Jesusi uandaspti: “Ma nasioni anapuecha uarhiperaati máteru nasioni anapuechani jingoni, ka ístu ma juramukuarhu anapuecha máteru juramukuarhu anapuechani jingoni. Ka kʼérati jencheati, ka uápuru jauati kʼarhingua ka pʼamenchakua” (Lukasʌ 21:10, 11). Enga iámindu i ambe májku tiempu jimbo úkuarhini japiringa, arhikuekapirindi eska Tata Diosïri Reinu axuterku japiringuia. ¿Exesïnchi eska úkuarhixaki i ambe interu parhakpinirhu? Ju je exeni máru ambe.

1. KʼÉRI UARHIPERAKUA AMBE

Uéxurhini 1914 jimbo, kʼéri uarhiperakua ma úkuarhispti enga no méni úkuarhini japka. Imecha engaksï istorieri ambe exejka, uandasïndiksï eska indeni uéxurhini jimbo sánderu no sési jánhaskuarhispka jimboka jiáni úkuarhispka primera kʼéri uarhiperakua enga xáni no sési úkuapka interu parhakpini anapuechani. Ini kʼéri uarhiperakua jimboksï úraaspti tankichani, bombechani, metraietechani, gasi enga uandikpijka ka uánikua máteru ambe enga no méni úrakuarhini japka. Tátsekua, enga úkuarhipka Segunda Kʼéri uarhiperakua Interu Parhakpinirhu, úraasptiksï sánderu kʼérati bombechani (bombas atómicas). Desde 1914 uératini, uánikua guerrechaksï úkuarhixati uápurisï ka ini ambe jimbo, uánikua kʼuiripuechaksï uarhixati.

2. KʼÉRATI JENCHENI

Encyclopedia Britannica uandasïndi eska mándani uéxurhini, úkuarhisïngaksï ma sieni kʼérati jenchekuecha. Ístu, Servicio Geológico Estados Unidos anapu, uandasïndi eska uéxurhini 1900 uératini, mándani uéxurhini diesiseisi kʼérati jenchekuechaksï úkuarhisïnga. Máruksï úpirindi eratseni eska ísï xarharasïnga enajkiksï sánderu uánikua úkuarhijkia, jimbokaksï úsïnga míteni na jatini jenchesïni. Enga ísïka o nómbe, uánikua kʼuiripu niárasïndi kómu nitamakuarhini ka uarhini enga ísï xáni kʼéri jenchejka.

 3. KʼARHINGUA

Niárasïndi kʼarhingua jarhani uarhiperakua ambe jimbo, juramuticha jimbo engaksï no jurhimbitku jámajka, jimbokaksï no iáminduecha jatsisïnga tumina, ka jimboka niárasïnga ambendurhikuarhini ambe enga ikaranhajka. Programa Mundial de Alimentos uandaspti: “Interu parhakpinirhu, 821 miioni kʼuiripuechaksï no jatsisïndi ambe jingoni tʼireni ka 124 miioni i kʼuiripuecheri, uátiksï uarhini” (2018 Year in Review). Mándani uéxurhini, 3,1 miioni sapiichaksï niárasïndi uarhini jimbokaksï no sési tʼiresïnga. Interu parhakpinirhu, iámindu sapiicheri engaksï 2011 jimbo uarhika, sáno terujkani inde sapiicheri, uarhistiksï jimbokaksï no sési tʼiresïrenga.

4. KʼÉRATI PʼAMENCHAKUECHA

Organización Mundial de la Salud, uandasïndi: “Ini últimu beinte uéxurhini jimbo, uánikua kʼérati pʼamenchakuechaksï niárasti jarhani. Máru pʼamenchakuecha engaksï ióntki japka, komu kolera, peste ka fiebre amarilla, ménderuksï xarhantastia ka ístuksï jarhasti máteru jimbanhicha komu síndrome respiratorio agudo grave, gripe pandémica, síndrome respiratorio de Oriente Medio, ébola ka zika”. Ka sánderu jimbanhi pʼamenchakua enga jaka jindeesti COVID-19. Nájkirukaksï sientifikuecha ka doktoricha jánguarhintani jaka exeni ambe jimboksï úkuarhisïni i pʼamenchakuecha, nóksï úxati exentani náki sïpiata jingonksï uá ambakerpintani.

5. INTERU PARHAKPINIRHU AIANHPINHAXATI TATA DIOSÏRI REINUERI AMBE

Ístu, Jesusi uandaspti máteru ambe enga úkuarhipiringa: “I ambakiti aianhperakua Diosïri juramukueri, aianhpinhaati iápuru parhakpinirhu paraka iápuru anapu kʼuiripuecha mítetinksï jauaka, ka jimajkani kʼamaraati i tiempu” (Mateu 24:14). Nájkiruka xáni uánikua uandanhiata ambe jaka parhakpinirhu, jukari ochu miioni kʼuiripuechaksï interu parhakpinirhu anapuecha, aianhpixatiksï ambakiti aianhperakua Tata Diosïri Reinueri ambe, 240 paisicha ka territoriuecha jimbo ka jukari mili idiomecha jimbo. No méni úkuarhixapti i jásï ambe.

Iámindu ambe enga Jesusi uandapka, iásï úkuarhixati. ¿Andisï jukaparhakue i ambe para jucha? Ju je miántani ambe enga Jesusi uandapka: “Engajtsï exeaka eska úkuarhini jauakia i ambe, míti je eska Diosïri juramukua janoxamkia” (Lukasʌ 21:31).

Ima mínda enga Jesusi uandapka ka na enga Biblia uandajka eska úkuarhipapiringa ambe ma, xarhatasïndiksï eska Tata Diosï, 1914 jimbo uaxastaska imeri Reinuni jini auandarhu. a Indeni uéxurhini jimbo, Rei ústi imeri Uájpani, Jesukristuni (Salmo 2:2, 4, 6-9). No ióni jimbo, Tata Diosïri Reinu juramuatia Echerirhu, kʼamajkuauati iámindu kʼuiripuecheri juramukuechani ka uáti eska iámindu Echeri paraisu máeuaka nani engachi irekaaka para méntkisï.

No ióni jimbo niáraati úkuarhini ambe engajtsïni Jesusi jorhendapka kurhajkuarhini padrenuestru jimbo: “Jaue ixú parhakpinirhu chíti juramukua. Úkuarhie eska tʼu na uékajka ixú parhakpinirhu, májku jásï eska na úkuarhijka auandarhu” (Mateu 6:10). ¿Peru ambe xáni úskia inde Reinu, 1914 uératini? ¿Ka ambe uá jiáni enga interu parhakpini jimbo juramuni jauakia?