¿Eranhaskasïntsï nénachi irekapirini enga Jurhiata no japiringa? Jurhiatani jimbo, anhatapuechaksï úsïndi chkurhi jukani, tsïpani, fruta jukani ka semiia ambe. Ístu, úsïndi eskaksï anhatapuecheri sïrangua itsï antsitaaka para chkurhicha ka jima uératini suánda úkuarhintasïndi.

Janikua, ambakiti intsïmperakua máesti Tata Diosïri. Janikua úsïndi eska echerirhu andaraaka akua ambe. Tata Diosï úsïndi eska janiaka, eskachi kánikua pʼikuntaaka ambe ma ka eskachi kánikua tʼirekua jatsiaka, ka úsïndi eskachi sési pʼikuarheraaka.

Uánikua tátichaksï jánguarhintasïndi paraksï imecheri familiecha jatsini tʼirekua ka xukuparhakua. Biblia uandasïndi: “Exea je pájaruechani. Nóksï trigu jatsikusïndi ka niksï uarhotani, ka niksï tántani ambe paraksï patsakuarhini, peru chári Táti auandarhu anapu tʼireraasïndi. Ka ¿nójtsï iauani sánderu jukaparhaski cha ka eska imecha?” (Mateu 6:25, 26).

“Exea je tsïtsïkichani na engaksï xáni sési járhati kʼuiripijka [...], peru jíksïni sési jimbo arhisïnga eska [jánhaskati rei] Salomoni nájkiruka xáni jatsikuarhiripka, no méni úspka xáni sési jásï xukuparhani eska ima tsïtsïkicha. Ka enga Diosï xáni sési jájkuantajka tsïtsïkichani engaksï iásï kampurisï tsïparini jaka [...,] ¿na xáni sánderuksïni sési xukutantaa chánksïni?” (Lukasʌ 12:27, 28).

Ísï eskajtsïni Tata Diosï na íntskujka tʼirekua ka xukuparhakua, ístujtsïni úsïndi jarhuatani parachi jatsini máteru ambe engachi uétarhinchajka. Engachi jánguarhintajka úni ambe enga Tata Diosï uéjka, imajtsïni újchakurasïndi parachi tʼirekua jatsini, ojtsïni jarhuatasïndi parachi ánchikuarhita ma jatsini parachi piáni ambe engachi uétarhinchajka (Mateu 6:32, 33).

Engachi exejka Jurhiatani, janikuani, pájaruechani ka tsïtsïkichani, ¿a no eska inde ambe úsïnga eskachi xénchaaka Tata Diosïni? Máteru jorhenguarhikua jimbochi exeaka ambe úrasïni juchari Kuerajpiri para arhiani ambe ma kʼuiripuechani.