¿Andichisï uétarhinchajki Tata Diosïri Reinuni?
Enga kʼuiripu uénaka irekani, juchari Kuerajpiri enga Jeoba arhinhajka, imajkusï jindepti juramuti ka uékperakua jingoni juramusïrendi. Ísï jimbo, sési jásï lugari ma úspti para kʼuiripuecha, jardini de Edeni, nani enga kánikua tʼirekua ambe japka. Ístu, ambakiti ánchikuarhita ma íntsaaspti (Génesis 1:28, 29; 2:8, 15). Engachi jurajkupiringa eskajtsïni útasï Tata Diosï juramuchini japiringa, kʼuiripuechachi seguirini japiringa pínandikua jingoni irekani.
Adani ka Eba, nóksï uékaspti eska Tata Diosï juramukuapiringa.
Biblia uandasïndi eska ánjeli ma enga no kurhandirapka —Satanasi enga jindeka Noambakiti— uandaspka eskajtsïni Tata Diosï no jatsiska para juramuchini. Ini ambe jingoni arhikuekaspti eskachi sánderu tsípikua jingoni irekapiringa engajtsïni Tata Diosï no juramuchipiringa. Peru xáni no sési enga Adani ka Eba, primeru kʼuiripuecha engaksï uénapka irekani, kasu úkupka ka nóteruksï uékania Tata Diosïni kurhajchani (Génesis 3:1-6; Jaŋaskuecha [o Apocalipsis] 12:9).
Engaksï Adani ka Eba nóteru uékapkia kurhajchani Tata Diosïni ka nóksï jiókuarhini para ima juramukuani, nóteruksï úsptia Paraisurhu jarhani níteruksï úni irekani para méntkisï no ma pʼamenchakua jingoni (Génesis 3:17-19). Imani ambe jimbo engaksï imecha úpka, ístu no sési nikuaspti imecheri uájpechani engaksï tátsekua kánguarhiapka. Biblia uandasïndi eska Adaniri kʼamanharhintskua jimbo, pekadu jurhaska “parhakpinirhu máechakua kʼuiripuni jimbo ka pekaduni jimbo uarhikua” (Roma 5:12). Ka i ambe ústi eska jauaka máteru uandanhiata: “Kʼuiripu juramukusïndi máteru kʼuiripuni solu para no sési ambe úkuni” (Eclesiastés 8:9). Máteru uandakuecha jimbo, enga kʼuiripu juramujka iápurisï jarhasïndi uandanhiata ambe.
KʼUIRIPU UÉNASÏNDI JURAMUNI
Nemrodi no uékaspti kurhajchani Jeobani.
Primeru acheeti enga Biblia uandajka eska juramukuaspti máteruechani, jindespti Nemrodi ka ima no uékaspti kurhajchani Jeobani. Jiáni uératini, uánikua kʼuiripuechaksï no sési úraxati juramukuani engaksï jatsika. Ísï jimbo, ma tresi mili uéxurhini ísïstia enga rei Salomoni ini ambe karaka: “Exespka imecheri uekua engaksï no sési kánhajka, ka no nema jarhaspti enga sési pikuastantaapiringa. Juramukuaksï jatsispti imecha engaksï no sési káuenga máteruechani” (Eclesiastés 4:1).
Iásïchi májkueni nitamakuarhixaka. Uéxurhini 2009 jimbo, Naciones Unidas uandaspti eskaksï sánderu uánikua kʼuiripuecha eratsesïnga eskachi no sési nitamakuarhixaka jimbokaksï juramuticha no úsïnga sési juramuni.
UÉTARHISÏNDI ESKA NEMA UÁKA AMBE MA
Uétarhisïndi eskaksï parhakpinirhu ambakiti juramuticha jauaka ka eskaksï sési juramuaka. Ka i ambesti enga juchari Kuerajpiri aiatspejka.
Na uéjki xáni ambakiti juramuti ma jarhani, no úsïndi sési péntani kʼuiripuecheri uandanhiatechani.
Tata Diosï, Reinu ma uaxastasti, juramukua ma enga kénditauaka iámindu parhakpini anapu juramutichani “ka imajkusï jauati para méntkisï” (Daniel 2:44). I jindesti Reinu engaksï xáni uáni kʼuiripuecha kurhajkuarhijka padrenuestru jimbo (Mateu 6:9, 10). Peru no Tata Diosï Reiuati indeni Reinurhu, sino erakusti nemani enga niárapka irekani komueska kʼuiripu ma. ¿Néni erakuski?
Jamberijtsï ístu uéjka ini ambe míteni
KURHAMARHIKUECHA ENGA BIBLIA MÓKUANTAAJKA
¿Tata Diosïri Reinu jindeeski ambe ma engachi mintsitarhu pájka?
Máruksï Biblieri traduksionicha arhisïndi: ʻTata Diosïri Juramukua chánksïni jingoni jarhastiaʼ. ¿Ambeksï arhikuekasïni i uandakuecha?
