Uákachi Bibliarhu exentani jurhimbikuani
Desde iónisïa, uápurisï anapuecha ka mámaru jásï kʼuiripuechaksï niárasti jakajkuni eska ísïska ambe enga Biblia uandajka. Ka iásï jamberi, uánikuechaksï imani ambe úsïndi enga Biblia jorhentpijka. Peruksï máteruecha uandasïndi eska libru máeska enga iásï nóteru marhuajkia o eska puru uandantskua ambeska. ¿Cha na exesïni? ¿Uáchi Bibliarhu exentani jurhimbikuani?
ANDIJTSÏSÏ UÁ MINTSIKANI BIBLIANI
¿Nénajtsï uá míteni sintsï uá mintsikani ambe enga Biblia uandajka? Eranhaska je eskaksïni chári amigu ma méntkisï jurhimbitku aiangusïnga iámindu ambe, ¿uandapirintsï eska mintsinharhikueska? Jimajkani, ¿Biblia ísïski komu amigu ma enga mintsinharhikueka? ¿Méntkisï jurhimbitku uandantasïni? Ju je exeani máru ejempluechani.
Jurhimbitku ambeksï karaspti
Imecha engaksï Bibliani karapka jurhimbitku ambeksï karaspti, asta imani ambe engaksï imecha mismu no sési úpka. Por ejemplu, profeta Jonasi karaspti eska ima no uékasïrenga kurhajchani Jeobani (Jonás 1:1-3). Últimu karaspti eska Tata Diosï jurhimberantaspka, peru nóteru karasptia eska tátsekua niáraspka mójtakurhini (Jonás 4:1, 4, 10, 11). Engaksï Bibliaeri kararicha méntku iámindu ambe karapka, xarharasïndi eskaksï mintsita jingoni jaiapanhintasïrenga ambe enga jurhimbitkueka.
Konsejuecha engajtsïni jarhuatajka
¿Úsïntsïni Bibliaeri konsejuecha jarhuatani pauani pauani anapu ambe jingoni? Jo. Por ejemplu, exe je ambe enga uandajka Biblia para ma sési pájperani máteruecha jingoni. “Eska cha na uékajka eskaksïni kámaaka kʼuiripuecha, chájtu ísï kaa je imechani iámindu ambe jimbo” (Mateu 7:12). “Enga mókuntskua tekaantskua jingonijka, kénditasïndi ikiatapuni” (Proverbios 15:1). Ístu, Bibliaeri konsejuechaksï iásï májkueni marhuaxati eska jiáni engaksï karanhapka.
Jurhimbitku uandantasïndi ióntki anapu ambe
Desde iónisïa, uánikua ióntki anapu ambe exenhantasti enga xarhatajka eska meru ísïska ambe enga Biblia uandajka eska úkuarhispka, k’uiripuecheri ambe ka lugaricheri. Por ejemplu, ju je exeni ambe ma. Jiánisï enga Nemiasi irekapka, Biblia uandasïndi eskaksï máru Tiru anapuecha Jerusaleni irekaxapka (Tiru, Fenisia jarhaspti) ka eskaksï kurucha ‘ambe juásïrenga ka máteru ambe para íntspikuarhini’ (Nehemías 13:16).
¿Jarhaski ambe ma enga xarhatajka eska inde ambe ísïska? Jo. Imecha engaksï ióntki anapu ambe jirhinhajtajka, exentastiksï máru ambe jini Israeli enga Fenisia anapuepka, inde ambe xarhatasïndi eskaksï ióntki inde tsimani iretecha ataratsperantasïrenga ambe. Ka no solu inde ambe, ístuksï jini Jerusaleni pʼiskuntasti kuruchecheri pakarakata ambe engaksï atarantsticha Tiru uératini juenga. Engaksï na estudiaripkia indeni ambe, kʼuiripu ma enga istoriaeri ambe exejka, uandaspti: “Kasichi seguru jarhaska eskaksï Tiru anapuecha kurucha pásïrenga atarantani Jerusaleni, ísï eska na uandajka Nehemías 13:16”.
Jurhimbitku uandantasïndi siensiaeri ambe
Nájkiruka Biblia libru máeka enga Tata Diosïri ambe uandajka ka imeri ambe enga ióntki úkuarhipka, ístujtsïni jurhimbitku aiangusïndi enga kʼuiripuecheri ka echeriri ambe uandajka. Ju je exeni ejemplu ma.
Ma tresi mili kinientu uéxurhini ísïstia enga Biblia tʼuini uandapkia eska Echeri “no ma ambe jimbo” tirhipakata jarhaska (Job 26:7). I ambe xarhataspti eska no ísïspka enga uandanhenga eska Echeri itsïrhu karhakua jarhaspka o eska kʼéri tortuga ma pʼínguxapka. Ma mili sieni uéxurhini nitamasptia enga libru de Job karanhapka peruksï kʼuiripuecha seguirixapti eratsini eska Echerini pʼínguxapka ambe ma. Apenasi tresientu uéxurhini nitamasti, 1687 jimbo enga Isaac Newton aianhpipka ambe enga inbestigaripka imani uinhapikueri enga újka eska iámindu ambe echerirhu antsitakuarhiaka (fuerza de gravedad) ka eska uandantapiringa ambe enga újka eska Echeri jurhiatani uantsitani jauaka. Ambe enga i acheeti niárapka míteni, xarhataspti eska ísïska ambe enga Biblia jukari tresi mili uéxurhini antesi tʼuini uandapkia Echeriri ambe.
Jurhimbitku uandantasïndi profesiaecheri ambe
¿Náksï xáni mintsinharhikueski Bibliaeri profesiaecha? Ju je exeni ejemplu ma: Isaiasi uandaspti na enga kʼamajkunhapiringa Babilonia.
Profesia: Uéxurhini 732 ante de Jesusi, jiáni enga Babilonia nótki xáni kánikua juramukua jatsipka, Isaiasi, Bibliaeri karari ma, uandaspti eska Babilonia kʼamajkunhapiringa ka eska tátsekua jima nóteru nema irekapiringuia (Isaías 13:17-20). Isaiasi ístu uandaspti eska ima enga kʼamajkupiringa indeni iretani, jindepiringa Siru. Ka asta uandaspti ambe enga úpiringa para kʼamajkuni, anhaxustaapirindi iorhekuechani engaksï jimesïsï nitamaenga. Ístu uandaspti eskaksï iretarhu anapu puertecha mítakuarhitini japiringa (Isaías 44:27–45:1).
Na enga kumplirikuarhipka: Ma dosientusi uéxurhini ísï tátsekua enga Isaiasi profesiani karapka, Persia anapu rei kʼamajkuspti Babiloniani. I rei arhinhasïrendi Siru. Jimboka Babilonia sési ótakata jarhaspka bardecha jingoni, Siru eratsispti ríu Éufratesi jimbo parhikuni enga jimesïsï nitamenga. Sirueri ejersitu úspti eska itsï máteru nanisï nipiringa, jimesïsï enga atsïmu japka. Enga itsï na tsikajtakuecharhu niárakuapkia soldaduechani, ríurhu ísïksï parhimispti astaksï siudadirhu puertecharhu niárani. I ambejtsïni ísku pakatasïndi, jimbokaksï Babilonia anapuecha no jamberi kuenta íntskukuarhispka eskaksï no míkaaspka puertechani, Sirueri ejersitu inchaakuspti ka kʼamajkusptiksï Babilonia.
Peru kuerataxapti para ma ambe kumplirikuarhini: ¿meru nóteru nema irekapirinia jima? Kʼuiripuechaksï ióni jamberi irekaspti Babilonia. Peru ini jurhiatikuecha jimbo, Babiloniaeri ruinechaksï —engaksï Bagdad (Irak) no iauani jaka— xarhatasïndi eska profesia iámu kumplirikuarhiska. Ísïsti, Biblia jurhimbitku uandantasïndi enga uandajka ambe enga úkuarhiaka sánderu orhepani.
