Imeri nombri. Tata Diosï mismu uandasïndi: “Ji jindeska Jeoba. Inde jindesti juchiti nombri” (Isaías 42:8). Bibliarhu, siete mili xanhari ísï karakata jarhasti Tata Diosïri nombri. Peru, máru Bibliaecharhuksï pʼikuntasti Tata Diosïri nombrini ka mójtakustiksï máteru uandakuecha jingoni komu Tata. Tata Diosï uékasïndi chári amigueni ka eskajtsï cha uandajpaaka imeri nombri jimbo (Salmo 105:1).

Na engachi ístu uáka arhini Jeobani. Bibliarhu, ístuksï jarhasti máteru uandakuecha para Jeobani arhikuekani komu Tata Diosï, Ima enga Iámu ambe újka úni, Kuerajpiri, Táti, Tata ka Kʼéri Juramuti. Uánikua imeri marhuarichaksï úraasïndi indeni uandakuechani engaksï kómarhijka ka ístuksï úrasïndi imeri nombrini, Jeoba (Daniel 9:4).

 Na enga jásïka. Tata Diosï espiritu máesti (Juanu 4:24). Biblia uandasïndi eska ‘no nema exeska Diosïni ni meni’ (Juanu 1:18). Ístu Biblia uandasïndi na enga pʼikuarherajka Tata Diosï. Ambe engachi újka, úsïndi sési pʼikuastani o no sési pʼikuastani (Salmo 78:40, 41; Proverbios 27:11).

Imeri sési járhati kualidadicha. Tata Diosï iáminduechani májkueni kaasïndi, nani uéjkiksï anapueni oksï mámaru járhani (Ukuecha 10:34, 35). Ístu xarhatasïndi pʼamojperakua, tekantskua, ambakiti uékperakua ka méntkisï jurhimbitku uandasïndi (Éxodo 34:6, 7). Peru, tʼámu kualidadichani sánderu xarhataasïndi.

Uinhapikua. Ima jindesti Tata Diosï enga Iámindu ambe újka úni. I ambe arhikuekasïndi eska iámindu ambe kumplirisïnga ambe enga aiatspijka (Génesis 17:1).

Jánhaskakua. Jeoba jindesti enga sánderu jánhastiika. Ísï jimbo, Biblia uandasïndi eska “imajku jideska Diosï enga iámindu ambe míteka” (Roma 16:27).

Jurhimbikua. Jeoba méntkisï jurhimbitku úsïndi ambe ma. Iámindu ambe sési úsïndi ka ísïmindu eska na jindeka (Deuteronomio 32:4).

Uékperakua. Biblia uandasïndi eska Tata Diosï “jindeska uékperakua” (1 Juanu 4:8). Tata Diosï no solu xarhatasïndi uékperakua, sino ima jindesti uékperakua. Iámindu ambe enga ima újka, xarhatasïndi na enga xáni uékpijka ka inde ambejtsïni mámaru ambe jimbo marhuachisïndi.

Na enga sési pájperajka kʼuiripuecha jingoni. Tata Diosï jindesti juchari Táti auandarhu anapu engajtsïni xáni xénchajka (Mateu 6:9). Engachi mintsikaska imani, uákachi imeri amigueni (Salmo 25:14). Ima kánikua uandanhiasïndi juchantsïni jimbo, jimbosï uéjti eskachi andarhieraaka imani kómarhikua jimbo ka eskachi aiangukuarhiaka iámindu ambe engajtsïni uandanhiatajka (Santiagu 4:8; 1 Pedru 5:7).

Jesusi no Tata Diosïsti. Tata Diosï jandiajku kueraasti Jesusini. Jimbosï Biblia uandajti eska Tata Diosïri Uájpeska (Juanu 1:14). Jeoba kueraasti Jesusini, imeri orheta uájpa. Tátsekua úspti eska ima jindepiringa ánchikuarhiri jánhasti ka úraspti para kueraani ambe enga xáni auandarhu ísï jaka ka iámindu ambe enga tsípiti jaka (Proverbios 8:30, 31; Kolosasi 1:15, 16).

 Jesusi no méni uandaspti eska ima Tata Diosïspka. Sánderu sési, uandaspti: “Ji jurhaska imeri kuenta jimbo ka imarinisï axati” (Juanu 7:29, TNM). Jiáni enga uarhiiti ma jingoni uandontskuarheni japka, imeri chúxapati ma, para Jeobani arhikuekani uandaspti: ‘Juchiti Táti ka chári Táti ka juchiti Diosï ka chári Diosï’ (Juanu 20:17). Enga Jesusi uarhipka, Jeoba tsítantaspti para ménderu auandarhu irekani, ústi eska imeri jurhijkandani jimbo uaxakapiringa ka kánikua juramukua jatsini (Mateu 28:18; Ukuecha 2:32, 33).

Jesukristuksïni uáti jarhuatani andarhierani Tata Diosïni

Jesusi jurhasti Echerirhu parajtsïni jorhendani na enga jásïka Táti jemba. Jeoba mismu uandaspti arini ambe Jesusiri: “I jindesti juchiti Uátsï [...] kurhajcha je” (Markusʌ 9:7). Jesusi jindesti enga sánderu sési míteka Tata Diosïni. Ima uandaspti: No “nema mítesti ne enga jindeka Diosï Táti, solu imeri Uájpa ka ístu ima enga Diosïri Uájpa uékaaka mítitarani” (Lukasʌ 10:22).

Jesusi meru sési xarhatasti na enga jásïka Tata Diosï. Jesusi xáni sési terokukuntaspti na enga jásïka imeri Táti, jimbosï úpti uandani: “Ima engarini exeka jindeni, exesti Diosï Tátini” (Juanu 14:9). Jesusi jarhuataaspti kʼuiripuechani paraksï andarhierani Tata Diosïni, jimboka imeri uandakuecha ka úkuecha jingoni xarhataspka na enga xáni xénchpijka imeri Táti jemba. Jesusi uandaspti: “Ji jindeska xanharu, ka ji jindeska engani sési jimboeka, ka ístu ji jindeska tsípikua. Ka no nema jurhasïndi andarhierani Diosï Tátini enga no jindeni” jimboeuaka (Juanu 14:6). Ístu uandaspti: “Imecha engaksï sési jimbo kómarhijka, kómarhiatiksï Diosï Tátini mintsita jingoni ka sési jimbo, jimboka Diosï Táti xárhati kómarhirichanisï jirinhaajka para eskaksï kómarhiaka” (Juanu 4:23). Ísïsti, Jeoba xarhati kʼuiripuechanisï jirinhani jati ísï eska cha engaksï uéjka míteni ambe enga jurhimbitkueka imeri ambe.