No ióni jimbo, nitamakuarhiakachi májkueni jásï ambe komueska kʼéri janikua ma. Jesusi arhiraspti “kʼéri mískuarhita” (Mateu 24:21). Ka nájkirukachi no uáka sïpakuarhikuni ini mískuarhitani, ambe engachi kʼóru uáka úni jindesti jirinhani nani kuájchakukuarhini. ¿Ambechi jatsiski para úni?

Enga Jesusi juátarhu arhijtsïkpipka, arini ambe juramuspti: “Enga sánderu uétarhijka jindesti eskajtsï jirinhaaka [o orheta peerani] Diosïri juramukueri ambe ka para jámani eska ima na jaiapanhintajka” (Mateu 6:33). ¿Ambe arhikuekasïni i ambe?

Orheta peerani Tata Diosïri juramukueri ambe. I ambe arhikuekasïndi eskachi jatsiska para sánderu jukaparharani Tata Diosïri Reinueri ambe ka eska ambe uéjkini (Mateu 6:25, 32, 33). ¿Andichisï jatsi para ísï eratseni? Jimbokachi kʼuiripuecha no úsïnga sési péntani uandanhiata ambe enga parhakpinirhu jaka. Tata Diosïjkusï uáti sési péntani iámu ambe.

Jámani eska ima na jaiapanhintajka. I ambe arhikuekasïndi eskachi jatsiska para jánguarhintani kurhajchaani Tata Diosïri konsejuechani ka úni ambe engajtsïni juramuchijka. ¿Andi? Jimboka engachi jandiajku erakuska ambe sésiski ka ambe nómbe, no sésijtsïni nicheati imani ambe jimbo engachi jucha erakuaka úni (Proverbios 16:25). Peru engachi úska ambe engajtsïni Jeoba juramuchijka, uákachi eska ima sési pʼikuarheraaka ka ístujtsïni sési nicheati juchantsïni (Isaías 48:17, 18).

¿Andisï Jesusi uandapi eskachi jatsiska para orheta peerani “Diosïri juramukueri ambe ka para jámani eska ima na jaiapanhintajka”? Jimboka ima  uandaspka eskaksï máru úpiringa eratseni eska kánikua tumina andani uáka eskaksï kuájchakukata jauaka. Máteruechaksï jukari uandanhiapirindi pauani pauani anapu ambe jimbo ka nóksï tiempu jatsini para Tata Diosïri Reinueri ambe úni (Mateu 6:19-21, 25-32).

Peru Jesusi uandaspti eska iámindu imecha engaksï Tata Diosïri Reinu jingoni kuenta úkuarhijka, nóksï ambe ma kueratanchaaka iásï, ka eskaksï sánderu orhepani uánikua kóntperatechani intsïnhauaka (Mateu 6:33).

Nájkirukaksï Jesusiri chúxapaticha orheta peerapka Tata Diosïri Reinueri ambe ka ísïksï jámani eska ima na jaiapanhintajka, útasï jarhaspti kómu nitamakua ambe. Peruksï imecha úspti kuájchakukuarhini. ¿Néna?

Engaksï úpka ambe enga Tata Diosï juramujka, nóksï jatsiaspti imani uandanhiatechani engaksï jatsiapka imecha engaksï no kurhajchenga Jeobani. Ka jimbokaksï xáni mintsikenga eska Tata Diosïri Reinu jupiringa, inde ambe jarhuataaspti paraksï orhepani uérakuani kʼérati uandanhiatechani. Ka ístu Tata Diosï íntsaaspti “uinhapikua enga xáni kʼéri ambeka” parakaksï úpiringa tekaantani (2 Korintu 4:7-9).

Primeru siglurhu anapu kristianuechaksï orheta peeraspti Tata Diosïri Reinueri ambe ísï eska Jesusi na juramupka. Aianhpesptiksï ambakiti aianhperakuani Tata Diosïri Reinueri ambe jimesïsï engaksï imecha irekapka (Kolosasi 1:23). ¿Jaki nema iásï enga májkueni úni jaka?

¡Jo! Jeobaeri testiguechaksï mítesti eska nóteru ióni kuerataxakaia para Tata Diosïri Reinu kʼamajkuni ambe enga iásï úkuarhini jaka parhakpinirhu. Ísï jimbo, jánguarhintaxatiksï arini ambe úni enga Jesusi uandaka: “I ambakiti aianhperakua Diosïri juramukueri, aianhpinhaati iápuru parhakpinirhu paraka iápuru anapu kʼuiripuecha mítetinksï jauaka, ka jimajkani kʼamaraati i tiempu” (Mateu 24:14).

¿Ambejtsï uá cha engajtsï kurhauaka ini ambakiti aianhperakuani? Pʼímarhisïngaksïni parajtsï májkueni úni eskaksï primeru siglurhu anapu kʼuiripuecha engaksï Berea irekapka jini Masedonia. Engaksï kurhaapka ambakiti aianhperakua Reinueri ambe, tsípikua jingonksï jiókuarhispti ambe enga apostuli Pablu aianguapka ka jirinhantasptiksï Tata “Diosïri Karakatecharhu” paraksï sési míteni sini ísïspi ambe engaksï kurhaapka ka sóntkuksï úspti ambe engaksï jorhenguarhipka (Ukuecha 17:11, 12).

Chájtujtsï uáka májkueni úni. Engajtsï orheta peeraska Tata Diosïri Reinueri ambe ka ísï jámani eska ima na jaiapanhintajka, kuájchakukatajtsï jauaka ini tiempu jimbo, ka sánderu orhepani pínandikua jingontsï irekaaka para méntkisï ka nóteru chétapu jingonia.