¿Mójtakurhiski ambe ma Tata Diosïri Karakatarhu?
Máru kʼuiripuechaksï kurhamarhikuarhisïni sini máru ambe mójtakurhiski Tata Diosïri Karakatarhu. Profeta Isaiasi uandaspti eska ‘Tata Diosïri Karakata méntkisï jauaka’ (Isaías 40:8). ¿Nénachi uá seguru jarhani eska no mójtakurhiska ambe enga Tata Diosï aiatspeka?
Imeri uinhapikua jingoni, Tata Diosï úsïndi kuájpini imeri Karakatani para no nema mójtakuni. Ióntki, engaksï kʼuiripuecha jájki jimbo kopiariuenga pímbinharhati karakatechani, miiuasïrendiksï letrechani paraksï no jukari jatsikuni ambe ma, mójtakuni o pʼikuntani ambe ma. Peru jimbokachi kʼamanharhintstiska, máru kʼuiripuecha engaksï kopiechani uénga, máru ambejkuksïsï no sési karapti peruksï no mójtakuspti ambe enga ima tekstu arhikuekenga.
¿ANDICHISÏ UÁ SEGURU JARHANI ESKA TATA DIOSÏRI KARAKATARHU UANDASÏNGA AMBE ENGA IMA KARARKUARHIPKA IÓNTKI?
Jarhastiksï uánikua kopiecha ióntki anapu Bibliaeri karakatecheri. Enga kopia ma jimbo exenhantajka sapichitu ambe enga no terukuntajka, terukutanhantasïndi máteru kopiecha jingoni para exenhani sini no sési karakata jarhaski (engajtsï uéjka sánderu ambe míteni, exe je jw.org ka arhinta je jorhenguarhikuani “¿Se ha cambiado o manipulado la Biblia?”).
Por ejemplu, ju je eratseni máru ióntki anapu karakatechani engaksï ísï mítekateka komu Rollos del mar Muerto engaksï exeantapka máru árabecha 1947 jimbo, imani kuebecharhu engaksï mari Muerto ísï no iauani jaka. Íksï ióntki anapu karakatecha, jindesti ma parti Tata Diosïri Karakateri engaksï jukari dosi mili uéxurhinisï karanhaka. Jorhenatichaksï terukutantaaspti ini roiiuechani iásï anapu Biblia jingoni, ka ¿ambeksï exentaspi?
Íksï jorhenaticha exespti eska májkueniska iásï anapu Tata Diosïri Karakata engachi jatsika imani karakata jingoni enga uénakuarhu karanhapka. * I ambe xarhatasïndi eska ambe engachi iásï arhintajka Tata Diosïri Karakatarhu, sési jimbo jindeska ambe enga ima kararkuarhipka ióntki. Ísïsti, Tata Diosï ústi eska imeri Karakata iásï jamberi májkueni ambe uandaaka eska ióntki.
Ísï jimbo, uákachi mintsikani eska ísïska ambe engachi arhintajka Tata Diosïri Karakatarhu. Ini ambe míteparini, ju je exeni ambejtsïni jorhendasïni profetecha Tata Diosïri ambe.
^ párr. 7 Geza Vermes: The Complete Dead Sea Scrolls in English, p. 16.
Jamberijtsï ístu uéjka ini ambe míteni
AIANHPIRI
Biblia útasï jarhasti nájkirukaksï uékapka mójtakuni ambe enga uandajka
Máru kʼuiripuechaksï uékasïreendi mójtakuni ambe enga Biblia uandajka. ¿Andiksïsï no úpi ísï úni?
JUKAPARHAKUA AMBE ENGA BIBLIA JORHENTPIJKA
¿Jurhimbitku uandasïni Biblia?
Enga Bibliani Tata Diosï kararkuarhika, jiájkani i jatsisti para no májkuenini eska máteru libruecha.
DOCUMENTARIES
Kánikuaksï jukaparharaspti Bibliani (ma parti William Tyndale)
Ambe enga úka, xarhatasïndi eska kánikua jukaparharasïreenga Bibliani. Iásï jamberijtsïni seguirixati marhuacheni ambe enga ima úka.
