ÍKSÏ uandakuecha rei Salomoniri enga xáni jánhaskatipka sési xarhatasïndi na engachi pʼikuarherajka iáminduecha. Nóchi ióni irekasïnga... Jamberi jimbosï méntkisï kʼuiripu jirinhantajti néna sánderu ióni irekani. Desde iónisï mámaru ambe ústia.

Por ejemplu, eratsi je rei Gilgamés enga Sumeria reipka. Ma uánikua leiendaecheri enga imeri ambe uandajka, arhisïndi eska nájkiruka úpiringa no sési ambe úkuarhinchani, iauanisï niraspka para jirinhani néna no méni uarhini peru no ma ambe exentaspti.

Iónistia engaksï China anapu sïkuamicha jánguarhintapka jirinhani sïpiata ambe para sánderu ióni irekani. Itsïmakueni jásïksï ma úspti enga sánisï merkuriu ka arséniku jukapka. Uandanhasïndi eskaksï máru China anapu kʼéri achamasïcha uarhispka engaksï indeni apka. Jini Europa (imani uéxurhinisï 500 d. de J. a 1500 d. de J.), máru sïkuamichaksï jánguarhintaspti úni eska oru, enga ióni marhuajka, akuepiringa jimbokaksï eratsisïrenga eska úpiringa úni para kʼuiripu sánderu ióni irekani.

Ísï eska ióntki na únhani japka ambe ma para kʼuiripu sánderu ióni irekani, ístuksï iásï máru sientifikuecha engaksï tsípikuani estudiarijka ka imecha engaksï iámindu informasionini estudiarijka enga selulecharhu jarhajka (genetistas) jánguarhintaxatiksï exeni andichisï tʼarhepijki. Ambe engaksï xáni úkia, xarhatasïndi eska kʼuiripu seguirixaka jakajkuni eska ma jurhiani uáka úni para nóteru nema tʼarhepinia ni uarhini. Peru, ¿ambeksï exentaskia?

Sientifikuecha engaksï kʼuiripueri selulani estudiarijka, uánikua ambeksï uandaspti andichisï tʼarhepijki ka uarhini. Arini uéxurhinicha jimbo, ústiksï eska animalicheri selulecha ka kʼuiripuecheri sánderu ióni marhuauaka. Ini ambe jimbo, máru jatsikuarherichaksï íntsaaxati tumina sientifikuechani paraksï míteni andichisï uarhijki. ¿Ambeksï xáni úskia imecheri estudiuecha jingoni?

Jánguarhintani eska kʼuiripu sánderu ióni irekaaka. Máru sientifikuechaksï uandasïndi eskachi niárasïnga tʼarhepini imani ambe jimbo enga kromosomecheri puntarhu úkuarhijka engaksï ísï  mítikateka komueska telómeruecha. Jiáni engaksï selulecha sánderu uánijka, telómeruechaksï kuájchakusïndi imani informasionini enga selulecharhu jaka, peru méni enga ísï úkuarhijka telómeruechaksï sánderu sapirhasïndi. Tiempu jingoni, selulechaksï nóteru arhukurhisïndia ka uénasïngachi tʼarhepini.

Elizabeth Blackburn, enga premiu ma intsïnhapka imeri ánchikuarhiteri siensia jimbo, ka imeri jarhuajpirichaksï exentaspti sustansia ma enga újka eskaksï telómeruecha ióndaaka sapirhantani, ka indeni ambe jimbo, eskaksï selulecha no sóntku kʼamakurhiaka. Peruksï ístu uandaspti eskaksï no telómeruecheska engaksï újka para kʼuiripu sánderu ióni irekani.

Mójtakuani selulechani. Engaksï juchari selulecha nóteru arhukurhijkia ka sánhani arhinksï kʼamakurhini, nóteruksï jarhuataasïndia máteru selulechani engajtsïni kuájchakujka pʼamenchakuecheri ambe, i ambe úsïndi eskachi pʼamenchaaka, pʼamerhikuarhini ka máteru ambe. Nótki xáni iónisïndi engaksï Francia anapu sientifikuecha mójtakuaka máru selulechani engaksï kʼuiripuechani pʼitaaka engaksï jatirikia, máruksï jukari 100 jatiristia. Profesori Jean-Marc Lemaître, enga orhejtsïkuni japka ini ambe, uandaspti eska imeri ánchikuarhita xarhataspka eskaksï selulecha uáka ménderu jimbanhintani.

Nóksï iámindu sientifikuecha uandasïndi eska ima ambe enga jarhuatajka kʼuiripuni para no sóntku tʼarhepini, uáka eskachi sánderu ióni irekaaka. Ísïsti eska desde 1,800 uératini, kʼuiripuechaksï sánderu sáni ióni irekaskia, peru jindesti jimbokaksï sánderu limpiueskia, medisina ambeksï úrasïnga enga marhuakuajka paraksï no kʼérati pʼamenchakua ambe pʼirani ka bakunecha jimbo. Kʼuiripuecha engaksï selulechani estudiariuajka, uandasïndiksï eskachi irekaxakaia xáni eskachi na xáni irekapiringa.

Ma tresmili kinientu uéxurhini nitamastia enga Moisesi, Bibliaeri karari ma, uandapka: “Na engachi xáni ióni irekajka, jindesti setenta uéxurhini o ochenta enga ma meru kánikua uinhapikua jatsiaka. Peru kánikua uandanhiakuarhisïndi ka no sési pʼikuarherakuarhini; sóntku nitamasïndi tiempu ka nóteruchi jarhasïnguia” (Salmo 90:10). Nájkiruka kʼuiripu xáni jánguarhintakia para úni eskachi ióni irekaaka, xántkuchisï irekajka na enga xáni Moisesi uandapka.

Terukutantaparini na engachi xántku irekajka jucha ka na engaksï xáni ióni irekajka máru animalicha komu tortuga enga jukari 150 uéxurhini irekajka ka pʼukuricha, komu uáparhikua enga uánikua uéxurhini jarhajka, jamberichi kurhamarhikuarhijka: “¿Ambe marhuasïni setenta o ochenta uéxurhintku irekani?”.