NÁJKIRUKAKSÏ Adani ka Eba úka eskachi no perfektuepiringa ka uarhini, no mójtakurhisti ambe enga Tata Diosï uéjka para kʼuiripuecha. Iámindu imeri Karakatarhu enga jindeka Biblia, somentsïni aiangusïndi eska no mójtakurhixaka ambe enga ima uéjka.

• “Echeri jurhimbiticheriuati, ka jimaksï irekaati para méntkisï” (Salmo 37:29).

• “Ima, ántaati uarhikuani para méntkisï, ka juchari Juramuti Jeoba kutsunharhikuauati uekua iáminduechani” (Isaías 25:8).

• “Últimu ikiatspiti enga andanhaaka jindesti uarhikua” (1 Korintu 15:26).

• “Nóteru jauatia uarhikua, ka ni uandanhiata, ka nóteru nema ueraati o pʼamenchani” (Jaŋaskuecha [Apocalipsis] 21:4).

¿Ambe uá Tata Diosï para “ántani” o kʼamajkuni uarhikuani para méntkisï? Eskachi na exekia, Biblia arhisïndi eskaksï jurhimbiticha irekaaka para méntkisï Echerirhu. Peru ístu arhisïndi eska “no ma kʼuiripu jarhaska echerirhu enga jurhimbitiika ka enga méntkisï ambakiti ambe úni jauaka ka no pekarini” (Eclesiastés 7:20). ¿Inde ambe arhikuekasïni eska Tata Diosï no janhanharhiaka ambe enga juramukia solu para kʼuiripu úni irekani para méntkisï? Nómbe, Tata Diosï no méni úpirindi indeni ambe jimboka no úsïnga chkuanderani (Titu 1:2). Jiájkani, ¿ambe uá Tata Diosï para imani ambe úni enga eratsitini japka para kʼuiripuecha?

Uékperakua jimbo, Jeobajtsïni euajpintasti uarhikueri. Enga Biblia úrajka uandakua euajpintskua, arhikuekasïndi xáni maiampintani na enga xáni jukaparhaka ima ambe enga ambenarhikuarhika o eska ísïmindu úkuarhiaka eska na jurhimbitkueka. Jimbokachi iámindu kʼuiripuecha no perfektueska ka niáraakachi uarhini, Bibliajtsïni arhisïndi: “No ma úsïndi euájpintani ermanuni ma o íntskuni ambe ma Tata Diosïni para imajkumindu pʼímutantakuarheni, (uétarhesïndi kánikua jukaparhakua ambe maiampini para imecheri tsípikuani pʼímutantani, jimbosï no nema újti ísï úni)” (Salmo 49:7, 8).

Enga kʼuiripu ma uarhijka, solu imeri pekaduecha jimbo maiampintasïndi. No úsïndi májkumindu pʼímutantakuarheni ni máteru kʼuiripueri pekaduechani maiampiantani (Roma 6:7). Uétarhinchasïrengachi eska nema, enga perfektuepiringa ka no ma kʼamanharhintskua jingoni, íntspepiringa imeri tsípikuani juchantsïni jimbo (Ebreu 10:1-4).

Indeni ambesï úti Tata Diosï. Axaspti ixú Echerirhu imeri Uájpani, Jesusi, enga auandarhu japka para kʼuiripu perfektu máeni (1 Pedru 2:22). Jesusi uandaspti eska jurhaspka “íntspini imeri tsípikuani para uánikuechani piantaani” (Markusʌ 10:45). Jesusi uarhisti para uarhikuani kʼamajkuni ka úni eskachi sánderu orhepani uáka irekani para méntkisï (Juanu 3:16).

Irekaxakachi jurhiatikuecha jimbo enga peligru jaka, i ambe xarhatasïndi eskachi “últimu jurhiatikuechani jimbo” jarhaskia ini parhakpiniri enga xáni no sési jánhaskuarhini jaka, ísï eska na arhijka Biblia (2 Timoteo 3:1). Últimu jurhiatikuechaksï jiáni kʼamakurhiati “imani jurhiatikua jimbo enga Diosï jusgarpiaka ka engaksï tsïnchiaka ima kʼuiripuecha engaksï no janhanharhijka imani” (2 Pedru 3:3, 7). Peru imechaksï tsípiti pakaraati engaksï xénchajka Tata Diosïni ka “jatsiatiksï tsípikua para méntkisï” (Mateu 25:46).

 Ístu, uánikua kʼuiripuecha engaksï tsíntaakia, uátiksï irekani para méntkisï. Jesusi úsïndi tsítantaani uarhirichani. Enga ireta Naini nipka, pʼamojperakua jimbo tsítantaspti uarhiiti tsïndiri uájpani, enga solu imantku kánguarhienga (Lukasʌ 7:11-15). Apostuli Pablu karaspti: “Ísï mintsikaxaka Diosïni [...] eskaksï tsíntaaka uarhiricha imecha engaksï ambarhatiika ka ístu imecha engaksï malueka [o engaksï no úka mítini Jeobani]”. I ambe enga sánderu orhepani úkuarhiaka xarhatasïndi na enga xáni xénchaajka Tata Diosï kʼuiripuechani (Ukuecha 24:15).

Uánikua kʼuiripuechaksï uáti irekani para méntkisï. Biblia uandasïndi: “Echeri jurhimbiticheriuati, ka jimaksï irekaati para méntkisï” (Salmo 37:29). Jiajkanksï uáti májkueni tsípikua jingoni uandani ísï eska apostuli Pablu na uandapka ase dosi mili uéxurhini: “Uarhikua, ¿naniteru jarhaski chíti tʼenajpitarakua?”. Uarhikua, “¿naniterujtsïni na andaa?” (1 Korintu 15:55). Jiáni kʼóru, kʼamajkunhaati kʼuiripuecheri sánderu kʼéri ikiatspiti.