para mókuantaani ini kurhamarhikuechani, ju je orheta míteni andichisï tʼarhepijki ka uarhini.