• Tata Diosï erakupirindi. “Jísïni peeraka juchiti reini [...,] jíkini kʼérati iretechani íntsauaka paraksï chíti erensieni ka chítiuati nani enga jamberi parhakpini kʼamarajka” (Salmo 2:6, 8).

• Rei Dabidiri kʼéri uaxantskua intsïnhapirindi. ‘Sapi ma andajpenusti’, “sapinchi ma intsïnhaska [...]. Imeri juramukua ka pínandikua nóksï nani kʼamaraati Dabidiri kʼéri uaxantskuarhu ka imeri juramukuarhu, para sési uaxastanhani” (Isaías 9:6, 7).

• Beleni andajpenupirindi. “Tʼunguini jimbo, Beleni [...], tʼurini íntskuaka imani enga niáraaka [...] juramutini”, ‘ima kʼéri ambeuati asta nani enga jamberi parhakpini kʼamarajka’ (Miqueas 5:2, 4).

• Nóksï jiókuarhipirindi ka uandikunksï. “No xénchanhaspti ka ísïchi exespka enajki no ma ambe jukaparhapi [...], pʼorhonhastiksï juchari kʼamanharhintskuecha jimbo; no sési kánhasti juchari no sési úkuecha jimbo” (Isaías 53:3, 5).

• Tsíntapirindi ka niárapirindi kʼéri ambeeni. Norini “jurajkuaka Tumbarhu. Nori jurajkuaka eska chíti ambakiti jántspiri exeaka posuni [...]; chíti jurhijkandani jimbo tsípikuarhita jauati para méntkisï” (Salmo 16:10, 11).

Iámindu i ambe Jesusi jingontkusï terukuntajti. Ánjeli ma arhispti imeri amamba Mariani: “Tata Diosï íntskuati Dabidiri juramukuani enga jindeka imeri táti jemba [...]. Ka imeri juramukua no méni kʼamaraati” (Lukasʌ 1:31-33).

Jesusi no méni juramuspti jiáni enga Echerirhu japka. Peru auandarhu uératini juramukuauati kʼuiripuechani komueska Rei, Tata Diosïri Reinueri. ¿Andisï ima jindee sánderu ambakiti Rei? Ju je exeni ambe enga xáni úpka jiáni enga Echerirhu japka.

•   Jesusi pendienti jarhaspti kʼuiripuecha jimbo. Jarhuataaspti acheetichani ka uarhiitichani, sapirhatkuechani ka jatirichani. No exesïrendi nani engaksï anapuepka ni imecheri jatsikuarhikua ambe (Mateu 9:36; Markusʌ 10:16). Enga kʼuiripu ma enga lepra pʼamenchani japka, arhipka: “Engari tʼu uékajka, uákarini ambakerantani”, Jesusi kánikua pʼamojkuspti ka ambakerantaspti (Markusʌ 1:40-42).

• Jesusijtsïni jorhendasti ambe engachi jatsika para úni parachi jaiapanherantani Tata Diosïni. Ima uandaspti: “Nójtsï uáka marhuakuni Diosïni ka jatsikuarhikuani”. Ístu uadaspti eskachi jatsiska para ísï kaani máteruechani eskachi na uékapiringa eskajtsïni kámapiringa. Ístujtsïni jorhendasti eska Tata Diosï no solu pendienti jarhasïnga imani ambe jimbo engachi újka, sino ístu ambe engachi eratsejka ka pʼikuarherani. Ísï jimbo, parachi úni Tata Diosïni jaiapanherantani, jatsiskachi para jingontku jámani imani ambe jingoni engachi mintsitarhu pʼikuarhinhejka (Mateu 5:28; 6:24; 7:12). Jesusi uandaspti eska parachi sési jimbo tsípikua jingoni irekani, jatsiskachi para míteni ambe enga Tata Diosï uéjka eskachi uáka ka ísï úni (Lukasʌ 11:28).

• Jesusijtsïni jorhendasti ambe enga arhikuekajka xénchpeni. Ambe enga Jesusi uandenga ka úni, mintsitarhu niárakuasïrendi kʼuiripuechani. Biblia arhisïndi: “Kʼuiripuecha eratsenksï pakaraspti imeri jorhengua jimbo, jimboka ima ísï jorhendaasïrenga komueska ma enga kánikua juramukua jatsijka” (Mateu 7:28, 29). Por ejemplu, juramukuaspti: “Uéa je chári ikiatspitichani”. Ka ima mismu kómarhijpikuaspti imechani engaksï uanditarkuarhipka: “Táti, puákuanta jimbokaksï no míteska ambe engaksï úni jaka” (Mateu 5:44; Lukasʌ 23:34).

Jesusi jindesti sánderu ambakiti juramuti. Sési mítestia úni iámindu ambe, xénchasïndijtsïni ka uékasïndijtsïni jarhuatani. Peru, ¿na jatini uénaa juramuni?