Iáminduechachi ma kʼuiripueri uájpeska enga jindeka Adani. I ambe arhikuekasïndi eskachi kʼéri familia máeska. Nájkiruka familia ma jimbo iáminduechaksï jatsipiringa para uékperani, sési jimbo, ini parhakpinirhu nóksï iáminduecha xénchperasïndi. Peru Tata Diosï no uékasïndi eskachi no xénchperaaka.

Xéncha máteru kʼuiripuni ísï eskari tʼu mismu na xénchakuarhijka (LEVÍTICO 19:18).

“Uéa je chári ikiatspitichani” (MATEU 5:44).

Exe je ambe enga uandajka Tata Diosï Karakata uékperakueri ambe, ixú 1 Korintu 13:4-7 jimbo.

“Ima enga uékpijka, tekaantasïndi ka sési útspini”.

Eratsi je ini ambe. ¿Nénajtsï pʼikuarherasïni enga nema tekaantstijka, sési kámpini ka no ikiani jiáni engajtsï cha no sési ambe újka?

Ima enga uékpijka, “no enbidiarpisïndi”.

Eratsi je ini ambe. ¿Nénajtsï pʼikuarherasïni cha engaksïni nema no mintsikajka oksïni enbidiarini?

Ima enga uékpijka, “no uékasïndi imeri ambejku”.

Eratsi je ini ambe. ¿Nénajtsï pʼikuarherasïni enga nema janhanharhijka ambe engajtsï cha uandajka ka no afuersa uékani eska úkuarhiaka ambe enga ima uéjka?

Ima enga uékpijka, no “pakarasïndi ikiatspini [o jatanhitspini]”.

Eratsi je ini ambe. Tata Diosï listu jarhasïndi para puákuantaani imechani engaksï moantajka. “No méntku jarhasïndi no sési ambe exetspini ka ni ióni jarhani ikiani” (Salmo 103:9). Kánikuachi jukaparharasïnga engajtsïni puáchintajka ima engachi no sési pʼikuastapka. Ísï jimbo, juchachi jatsiska para puákuantaani imechani engajtsïni no sési pʼikuastajka (Salmo 86:5).

“Ima enga uékpijka, no tsípisïndi enga nema no sési újka [o no sési ambe nitamakuarhini]”.

Eratsi je ini ambe. Engachi no sési ambe nitamakuarhijka, nóchi jaiapanhintasïnga engaksï máteruecha tsípijka indeni ambe jimbo. Ísï jimbo, nóchi tsípisïnga engaksï máteruecha kómu nitamakuarhijka nájkirukajtsïni imecha niárapka no sési kámani.

Engachi uéjka eskajtsïni Tata Diosï újchakuraaka, jatsiskachi para xénchaani máteruechani no arhiparini na engaksï xáni jatirika, nani engaksï anapueka oksï máteru relijiorhu jarhani.