¿Kurhauasïni Tata Diosï juchari kómarhikuechani?
¿Ménisïjtsï kurhamarhikuarhiski sini Tata Diosï kurhauajki chári kómarhikuechani? Enga ísïka, nójtsï chájkueska. Uánikua kʼuiripuechaksï kurhakusïndi Tata Diosïni eska jarhuatauaka jiáni engaksï uandanhiatechani jatsiajka. Joperu, imecheri uandanhiatechaksï no kéndikusïndi. ¿Arhikuekasïni i ambe eska Tata Diosï no kurhauasïnga juchari kómarhikuechani? Nómbe. Bibliajtsïni arhisïndi eska kurhauasïnga engachi ísï kómarhijka eska ima na jaiapanhentajka. Ju je exeni ambe enga arhijka.
TATA DIOSÏJTSÏNI MERU KURHAJCHASÏNDI
“Tʼunguini, engari kurhauajka kómarhikuechani, tʼunguini juuati andarherani iámindu jásï kʼuiripuecha” (Salmo 65:2).
Máru kʼuiripuechaksï kómarhikua úsïndi jimbokaksï ísï sési pʼikuarherantasïnga, nájkirukaksï eratsejka eska no nema kurhauasïnga. Joperu kómarhikua sánderu ambesti ka eska para solu sési pʼikuarherantani ka para úni orhepani uérakuani uandanhiatechani. Bibliajtsïni arhisïndi eska “Jeoba * no iauani jarhas[ka] imecha jingoni engaksï kómarhijka, iámindu imecha jingoni engaksï mintsita jingoni kómarhijka [...]; kurhaasïndi engaksï uinhachaparini jarhuajperata kurhajkuarhijka” (Salmo 145:18, 19).
Ísï jimbo, uákachi seguru jarhani eska Jeoba kurhauasïnga kómarhikuechani imecheri engaksï imani kʼéri ambe arhijka. Uékperakua jingoni imajtsïni arhisïndi: “Chájtsïni uandajpaaka, kómarhikua jimbojtsïni andarhieraaka, ka jíksïni kurhajchaaka” (Jeremías 29:12).
TATA DIOSÏ UÉKASÏNDI ESKA CHÁ KÓMARHIAKA
“Méntku jauena je kómarhini” (Roma 12:12).
Bibliajtsïni pʼímarhisïndi parachi méntku kómarhini jarhani iámindu ambe jimbo. Jiájkani, xarharasïndi eska Jeoba uékasïnga eskachi kómarhiaka (Mateu 26:41; Efesu 6:18).
¿Andisï uéjki Tata Diosï eska chá kómarhiaka? Eratsi je arini ambe: táti ma kánikua sési pʼikuarherasïndi enga imeri sapi jarhuajperata kurhakujka. Jamberi táti jémba mítejtia ambe enga imeri sapi uétarhinchajka o pʼikuarherani, joperu enga kurhaajka ambe enga arhijka, táti jémba kuenta íntskukuarhisïndi eska imeri sapi mintsikasïnga ka eska uékasïnga. Májkueni, engachi kómarhijka Jeobani, xarhatakusïngachi eskachi mintsikasïnga ka uékani imani andarhierani (Proverbios 15:8; Santiagu 4:8).
TATA DIOSÏ MERU UANDANHIASÏNDI CHÁNKSÏNI JIMBO
“Jurajkua je iámindu chári pendientichani imani jingoni, jimboka ima pendienti pásïnga chánksïni jimbo” (1 Pedru 5:7).
Tata Diosï uékasïndi eskachi kómarhiaka jimbokajtsïni xénchasïnga ka uandanhiani juchantsïni jimbo. Pendienti jarhasïndi imani ambe jimbo engachi no sési nitamakuarhini jarhajka ka uékasïndijtsïni jarhuatani.
Rei Dabidi méntkisï kurhakuspti Jeobani eska jarhuatapiringa ka aianguspti ambe enga eratsenga ka pʼikuarherani (Salmo 23:1-6). ¿Ambe pʼikuarherasïreni Tata Diosï, Dabidini jimbo? Kánikua xénchasïrendi ka kurhauasïrendi iámindu imeri kómarhikuechani (Ukuecha 13:22). Májkueni, ístujtsïni Tata Diosï kurhajchasïndi jimboka uandanhiasïnga juchantsïni jimbo.
“XÉNCHASÏNGA JEOBANI, JIMBOKA IMA KURHAUASÏNGA JUCHITI UANDAKUECHANI”
Í ambe uandaspti salmueri karari ma. Ima enga ini ambe karapka seguru jarhaspti eska Jeoba kurhauasïrenga imeri kómarhikuechani ka i ambe kánikua jarhuataspti. Sánderu andarhieraspti Jeobani ka inde ambe jarhuataspti para orhepani uérakuani uandanhiatechani (Salmo 116:1-9).
Engachi seguru jaka eskajtsïni Tata Diosï kurhaasïnga, méntkisïchi kómarhiaka. Ju je exeni ambe enga úkuarhinchapka España anapu ma acheeti enga Pedru arhinhajka. Uájpa enga 19 jatiripka karru jingoni aksidentarikuarhispti ka uarhispti. Enga xáni no sési nitamakuarhini japka, Pedru aianguspti Tata Diosïni na enga pʼikuarherenga ka someni kurhakuspti eska sési pʼikuastantapiringa ka jarhuatani. ¿Ambe úkuarhispi? Pedru uandasïndi: “Jeobarini mókuchiantaspti kómarhikuechani. Tata Diosïjtsïni jarhuataspti ka sésijtsïni pʼikuastantani máteru erachichani úrapariani”.
Juchari kómarhikuechaksï uánikua xanhari mókukuarhintasïndi engajtsïni juchari amiguecha sési pʼikuastantajka ka jarhuatani.
Nájkiruka uájpa no tsíntapka, kómarhikuechaksï kánikua jarhuataspti Pedruni ka imeri familiani. Imeri témba María del Carmen miásïndi: “Kómarhikuechajtsïni jarhuataspti parani orhepani uérakuni inde xáni kʼéri uandanhiatani. Mítespka eskarini Jeoba kurhanguchisïrenga, jimboka engani kómarhienga sési pʼikuarherantasïrenga ka pínandikua jatsini”.
Ambe enga Biblia uandajka ka ambe engaksï nitamakuarhikia uánikua kʼuiripuecha, jorhendasïndijtsïni eska Tata Diosï meru kurhauasïnga kómarhikuechani. Nájkiruka ísïka, Tata Diosï no iámindu kómarhikuechani kurhauasïndi. Jiájkani, ¿andisï Tata Diosï mókuantajki máru kómarhikuechani ka máteruechani nómbe?
^ párr. 5 Tata Diosïri nombri jindesti Jeoba (Salmo 83:18).
