Máteru artikulu jimbo, exeskachia imani míndani enga Jesusi uandapka. Inde mínda xarhatasïndi eska Tata Diosïri Reinu auandarhu uaxastanhaskia ka eska Jesukristu jindeska Rei.

Biblia uandasïndi ambe enga orheta úpka Jesusi enga uénapkia juramuni, orheta, pétantaspti Satanasini ka demoniuechani auandarhu uératini. Íchaksï iásï solu Echerirhu jámasïndia ka í ma ambesti enga jimbo xáni no sési jánhaskuarhini jaka 1914 uératini (Jaŋaskuecha 12:7, 9).

Nájkiruka parhakpinirhu sánhani arhini jaka sánderu no sési jánhaskuarhini, Jesusi enga jindeka Rei, Tata Diosïri Reinurhu, ambakiti ambe úxati kʼuiripuni jimbo. Ima orhejtsïkuxati aianhpikuani enga uandapka eska úkuarhipiringa interu parhakpinirhu, ka enga uánikua kʼuiripuechani jarhuataakia paraksï míteani Bibliaeri konsejuechani ka úni ambe engaksï jorhenguarhijka (Isaías 2:2-4). Íksï kʼuiripuecha jorhenguarhisti néna tsípikua jingoni irekani familiarhu ka paraksï no sánderu jukaparharani ánchikuarhitani ni jatsikuarhekua ambe imecheri irekuarhu. Biblia jarhuataasïndi paraksï sánderu sési irekani ka paraksï xásï kʼuiripueni eska Tata Diosï na járhati uéajka imeri Reinurhu.

Nájkiruka Jesusi juramuni jakaia jini auandarhu, kʼuiripuechaksï útasï juramuxati ixú Echerirhu. Peru Tata Diosï arhispti Jesusini: “Ní juramuni nani engaksï chíti ikiatspiticha jaka” (Salmo 110:2). No ióni jimbo, Jesusi kʼamajkuauati iámindu imeri ikiatspitichani ka ístu imani ambe enga uandanhiataajka kʼuiripuechani engaksï uéjka kurhajchani Tata Diosïni.

Imani tiempu jimbo, Tata Diosïri Reinu arini ambe uáti:

• Kʼamajkuauati relijioni no jurhimbitichani. Biblia terukutantaasïndi iámindu relijioni no jurhimbitichani uarhiiti ísku jándi ma jingoni enga no ióni jimbo kʼamajkunhaaka. Ísï jimbo, nóteruksï jauatia relijionicha engaksï chkuanderakua ambe jorhentpijka Tata Diosïri ambe ka engaksï újka eskaksï kʼuiripuecha kómu nitamakuarhiaka. Uánikua kʼuiripuechaksï ísku pakaraati engaksï iámindu relijionicha kʼamajkunhaaka (Jaŋaskuecha 17:15, 16).

• Kʼamajkuauati parhakpini anapu juramutichani. Tata Diosïri Reinu kʼamajkuauati iámindu parhakpini anapu juramukuechani (Jaŋaskuecha 19:15, 17, 18).

• Kʼamajkuati kʼuiripu no sési úrini. ¿Ambe úkuarhia imecha jingoni engaksï tsitijka no sési jásï ambe úni ka méntkuksï no uékani kurhajchani Tata Diosïni? “No sési úrichaksï kʼamajkunhaati” echerirhu (Proverbios 2:22).

• Kʼamajkuati Satanasini ka demoniuechani. Íchaksï nóteru uátia támisï jánhastaani kʼuiripuechani (Jaŋaskuecha 20:3, 10).

¿Ka ambe úkuarhia imani kʼuiripuecha jingoni engaksï uékaaka irekani jiáni enga Tata Diosïri Reinu juramuni jauakia?

Auandarhu uératini, tata Jesukristu uánikua ambe uáti úni eska náki uéjki parhakpini anapu juramuti ma. Ístuksï jarhuataati 144,000 reicha engaksï echerirhu erakukateka (Jaŋaskuecha 5:9, 10; 14:1, 3). Uáti eska ixú Echerirhu úkuarhiaka ambe enga Tata Diosï uéjka. ¿Ambe uá Tata Diosïri Reinu kʼuiripuni jimbo?

• Kénditauati pʼamenchakuechani ka uarhikuani. “No nema enga jima irekaaka uandaati: ‘Pʼamenchaxaka’” ka “nóteru jauatia uarhikua” (Isaías 33:24; Jaŋaskuecha 21:4).

• Uáti eska pínandikua jauaka ka eska no nema chétapu jingoni irekaaka. “Chíti sapiichaksï kánikua pínandikua jatsiati” ka “mándani kʼuiripuechaksï uaxandukuati jima enga ubasï jukajka ka jima enga jigusï jukajka, ka no nema chérauati” (Isaías 54:13; Miqueas 4:4).

• Ambakiti ánchikuarhita íntspiati. “Juchiti erakukatechaksï marhuataati ambe engaksï uáka imecheri jájkicha jingoni. Nóksï ísku xáni ánchikuarhiati” (Isaías 65:22, 23).

• Uáti eska iámu echeri limpiu jauaka. “Desiertu ka echeri kʼarhiri kánikuaksï tsípini jauati, ka pákua enga no ma ambe újka tsikini, tsípini jauati ka ísï tsïpaati komueska asafrani” (Isaías 35:1).

• Jorhendani kʼuiripuni ambe enga jatsika para úni para méntkisï irekani. “I jindesti tsípikua para méntkisï, eskaksïni míteaka tʼun[guini] engari tʼujku jindeeka Diosï engari sési jimboeka, ka ístu Jesukristuni engari tʼu axaka” (Juanu 17:3).

Tata Diosï uékasïndi eskajtsï cha jatsiauaka ini kóntperatechani (Isaías 48:18). Máteru pájina jimbo, exeakajtsï ambe engajtsï uáka úni iásï parajtsï sánderu orhepani úni jatsini indeni xáni ambakiti ambe.